Tanggung Jawab Ibas Jabu

(Kolose 3:18-21)

Kata Penaruh

Jabu eme “persadan” simetuana ijadiken Dibata. Jabu eme persadan si kitik menentuken kerina keadaan kegeluhen, erbangsa ras ernegara, ermasyarakat ras ergereja. Adi kerina jabu banci ngaturken anggota jabuna alu mehuli, dingen nggeluh bagi arusna maka lanai lit “kinigutulen” ras kebiaren ibas geluh enda.

Emaka ibas tradisi kalak Yahudi “pendidiken bas jabu” jadi pilar pembentuken bangsa si megegeh. Fungsi jabu lebih asa fungsi sekolah ras gereja ibas nuanken “pemeteh ras prilaku nggeluh”. Adi si baca ibas Ulangen 6:4-9 maka pendidiken si terpenting eme nuanken “kemalangen man Tuhan”, sebab erkemalangen man Tuhan eme ulu kerina pemeteh ra kepentaren (bd. Masmur 111:10; Kuan-kuan 1:7) . Janah kerna sie labo ipercayakenna man pihak lembaga si ngurusi kerohanian, tapi jadi dahin si “penting ibas jabu”, emaka nina “ajarkenlah e alu mulih-ulih, sanga kam kundul-kundul,  sanag kam bas perdalinen, sanga kam medem-medem. Harus iiketkenndu ibas tandnu, ras tamaken e ibas perdempakenndu, tulisken ibas binangun pintu rumahndu ras tiang pintu gerbangndu.

Arah bahan perpulungen jabu-jabunta sendah ipersingeti ka kita uga maka kerina anggota keluarga e banci ndalanken tanggung jawabna, sebab adi kerina anggota keluarga ndalanken tanggung jawabna, lanai kai pe lit si jadi persoalen.

Tanggung Jawab Ibas Jabu

1.       Ndehara (ay. 18)

Tanggung jawabna eme “patuh man perbulangen”. Ijenda banci mis kita si jababen ban moria e, “banci kami patuh adi .... “

Tapi erpalasken Pustaka Si Badia, maka sekalak ndehara harus patuh man perbulangenna sebab perpulangen nge takal ndehara bali ras Kristus takal perpulungen( Epesus 5:23), terdauhen ituriken ibas 1Petrus 3:1”Patuhlah man perbulangen, gelah adi perbulangen “ la tek” nangdangi Kata Dibata, banci ia tek. Ijenda igaris bawahi adi lit perbulangen “la tek man kata Dibata”  ijenda igambarken kepatuhene labo erkiteken perbulangen e enggo “sempurna” tapi justru kepatuhen ijenda gelah maba pertobaten man perbulangen. Alu bage lanai lit si begi istilah “banci aku patuh adi memang  layak ipatuhi adi lang uga pe lah ningen kami patuh”. Ibas kitap Epesus 5:21“patuhlah sekalak man si debanna erkiteken kam mehamat man Kristus”. Jadi kepatuhen e erpalasken “kiniteken” labo erpalasken cocok siakap entah lang.

2.       Perbulangen (ay. 19)

Ngkelengi ndehara ras Ula kasar man bana. Ngkelengi ijenda mbue jenisna. Perbulangen harus engkelengi ndeharana bagi Kristus engkelengi perpulungen. Tanggung jawab perbulangen ijenda eme mereken geluhna “totalitas” guna ndehara bagi Kristus “totalitas” ngendesken geluhna guna perpulungen. Kristus engkelengi perpulungen tersirat arah:

1.       Mere man  (bd. Yoh. 6:35) tanggung sekalak perbapan  bas jabu eme encukupken keperlun kegeluhen.

2.       Mere kenyamanen,  kesejuken ras kepuasen, seh maka lani muas (bd. Yoh. 4:14), kejahaten-kejahaten si terjadi ibas geluh enda erkiteken ndarami kepuasen sebab kerina “muas/haus”. Tanggung jawab sekalak perbapan bas jabu uga maka kerina isi jabu e “puas ras lanai muas”  seha maka kerina isi jabu e lanai terjebak ibas ndarmi kepuasen-kepuasen i darat rumah.

3.       Mereken “terang” (Yoh. 8:12) tanggung jawab perbapan ibas jabu eme  uga maka seisi jabu e la “tertukutuk, la tersesat” ibas ndalani dalan kegeluhen. Terang e pe sekaligus mereken semangat (motivasi) man sisi jabu guna terang ngidah ku masa depan.

4.       Mereken keteladanen nggeluh, gelah ieteh anak jabu e arah dalan siapai si harus idalanina, gelah seh kubas kegeluhen si damai ras senang (bdk. Yohanes 14:6) .

5.       Jadi permakan (bd. Yoh. 10:11)sekalak perbapan terus njagai anak jabuna nggeluh ibas dame ras keriahen (bd. Mas. 23), mabasa ku mbal-mbal, ertina ngelepasken perberkat anak-anak alu pertoton, bage pe ibas karaben wari mabasa mulihi ku karang (ku rumah) je nari adi lit si lalar idarami, iperiksa sada-sada entah lit si terluka, gelah banci itambari ras ibaluti lukana. Ban buena kesibukenta selaku perbapan lanai kap si eteh pe katawari anakta berkat ras mulih kurumah, lanai si eteh entah enggo lit luka (pusuh) sebab adi luka jasmani  uga pe mis ia ngata man banta jenari mis si tambari, tapi luka pusuh si ibahan dosa megati lanai sempat kita nungkuninsa, padahal kematen si meratna labo ban luka jasmani tapi luka pusuh siibahan dosa.

6.       Ngelai ras ngendesken Kesahna (Mat. 20:28) tanggung jawab sekalak perbapan eme “uga maka banci malem ate anak jabuna ras uga maka kerina banci terkelin” arah kata sienda maka sekalak perbapan lanai banci mengorbanken anak jabuna erkiteken “kesenangen pribadina”, harusna kai pe ilakoken gelah jabu e banci terkelin.

3.       Anak (ayat 20)

Megati is begi istilah “anak pe nganaki” encidahken kesetresen  orang tua ibas ngajarken anak.  Ngidah buena anak si lanai terajarken, emaka megati kel ibahan orang-orang tua seminar-seminar pendidiken man anak, seminar “kenakalen-kenakalen anak remaja”, tapi jarang kel si begi seminar “kenakalen orang tua”. Banci jadi erkiteken la kita ngasup ndalanken tanggung jawabta bagi si datas ndai “ndehara pe la patuh man perbulangen, akapna ia rusur kepala e, ia atena rusur ibegiken, la kenca bage berjut, merawa rsd. Perbulanegn pe  la ka totalitas mereken kegeluhenna guna  kemalemen ras keterkelinen jabu, terjebak kubas ndarami kepuasen-kepuasen pribadi, piah dungna  anak pe ndarami kepuasenna saja.

Arah renungenta sendah maka selaku anak harus patuh man orang tua, sebab orang tua me wakil Dibata mereken kegeluhen  man anak, orang tua me wakil Dibata encukupken kerina keperlun anak, jadi wakil Dibata maba anak e kubas keterkelinen. Perlu pe ieteh anak-anak maka labo lit orang tua si ersura-sura encelakaken anakna, emaka adi lit peraturen-peraturen  si ibahan orang tua ula ka akapna e “merampas kemerdekaanna, tapi igejapnalah e sada usaha pendisiplinen ra pembentuken karakterna, ula ka iakap anka-anak adi salah ia irawai enggo menjajah hak azasina.  Sebab adi la kin irawai orang tua nakna si ersalah, isampatina kap meneken anakna e (bdk. 2 samuel 14 “Aku jadi bapana, janah ia jadi anakKu. Sanga ibahanna salah, Kuukum ia bali ras sekalak bapa ngukum anakna; Kuan-kuanen 23 :13-14 “Ola kam biar-biaren ndidik anakndu, adi ipekpekndu ia labo ia mate, tapi selamat”)

 Kesimpulen :

Jabu si ndatken kemalemen ate eme jabu si anggotana kerina nggeluh ibas ndalanken tanggung jawabna.  Ijenda labo perlu si ukuri ise si mberatna tanggung jawabna ras ise si menanhangna tanggung jawabna. Tapi masing-masing harus rukur uga maka kerina naggota keluarga e ndatken kemalemen ate.

Sada anggota kelurga la ndalanken tanggung jawabna maka kerina anggota keluarga e rate mesui (kena imbasna).

Ijenda tempa tanggung jawab perbapan si mbelinna ibas jabu, janah memang kin bage nge arusna, saja man ndehara sebagai mitra perbulangen maba jabu e jadi persembahen si merimna man Tuhan, maka kai ka si isuruh perbulangen maka ia pe harus ka patuh. Alu bage enggo ka mbue turunen patuh ndai, emaka lit kalak si nulisken makalebih kurang lit 40 tanggung jawab ndehara bas jabu. Enggo termasuk tanggung jawab sebagai ndehara ras tanggung jawab sebagai nande (bdk. Kuan-kuanen 31 :10-30)

Pdt Saul Ginting 

RG GBKP Bekasi 

SUPLEMEN BIMBINGAN PA MORIA GBKP

24-30 Juni 2018

(Moria terteki ibas IPTEK)

Siman ogen        : Keluaren 35:30-35

Tema                : Nggit Maju Tapi La Lalar

Tujun                : Gelah Moria ;

-          Ngangkai kepentaren ras IPTEK rehna ibas Dibata nari

-          Ngangkai “dampak” positif ras negatif IPTEK dingen makekensa bagi arusna

Metode PA         : Diskusi

Penaruh

Kerina tinepa Dibata tentu la sepadan adi si bandingken ras kerina sibanci i bahan manusia. Sabab pemeteh siipake manusia guna ngelitken/mencipta reh ibas Dibata nari kap. Manusia e pe Tuhan simpuna. Tuhan me ulu kerinana. Emaka rikutken maksud Tuhan si dem kiniulin, manusia pe iberekenNa gegeh, pemeteh ras kepentaren si banci ipakeken gelah mpekena-kena kegeluhenna i doni enda. Tapi kerina e la banci lepas ibas sura-sura Tuhan, si arusna tetap mabai kiniulin ras jadi pujin man gelar Tuhan si mereken kerinana. Perkembangen IPTEK perlu man banta. E jadi sada tanda maka lit kemajun si banci i pakeken ulihna guna manusia. Tapi ibas sie pe perlu tetap si inget, gelah ula kerna perkembangen IPTEK, kita lalar makekenca.

Isi

Tuhan mereken pemeteh ras kepentaren guna ipakeken man kiniulin manusia. Diperlengkapi bakat, keterampilan dan hikmat untuk melakukan pekerjaan dan pelayanan ku tep-tep jelma. Ku tengah-tengah bangsa Israel, ibereken Tuhan ka sie. Ibas paksa si e atena majekken Kemah si Badia, emaka Tuhan ka si mpegegehisa.

Dibata milih Besalel anak Uri ibas suku Yehuda nari. Idemi me ia alu Kesah Tuhan, mereken bana kepentaren, kengasupen ras pengertin, beluh ndahiken barang-barang emas, pirak ras tembaga bagepe batu permata ras ukiren kayu jadi mejile.Ibereken Tuhan ka man Oholiap anak Ahisamah merga Dan nari, kengasupen ngajarken kebeluhenna ertukang man kalak si deban. Dahin tukang ukir, tenun arah lenen halus, wol biru, ungu, megara ras uis si deban, bagepe pentar ngerencanaken potongan barang.

E kerina tanda Tuhan masu-masu bangsaNa mbagun kemah si Badia ras kerina perlengkapen siniperluken. Pemeteh kepentaren epe ibereken Tuhan gelah banci ka iajarken man jelma sienterem, emaka enggo erlalana kalak si radu-radu metehsa, dahin e pe idahiken ras-ras.

Pengkenaina

Ibas kerina perkembangenna IPTEK berdampak positif sekaligus negatif. Positifna banci informasi si dat alu cepat tepat. Arah media massa, media sosial elektronik. Banci tersampati ndahiken pendahin, misalna lit mesin, listrik, kendaraan. Negatifna pe mbue, banci terjadi perpecahen ibas jabu ras masyarakat, sabab informasi siibagiken salah (berita HOAX). Banci ka encedai pola pikir ras kebiasaan sabab gundari kerina mudah, erbahanca manusia merhat ndatken kerina alu instan lanai berjuang ras kerja keras. Mengikis kebersamaan sabab kalak si ndauh banci erdeherna tapi kalak si ndeherjadi ndauh (sangana jumpa pe sibuk erHP).

Kemajun IPTEK arus ikekola alu mehuli, ibas tan ras perukuren manusia si tetap malang man Tuhan. Adi egois terjeng mengandalken gegeh pemetehna jine, banci saja lupa me dungna kerina si lit Tuhan simerekenca janah arusna e pe jadi pujin man gelarNa. Banci terjadi penyimpangan-penyimpangan adi ateta terjeng maju saja, sabab ibabai kita lalar ibas sie. Emaka perlu si andalken Kesah Tuhan si tetap ngajari gelah kerina silit bas ita banci ipakeken guna kiniulin manusia alu tetap naksiken kemuliaan Tuhan. kininggitenta tetap erlajar ras metenget nandangi perkembangen si lit.

Sipakekenlah IPTEK ras perkembangenna bagi siarusna, ibas waktu ras ingan si tepat. Misalna, adi ngelai tahpe kebaktin asa bancina ula sipake Alkitab elektronik bas HP sabab banci dungna mengganggu konsentrasi dikune reh info arah media sosial nari paksa kebaktin. Banci baba kendaraanta tapi ula kerna lit bas kita sipake alu ugal-ugalan mbabasa, sabab e encelakai kita ras kalak si deban. Adi berkomunikasi via whatsapp, facebook, twitter rsd, pake lah alu la encedai kebersamaan. Adi sangana kumpul keluarga tah teman, sierganlah ras mediate ibas sekelewetta. Ula sempat e lebih siutamaken asangken kalak si lit iadepenta. Janah berbagi informasi arah media sosial elektronik alu pentar. Sabab zaman gundari lanai bo mulut e jadi harimo man banta, jari-jari tan e pe perlu sijaga, gelah pentar niksiki lebe kebenarenna maka sibagiken. E pe perlu siukuri kai-kasi saja si bermanfaat, membangkitkan semangat, mere gegeh ras penghiburen man kalak, terlebih eme bagin kata Dibata si banci isaksiken arah status, komentar, video, foto rsd. Tuhan pe mereken kerina gelah manusia maju ras ngejapken kiniulin, emaka sipakeken min alu kepentaren si ibreken Dibata banta, gelah dampak positifna sipake, negatifna terhindari.

                                        Deci Kinita br Sembiring – GBKP Rg. Balikpapan

SUPLEMEN BIMBINGAN PA MORIA GBKP

17-23 Juni 2018

(Hari Keluarga)

Siman ogen        : Mazmur 128:1-6

Tema                     : Jabuku Kesangapenku

Tujun                    : Gelah Moria ;

-          Ngeteh palas kesangapen i tengah-tengah jabu eme malang man Tuhan

-          Ngasup nandai ras ngaloken biak si mehuli ras si la mehuli i bas anggota jabu

Metode PA         : Refleksi

Penaruh

Nggeluh ibas kesangapen (kebahagiaan, kedamaian) e jadi ketedehen manusia. Apai ka adi ndatken kesangapen ibas kegeluhen jabu. Sieteh maka isi jabu, bapa, nande, anak-anak lit erbage-bage karakter, cara rukur, kebiasaan rsd. Mpersadaken kerina isi jabu gelah seperaihen seperukuren jadi jabu sempabu, tentu perlu jadi perjuangenta ras-ras. Emaka sietehlah palasta gelah kesangapen siiarapken e banci igejapken la saja man jabu e, tapi banci ka ernanam ku sekelewet ras jadi kesaksin si nggeluh.

Isi

Kalak si malang nandangi Tuhan ras nggeluh ngikutken perentahNa, dat kesangapen kap. Tandana eme ;

-          Ipanna ulih latihna, mehuli sikerajangenna

-          Ndehara ras anak-anakna, kecibalna bali ras anggur si meramis, bali bagi tunas saitun i sekelewet mejana

-          Tuhan mere pemasu-masun kidekah umurna

-          Cawir metua, ngidah kempu-kempu daten kedamen

Palas kesangapen i tengah-tengah jabu eme malang man Tuhan. Sabab i bas kegeluhen sibage me Dibata erdahin, mere pemasu-masun man manusia. Gegeh ndalani kegeluhen terlebih bas jabu subuk senang tah pe susah, jaminenna eme Dibata nari, labo kerna kinibeluhenta. Dikune melala tantangen ibas jabu, man kalak si erkemalangen man Tuhan, pengarapen e tetap ngeluh. La saja bana, tapi man isi jabu e tangkas teridah ulih erkemalangen man Tuhan, sidatken kesangapen. Bapa, nande ras anak-anak bas jabu, datken ulihna, arah pendahin sinidahiken, cara nggeluh si maba kemalemen, jaminen masa depan si dem pengarapen. Ije me maka tep-tep jabu kalak si tek man Tuhan, nggeluh setia ibas erkemalangen man Tuhan.

Pengkenaina

Ibas filosofi kalak Karo, kesangapen eme ertuah bayak, sangap encari, merih manuk niasuh, erbuah page nisuan rsd. Eme bentuk-bentuk kesangapen si jadi ukuren ibas ngertikenca. Tapi kesangapen si jadi bas jabu kalak si erkiniteken, kepeken la iukur terjeng arah kai-kai saja si banci teridah mata. Kesangapen si tuhu-tuhu rehna ibas kiniteken si paguh, nggeluh erkemalangen man Tuhan. Kerna eme simpegegehi gelah banci tetap ersada arih ras isi jabu ndalankenca bagepe ngejapken ulihna. Alu bage perlu perjuangen ras-ras kerina anggota jabu, gelah banci ndatkenca ras njagaisa.

Kesangapen la terjeng kai si banci iidah mata, tapi kesangapen e rehna ibas pusuh si dem pengataken bujur, erkiniteken, gelah ngasup ngalaken uga pa pe situasi alu kiniteken. Kerina perbedaan ibas bapa, nande bagepe anak-anak ipersadaken, iperlengkapi arah kiniersadan erkemalangen man Tuhan saja. Banci ngaloken kekurangen isi jabu, ngubah hal-hal si la mehuli gelah kerina isi jabu tetap ngeluh erkemalangen man Tuhan.

La lit manusia si serta (sempurna), tapi ibas kinilasertan e, kita iperlengkapi sada ras si debanna. Ibas kekurangen sekalak, iperlengkapi arah kelebihen si deban, bagekape sebalikna. Ije me siiarapken, kerina isi jabu la ngarapken kesangapen ibas cara-cara instan tah pe si la ngena ate Dibata. Ibas 1 Petrus 4 ngatakenca kesangapen ibas kam dikune ndatken kiniseran erkiteken Kristus. Emaka si perlu tetap ijaga bas jabu, eme kiniersadan ndalanken si ngena ate Dibata, gelah kesangapen e jadi ulihna sabab Dibata simasu-masusa.

Pdt. Deci Kinita br Sembiring – GBKP Rg. Balikpapan