Suplemen Mamre : Johanes 9 : 1-7 ; Tgl 08-14 Juli 2018

PA MAMRE, Tgl 08 – 14  Juli 2018

(HUT ALPHA OMEGA Ke-30)

Ogen      :  Johanes  9 : 1 – 7 

Tema      : “Ngaloken ras Ngergai Disabilitas”

Tujuan    : Gelah Mamre :

1.                   Meteh maka disabilitas ncidahken kuasa Dibata.

2.                   Ngasup ngergai ras nampati kalak disabilitas.

Metode  : Aksi

I.           Kata Penaruh

Adi lit si idah ntah jumpa kita ras sekalak jelma si lit kekurangenna subuk secara kula nah pe mental (disabilitas) uga penilaianta? Kai nge si lit ibas ukurta, uga menurutta kerna kekurangen ntah pe keterbatasenna e? Man banta si lenga pernah ndahi ingan pelayanen disabilitas i Yayasan Kesejahteraan Penyandang Disabilitas (YKPD) Alpa Omega, Kabanjahe ntah ingan si deban si seri pelayanena. Kune si dahi yakin aku maka erbage tanggapen, perukuren ras penilaianta kerna kalak disabilitas enda. Nai adi idah kenca ntah tubuh sekalak anak disabilitas ibas sada jabu, minter si enda ikawitken ras dosa, kesalahen si mbelin ntah mesangat si pernah iban ntah pe terjadi. Dosa nini-apung susur man anak kempuna. Lit kenca tubuh anak disabilitas, minter kalak salih jadi malekat Dibata lako nggargari ras ncubaken ndaftarken dosa si lit ibas ia, bas orangtuana ntah ninina. Gundari pe megati denga nge si begi perukuren ras tanggapen si bagenda nangdangi disabilitas. Jarang kalak ngidah ntah rukur ras nilaisa alu cara si deban. Guna ngidah alu payo kerna disabilitas, mari erlajar kita arah Kata Dibata.

II.         Isi/ Tafsiren

Tupung Tuhan Jesus erdalan ras ajar-ajarNa i Jerusalem, kerina ia ngidah sekalak pentang. Ikataken alu jelas bas ayat 1 maka ia pentang tangtang tubuhna nari. Ngidah kalak pentang enda ajar-ajar Jesus alu spontan nungkun man Tuhan Jesus selaku Guruna. Nina ajar-ajar e, “Dosa ise nge erbahanca maka ia pentang tubuhna nari? Dosana ntah dosa orangtuana?” (ayat 2). Kepeken penungkunen ajar-ajar  enda semal kal jadi penungkunen ras perukuren jelma si enterem. Penungkunen enda mewakili penungkunen ras perukuren manusia secara umum. Perukuren si lit bas jelma si enterem ngataken maka anak si tubuh ibas disabilitas jadi erkiteken ia erbahan dosa ibas bertin nandena. Lenga pe ia tubuh ras lenga pe ia mbelin nggo ikataken ras ivonis ia erbahan dosa bas berin nari. Janah adi ia la erdosa tapi tubuh ia bas disablitas e berarti erkiteken dosa orangtuana.

Pengidah Tuhan Jesus ras ajar-ajarNa la seri. Si enda tangkas si idah arah jawapen Jesus. Nina, “Ia pentang labo erkiteken dosa dasana bagepe labo erkiteken dosa orangtuana, tapi gelah teridah kuasa Dibata ibas geluhna” (ayat 3). Tuhan Jesus mpekena ras mpepinter perukuren ajar-ajar ras manusia secara umum kerna disabilitas. Labo salah si pentang e ras labo kepeken salah ntah dosa orangtuana. Tapi gelah arah si pentang terjadi sada kesempaten man Dibata lako encidahken perbahanenNa si mbebasken ( bnd. 11:4). Jenari ibas paksa si kentisik, Jesus nuriken kerna missiNa ras ajar-ajar eme lako ndahiken persuruhen Dibata. Tupung terang wari me maka banci erdahin. Terang wari eme kesempaten lako erdahin. Adi enggo gelap lanai kap lit kesempaten erdahin. Janah tupung Jesus selaku manusia si isuruh Dibata i doni enda denga me maka arus Ia ndahiken persuruhen BapaNa e (ayat 4,5 ).

Kenca dung iturikenNa si enda emaka ilakokenNa aksiNa. ibenakenNa alu ndauk taneh si enggo leben iciduriNa. Jenari ndampelkenca ku mata kalak pentang ndai. Tole isuruhNa gelah kalak pentang e lawes ku kolam Siloam si ertina “Isuruh” lako erduhap. Ilakoken kalak pentang e kai si isuruh Jesus. Asilna erpengidah ia. Lanai ia sekalak disabilitas (ayat 7). Arah ayat enda penulis Injil Johanes ngataken maka arah Jesus si isuruh (diutus dan diurapi)  Dibata ngenca tuhu-tuhu ngasup mpepalem ras ndemi (kepenuhan) man doni enda.

III.       Pengkenaina/ Aplikasi

1.         Cara rukur ras penilainta khususna nangdangi kalak disabilitas arus si ubah ras sipelimbarui. Baik kita si lit bas jabuta si disabilitas, bas jabu sangkep geluhta ras pe ibas jabu kalak si deban. Ntah Ulanai si pake label si ndekah eme erkiteken dosana, dosana orangtuna ntah pe dosa nini-ninina. Cara rukur ras perukuren si male arus iganti alu cara rukur si mbaru eme si sue ras Kata Tuhan Jesus. Lanai kita ndarami dosa ras kesalahen kalak disablitias ntah pe keluargana tapi ndarami kai sura-sura ras peraten Dibata.

2.         Kita ras senina turangta si disabilitas seri ras la erndobahen i lebe-lebe Dibata. Labo ganjangen derajat ras martabatta asangken disabilitas. Doni ras aturen doni ngenca erbahanca lit perbedan manusia. Emaka arus si aloken ras si ergai kalak disabilitas. La banci si pekitik, si lecehken, si bully rsd. Ula mela adi lit disabilitasta. Tetaplah percaya diri. Bagepe ula mela ras ula buniken adi lit bas jabuta si disabilitas. E erbahanca ia susah ras mesera dingen la berkembang alu mehuli ngenca. Nenlah Nick Vujicik si banci ipake Dibata alu luar biasa gia ia sekalak disabilitas.

3.         Tupung terang denga wari ertina tupung kita nggeluh denga dingen ngasup, marilah si pake kesempaten e guna ngelai, nampati ras jadi pasu-pasu man kalak memerluken khususna man disabilitas. Lit pagi waktuna lanai lit waktuna. Lita pagi paksana ntaku sampati sesamaku, disabilitas e ateta lanai banci si sampati. Enda banci erkiteken nggo terlambat, misalna: enggo ia metuasa, enggo sakit mekelek ia, ntah enggo mate ia. Atau kita pe banci ka leben mate asangken ia. Tuhan mindo pertanggungjawapenta nangdangi gegeh, pemeteh ras talenta si iberekenNa man banta (bnd Roma 14:12).

4.         Tuhan la mindo kita ngubah terjeng mindset ta ngenca kerna disabilitas. Bagepe labo ka terjeng merasa kasihan ras berbelaskasihan ngenca. Bagi Tuhan Jesus la terjeng mpepinter cara rukur ras perukuren si nggeduk ajar-ajarNa tapi mpepalemsa, bageme pe kita. Jesus Kap Terang doni (Joh 8:12). Janah kita si tek man baNa ijadikenNa jadi sira ras terang doni (Matius 5:13-15). Mari dage kita pe jadi terang ras penampat man kalak si deban, termasuk disabilitas. Tuhan Jesus mindo aksi, perbahanenta si nyata nangdangi disabilitas. Si pindoNa gelah kita erkeleng ate ras ngergai disabilitas e. keleng ate e arus alu perbahanen. Kita si lebih secara kula ras mental asangken disabilitas mari si lakoken kai si banci si lakoken man disabilitas.

5.         Bahanlah ras lakokenlah gelah arah kita ermulia Dibata. Ibas kita erdiate, erkeleng ate ras nampati kalak si deban termasuk disabilitas ermulia kap Dibata. Dage, labo erkiteken Tuhan Jesus langsung erbahan mujizat nangdangi disabilitas maka ermulia Dibata. Tapi pe arah perukuren, pengerana ras perbahanenta si mehuli dingen payo nangdangi sesamata ije Dibata ipermuliaken (Matius 5:16).

Pdt. Juris Tarigan, MTh (GBKP Depok – LA; 081316879945)