Ogen  : 1 Kronika 11 : 10 – 25; Perb. Rasul 23 : 1

Tema 

“Ngelai/ Erdahin Alu Pusuh!”

·         Kenca Saul mate ibas peperangen ngadapi bangsa Pilisti maka minter Daud iangkat jadi raja Israel. Dingen minter icidahken dukungen kerina bangsa Israel nandangi Daud. Daud itetapken jadi kepala nandangi kulana bangsa Israel, Daud itetapken jadi permakan sienjagai rarasen bangsana kerina. Enda me gambaren sinituriken ibas kitab Kronika enda.

·         Arah nats enda icidahken loyalitas tentera Daud siterberita kengasupenna erperang. Ibas bagin tentera Daud lit telu kalak si utama dingen igelari  “si telu tentera si terberita”. Kalak enda terberita erkiteken kesetianna nandangi raja Daud.

·         Sipemena  arah "Si Telu tentera terberita" me Jasobeam i bas terpuk Hakmon nari; ia me peminpin "Si Telu". Alu make lembingna ilawanna telu ratus kalak janah ibunuhna si telu ratus kalak e i bas sada peperangen.

·         Sipeduaken arah "Si Telu tentera terberita" eme Eleasar anak Dodo, i bas terpuk Ahoh nari. Erperang ia arah pihak Daud ngelawan bangsa Pilisti i peperangen i Pas Dammim. Eleasar sanga i bas juma dawa tupung bangsa Israel mulai kiam. E maka ia ras teman-temanna ertahan i tengah juma e, jenari ilawanna bangsa Pilisti. Ibereken TUHAN man bana kemenangen si mbelin.

·         Sipeteluken la ituriken ibas kitab 1 Kronika enda, la tersurat gelar kalak simbisa sipeteluken tapi tersurat ibas 2 Samuel 23:11 “Kalak si peteluken i bas si telu si terberita e, e me Sammah anak si Age i Harar nari”.

·         Selain "Si Telu tentera terberita" lit ka tentera si igelari "Si Mbisa Telu Puluh".  Si Abisai, peminpin "Si Mbisa Telu Puluh". Ia erperang alu lembing ngelawan telu ratus kalak janah ibunuhna kerina, e maka ia jadi terberita i bas "Si Telu puluh". Ia si terberitana i bas "Si Telu puluh" e, e maka ia jadi peminpinna; tapi la bagi "Si Telu" e kal ia terberitana.

·         Selain Abisai lit ka sekalak siterberita ibas "Si Mbisa Telu Puluh" eme Benaya anak Joyada i Kapsel nari; piga-piga kali teridah kinirawanna, termasuk munuh dua puanglima kalak Moap. Pernah sekali lawes ia ku bas lubang si mbages sangana nusur es, janah ibunuhna sada singa. Ibunuh pe sekalak bangsa Mesir, sekalak si mbestang, gedangna lebih dua meter, ersenjataken lembing si seh kal galangna. Benaya ngelawan bangsa Mesir e alu ciken, isintapkenna lembing kalak Mesir e i bas tanna nari, jenari ibunuhna kalak Mesir alu lembing e ka. Itamaken Daud ia jadi kepala pengawal pribadina.

·         Daud ndatken dukungen Tuhan bage pe dukungen teman-temanna. Salah sada contohna ituriken maka Metedeh kal ate Daud kutana, e maka nina, "Merincuh kal aku sekalak maba lau i bas sumur i pintu gerbang Betlehem nari!" Situhuna Daud erkanam-kanam, labo arapkenna teman-temanna empertaruhken kesahna guna ngelegi lau e. Tapi teman-temanna nanggapisa alu serius, “E maka teluna tentera si terberita ndai erpala-pala ngepari kemah bangsa Pilisti e, itimbana lau i bas sumur e nari, jenari ibabana mulih man Daud”. Kenca iberekenna man Daud maka Daud tersengget, la ia nggit minem lau e, iamburkenna jadi persembahen man TUHAN , nina, "Asa ndigan pe la aku nggit nginemsa, sabap seri kap e ras minem dareh kalak si ngasamken kesahna muat lau e!" Bage me ketutusen ras pelayanen “teluna tentera si terberita e” nandangi Daud. Ertina, enggit ia ngasamken kesahna guna Daud. Tapi Daud pe labo ngarapken bage, sebab Daud pe empertaruhken kesahna guna bangsana. Jadi ijenda me gegeh bangsa Israel e, ibas kiniersadanna sienteguh bage pe Tuhan masu-masu kiniersadan kalak enda.

·         Adi Daud ndatken dukungen arah teman-temanna bangsa Israel, sebalikna Paulus ndatken perlawanen arah teman-temanna bangsa Israel. Paulus ihakimi erkiteken kinitekenna man Tuhan dingen erkiteken pengarapenna nandangi kekeken arah simate nari. Nina Paulus kempak anggota-anggota sidang e, "O senina-senina! Seh i bas wari enda aku tetap nggeluh alu pusuh peraten si bersih i lebe-lebe Dibata." Tapi Ananias, e me Imam si Mbelin, nuruh kalak si tedis i deher Paulus marap Paulus. Ertina sitik pe la iergaina kata-kata Paulus enda, kai pe sinibelaskenna akapna enjuruken Dibata. Amin bage gia Paulus tetap engkuasai dirina, pusuhna tetap tertuju kempak Tuhan, mekuah atena ngenehen penolaken bangsana nandangi Tuhan Jesus. Paulus pe situhuna enggit empertaruhken dirina guna keselamaten bangsana. Nina Paulus ibas Roma 9:3 “Erkite-kiteken seninangku si sada bangsa ras aku. Adi banci lah labo kuakap dalih aku gia isumpahi Dibata dingen sirang ras Kristus adi alu bage banci kusampati bangsangku e”. La tersipati kita, uga maka bage kel ulina pusuh Paulus nandangi temanna sebangsa.

·         Temata sekalenda ngataken  “Ngelai/ Erdahin Alu Pusuh!” eme spiritualitas Mamre GBKP. Sebaba siidah sekalenda si telu tentera terberita, si dua kalak arah si mbisa telu puluh, raja Daud bage pe Paulus eme kalak-kalak simbereken dirina guna ngelai, enggit ngasamken kesahna guna teman-temanna. Jadi la sekedar kata siterbelas tapi teridah buktina ibas sikap ras perbahanenna. Maka dahinta ibas erkiniteken man Tuhan guna encidahken keleng ate situhu-tuhu man Tuhan ras man teman-temanta. Amin.

Pdt. Sura Purba Saputra, M. Th

GBKP Harapan Indah

Ogen  : Lukas 5 : 15 – 16

Tema

 Mamre Center Eme Ingan Jumpa Ras Nandai Tole Sura-sura Dibata

·         Jesus enjaga keseimbangen kegeluhen. ibas sada dampar, Ia megati ringan i tengah-tengah jelma sienterem guna ngajar ras nampati si kesusahen. Ibas dampar sideban, Ia pe megati lawes ku ingan simelungun guna ertoto. Dua dampar enda penting, maka rusur ituriken, segelah kita pe arah kesibukenta ngelai, siinget ka guna retreat tah pe mbuat paksa teneng, jumpa ras bersekutu ras Tuhan saja.

·         Engkai maka Jesus lawes ku ingan si melenget? Jesus situhuna labo mutlak nilahi kalak siperlu ipepalem. Tapi tentuna lit alasen ibas diri-Na engkai maka deba ijumpaina tapi deba isilahken-Na. Salah sada mungkin, Tuhan nandai motivasi kalak sireh man ba-Na, adi terjeng ndarami malem secara fisik saja labo ngena ate-Na. Sebab siutamana ibaba Jesus labo kuasa kesembuhan dari sakit-penyakit, tapi kuasa yang menyelamatkan manusia dari dosa dan kematian kekal.

·         Tujun Jesus arah tindakenna surut arah jelma sienterem enda pe sada pengajaren man banta. Sabab Tuhan jine perlu ‘persekutuan dengan Bapa-Nya’, apai ka kita. Jesus encidahken kebergantungen-Na nandangi penampat Bapa-Na, aminna gia Ia setara ras Bapa-Na. TujunNa eme segelah kita enggejapken kebergantungen enda, segelah kita pe mengkhususken waktunta guna paksa teneng ngadap Tuhan. Retreat entah pe menarik diri arah kesibuken sitep-tep wari guna mengisi kembali kegeluhenta, alu bage ipengasup mulihi ndalanken pelayanenta.

·         1 Timotius 4:8 “Latihen gerak badan lit piga-piga gunana, tapi latihen pertendin erguna i bas kai pe, sabap latihen pertendin e njamin geluhta subuk si genduari bage pe si pagin”. Kita perlu latihen pertendin, nikapken waktu ras ingan si khusus guna ngerembakken diri kempak Dibata. Latihen pertendin enda sada kebutuhen si la danci lang, reh sibukna kita ibas doni enda erperluna kita empegegehi pertendinta. Adi lang kita danci kehabisen gegeh ras semangat ndalani kegeluhen.

·         Mamre center GBKP enggo nikapken lahan i daerah Tongging kecamaten Merek, salah sada bagin wilayah wisata Danau Toba. Ingan enda irencanaken jadi pusat pembinaan rohani Mamre GBKP. Lahan enda enggo itukur alu cara danana ipinjam lebe, dingen rencana iulihken segelah lahan enda sepenuhna jadi milik GBKP. Iarapken ibas tahun 2019 enggo min tergalari tanehna dingen ibas tahun 2020 enggo danci ibenaken guna mbangunsa. Dana sini arapken eme arah anggota Mamre se-GBKP alu Geraken Rp. 10.000,-/ Mamre per bulan. Perlu penjemba semangat mamre GBKP gelah ergiah-giah muat bagin ibas penggalangen dana pelunasen lahan Mamre Centerta enda. Adi sigejapken program enda eme sada kebutuhen rasa di lit rasa memiliki tentuna la ndekah proses pelunasen bage pe pembangunenna lebih cepat terlaksana. Mari sidukung alu segenep ukur ras gegehta.

Pdt. Sura Purba Saputra, M. Th

GBKP Harapan Indah

Ogen  : Kejadin 41 : 39 – 49

Tema

Kalak Si Erkiniteken Pentar Erbahan Perencanan

·         Kepentaren Jusup eme kepentaren si rehna arah Dibata nari, maka la lit pemeteh si lebih meganjang i Mesir. Sabab Tuhan simbukaken pengertin man Jusup maka ietehna kai sinandangi jadi dingen kai arus ibahan guna mengantisipasisa. Kerina ketepaten kai sinikataken Jusup, Tuhan sienjaminisa, bahwa kai si terjadi Tuhan singaturkenca.

·         Firaun ngakui kepentaren Jusup ngelebihi kerina kalak sitandaina dingen tetap ukurna mbereken kuasa guna ngaturken Mesir. Enda me hal si luar biasa, sabab edenga Jusup ndarat penjara nari, edenga Jusup itandai Firaun, tapi minter tetap ukurna ngendesken kuasa man Jusup. Sabab kata-kata sinibelasken Jusup empeteneng ras empetetap ukur Firaun. Kai sini turiken Jusup mbereken kejelasen ras terperinci kerinana, kai sinandangi terjadi pitu tahun sireh enda, kai sinandangi terjadi pitu tahun berikutna. Firaun ngidah kompetensi entahpe kengasupen si lit ibas diri Jusup sierbahan dirina yakin bahwa Jusup ngasup ngaturken Mesir.

·         Lit pitu tahun riba-iba ras pitu tahun kelihen (kekurangen), si pitu tahun riba-iba e danci itelen pitu tahun kelihen. Sebab lit kecenderungen, masa riba-iba e erbahan kalak mekisat ras nia-niaken kelimpahen e. Apai ka masa kelimpahen e lit pitu tahun. Malas ras boros eme biasana sierbahan kehancuran. Maka dahin siarus ilakoken Jusup guna empebetehken situasi enda nandangi kerina rakyat Mesir, segelah ula tersengget ibas paksa kelihen sindangi reh. Masa kelimpahen e arus ipakeken alu tutus guna empepulung persedian si cukup. Jadi kerina arus mejingkat ras empepulung kelimpahen e.

·         Pemeteh Jusup kerna ngaturken logistic enda relevan denga asa genduari. Termasuk ibas negaranta enda lit Bulog (badan urusan logistik) singaturken persedian logistik, erjaga-jaga guna ketahanen pangan negaranta enda. Sabab adi ketahanen pangan terganggu tentuna Negara la megegeh, lit erbage-bage kerawanen si danci terjadi, erbahan stabilitas terganggu.

·         La nia-niaken ibas masa kelimpahen. Biak empepulung ras nimpansa ibas ingan simehuli. Jusup kenca iangkat jadi perdana menteri i Mesir labo santai ras menikmati jabatenna. Kerina enda mbabai ia guna bekerja keras, niari kerina wilayah Mesir, ngaturken ingan-ingan nimpan ulih peranin, ngaturken kalak-kalak siitugasken guna nimpan ras enjagaisa. Jusup arus tutus ras setia ndahiken dahinna, sebab pendahinna enda bakal iuji alu rehna masa kelihen, cukup entah lang, teratasi entah lang. Jadi proses managerial (perencanaan dan pengelolaan) sinilakokenna cukup efisien ras efektif guna ngatasi masalah.

·         Maun-maun si idah maka kalak sierkiniteken jadi kalak si lenge, sebab bagi tempa adi erkiniteken man Tuhan kerina masalah enggo teratasi, lanai perlu erlatih-latih. Kalak sierkiniteken pe perlu perencanan ibas kegeluhenna. Kenca ibahan perencanan maka perlu eksekusi entahpe tahap-tahap pelaksanan si enggo irencanaken. Lit deba kalak si beluh erbahan konsep perencanaan tapi ibas proses pelaksananna la tutus ras setia ndahikenca. Tanda kalak sierkiniteken eme rukur alu mbages erbahan perencanan kegeluhen dingen mejingkat erdahin. Dingen siterpenting ije eme pasu-pasu Tuhan nandangi kerina sini rencanaken ras sinidahiken kita.

Pdt. Sura Purba Saputra, M. Th

GBKP Harapan Indah