Suplemen PA Mamre : Job 1 : 1-5 ; Tgl 14-20 April 2019
(HUT KAKR)
Ogen : Job 1 : 1 – 5
Tema
Bapa Si Mediate
Tujuan : Gelah Mamre
1. Sedar kerna tanggungjababna sebage bapa i tengah jabu.
2. Ertanggungjabab nangdangi kegeluhen anak.
I. Kata Penaruh
Kerina kita MAMRE (persadan perbapan GBKP) tentu merincuh, ngarap ras ngayak gelah kita jadi bapa si erdiate, bapa si mediate nangdangi ndehara ras anak-anakta. La kebetulen kita selaku bapa (MAMRE GBKP) itamaken Tuhan selaku imam i tengah-tengah jabu, selaku perbulangen man ndehara, sebage bapa man anak-anakna ras sebage warga i tengah-tengah masyarakat. Sura-sura Tuhan eme gelah jabu Kristen jadi jabu si ermalem ate, jabu si ipasu-pasu ras jabu si mpermuliaken Tuhan. Gelah tangkas man banta kerna tema: “Bapa si Mediate”, marilah kita erlajar arah Kata Dibata.
II. Isi/ Tafsiren
Jop ntah pe Ayub eme sekalak tokoh bas Pustaka Si Badia si nggeluh leben asangken bapa leluhur kalak Israel eme Abraham, Isak ras Jakup. Jop sekalak si geluhna kuh ntah pe sempurna. Ikataken geluhna sempurna ntah pe lengkap erkiteken ia sehat janah bayak namura kal, ija nai si jadi ukurenna kinibayaken eme melala asuh-asuhenna ras enterem suruh-suruhenna. Selain ia sehat ras bayak namura, anak-anakna pe enterem eme 7 dilaki ras 3 diberu janah kerina bugis. Lenga denga terjeng si enda, ia pe sekalak si nembah dingen erkemalangen man Dibata. Penembahenna man Dibata erkawiten ku bas kegeluhenna si tep-tep wari. Ia mehuli janah la lit perbahanenna si jahat (ayat 2). Ngidah ras mperdiateken kegeluhen Jo penda kuakap bicara isungkun pusuhta perbapan sekalak-sekalak, kuakap kita pe kerina terincuh ras ngarap gelah geluhta banci bagi Jop. Bicara la gia seri kal, mendekatilah gia.
Jop la sukses ibas pencarin ras pendahinna ngenca, ia pe sukses ka ibas jabu/ keluargana. Jop la terjeng mperdiateken ras ngelitken keperlun anak-anakna bagi rumahna sekalak-sekalak, usaha ras pendahin anak-anakna tapi pe iajarina anak-anakna e nggeluh ersada, erdiate sada ras si debanna dingen si keleng-kelengen. Si enda teridah ija anak-anakna si semal erbahan pesta sekalak-sekalak tapi saling ngundang ia kerina dingen si dahi-dahin. Keriahenna iras-raskenna selaku ersenina-erturang. Lenga denga ngadi i jenda kerna kiniulin Jop. Pustaka tole naksiken uga Jop tuhu-tuhu sadar kerna kel keterbatasen ras lenga mbue pengalamen anak-anakna erkiteken kengudanna. Jop rukur ras sadar bahwa banci saja anak-anak erbahan dosa si la isedarina tupung anak-anakna e ermeriah-meriah ibas pestana. Ijagana kal gelah anak-anakna nggeluh badia ras erkemalangen man Dibata. Emaka tep-tep anak-anakta dung erbahan pesta, Jop mpebadiaken anak-anakna e sekalak-sekalak alu ndahisa, ercakap rassa, mpedahisa, mpersingetisa dingen ngelakoken persembahen tutungen guna ndatkn pengalemi dosa bas Dibata nari kune anak-anakna e erbahan dosa. Si enda la sekali, dua ntah telu kali ibahan Jop tapi alu tetap (Indonesia: ‘senantiasa’). Jop enggo encidahken dirina selaku bapa si mediate ras bapa si erkeleng ate.
III. Aplikasi/ Pengkenaina
1. Pendilo jadi bapa si mehuli, melias, metami, mesayang tuhu-tuhu jadi tantangen kali bas zamanta enda. Melala bapa lanai ndahiken ras ndalanken pendilona, tugasna ibas paksa enda. Adi enggo ilitkenna duit guna keperlun jabu (pangan, paken, ingan tading) ras keperlun kegeluhen sewari-wari si deban enggo akapna bias ras dung. Jenari iendeskenna dahin nemani, ngajari ras ndidik anak-anakna man ndeharana, man si nampati i rumahna ras man guru-guru les anakna. Pengangkan ras pengertin si bagena lepak kap. Secara pribadi kita MAMRE idilo Tuhan jadi imam i tengah-tengah jabuta. La banci si bereken kerina urusen ndidik anakta man ndeharata saja. Arus si bereken pe pusuh ras ukurta man anak-anakta. Nina Kata Dibata, “Bapa ras anak ipersadana pagi mulihi” bahasa Indonesia “Maka ia akan membuat hati bapa-bapa berbalik kepada anak-anaknya dan hati anak-anak kepada bapa-bapanya…”( Maleaki 4:6 bdk Lukas 1:17b).
2. Tema: “Bapa Si Mediate”. Adi ateta jadi bapa si mediate, usihlah ras ikutken kai si ilakoken Jop. Jop enggo encidahken dirina selaku bapa si melias. Ia erkemalangen ras ersembah man Dibata. Ia pe encariken keperlun kegeluhen anak-anakna. Iajarina anak-anakna uga orat nggeluh seh maka anak-anakna ersada, si keleng-kelengen ras si hamat-hamaten. Iperdiatekenna kal kegeluhen pertendin anak-anakna. Si enda teridah uga alu tetap ipebadiakenna anakna e sada persada tep-tep anakna dung erpesata. Mbiar ia kune anakna erbahan dosa si la iarapna, si la isengajana. Emaka iajarina dingen ididikna anak-anakna. Jop enggo encidahken tanggungjababna selaku bapa. Kita pe selaku bapa i tengah-tengah jabuta mari si cidahken tanggungjababta. Kita ertanggungjabab nangdangi kerina dampar kegeluhen anak-anakta (bdk Kuan-Kuanen 22:6; 23:13-14).
3. Bapa si la mediate erbahanca anak-anakna katawari pe ikuasai gawai/ gadget si erbahanca lampas me kari ceda matana. Perdiatekenlah anak-anak si gundari enda. Kitik denga pe enggo mbue kal arus erkaca mata. Si enda erkiteken ndekahsa nonton ras main ibas tv ras Hp. Bapa si la mediate erbahanca lit anak-anakna nggo engkuit si la man kuiten eme narkoba. Enda me bahaya ras bencana nomor 2 gundari i negarata enda kenca korupsi. Narkoba erbahanca ceda otak. Narkoba erbahanca ketergantungen. Adi nggo kenca anakta kenca narkoba e nggo mesera kal mpepalemsa. Bapa si la mediate erbahanca anak-anak ndabuh ku bas pergaulen bebas. Lanai bo ietehna mela, lanai ietehna uga kearusen nggeluh. Adi la kita mediate man anakta bahaya LGBT, ateis, pindah agama/ murtad, la nggit ras ngasup megenggeng, la lit daya juang rsd siap njerngem (memangsa) anak-anakta. Emaka la banci lang adi atena anak-anakta mejuahjuah, terkelin arus maka kita jadi bapa si mediate (bdk Ulangen 6:7; Kuan-Kuanen 19:18).
4. La mesunah jadi bapa si mediate. Melaskenna ‘bapa si mediate’ ngenca mesunah, tapi ndalankenca perlu toto, usaha ras komitmen . Melala denga kal kita perbapan ikuasai hobbi pribadita, kesenangenta si sada asangken nggit mereken dirita ras waktuna man anak-anakta. Semal si idah perbapan main hp asangken main ras anak-anakna. Megati si idah buen waktu perbapan i kede kopi asangken i rumah ngajari ras nemani anakna. Emaka jadi bapa si mediate e tuhu-tuhu jadi tantangen ras sekaligus kebutuhen anak-anakta kal. Emaka marilah reh gegehna kita ertoto ras ndisplinken dirita.
5. Mari si praktekken geraken 1821 alu metode 3B ibas jabuta sekalak-sekalak. 1821 ertina 3 jam sada wari mulai pukul 6 karaben seh pukul 9 si bereken waktuta lako nemani, ngajari ras ndidik anak-anakta. Litken waktuta ras anakta i rumah. Adi la kita banci mulai jam 6 karaben tapi bas jam si deban maka banci tentu la soal. Kerna jam piga benaken e tergantung litna waktuta sekalak-sekalak. Banci langsung 3 jam sekaligus, banci ka pe si dihdih tapi adi ijumlah seh 3 jam. Metode 3B ertina, B1 ‘Belajar bersama’. B2 ‘Bermain bersama’. B3 ‘Bercerita bersama’. Yakin kal kita adi geraken enda si lakoken kita enggo jadi bapa si mediate. Alu jadi bapa si mediate me maka maler perkuah ate, keleng ate ras pasu-pasu Dibata ku tengah-tengah jabuta.
Pdt. Juris Tarigan, MTH (GBKP Depok – LA; 081316879945)
