Suplemen PA Mamre : Masmur 19 :8-12 ; Tgl 21-27 April 2019
(Entreprenuership, Nepa Peluang Usaha, Rukur La Bagi Biasa)
Ogen : Masmur 19 : 8 – 12
Tema
Rukur Kreatif Ras Inovatif
Tujuan : Gelah Mamre: 1. Ngeteh Dibata ulu perukuren ras pemeteh si mehuli.
2. Makeken perukuren alu mbages (maksimal ras kreatif).
I. Kata Penaruh
Kita eme tinepa Dibata si rukur. Kita ibereken kengasupen rukur erkiteken kita itepa Dibata sue rupa ras gambarNa. Ate Dibata gelah arah perukurenta kita ngelai ras mpermuliaken Ia. Adi si perdiateken maka lenga bo kita mpergunaken perukurenta alu mehuli ras maksimal. Bagi biasa ras semalna denga caranta rukur. Erkiteken si e asil si idatken kita pe lenga bo bagi ukurta. Guna ndatken asil si bagi ukurta maka perlebe arus si ubah cara rukurta. Kita arus rukur kreatif ras inovatif. Alu cara rukur kreatif ras inovatif enda me maka reh buena banci si ban guna mpermuliaken Dibata ras jadi pasu-pasu man kalak si deban . Uga kin si imaksudken rukur kreatif ras inovatif? Guna si e mari erlajar kita arah Kata Dibata si jadi ogenta.
II. Isi/ Tafsiren
Masmur 19 enda ngerana kerna Dibata si encidahken diriNa arah tinepaNa jine (ayat 1-6) bage pe secara khusus arah KataNa/ Undang-undangNa (ayat 7-12) lako nuduhken kai kin sura-suraNa nangdangi manusia. Si jadi fokus ibas Dibata encidahken baNa (penyataanNya) arah tinepaNa lako tinepaNa tapi Dibata jine. Si jadi fokus ibas Dibata menyataken baNa arah undang-undangNa labo kerna undang-undang e tapi Dibata jine Simereken undang-undang e.
Kata Dibata si jadi ogenta eme Masmur 19:8-12 ngerana kerna biak, erti ras guna Undang-Undang Tuhan. Undang-undang Tuhan e perlebe ngerana kerna Taurat Musa eme kitab Kejadin seh ku Ulangen ntah pe 5 kitab pemena ibas Pustaka Si Badia Padan Sindekah. Undang-Undang Tuhan e seri ras Kata Dibata (Ind: Firman Allah). Piga-piga biak Kata Dibata si idah kita arah ogenta eme: Perlebe, undang-undang Tuhan e serta (sempurna). Erkiteken si enda Undang-undang Tuhan (Kata Dibata) e erguna mereken gegeh si mbaru man manusia. Sipeduaken, terteki tuhu. Erkiteken si enda Undang-undang/ Kata Dibata e erguna lako mereken pengertin man si kurang pentar (ayat 8). Sipeteluken, benar kap. Erkiteken si e erti ras gunana mereken keriahen ukur man kalak si ngikutken KataNa, dingen mereken pengertin ku bas perukuren (ayat 9). Arah ngangkai ras ngantusi Kata Dibata/ undang-undang Tuhan alu mehuli dingen payo erbahanca penandaita man Tuhan pe reh mehulina dingen payona. Sabab si eteh maka Kata/ undang-undang Tuhan e rehna bas Tuhan nari kap. Erkiteken si enda me maka nina pemasmur, “Ersembah man Tuhan e mehuli kap”. Emaka tetaplah ersembah man Tuhan seh rasa lalap. La ersembah man Tuhan ngenca mehuli, tapi pe putusenNa adil dingen tetap rembang tengah (ayat 10). Ersembah man Tuhan e jilen ras ergan asangken emas murni 24 karat. Ersembah man Tuhan e tebun asangken pangan si terbaik eme tengguli si entebuna (ayat 11). Pemasmur naksiken maka ersembah man Tuhan dingen makeken Kata/ undang-undangNa erbahanca idatkenna pemeteh. Ibas ia patuh man Kata Dibata idatca upah ije nari (ayat 12).
III. Aplikasi/ Pengkenaina
1. Arah Kata Dibata si jadi ogenta tangkas kap man banta erti ras guna Kata Dibata si rehna ibas Dibata nari. Pemeteh ras pengertin si mbages rehna ibas Dibata nari kap. Dibata jine nepa doni ras kerina isiNa alu KataNa kap (Kej. 1-2). Kata e Pencipta ras mencipta. Ula pemeteh ras kepentaren eme kap erkemalangen ras mehamat man Tuhan (bdk Kuan-Kuanen 1:7). Kata Dibata e kap tendang kegeluhenta (bdk Masmur 119:105). Kata Dibata e ulin asangken emas murni, tebun asangken pangan si mehulina eme tengguli murni. Alu ngantusi erti ras guna Undang-undang/ Kata Dibata erbahanca keriahenta eme matuhi Undang-undang/ Kata Dibata dingen ngukurisa suari ras berngi (bdk Masmur 1:2).
2. Tema: “Rukur Kreatif ras Inovatif”. Tuhan alu KataNa me si jadi ulu (sumber) rukur kreatif ras inovatif man banta Mamre. Adi ateta perukurenta mbages, terbuka, melala ide ras gagasenta, marilah si pindo man Tuhan alu ngukuri KataNa suari ras berngi dingen matuhisa. Arah ras alu Kata Dibata me erbahanca pemeteh, pengertin ras kepentarenta ertambah-tambah dingen la pernah keri, la pernah ngadi. Emaka lalaplah erlajar arah Kata Dibata. Ogelah Pustaka alu tetap ras teratur.
3. Dibata arah KataNa si tersurat bas Pustaka erbahanca ras mpengasup kita rukur la bagi biasana/ semalna kalak si enterem rukur (Think out of the box). Perukuren si biasa asilna pe biasa. Rukur alu la bagi biasa maka asilna pe la bagi biasa. Ibas si e banci melebihi bayangen ras arapenta. Tuhan jine ngarapken kita gelah geluhta la bagi biasa-biasa saja. Adi lit ndube nina lirik lagu, “Yang sedang-sedang saja”, ras lagu “Aku masih seperti yang dulu” enda lanai lako, nggo ketadingen zaman. Arus si up date . Carata rukur ras erbahan arus di atas rata-rata. Nina kalak Jahudi, “Sebelum orang lain berpikir, kami telah membuat dan melakukannya”. Emaka si idah kalak Jahudi melala kal si maju. Lalap ia leben asangken kalak, la pernah ia ketadingen ibas kerina dampar kegeluhen. Perdiakenlah ras pelajarilah usaha/ bisnisNa, pertanianna, perkebunenna, teknologi persenjatana, teknologi farmasina rst.
4. Enggo seh paksana kita Mamre rukur ras erdahin kita alu 4 –as, eme kerja keras, kerja cerdas, kerja tuntas, ras kerja iklas. 2 ekstrim si la mehuli ibas manusia eme, sipemena rukur saja lalap tapi la pernah erdahin, idahikenna asil perukurenna e. Sipeduaken, erdahin saja lalap ras la lit waktuna rukur, ngevaluasi dahin si enggo idahikennna. Si payo eme kap rukur janah erdahin, ras erdahin kenca iukuri alu mehuli dingen mbages. Emaka kerja keras e la banci lang. Tapi selain kerja keras, kita arus kerja cerdas. Kerja cerdas ertina make otak, make perukuren si ibereken Tuhan. Jenari dahin si idahiken kita arus si dahiken alu tuntas, ola tanggungi, ola tadingken tegun lolo. Terakhir kita erdahin alu iklas, erdahin alu pusuh si ersuruh, pusuh si tulus.
Pdt. Juris Tarigan, MTH (GBKP Depok – LA; 081316879945)
