Pekan Doa Sedunia Wari V 2019 : 1 Tesalonika 1 : 2 - 7

Invocatio      : “Pindolah, tentu ngalo me kam; Daramilah, tentu idatndu; Tuktuklah, tentu italangi pintun man bandu”(Mat 7 : 7)

Khotbah       : I Tesalonika 1 : 2 - 7

Tema

Ertoto ras Erdahin

I. Kata Perlebe

 Sada semboyan Latin si cukup terkenal ibas St. Benedict : “Ora et Labora; Berdoa dan Bekerja” enda rusur sibelasken ibas kegeluhenta selaku anak-anak Dibata. Enda pe jadi gelementa ibas ndalani tanggungjawab ras pendahinnta sitep-tep wari. Ija kita selaku manusia sue ras keberadaan jamanta genduari ituntut guna terus erdahin, tapi labo ka e ngatakenca maka banci silupaken tanggungjawab kinitekenta selaku manusia si terbatas eme ertoto man Dibata (ersembah man Dibata). Melala siidah ibas kinata maka erkiteken kesibuken ibas pendahin, lanai ingetna Dibata; Wari-wari epe akapna enggo kurang mbue; wari minggu epe lanai sempat lako ersembah man Dibata. Kalak si sadar maka kegeluhenna eme pemere Dibata, dingen sadar pe ia maka terbatas kel kengasupenna ibas ndalani kegeluhenna bagepe ndahiken dahinna tentu labo ia lupa tetap mindo gegeh ras kepentaren man Dibata, subuk arah toto bagepe ersembah ibas tep-tep kesempaten si lit.

II. Isi

Tesalonika eme ibukota Makedoni sipaksa e lit iteruh jajahen kekaisaren Roma. Perpulungen e eme bekas panteken Paulus ras Silas, tapi erkiteken cian ras nembeh ate kalak Yahudi sebab Paulus ras Silas berhasil ibas nehken pengajaren man perpulungen emaka ibahanna perlawanen. Erkiteken si e Paulus ras Silas lawes nadingken Tesalonika lawes ku Berea. Perpulungen enda ibas perkembangennya jadi perpulungen situhu-tuhu ngasup mereken usihen man perpulungen si deban si lit isekeleweta (ay. 7). Aminna pe perpulungen ibas paksa arus ngenanami kiniseran ras penindasen tapi Berita si Meriah e tetap banci ipembarken. Paulus arah suratna enda ersura-sura mpegeghi ras mpetetap ukur perpulungen segelah tetap nggeluh ibas kiniteken man Dibata dingen setia ibas ndalanken sura-sura Dibata. Ipujiken Paulus pe perpulungen enda erkiteken kiniteken ras kekelengenna (ay. 1). Kinigenggengen perpulungen ibas ngalaken kiniseran, kesetiaan encidahken kiniteken arah perbahanen, kinilatihen erdahin erkiteken keleng ate ras ketetapen ukur erpengarapen man Dibata e banci jadi erkiteken ulih Pendahin Kesah si Badia. La lit sitik pe Paulus mujiken bana kerna pendahinna ibas meritaken Berita si Meriah man perpulungen Tesalonika. Siidah kuga Dibata erdahin mpetangkas kuasa ras kemulianna dikune erdahin ras ertoto enda tetap sibahan jadi motto geluhta selaku anak-anak Dibata. Paulus idahikenna dahinna lako meritaken Berita Si Meriah itengah-tengah tantangen ras perlawanen ibas kalak Yahudi nari, bagepe la ia lupa guna tetap notoken dahin siidahikenna e segelah alu gegeh ras penampat Kesah si Badia mereken ulih simehuli (ay. 3). Gegeh ras kengasupenna ndahiken dahinta e banci saja erbaleng, tapi lit gegeh ras kuasa simbelin si erdahin radu ras kita, arah pertotonta, eme gegeh Dibatanta.

Matius 7:7 sijadi bahan invocationta eme bagin ibas khotbah Jesus iuruk sinuriken kerna karakter ras jati diri selaku anak-anak Dibata. Khususna ibas perikop enda eme kerna ertoto. Ertoto eme kesah kegeluhen kalak si erkiniteken, emaka kalak si lanai ertoto berarti kinitekenna mate. Lit 3 hal sijadi penekanen ibas ayat enda eme ; 1). Pindolah, ertina lit kesadarenta ras kinitekenta maka Dibata tetap megiken pertotonta, 2). Daramilah, nuduhken kerna pemindon situhu-tuhu si rehna ibas pusuh nari alu palas kesetiaan ras kepatuhen man Dibata, 3). Tuktuklah, mengacu kubas ketutusen ras kesetiaan guna tetap ertoto man Dibata amin pe kai sijadi sura-suranta e lenga tersehi.

III. Pengkenaina

1. Erdahin eme kearusen nggeluh selaku anak-anak Dibata. La ngena ate Dibata anak-anakna nggeluh ibas kekurangen, emaka kegeluhen enda arus tetap siperjuangken arah pendahinnta. Tapi arus maka siinget pendahin e eme pemere Dibata labo Dibata. Sebab melala gundari anak-anak Dibata erkiteken pendahin lanai er-Dibata; ngayak-ngayak pendahin lanai lit waktu guna ersembah/ ertoto man Dibata; ngayak-ngayak pendahin (kesuksesen/jabaten) piah cara sikugapape idalanken aminna pe lanai bagi sura-sura Tuhan.

2. Ertoto eme gambaren relasinta ras Dibata. Ertoto eme salah sada cara pengungkapen kinitekenta. Emaka ibas ertoto sipindolah kai si banci mpebelin kinitekenta man Dibata, labo kai sijadi sura-suranta saja. Melala anak-anak Tuhan si kecewa kerna ulih pertotonta sebab kai siipindona e la sue ras sura-sura Dibata.

3. Ertoto eme salah sada caranta guna mpersiapken dirinta pe ibas ngaloken kai saja pe siterjadi ibas kegeluhen enda. Kalak siertoto sope erdahin enggo memiliki modal guna ngalo-ngalo sikugapana pe. Amin pe bagi ukur, la e erbahanca ia meganjang rukur, anem pe la bagi ukur la ka e erbahanca ia surut ibas kiniteken man Dibata.

4. Ertoto ras Erdahin. Pertoton e jadi palasta guna banci ndahiken dahinta alu payo, mehuli ras sikap. Banci kap sibandingken ibas kita ndahiken dahinta ibenai alu pertoton ras lang. Emaka anak-anak Dibata sitetap ibas pertoton, pendahinna pe enggo pasti sikap; arah pendahinna ia jadi pasu-pasu dingen ibahanna pendahinna e pe jadi dalan guna naksiken kerna kemuliaan Dibata.

5. Ora Et Labora; totoken dahinndu, dahiken ka kai siitotokenndu e.

Pdt. Elba Barus

GBKP Runggun Bandung Timur