Ogen : 1 Raja-Raja 3:7-14

 

Tema :

 

“Bapa Si Erdiate”

 

Kewajipen si penting orangtua eme mereken man anakna pengajaren ras persinget si termasuk pendidiken Kristen. Orangtua harus jadi usihen ibas kegeluhen ras perbahanenna sebage kalak Kristen, janah lebih mperdiateken keselamaten anakna ibas pendahin, profesi, pelayanenna ibas gereja ntah pe status sosialna. Orangtua bertanggungjawab guna mereken pendidiken man anak-anakna sinuate mpersiapken ia guna nggeluh bagi singena ate Tuhan. Si terutama bertanggungjawab mereken pengajaren alkitabiah ras rohani man anak-anak eme keluarga, labo gereja ntah pe sekolah minggu. Gereja ras sekolah minggu terjeng nampati pengajaren arah orangtua.

 

Inti pendidiken Kristen eme: pusuh sekalak bapa harus seh ku pusuh anakna gelah banci mabai pusuh anak e kubas pusuh Juruselamat (bnd. Luk. 1:17). Ibas mpebelin-belin anak-anakna, segelah orangtua ula ncidahken sikap pilih kasih, harus mereken dorongen bagepe persinget, iukumna perbahenen anakna si kin memang ngelakoken kesalahen, ngajarken man anak kerna nggeluh meteruk ukur, lemah lembut, saber, pusuh si dem kekelengen.

 

Emaka lit15 langkah si harus ilakoken orangtua guna mabai anakna kempak kegeluhen si badia ibas Kristus:

 

1)   Ngendesken anak-anakna man Dibata mulai kin ia kitik-kitik nari (1 Sam. 1:28; Luk. 2:22).

 

2)   Ngajarken anak-anak gelah erkemalangen man Tuhan janah mpedauh kejahaten, ngkelengi kebenaren janah ciga atena erbahan dosa. Lit me ibas anak-anak e kesadaren kerna sikap ras pendapat Dibata nandangi dosa (Heb. 1:9).

 

3)   Ngajarken anak-anak guna matuhi orangtua arah disiplin alkitabiah (Ul. 8:5)

 

4)   Melindungi anak-anak ibas erbage-bage pengaruh jahat alu menyadari usaha iblis guna ngkernepken anak-anak secara rohani arah daya tarik doni ras teman-teman si la bermoral (Kuan. 13:20).

 

5)   Menyadarken anak-anak maka Dibata lalap mperdiateken ras menilai kai si ilakokennal, si iukurkenna, ras si ikatakenna (Msm. 139:1-12).

 

6)   Mabai anak-anak ibas umur si nguda kerna kiniteken secara pribadi, pertobaten

 

7)   Netapken anak-anak ibas sada gereja rohani ija Kata Dibata iberitaken, prinsip-prinsip kebenarenNa ihamati.

 

8)   Mendorong anak-anak guna tetap nggeluh iserapken ibas doni enda nari janah ersaksi ras erdahin guna Dibata.

 

9)   Mpebetehken man anak-anak kerna pentingna anak e iperidiken.

 

10)Ngajarken anak-anak maka Dibata ngkelengi ia janah lit maksud khusus guna kegeluhenna.

 

11)Tiap wari ngajarken anak ibas Kata Dibata, baik ibas percakapen bagepe ibas ibadah keluarga.

 

12)Arah usihen ras persinget, doronglah anak-anak guna nggeluh tutus ibas pertoton.

 

13)Nikapken anak-anak guna menderita ras mengalami penganiayan erkiteken kebenaren.

 

14)Notoken anak-anakta.

 

15)Lit ibas anak-anak e kekelengen ras biak kepate.

 

Dibata mpetandaken diriNa arah nipi man Salomo i Gibeon. Man Salomo, Dibata mereken tawaren kenca Salomo erban sada persembahen si seh kal buena ibas sada ingan eme uruk pengorbanen. Pemindo Salomo ipalasi alu kekelengen Dibata si nggit mereken kursi kerajan, eme jabaten raja. Ibas sada sisi Salomo ngakui kinibelinen kekelengen Dibata, janah ibas sisi sideban ngakui maka ia nguda denga janah lenga lit pengalamenna. Erkiteken sie Salomo mindo man Dibata gelah mereken pusuh si meteh ertimbang kerna perkara-perkara guna ngadili bangsa Israel janah banci mbedaken apai si mehuli apai si la mehuli. Arah penatap Dibata, pemindon Salomo e eme mehuli ibas Tuhan, sebab kepeken Salomo la mindo umur si gedang, kebayaken, ntah pe naluken musuh-musuhna.

 

Kenca Salomo nggantiken bapana Daud jadi raja, Tuhan ncidahken diriNa man Salomo ibas nipi, ngerana Tuhan man Salomo mindo kai siniperlukenna gelah iberekenNa man Salomo. Salomo banci milih kai saja, erkiteken Tuhan la erban batasen pilihen, Salomo banci saja mindo guna naluken musuh-musuhna, ntah pe mindo kebayaken, mindo umur si gedang, mindo gelah ia ihamati bangsana, rsd. Tapi Salomo si dem kepentaren nggo banci mbedaken kai sinisuraken Tuhan janah kai si la isuraken Tuhan. Nggo ieteh Salomo kai si mehuli si harus ilakokenna, seh maka mindo ia man Tuhan kepentaren gelah ia banci mimpin bangsa Israel alu mehuli sue ras sura-sura Tuhan, gelah Tuhan mereken pusuh si beluh ertimbang kerna perkara-perkara si lit alu banci mbedaken apai si jahat janah apai si mehuli.

 

Pengalamenta masing-masing ras bapa tentu labo seri. Tapi secara umum banci sibuat garis sejajar kerna dinamika hubungen antara bapa ras anak. Sanga kitik denga anak e mengagumi bapana, “bapa hebat banci iangkipna aku!”. Tapi menjelang remaja anak mulai mbiar man bapa. Iidah anak e bapa sebage kalak si la tertandingi. Bapa pe rusur itatap sebage saingen ibas hubungenn segi tiga anak-nande-bapa. Akibatna anak cenderung guna memberontak, memusuhi ras segat atena man bapana. Frans Kafka sekalak filsuf Ceko, ngataken man bapana: “aku membayangkan peta yang luas dan engkau berbaring menutupi seluruh peta itu. Hanya bagian yang tidak tertutupi badanmu yang bisa menjadi daerah di mana aku bisa bergerak”. Untung me ketegangen e biasana erkedungen kenca anak e dewasa. Mulai itadingkenna sikapna memberontak, ngalemi keunggulen bapana ras erdame janah mulihken jadi akrab ras bapana.

 

Dinamika hubungen sibagenda si mungkin pe mewarnai hubungen bangsa Israel ras Dibata, seh maka bangsa Israel ngidah Dibata sebage sekalak bapa (Jes. 63:7-16). Enda me dinamika hubungen bapa ras anak: akrab ras kagum, emaka mbiar ras segat, emaka berontak ras memusuhi, tapi kedungenna mulihken ka akrab ras mengagumi. Tokoh bapa e memang unik. Sanga Dibata nepa sekalak bapa, sekalak malekat mperdiateken alu termamang-mamang. “Ngkai bage kal gedangna banNdu? La kari ia banci main guli ras anakna”. Ijawab Tuhan, “adi la gedang, man ise anak e natap kudatas, erpengarapen kerna cita-citana?”. Emaka Tuhan erban bara si mbelang. Malekat e pe termamang-mamang, “Uga maka mbelang baNdu barana?”. Ijawab Tuhan, “sengaja bage kuban gelah banci iangkipna anakna”. Emaka Tuhan erban nahe bapa si mbelang. Malekat langsung komentar, “ula bage kal belangna, terdedeh kari anakna”. Ijawab Tuhan, “sepatu bapa si mbelang pasti menarik ibas pusuh anakna guna erdalan bagi bapana”. Seh berngi, Tuhan terus ndungi tinepaNa. Tuhan puas ras ersikap guna lawes. Tapi rempet Tuhan merasa lit sitik si lupa. Meter Tuhan mulihken. Itamaken Tuhan sada titik ibas mata bapa. “Kai e?” nina malekat. Ijawab Tuhan, “enda me iluh bapa”. Gelah banci naktak iluhna adi ngidah anakna jadi kalak si la erguna, ntah pe naktakken iluh kemalemen ate ngidah anakna jadi kalak si erguna.

 

Pdt. Andreas Pranata Meliala, S.Th

GBKP Rg. Cibinong

Ogen : 1 Korinti 5:1-13

Thema :

“Sirangilah Perbahanen Si Melket”

1 Korinti bindu 5 si jadi bahan PA Mamre nuriken kerna kiniganjangen ukur perpulungen Korinti. Paulus ncidahken maka perpulungen e mereken izin ilakoken perbahanen si melket si la sue labo terjeng penatap Undang-undang Dibata (Hukum Taurat), tapi pe, janah khususna eme Berita Si Meriah (Injil). Telu pokok penting harus ikataken sope kita ngukal teks si jadi bahan PA Mamre enda.

1.        Erkiteken iperhadapken alu kasus-kasus perbahanen si seh kal melketna, Paulus mungkin terjeng ncidahken cikenna, “Kuga dage atendu? Reh atendu aku alu maba perpalu, ntah alu keleng ate dingen mesayang” (1 Kor. 4:21). Enda me ciri khas arah pendekaten pastoral Paulus maka jawapen si mendasar eme Berita Si Meriah, labo Undang-undang Dibata (Hukum Taurat).

2.        Man Paulus jine lalit kai si igelari Etika Kristen pribadi. Kegeluhen kalak Kristen tergolong ibas kegeluhen kerina perpulungen. Perbahanen-perbahanen tiap anggota mereken pengaruh ibas kerina Kula ni Kristus. Jadi, memang lit kebebasen, tapi terjeng ibas kewajipen-kewajipen si erkawiten ras keanggotan ibas perpulungen.

3.        Iakui Paulus maka gereja, amin pe badia ras ipeserap ibas doni enda nari, tetap merupaken ingan ija dua wilayah gegeh saling tumpang tindih. Kinirajan Dibata ras kinirajan doni. Gereja la banci pulah ibas doni enda nari. Jadi, Paulus la pernah menawarken semacam ingan pelarian Kristen, ia pe la ngataken maka kalak Kristen lit hakna guna ngadili kalak sideban (ay. 9-13).

Sada hal sierbanca sengget nggo ibegi kalak, sierbanca meganjang ukur kalak Korinti e bahkan harus ipersingeti. Ipediatna sada kasus perlua-lua si mekelek terjadi alu lalit ise pe singambatisa. Paulus la ngataken ija nari informasina; ikatakenna bagenda erkiteken nggo jadi rahasia umum maka dauh nari pe ieteh kalak perbahanen sibagenda. Bahasa Junani kerna perlua-lua enda erkawiten ras kata guna erlua-lua, tapi ertina eme pelanggaren seksual ibas bentuk kai pe. Ijenda Paulus erban acuan kubas sada kasus perlua-lua si tertentu, perlua-lua si bage kalak si langa nandai Dibata pe ciga atena, e me: lit kalak si nggeluh erlua-lua ras ndehara bapana, sie lalit tolok ukur moralitasna erkiteken la itandaina sura-sura Dibata. Lit kalak si nggeluh ras ndehara bapana, ertina ernande nguda ia (nande tiri).

Hubungen sumbang e ilarang bahkan ibas undang-undang Romawi; tapi, si lebih penting ka, hal sie rulih-ulih isehken ibas Undang-undang Musa (Im. 18:7, 8; 20:11; Ul. 22:30; 27:20; Kej. 35:22 kasus Ruben). La sieteh kai pe kerna keadan situhuna arah kasus enda. Banci siduga maka bapa arah dilaki e nggo mate, janah diberu si bersangkuten labo kalak Kristen. Paulus la ngerana kerna kesalahenna, seh maka mungkin diberu e eme kalak “darat” janah kalak Kristen la banci ngadili ia (ay. 12-13). Dilaki si terlibat e eme sekalak anggota perpulungen janah harus ipindo man bana pertanggungjawapenna.

          Alu bahasa si tegas, ikataken Paulus: Amin bage pe meganjang ka ukurndu! Peempatkaliken ibas surat enda, kalak Korinti ikataken, “meganjang ukur”. Imegahkenna kedewasanna sebage kalak si erkiniteken, ipemegahna pemetehna si lebih ras kebebasenna. La ia perlu man Paulus guna ngajarken kai si harus ilakokenna.

          Sementara si ngoge surat enda pujikenna dirina jine, Paulus nggo erban keputusen kai si harus ilakoken. Secara badan aku ndauh ibas kam nari, tapi ukurku lit i tengah-tengahndu (bnd. Kol. 2:5), erdahin guna mpepinteri si nggeduk. Paulus tuhu-tuhu la ngadili kalak perdosa e alu ukumen si rasa lalap. Perbahanen kai pe si harus ibuat haruslah lit tujun positif guna mpehuliken si perdosa e (ay. 5). Kai situhuna ikataken Paulus eme maka ia nggo “muat keputusen”, ertina iputuskenna langkah kai si harus ibuatna.

          Masing-masing ungkapen ras makna umum ayat 4 enda jelas; si la jelas eme cara uga ungkapen-ungkapen e erkawiten. Apakah Paulus nggo ngelakoken penilaianna alu kuas Jesus, Tuhanta, ntah kin kalak Korinti harus ngelakoken perbahanen sanga ia pulung ibas gelarNa? Duana secara teologis eme mungkin. Sebaga sekalak rasul Kristus, lit kewajipen Paulus guna ngerana ras ngelakoken tindaken ibas gelar Kristus (2 Tes. 3:6). Tapi la ia isuruh sebage sekalak diktator ibas perpulungen ibas urusen-urusen moral; tindaken harus ibuat kerina perpulungen, janah labo pribadi-pribadi saja. Harus ietehna uga melindungi kiniersadan ras kebadian gereja, janh ndigan ngelakokenca. Harus ilakokenna sanga ia pulung ibas gelar Tuhan. Ibas kebaktin Tuhan reh sebage Juruselamat ras Hakim. Erkiteken perpulungen e eme gereja, kalak sitek sideban terlibat ibas tindaken-tindakenna. Paulus pe pulung radu ras ia ibas kesah sanga ia pulung.

          Kaiten si seri arah ungkapen alu kuasa Jesus, Tuhanta sienda pe situhuna labo jelas. Maksus Paulus mungkin maka kalak Korinti pulung alu pemeteh maka kerehen ibas “gelar” Kristus berarti kuasa guna ngelakoken erkiteken kinidolatenNa. Kemungkinen si lebih mbelin, ungkapen e berhubungen ras ayat 5: alu kuasa Kristus jine, kalak e harus iendesken kalak Korinti ibas gelar Tuhan Jesus man iblis. Ungkapen enda adi sibegi tempa-tempa seh kal kerasna, tapi menurut undang-undang Jahudi kalak e harus ibenteri alu batu seh mate. Sebelumnna Paulus nggo ngataken maka kalak Korinti seharusna ceda atena erkiteken kebenen temanna sada kiniteken (ay. 2); ibas pengertin maka kalak e nggo mate. Amin bage, perpulungen harus ngendesken kalak e man iblis guna sada tujun akhir si positif. Kulana harus ikernepken gelah kesahna banci iselamatken. Alu singkat saja Paulus erban acuan kubas praktek-praktek ras konsep si itandai alu payo kalak singoge suratna, tapi si erbanca mesera man banta pembaca ibas jaman modern enda. Piga-piga bagin nggo ngusulken maka Paulus atena gelah kalak Korinti nehken sumpah nandangi kalak perdosa, sue ras praktek ibas Judaisme. Tapi ungkapen siendesken man iblis (banci ka sioge ibas 1 Tim. 1:20) lalit kesejajarenna ibas praktek-praktek ntah pe rumusen Jahudi ibas hal numpahi. Amin pe, terjeng man Pertua, labo kerina ingan kalak Jahudi ersembah (sinagoge) si nehken larangen ntah pe tindaken si bage.

          Ngkernepken kula haruslah lit tujun si positif, tapi kai? Nggeluh ibas kula berarti nggeluh ibas doni, si ndekah, jaman si ndekah si nggo lewat. Ertina patuh nandangi kuasa dosa, janah upah dosa eme kematen. Nggeluh rikutken kula berarti petembil ras nggeluh rikutken Kesah Dibata. Alu ngendesken kalak perdosa man iblis, perpulungen nehken kai si nggo terjadi: kalak e eme sikerajangen iblis ras doni sindekah, labo jaman simbaru sikerajangen Kristus arah KesahNa. Nggo ipeserapna dirina ibas perpulungen arah dosana jine ndauh sope perpulungen momoken kerna sienda (ay. 11,13). Tapi penungkunenna: uga nge kula e harus ikernepken? Paulus ngerana kerna perluna ngkernepken kula, matekenca. Enda la banci isehi alu kematen secara fisik. Kula sebage pribadi manusia si meganjang ukur ras erdosa ikernepken alu pertobaten ras kiniteken man Kristus si mereken pengalemi dosa. Kesah Si Badia me si mereken kegeluhen simbaru ibas jaman simbaru enda janah mulahi arah kuasa daging. Harus sicatat maka Paulus ngerana kerna kula ras kesah labo ibas pengertin dualisme Junani kerna kula ras tendi. Maksud Paulus maka tujun ngendesken kalak perdosa e man iblis eme gelah ia banci iajuk guna jera erkiteken kuasa dosa si seh kal ngerina. Hasil akhirna, bagi siniarapken, gelah kesahna iselamatken ibas wari pendungi, ibas wari Tuhan. Sebage sekalak perdosa si nggo ialemi, dirina si nggo ipelimbarui e bakal iselamatken guna kegeluhen sirasa lalap. Jadi, amin pe teridah aneh, Paulus ngidah kemungkinen maka Dibata bahkan makeken iblis guna tujun simehuli. Ngkernepken kula mungkin pe mencakup perukuren sideban. Lit hubungen si ndeher antara dosa ras pinakit ibas Padan Sindekah, amin pe misalna labo tiap pinakit banci secara langsung itelusuri mulihi ikataken e dosa. Siidah kuasa dosa ras iblis ibas turi-turin mpelawes setan ibas Kitab-Kitab Injil; Jesus mperehken jaman simbaru alu mpelawes kuasa-kuasa iblis.

          Ibas Padan Sindekah, peristiwa penyelamaten si sentral eme peristiwa Keluaren. Tentu nggo wajar, penulis Padan Simbaru rusur nggambarken keselamaten ibas Kristus alu makeken bahasa ras gambaren Keluaren. Pembebasen arah perbudaken Mesir nari ras peristiwa-peristiwa si erkawiten ras sie, iidah sebage karakter ntah pe awih-awih arah pembebasen simbelin; keselamaten ibas dosa arah kematen Jesus Kristus. Ikawitken Padan Sindekah ras simbaru khususna seh kal wajarna man kalak Kristen si sebelumna eme Jahudi. Tiap perayan Paskah tahunen eme peringeten ras peragaan man Paskah sipemena sanga Tuhan nuruh bangsaNa man biri-biri ras roti si la itama ragi.

          Nina Paulus ibas ayat 6 enda la mehuli meganjang ukur, pasti istilah enda nggo iperhalus. Banci kita erpengakap nggo meganjang ukurna maka kasus hubungen sumbang enda terjeng sada kasus tersendiri si la ncedai ia. Banci kita erpengakap ia kerina nggo tutup mata nandangi masalah enda, alu nehken maka tindaken-tindaken manusia labo tuhu-tuhu menyentuh pribadi rohanina situhu-tuhu. Kai pe masalahna, arah 1 Korinti bindu 5 enda menam mereken izin man bana guna meganjang ukur. Jawapen-jawapen Paulus alu sada ilustrasi sederhana, kebenaren si seharusna nggo jelas; la kin ietehndu lit ije erti si seri alu “tentuna nggo ietehndu”. Ragi si sitik isiarina cimpa e kerina. Bahkan sada kasus sada dosa simbelin, adi ipediat, banci mis ncedai kerina perpulungen. Lit kebiasan dosa mpebelang banci pinakit si njajat/menular.

          Paulus labo erban acuan tempa-tempa kubas erbahan roti si biasa ibas rumah tangga. Jelas lit jumlah mbelin kalak simbaru jadi Kristen i Korinti, janah ietehna maka pesta Paskah tahunen eme pesta roti si la itama ragi. Pesta e banci irayaken kenca tiap bagin arah roti si la itama ragi, bahkan potongen si kitikna kal, nggo iambekken ibas rumah nari. Bagi sekalak nande si mbersihken kerina lemari sope wari Paskah, kalak Korinti ipindoken ngambengken ragi sindekah eme dosa gelah ia banci jadi cimpa simbaru. Ibas Judaisme, ragi banci ilambangken sebage dosa. Jadi, Jesus mpersingeti ajar-ajarNa nandangi ragi (ertina, pengajaren palsu) arah kalak Parisi ras Saduki. Ibandingken Paulus aturen si nggo mengketi kubas perpulungen Galati alu ragi si mengancam guna ngeracuni ia janah ngkernepken Berita Si Meriah si tuhu-tuhu. Ijenda me ragi sindekah e seri ras “pribadi sindekah” si nggo itadingken kalak sitek sanga ia iperidiken, janah si lalap ipulahina.

          Uga kalak Korinti banci ngambengken ragi sindekah, sementara ia memang lalit ragina? Ijenda lit contoh simehuli arah sada perintah Berita Si Meriah si ipalasi ibas arahen Berita Si Meriah. Ibas pengertin si lebih sederhana. Labo kebadian e ngenca tujun ibersihken ibas dosa nari; ibereken kebadian ibas Kristus eme titik tolakna. Paulus alu jelas ngataken praduga Berita Si Meriah: Kristus si kin anak biri-biri Paskahta nggo igeleh. Arah kematen biri-biri Paskah, kalak Israel i Mesir nggo iselamatken arah malekat kematen. Kristus eme “biri-biri Dibata” si sempurna “si nasapken dosa doni”. Kalak sitek ietehna maka ia nggo itebus “alu dareh si meherga, eme dareh Kristus si seri bagi dareh anak biri-biri si lalit cacatna”. Arah sie ia jadi kalak badia. Amin bage, tetap denga ia lit ibas jaman sindekah janah harus erjuang ngelawan dosa. Tapi kemenangen idatken labo arah usaha ntah pe keberhasilen manusia, labo arah kepatuhen ibas Taurat, tapi alu ngataken kemenangen Kristus ibas kiniteken.

          Jadi, kalak Kristen harus erpestas alu cara simbaru, sebage bangsa simbaru ibersihken. Ragi sindekah eme bagin arah kegeluhen dosa erkiteken sie ia nggo iselamatken. Sebage “cimpa simbaru” ntah pe roti si la itama ragi, kegeluhenna itandai alu kebenaren. Maksud Paulus eme kerina kegeluhen Kristen haruslah merupaken perayan pemere kebadian Dibata ras kemenangen Kristus nandangi dosa; la banci ibatasi ibas sada perayan sada wari ngenca.

          Pesan Paulus gelah ia ula erteman ras kalak perlua-lua. Sada pesan si seri amin pe la identik (bnd. 2 Kor. 6:14). Kalak sitek la banci ndarami teman geluh “”si la seri ras kalak si tek”. Mungkin kalak Korinti nggo salah menafsirken kata-kata rasul e, tempa-tempa ia ngataken maka kerina kalak perdosa harus isilahken ibas kegeluhen tep-tep wari. Paulus njelasken maka ia la ngerana kerna kalak perlua-lua ibas doni enda. Uga mungkin kalak Kristen ndalani kegeluhen si normal alu la bersinggungen ras kalak jahat? Guna nilahken ia, harus itadingkenna doni enda.

          Kai maksud Paulus ijenda: kalak sitek la banci erteman ras kalak singataken dirina Kristen, tapi mpersilahang pendilo Kristenna alu kegeluhen si dem alu dosa alu terang-terangen. Sada daftar singkat kerna kalak perdosa itambahken guna nggambarken macam-macam jelma si ikataken Paulus: perlua-lua, rangap, nembah berhala, pengisak-ngisak, pemabuk, tukang kompas. Kalak si bage si mpersilahang pendilo Kristenna harus isilahken bagi pinakit si njajat/menular. Ibas kalak Jahudi ras Kristen, persadan meja berarti pe persadan pertoton. Man ras-ras kalak sideban eme ungkapen persadan si ndeher. Man ras-ras kalak sideban ibas wilayah kalak si la nandai Tuhan Jesus banci ngelibatken penembahen berhala; eme sebabna penembahen berhala itambahken Paulus ibas daftar dosa. Kalak Kristen bahkan ilarang man ras-ras ras kalak singataken dirina Kristen, tapi ersalah ngelakoken dosa-dosa si bage. Bahkan lebih mehuli man bana guna man ras-ras ras kalak si la tek.

          Ngadili kalak si labo Kristen si la tergolong anggota perpulungen labo urusen Paulus ntah pe kalak Kristen sidebanna. Uga mungkin kalak Kristen ngadili ia si la banci iarapken meteh sura-sura Dibata, janah si lalit pengalamen ras kekelengen si mpebadiaken arah Dibata? Sebage “kalak si labo Kristen”, la ietehna rahasia Kinirajan Dibata.

          Kalak Kristen idilo guna mbedaken antara si mehuli ras si jahat, antara kebadian ras dosa, khususna ibas lingkungenna jine. PengadilenNa nggo erdahin ibas kegeluhen enda, tapi keputusen pendungiNa bakal isehken ibas wari pendungi. Jadi, kesimpulenna eme maka kalak Kristen harus mpelawes kalak si ngelakoken kejahaten ibas lingkungenna jine, labo terjeng kalak si ersalah erkiteken ngelakoken hubungen sumbang, tapi kerina kalak si terang-terangen erdosa. Tindaken si bage lalit hubungenna alu balas dendam, ntah pe alu sikap meganjang ukur janah ngadili nandangi kalak perdosa. Disiplin si bage lit lalap dua tujun ibas sie: keselamaten akhir man kalak perdosa, janah kebadian perpulungen si harus lit nandaken kesaksinna man doni. Erkiteken, uga mungkin perpulungen mberitaken kemenangen Kristus adi la ia nggeluh sebage anak Dibata si badia?

Pdt. Andreas Pranata Meliala, S.Th

GBKP Rg. Cibinong

Ogen  : Kuan-Kuanen 23:25

Thema :

“Bahanlah Megah Iakap Orangtuandu”

Kewajipen si penting orangtua eme mereken man anakna pengajaren ras persinget si termasuk pendidiken Kristen. Orangtua harus jadi usihen ibas kegeluhen ras perbahanenna sebage kalak Kristen, janah lebih mperdiateken keselamaten anakna ibas pendahin, profesi, pelayanenna ibas gereja ntah pe status sosialna. Orangtua bertanggungjawab guna mereken pendidiken man anak-anakna sinuate mpersiapken ia guna nggeluh bagi singena ate Tuhan. Si terutama bertanggungjawab mereken pengajaren alkitabiah ras rohani man anak-anak eme keluarga, labo gereja ntah pe sekolah minggu. Gereja ras sekolah minggu terjeng nampati pengajaren arah orangtua.

Inti pendidiken Kristen eme: pusuh sekalak bapa harus seh ku pusuh anakna gelah banci mabai pusuh anak e kubas pusuh Juruselamat (bnd. Luk. 1:17). Ibas mpebelin-belin anak-anakna, segelah orangtua ula ncidahken sikap pilih kasih, harus mereken dorongen bagepe persinget, iukumna perbahenen anakna si kin memang ngelakoken kesalahen, ngajarken man anak kerna nggeluh meteruk ukur, lemah lembut, saber, pusuh si dem kekelengen.

Bahan PA ngataken, “Malem ate bapa adi anakna erkemalangen man Dibata; ersurak pusuhna adi pentar anakna”. Dampak arah sikap anak si patuh nandangi kebenaren, kepentaren, ras pengarajen ras pengertin isehken ibas kalimat motif ibas ayat 24 ras 25. Istilah bahasa Ibrani si ipake guna kata “ersurak” ibas ayat 24b seri ras si ipake guna kata “megah” ibas ayat 25a, janah istilah bahasa Ibrani guna kata “malem ate” ibas ayat 24a seri ras si ipake guna kata “malemlah ate” ibas ayat 25b. Erkiteken ietehna anakna nuate ndalani kegeluhen si benar janah lit ibas peraturen ibas kegeluhenna. Anak e labo terjeng benar, tapi iperlengkapi ibas kerina pemeteh si ibutuhken ibas kegeluhen, dewasa ia erkiteken ngasup ertimbang ras milih apai si benar ibas kerina si la benar. La terjeng ietehna kerna peraturen nggeluh, tapi keberhasilen ibas kegeluhenna. Bapa siapai nge si la malem atena ngidah anakna bertumbuh jadi anak si pentar bagi si ikataken ibas bahan PA Mamre enda.

Habis manis sepah dibuang, bageme peribahasa ngandingken desken man tebu, kenca keri launa si ntebu iambekken me sampahna, bagepe anak-anak si la ngergaken orangtua ibas kinituanna. Sebab kerina gegeh ras kiniliten orangtuanta tupung ia nguda, nggo ipindahkenna, ibarat bank, nggo itransferna kerina gegeh, kiniliten bagepe pemetehna man banta anak-anakna maka kita bagi si gundari enda. Bahan PA Mamrenta enda ikawitken ras HUT Saitun GBKP. Kita ipersingeti guna tetap ncidahken kehamaten ras kekelengen man orangtuanta amin pe ia nggo metua. Orangtua dalam arti si lebih luas selaku nenek moyang ibas bahasa Indonesia igelari pe “leluhur”, siertina yang diluhurkan, yang dihormati dan dimuliakan. Istilah enda mere pesan man banta maka siigelari leluhur eme kalak si ndalanken kegeluhen si mulia, luhur, medolat. Emaka selaku anak kita harus beluh mpehagaken ras memuliaken orangtuanta, janah tupung kita nguda pe, segelah metua metunggung pepagi igelari leluhur harus pe kita ndalani kegeluhen si ermulia dingen mehaga, sendalanen ras uga cara nggeluh kalak bujur. Selamat HUT Saitun pe-28-ken GBKP.

Pdt. Andreas Pranata Meliala, S.Th

GBKP Rg. Cibinong