Invocatio      : “Pertoton Daud. O Tuhan, dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu” (Masmur 17:1)

Khotbah       : Pilipi 4:6-8

Tema

“Ertoto Mpegegehi Kula, Ukur ras Tendi!”

I.        PENDAHULUAN

Ibas paksa kita kote, ukur serbut erkite-kiteken melala perbeben, kecedan ate, sakit pinakit, ekonomi sulit, megati banci mabai kita jadi sada pribadi si ergegehna ertoto. Mabai kita erdeherna ras Tuhan. Tapi situhuna kegeluhen ertoto (aktifitas ertoto) labo hanya ilakoken tupung kita ibas ngenanami kegogon bagepe bas paksa melala perbebenta, tapi pertoton ilakoken ibas kerina paksa ras situasi kegeluhenta subuk sehat ntah sakit, subuk paksa kegogon ntah keriahen, pertoton harus tetap silakoken jadi tanda pengataken bujur dingen pengarapenta nandangi Tuhan.

II.        PENDALAMAN NAS

Surat Pilipi eme surat sinitulis Rasul Paulus si sangana ngenanami kiniseran erkiteken ipenjaraken i Kota Roma ibas tahun antara 60-63 M. Amin gia Paulus sangana i penjara tupung ia nulisken kitab Pilipi tapi tema mbelin sinitulisken Paulus khususna Pasal 4 eme tetap ermeriah ukur ibas Tuhan amin gia melala perbeben ras aru ate si man alanken ibas kegeluhen.

Ibas ayat 6 ikataken, “Ola aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur”. Selaku manusia Paulus pe tentu ngenani perbeben terlebih selaku Rasul Kristus si mbue ngenanami kiniseran, pernah menam mate erkiteken karam kapalna, ia pernah ipekpeki ras igudami, ia ipenjaraken tapi Paulus arah surat enda mpegegehi kerina kita si mbue ngenanami kiseran ras erbage-bage persoalen geluh. Emaka gelah kearun ateta bene sibaba kerina ku bas totonta man Tuhan. Ibas 1 Petrus 5:7 ikatakenna “Ampekenlah kerina kearun atendu man Dibata, sabap Ia kap si mperdiateken kam” (bhs. Indonesia, “Serahkanlah segala kekuatiranmu kepadaNya, sebab Ia yang memelihara kamu”). Lit ije kata ‘kerina/semua’ la setengah-setengah, labo seperteluna, labo ka 90 % tapi kerinana/semuanya, enda nuriken maka Tuhan tuhu-tuhu mperdiateken kita janah ngasuhi kita ibas kerina dampar geluhta. Ibas bahasa Inggris kata kekhawatiren iperinci alu ndauh nina: “all your anxieties, all yuor worries, all your concerns, once and for all” (semua ketakutan, kecemasan, kegelisahan, ketidaktenangan, segala yang membebani pikiran, sekali untuk selamanya). Ola nari ibaken entah tadingken kerina perbebenta tapi endesken/serahkan man Tuhan kerinana/semuanya, seh makana enggo menahang si akap ndalani geluh enda.

Ibas ay. 7 ikataken gelah ola mbiar janah ola aru ate kerna kai pe, ertina ibas kerina aspek geluhta em kap kula, tendi ras ukurta tetap i cukupken Tuhan adi kita tetap ernalem dingen nggit mindo man Tuhan ibas pertotonta. Emaka ulih ibas pengendesenta dingen pemindonta arah pertotonta man Tuhan, icukupkenNa dingen ijujuriNa kai siniperluken kita eme kap “Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Jesus” (ay. 7).

Jenari gelah kita banci ndatken dame sejahtera ibas geluhta harus lebe sibeneken perukuren-perukuren si negatif jenari merubah caranta rukur kerna hal-hal si positif dingen mehuli, alu bage kegeluhenta pe banci jadi mehuli. Ay. 8 ngatakenca, “kedungenna o senina-seninangku, ukurilah kerna simehuli, e me kerna si bujur, mulia, benar, bersih, mejile ras kerna kerina si patut ipuji”.

III.        APLIKASI

Jadi kalak kristen labo jaminen maka la nai kita ngenanami perbeben ntah masalah nggeluh, tapi jadi kalak kristen lit sada jaminen maka kita ipegegehi ngalaken kerina perbebenta arah kita erpengendes man Tuhan janah tek kita Tuhan nampati kita guna ndungi kerina masalahta. La nai kita erbebe sekalak kerna perbebenta alu ngandalken gegeh ras kemampunta tapi siendesken kerinana man Bapa si ni Surga. Siharus ilakoken kalak kristen ibas perbebenna em kap “reh ku adepen Tuhan”, amin gia melala denga kita adi lit perbebenta leben si dahi temanta, si teleponi janah curhat kita man bana sebab siakap banci kari iberena solusi tapi megati sebalikna banci ka nambahi si man tangkelen. Emaka si dahilah Tuhan bagi si ituriken bas Pustaka si Badia, “E maka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita” (Heber 4:16). Sabab tek kita i bas tan Tuhan kerina perbebenta la bo lit si mberatsa ntah menahangsa, bagepe tetap si gelem pengarapenta maka “mata Tuhan tetap nare kempak kita dingen mperdiateken kerina perbebenta janah Tuhan-ta ndauh kal belinen asangken perbebenta”.

Ibas sada tulisen thehealthsite.com, ikataken maka pertoton labo hanya sekedar uga caranta ngerembakken dirinta man Tuhan, tapi lebih asa si e ertoto mereken mbue kal manfaat subuk nandangi kesehaten kula, ukur ras tendi. Kegiaten ertoto pe banci mabai kita jadi pribadi si tetap rukur ras bertindak alu positif, lebih tenang ras terbebas arah erbage masalah kesehaten fisik ras psikis. Para ahli ngatakenca maka lit 4 ulih/manfaat sehat arah kita ngelakoken aktivitas ras kebiasan si teratur ibas  ertoto :

1.    Mencegah ras Mengatasi Stres

Ibas sada penelitin siilakoken para ahli psikis ibas tahun 2014 ngataken, maka ertoto mereken manfaat simbelin kal eme kap banci mencegah ras mengatasi stres. Seh makana arah gegeh pertoton banci mabai kita terhindar arah resiko depresi bagepe masalah-masalah psikis sideban. Pertoton banci mabai sekalak jelma reh tenengna ibas rukur, la mesukah putus asa tapi tetap rukur alu positif.

2.    Ertoto Erbahanca Ukur Meriah (Membuat Bahagia)

Ulih ertoto la terjeng banci mencegah ras mengatasi stres tapi banci ka maba ulih erbahan perukurenta tetap meriah. Para ilmuwan mempublikasiken ulih penelitinna ibas JAMA Networks Journal ngatakenca maka kalak si aktif dingen tutus ngikuti kerina kegiaten-kegiaten ibadah/kebaktin ras disiplin ibas ertoto, maka jelmana teridah lebih bahagia asa kalak si labo tutus ngelakoken ritual keagamaanna. La terjeng man bana saja tapi perukuren si dem keriahen pe teridah arah anak jabuna, seh makana jabuna jadi jabu si sempabu ras ermalem ate.

3.    Cawir Metua (Panjang Umur)

Ibas sada study penelitin siilakoken ilmuwan i Harvard School of Public Health ngataken maka kalak si religius ntah patuh eragama jenari ertoto secara rutin subuk i rumah ntahpe i rumah-rumah ibadahna sekalak-sekalak, secara umum nggeluh cawir metua ras gedang umurna geluh (memiliki umur yang panjang). Sebab kalak si tutus ertoto ras kegeluhen spiritualna pe sehat maka mabai dirina rukur alu teneng jenari enggeluh sehat, tenang ras bahagia.

4.    Mpegegehi Kula (Meningkatkan Sistem Kekebalan Tubuh)

Kalak si tutus dingen disiplin ertoto banci meningkatken dingen lit ibas ia sada sistem kekebalan tubuh yang kuat. Arah pemikiren si tetap positif, rukur alu teneng ras nggeluh meriah ukur (bahagia) dingen disiplin ertoto lit ibas ia sistem kekebalen tubuh si megegeh ras kuat. Kalak si tutus ertoto, saber dingen geluh alu tetap erpengendes man Tuhan banci terhindar arah resiko serangen jantung bagepe tekanan darah tinggi.

Pdt. Irwanta Brahmana

GBKP Runggun Surabaya

Invocatio      : “Pindolah, tentu ngalo me kam; Daramilah, tentu idatndu; Tuktuklah, tentu italangi pintun man bandu”(Mat 7 : 7)

Khotbah       : I Tesalonika 1 : 2 - 7

Tema

Ertoto ras Erdahin

I. Kata Perlebe

 Sada semboyan Latin si cukup terkenal ibas St. Benedict : “Ora et Labora; Berdoa dan Bekerja” enda rusur sibelasken ibas kegeluhenta selaku anak-anak Dibata. Enda pe jadi gelementa ibas ndalani tanggungjawab ras pendahinnta sitep-tep wari. Ija kita selaku manusia sue ras keberadaan jamanta genduari ituntut guna terus erdahin, tapi labo ka e ngatakenca maka banci silupaken tanggungjawab kinitekenta selaku manusia si terbatas eme ertoto man Dibata (ersembah man Dibata). Melala siidah ibas kinata maka erkiteken kesibuken ibas pendahin, lanai ingetna Dibata; Wari-wari epe akapna enggo kurang mbue; wari minggu epe lanai sempat lako ersembah man Dibata. Kalak si sadar maka kegeluhenna eme pemere Dibata, dingen sadar pe ia maka terbatas kel kengasupenna ibas ndalani kegeluhenna bagepe ndahiken dahinna tentu labo ia lupa tetap mindo gegeh ras kepentaren man Dibata, subuk arah toto bagepe ersembah ibas tep-tep kesempaten si lit.

II. Isi

Tesalonika eme ibukota Makedoni sipaksa e lit iteruh jajahen kekaisaren Roma. Perpulungen e eme bekas panteken Paulus ras Silas, tapi erkiteken cian ras nembeh ate kalak Yahudi sebab Paulus ras Silas berhasil ibas nehken pengajaren man perpulungen emaka ibahanna perlawanen. Erkiteken si e Paulus ras Silas lawes nadingken Tesalonika lawes ku Berea. Perpulungen enda ibas perkembangennya jadi perpulungen situhu-tuhu ngasup mereken usihen man perpulungen si deban si lit isekeleweta (ay. 7). Aminna pe perpulungen ibas paksa arus ngenanami kiniseran ras penindasen tapi Berita si Meriah e tetap banci ipembarken. Paulus arah suratna enda ersura-sura mpegeghi ras mpetetap ukur perpulungen segelah tetap nggeluh ibas kiniteken man Dibata dingen setia ibas ndalanken sura-sura Dibata. Ipujiken Paulus pe perpulungen enda erkiteken kiniteken ras kekelengenna (ay. 1). Kinigenggengen perpulungen ibas ngalaken kiniseran, kesetiaan encidahken kiniteken arah perbahanen, kinilatihen erdahin erkiteken keleng ate ras ketetapen ukur erpengarapen man Dibata e banci jadi erkiteken ulih Pendahin Kesah si Badia. La lit sitik pe Paulus mujiken bana kerna pendahinna ibas meritaken Berita si Meriah man perpulungen Tesalonika. Siidah kuga Dibata erdahin mpetangkas kuasa ras kemulianna dikune erdahin ras ertoto enda tetap sibahan jadi motto geluhta selaku anak-anak Dibata. Paulus idahikenna dahinna lako meritaken Berita Si Meriah itengah-tengah tantangen ras perlawanen ibas kalak Yahudi nari, bagepe la ia lupa guna tetap notoken dahin siidahikenna e segelah alu gegeh ras penampat Kesah si Badia mereken ulih simehuli (ay. 3). Gegeh ras kengasupenna ndahiken dahinta e banci saja erbaleng, tapi lit gegeh ras kuasa simbelin si erdahin radu ras kita, arah pertotonta, eme gegeh Dibatanta.

Matius 7:7 sijadi bahan invocationta eme bagin ibas khotbah Jesus iuruk sinuriken kerna karakter ras jati diri selaku anak-anak Dibata. Khususna ibas perikop enda eme kerna ertoto. Ertoto eme kesah kegeluhen kalak si erkiniteken, emaka kalak si lanai ertoto berarti kinitekenna mate. Lit 3 hal sijadi penekanen ibas ayat enda eme ; 1). Pindolah, ertina lit kesadarenta ras kinitekenta maka Dibata tetap megiken pertotonta, 2). Daramilah, nuduhken kerna pemindon situhu-tuhu si rehna ibas pusuh nari alu palas kesetiaan ras kepatuhen man Dibata, 3). Tuktuklah, mengacu kubas ketutusen ras kesetiaan guna tetap ertoto man Dibata amin pe kai sijadi sura-suranta e lenga tersehi.

III. Pengkenaina

1. Erdahin eme kearusen nggeluh selaku anak-anak Dibata. La ngena ate Dibata anak-anakna nggeluh ibas kekurangen, emaka kegeluhen enda arus tetap siperjuangken arah pendahinnta. Tapi arus maka siinget pendahin e eme pemere Dibata labo Dibata. Sebab melala gundari anak-anak Dibata erkiteken pendahin lanai er-Dibata; ngayak-ngayak pendahin lanai lit waktu guna ersembah/ ertoto man Dibata; ngayak-ngayak pendahin (kesuksesen/jabaten) piah cara sikugapape idalanken aminna pe lanai bagi sura-sura Tuhan.

2. Ertoto eme gambaren relasinta ras Dibata. Ertoto eme salah sada cara pengungkapen kinitekenta. Emaka ibas ertoto sipindolah kai si banci mpebelin kinitekenta man Dibata, labo kai sijadi sura-suranta saja. Melala anak-anak Tuhan si kecewa kerna ulih pertotonta sebab kai siipindona e la sue ras sura-sura Dibata.

3. Ertoto eme salah sada caranta guna mpersiapken dirinta pe ibas ngaloken kai saja pe siterjadi ibas kegeluhen enda. Kalak siertoto sope erdahin enggo memiliki modal guna ngalo-ngalo sikugapana pe. Amin pe bagi ukur, la e erbahanca ia meganjang rukur, anem pe la bagi ukur la ka e erbahanca ia surut ibas kiniteken man Dibata.

4. Ertoto ras Erdahin. Pertoton e jadi palasta guna banci ndahiken dahinta alu payo, mehuli ras sikap. Banci kap sibandingken ibas kita ndahiken dahinta ibenai alu pertoton ras lang. Emaka anak-anak Dibata sitetap ibas pertoton, pendahinna pe enggo pasti sikap; arah pendahinna ia jadi pasu-pasu dingen ibahanna pendahinna e pe jadi dalan guna naksiken kerna kemuliaan Dibata.

5. Ora Et Labora; totoken dahinndu, dahiken ka kai siitotokenndu e.

Pdt. Elba Barus

GBKP Runggun Bandung Timur

Invocatio      : “ertotolah kerna aku gelah banci aku ngerana alu mehuli, maka banci kupetangkas rahasia e bagi patutna” (Kol. 4:4)

Nats   : 2 Timotius 2:1-7

Thema

Notoken Laskar Kristus

Lit 2 sikap/dampak  si rusur siidah ibas kegeluhen  tupung manusia ngenanami kiniseran, sipemena manusia reh rembakna ras Dibata, si peduaken manusia reh ndauhna ras Dibata. 

Timotius ibas kinigudanna muat bagin guna meritaken berita si meriah, tupung rasul Paulus ibas penjara.  Tapi aminna pe rasul Paulus ibas penjara, ia tetap mengikuti perdalanen  pelayanen Timotius, janah rasul Paulus pe ngeteh maka melala kal tantangen si arus ialaken Timotius ibas ndahiken dahin pelayanenna.  Jadi sebagai rasul ras teman sepelayanan Timotius si lebih metua, Rasul Paulus tetap mpersingeti ras mpegegehi Timotius  alu surat. Janah renungenta berngi enda merupaken bagin surat sipeduaken si itulis Rasul Paulus man Timotius.

Ibas pengogenta, Rasul Paulus menyapa Timotius alu panggilan “anakku”, enda nuduhken maka Rasul Paulus ras Timotius memiliki hubungen sindeher. Jadi, pasti keleng kel ate Rasul Paulus nandangi Timotius bagi sekalak bapa si ngekelengi anakna. Tentuna kerina persinget e ertujun gelah Timotius selamat (megegeh ras megenggeng) ibas ngalaken tantangen-tantangen sireh. 

Ibas bagin suratna pe banci siidah maka Rasul Paulus menekanken kembali kerna kesetiaan ras ketutusen ibas ndalanken tanggung jawab eme tetap nerusken pengajaren si enggo pernah i begi ras ialoken Timotius guna  ipeseh ka tole man kalak sideban (ay.2). Enda nuduhken maka dahin Berita Si Meriah la banci ngadi I ipembarken aminna pe melala tantangen sibakal ras siarus ialaken Timotius. Tangtangen bagepe kiniseran labo hal si arus ihindari, tapi arus ialaken ras ihadapi (ay.3, …ikutlah) erkiteken kiniseran ras tantangen e merupaken proses si arus ialaken guna banci ndatken ulih. Kecibal e igambarken Rasul Paulus bali bagi:

·         Ay. 4: sekalak Laskar si sangana ertugas si arus focus ras patuh nandangi perintah gelah ngena ate komandanna. Timotius eme Laskar ras komandanna eme Dibata. Jadi guna nerusken dahin mberitaken berita Simeriah ibas doni enda ibarat bagi laskar sisangana erperang. Tentuna keselamaten Laskar e, labo terjeng hanya erkiteken keahlian ntah pe pemeteh ibas erperang, tapi pe arus tetap focus ras patuh man pimpinen.  Musuh pasti lalap ndarami kelemahen ras kesalahennta. Tapi enda labo hal si patut jadi kebiaren erkiteken pimpinenta eme Dibata, sindauh lebih erkuasa asangken kerina manusia bas doni enda, si pasti uga kita banci tetap menyenangken Tuhanta selaku komandanta.

·         Ay.5: sekalak siikut bas perlomban siarus patuh nandangi peraturen-peraturen bas perlomban.  Sekalak atlit sope lenga erlumba, pasti melala ndatken pelatihen-pelatihen. Keahlian tidak didapatka alu proses si singkat tapi ndekah. Kenca siap erlumba, sekalak siikut bas perlumban pe arus ka nge ia nggit patuh ibas peraturen-peraturen perlumban. Jadi la cukup alu kebeluhen tapi pe arus patuh man kerina peraturen-peraturen. Timotius singuda denga pe, arus tetap ngasup njagai dirina alu kepatuhen man aturen-aturen Dibata. La cukup hanya terampil tapi pe arus njagai dirina ndalanken aturen-aturen bas perlumban e. Tetap jujur, la erbahan kecurangen bagepe setia.

·         Ay.6: Sekalak perjuma si arus latih erdahin gelah banci ngaloken uih ibas juma e nari. Hal sipaling menyenangkan bagepe si paling inantiken sekalak perjuma eme masa rani. Tentuna gelah banci rani, sekalak perjuma arus erbintuas lebe ibas nuanken benih. Kenca isuanken, ijagai, ipelihara erkiteken melala ka nge tangatangen subuk ibas cuaca, bagepe hama sierbahanca benih sienggo isuan e banci turah she erbuah.  Sie ilakoken ibas waktu sindekah. Sebab labo banci kenca isuanken pepagi mis iperani. Perjuma arus metenget kerna kai si ibutuhken sinuan-sinuanna. Bagi mpebelin-belin sekalak anak. Tapi kerina kelatihen ras pengorbanen e, sai igalari alu keriahen paksa rani.

Jadi arah telu profesi enda banci siidah maka kerinana labo terlepas ibas perjuangan bas ndalani proses guna ndatken ulih si mehuli.  Guna ndatken ulih simehuli labo terlepas ibas proses si mehuli.

Terakhir,  Paulus ngataken maka persinget bagepe pengajaren siisehkenna man Timotius, arus iukuri ras iperdiateken guna I dalanken alu pengertin si enggo ibereken Dibata.

Tentuna kita banci ngidah maka sebagai Laskar Kristus perlu dukungen guna ndalanken tugas panggilenna. Secara umum, kerina kita eme Laskar Kristus si ertanggung jawab guna ncidahken  identitasta sebagai Laskar Kritus si maba berita Si meriah man doni enda. Secara khusus, Laskar Kritus eme kalak si nggit idilo secara khusus (pdt/pt/dk), terlebih enggo ka terpilih serayan Tuhan ibas periode si mbaru enda. Uga caranta mempersiapkan dirinta bagepe encidahken dukungenta? Tentuna selain persiapen ibas dirinta sendiri, maka kita kerina pe arus sitoto-toton bagi bahan invocatiota (kol.4:4) Erkiteken doni enda eme medan peperangen, arena perlomban bagepe juma si jadi inganta berkarya.

Pdt. Sripinta br Ginting

GBKP Runggun Cileungsi