Pekan Penatalayanan Wari 2 ; Kuan-kuan 23 : 19-35

Invocatio

“O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli” (3 Johanes 1:2)

Ogen :  Epesus 5:29-30

Khotbah : Kuan-kuanen 23:19-35

Tema : Mpekena-kena kula

Mejuah-juah ibas gelar Tuhan Yesus Kristus,

Kitab Kuan-kuanen si jadi bahan renungenta ibas pekan penatalayanen berngi pe duaken enda nuriken kerna ajar man anak si nguda , uga arusna ia nggeluh ibas doni enda.  Arus maka ia erkemalangen man Dibata ras mperdiateken kai si iajarken orang tuana man bana.

Kalak si patuh ras erkemalangen man Tuhan dingen megermet ras mediate nandangi ajar orang tua, anak e jadi anak kebanggan ras maba kemalemen ate man bapa ras nandena. Sebab orang tua ajar simehuli nge si iajarkenna man anak-anakna. Janah sura-sura orang tua ulin min pagi kegeluhen anak e asangken kegeluhenna. Emaka iajarkenna dingen ibabaina anakna e ngikutken kata Dibata gelah anak jadi bijak ibas ndalani geluhna.
ibas kuan-kuanen enda lit 30 pedah si man ikutenken janah ibas nas renungenta enda lit piga-piga si perlu idalanken ibas kegeluhenta:

1.      Jadilah pentar dingen megermetlah

Kepentaren maba sekalak jelma reh beluhna rukur dingen muat keputusen ibas geluhna.  Kepentaren mabai ia beluh mbedaken si mehuli ras si la mehuli, si payo ntah la payo, bage pe si erguna entah la erguna. Emaka nina, o anakku jadilah pentar! Kepentaren si imaksudken ijenda labo kepentaren secara doni, tapi kepentaren ibas Dibata nari eme hikmat si rehna ibas Dibata nari. Janah dalan guna ndatken kepentaren eme erkemalengen man Dibata (bnd. 1:7)

Kalak si pentar ibas Dibata mahan bana pe nggeluh metenget eme sikap hati-hati, tanggap, teliti, la menggo/ mekarus, bijaksana ibas kerina hal. Ertina labo kai pe asal merincuh minter ilakokenna tapi kalak si megermet pasti ia rukur lebe alu manjar-anjar. Kenca dung iukurkenna alu mbages me maka ilakokenna kai siakapna perlu ilakokenna (kuan-kuan karo: “siksik lebe maka tindes).

2.      Ola pertemani kalak pemabuk dingen merangap

Kalak pentar tehna ise temanna ergaul, metenget ia nandangi kalak si deban. Emaka labo atena erteman ras kalak pemabuk. Engkai??? Kalak pemabuk kerincuhen dagingna ngenca iukurkenna. Uga akapna senang ras meriah bage me ibahanna. Labo lit pertimbangen untung rugi ibas ia. Si penting “happy” nina kin anak si genduari. Kenca ia mabuk, ia nge akapna punana doni enda, ise pe labo diatena, perukurenna pe lanai payo, ranan si ndarat ibas babahna nari pe lanai beres. Erdalan pe lanai bo tehna kuja perdalanna. Emaka megati pe si idah kalak si enggo mabuk, medem pe lanai bo bas inganna medem tapi bas ingan si la payo, misalna parik. Kalak si mabuk ia akapna si payona, emaka enterem temanna erjengil. Arah si e si idah maka kiniseran kepe jadi sikerajangenna. Bahken terdauhen ikataken ibas oratenta enda kalak si bage  “tak-tak lanai bo ergonje”, sebab lanai bo lit sura-surana ndalanken simehuli ras ndahiken dahinna.

Bage pe tole ipersingeti gelah ola erteman ras kalak merangap. Adi ibas bahasa indonesia ikataken “pelahap daging”. Makan daging itu perlu ras sehat adi sue ras porsina. Tapi adi enggo merangap enda lanai bo payo. La banci lang ngerehken pinakit nandangi daging kula. Adi rikutken ahli gizi makanan si sehat eme 4 sehat 5 sempurna. Tapi si enda lanai idalanken erkiteken kerincuhen man daging. Megati selerata saja ngenca si ukuri lanai si inget kesehatenta. Lanai seimbang pola hidup dan pola makan. Emaka si idah jaman genduari enda melala kel pinakit daging kula erkiteken ketidak seimbangan hidup, erkiteken pola makan yang tidak sehat.

3.      Ola pertemani diberu perdenggal si pendahinna erlua-lua

Mbue genduari pinakit ras perjengilen turah erkiteken erlua-lua. Melala kalak hanya ngukurken kesenangenna saja, matana jadi penggurunna. Emaka gampang ia tergoda nandangi diberu si pendahinna erlua-lua. Alu rayuan si manis, terlena dingen mobak dilaki e ibahanna, seh maka lanai ingetna anak jabuna i rumah. Erkiteken kegeluhen si bage mpeturah perjengilen bage pe penakit  ibas kegeluhen manusia. Paksa genduari enda melala kel jelma terinfeksi penakit HIV/ AIDS erkiteken pergaulen ras cara nggeluh si la payo ras diberu perdenggal si dahinna perlua-lua. Diberu si bagenda desken siding si atena meneken kegeluhennta. Emaka metengetlah ras ola matanta jadi penggurunta.

Ibas wari peduaken pekan penatalayanenta si jadi tema man banta eme “mpekena-kena daging kual”. Iajuk kita gelah ngasup kita mpekena-kena daging kulanta dalam arti ngasup kita njaga dirita, selerata ras pergaulenta (cara hidupta). Adi erteman kita ras kalak si erkemalangen man Tuhan, pasti cara geluhna pe sehat. Adi ergaul kita ras ia labanci lang sedikit banyak cara hidupna mempengaruhi kita. Tapi adi erteman kita ras kalak si la erkemalangen man Tuhan, si lagu langkahna la payo i adep-adepen Dibata, cara hidupna pe la payo, bergaul kita ras ia, la banci lang ipengaruhina ka nge kegeluhenta, pola geluhta pe lanai bo sehat.

Alu bage nggeluhlah erkemalangen man Tuhan, jadilah pentar gelah ngasup kita njagai dirinta, pergaulenta ras kesehatenta. Ola matanta jadi penggurunta ras ola kerincuhen daging kulanta rusur si pejangjang.Seh maka ngasup kita mpekena-kena kulanta. Sebab kita eme ring-ring kula ni Kristus, janah kulanta enda eme ingan kesah si Badia ringan. Jagai dingen pekena-kenalah kulanta enda gelah arah kulanta enda pe terpuji gelar Dibata.

Pdt Evlida br Ginting

Rg  GBKP Klender