Suplemen PA Mamre : 1 Petrus 2 : 16 ; Tgl 04-10 Agustus 2019
Ogen : 1 Petrus 2:16
Thema :
“Kita Imerdekaken Kristus Guna Maba Kemerdekan”
Abraham Lincoln tubuh i Hardin County, Kentucky, 12 Februari 1809, ia mate i Washington, DC, 15 April 1865 ibas umur 56 tahun. Ia eme presiden AS pe-16-ken. Ia mimpin bangsana mengakhiri perang saudara Amerika, mpertahanken keutuhen bangsa, janah ia berperan menghapusken perbudaken. Ipedaratna sada dekrit si memerintahken penghapusen perbudaken arah Proclamation of Emancipation ibas tahun 1863, ras nambahisa kubas pasal ketige belas UUD AS ibas tahun 1865. Lit sada ungkapen Abraham Lincoln, nina, “mereka yang menolak kebebasan bagi orang lain, tidak pantas mendapatkannya bagi diri mereka sendiri”. Tentu kai si ilakoken Abraham Lincoln enda eme njagai kiniersadan bangsana ras menghapusken perbudaken patut ipuji ras iergai. Sabap kerina manusia eme tinepa Dibata si seri ergana. Labo lit si ganjang teruhen i lebe-lebe Dibata. Adi kin ia manusia denga, ia harus jadi teman, sahabat nandangi seninana. Kerina manusia sada ngenca “tuanna” eme Dibata. Emaka Dibata pe mbebasken bangsa Israel ibas perbudaken Mesir ras Babel nari gelah banci ia “merdeka” muji Tuhan ras nerusken kegeluhenna.
1 Pertus 2:16 bahan PA enda eme sada bagin “tugas kalak Kristen”. Ayat enda memang ngerana kerna kemerdekan kalak Kristen, janah kemerdekan enda tetap nge ikawitken ras tugas tanggungjawab selaku kalak Kristen. Janah lebih asa sie tanggungjawab tetap ka nge ikawitken ras keleng ate, keleng ate kalak si tek e eme awih keleng ate si ialoken ibas Dibata nari. Erkiteken sie Bapa Gereja Agustinus ngataken “kelengilah Tuhan janah bahanlah kai akapndu si pas man bahanen”. Ertina kalak si tek bebas ngelakoken kai pe atena sebatas perbahanenna e nuduhken kekelengenna man Dibata. Alu bage, kalak Kristen e merdeka tupung ia ngasup ndalanken kai sinisuraken Dibata. Banci kataken maka kemerdekan kalak Kristen labo ngatakenca maka ia bebas ngelakoken kai sura-surana, tapi bebas ngelakoken kai si arusna ilakokenna.
La kal ngena ate Tuhan adi lit bangsaNa si tertindas, ras saling menindas sada ras sidebanna. Tujun Dibata njadiken manusia labo gelah sapih-sapih kita manusia saling menindas, tapi gelah kerina manusia nggeluh muji Tuhan, mpehaga Tuhan, Dibata ngenca isembahna. Labo banci sekalak manusia pe jadi tuan nggancihken Dibata. Si eteh arah sejarah uga hebat raja Mesir, Alexander Agung, Adolf Hitler, tapi kerina penguasa enda nggo kernep, gegeh penguasa enda terbatas, tapi bangsa Tuhan tetap nggeluh. Bagepe sieteh uga hebatna masa penduduken Jepang i Indonesia, tapi bom atom Hirosima & Nagasaki ikut mpengaruhi bangsanta Indonesia merdeka. Ulanai sipediat dirinta enda jadi alat dosa jadi “tuan” nandangi temanta manusia. Lit deba jelma megah kal akapna adi banci iperentahina kalak sideban, nggit kalak isuruh-suruhna, lalit si pang ngelawan ia. Kalak si bage situhuna “lenga selesai dengan dirinya sendiri”. Langa ia nggeluh ibas sura-sura Dibata, lenga merdeka.
Pdt. Andreas Pranata Meliala
GBKP Rg. Cibinong
