Bahan : Nehemia 1:4-11

Tema  : Ertoto kerna masyarakat, bangsa ras Negara

1.    Kata perlebe

Kegeluhenta selaku kalak Kristen, la terlepas ibas kerukunan masyarakat ras kedamain ibas bangsa ras negaranta. Sebab keadaan sekitarta tentu lit pengaruhna nandangi kita. Kita akan lebih tenang ibas ndahiken aktifitasta sehari-hari. Saja adi sinen genduari realitas keadaan masyarakat, bangsa ras negaranta enda. Ija masyarakat  nggeluh ibas kemiskinen, ketidakadilen  ras sidbanna. Hal enda nggo tangkas siidah, uga dage sikap siharus silakoken khususna ibas pekanta sipelimaken enda.

II.      Isi

Bagi radu ras sieteh maka kitab Nehemia erat hubungenna ras kitab Esra. Sebab radu ras nuriken kerna kemulihen bangsa Israel ibas pembuangen nari. Saja kitab Nehemia lebih focus kubas pembangunan tembok Yerusalem sienggo runtuh.

Nehemia eme sekalak Jahudi siertugas sebagai pelayan pribadi raja artahsasta. Ia tading I kuta susan, si tupung e sebagai ibu kota Persia. Sewaktu senina Hanani reh ngunjungin ia emaka isungkunna kerna senina-senina kalak Yahudi sienggo mulih ibas pembuangen nari ras  Yerusalem ( Neh 1:2).  Janah Hanani ngataken maka bangsa Israel sangana ngenanami kiniseran simbelin janah tembok kuta Yerusalem enggo ka sontar ras pintu-pintu gerbangna lenga ipekena.( ay 3)

Megi kerna sie kundul Nehemia dingenna tangis. Lit piga-piga siidah bahwa ungkapen kesediahan hati yang mendalam alu kundul dingen tangis (Ezr 4: 7-23, Job 2:8, Maz 137:1). Engkai maka Nehemia she kel atena ceda ibas sontarna tembok Yerusalem ras pintu –pintu gerbangna ? erkiteken Nehemia eme sekalak si mencintai ras setia man Dibata. Ia ngidah bahwa adi tembok Yerusalem ras pintu-pintu gerbangna tetap sontar e nandaken maka kota e la megegeh. Nehemia keleng kel atena kutana terlebih arah kiniulin kuta Yerusalem teridah kemuliaan Dibata.

Nehemia la larut ibas ceda atena tapi ia lebih bersikap guna banci mabasa ibas totona man Dibata. E teridah ibas Ay 5-11 kerna ungkapen toto Nehemia man Dibata kerna bangsana Israel ras kerna sura-sura. Siidah bahwa Nehemia labo nutupi kerna kai siilakoken bangsa Israel sienggo erdosa erkiteken la patuh nandangi peraturen sini bereken Musa. Sinianggap e perwakilan Dibata. Ia la nutupi dosa  bangsana tapi pe mindo perkuah ate Dibata gelah min mulihi mperdiateken bangsa Israel adi bangsa e enggo menyadari kerna dosa-dosana. Alu e Dibata pe nampati ia gelah raja artahsasta pe banci mekuah atena ngenehen kecibal bangsana ras kuta Yerusalem. 

III.     Pengkenaina  

Arah prikopta sendah lit 2 hal sibanci sipelajari

•        Perhatin nandangi keadaan masyarakat, bangsa ras Negara

Kita kalak Kristen situhuna kalak si peduli nandangi keadaan masyarakat, bangsa ras negaranta. Erkiteken kita rusur nge encakapkenca ibas diskusi kelompok, jabu-jabuta, ibas gerejanta. Saja rusuren terjeng cakap saja tapi kurang kel kita ngasup mendalamisa sehingga la teridah kel maun-maun ulih percakapenta e. Nehemia ibas perjumpanna ras senina hanani I Yerusalem seh metedehna guna megi berita seninana kalak Jahudi ras kuta Yerusalem. Nggo waktuna kita mereken perhatinta nandangi masyarakat, bangsa ras negaranta enda, baik soal kemiskinan, ketidakadilan, politik ibas bangsa ras negaranta. Sebab impilaksi iman adalah cinta ras senang akan kemajuan orang lain ras bangsa ras negarana labo sibuk hanya ngukurken kemajunta pribadinta saja ras jabuta tanpa peduli nandangi kalak sideban.

 •        Sikap positip

 Melala kalak ngidah keadaan bangsa ras negarata enda bersikap cuek ras apatis. Seakan-akan tidak akan mungkin terjadi perubahen kai-kai pe. Adi kuan-kuanta ngatakenca sia-sia latih saja siakap. Seakan-akan masyarakat, bangsa ras negaranta enda ikendaliken oleh beberapa orang rikut peraturenna silabo banci nari iruntuhken. Memang tempa lit perpayona tapi labo tentu bage kebenarenna. Kita erlajar arah Nehemia ija tupung paksa e sangat tidak mungkin banci ia maba kiniulin man bangsa Israel. Tapi sikapna la apatis tapi justru ia ertoto ras erpuasa. Janah adi siidah Nehemia mewakili bangsana ngaku akan dosa-dosana ras mindo gelah mekuah mulihi ate Tuhan nandangi ia ras bangsana Israel. Ia njadiken dirina wakil bangsana mindo ras ncidahken pertobaten. Alu e siidah Dibata nampati ia. Kita pe sebagai jabu-jabu Kristen terus maba keadaan masyarakata, bangsa ras negaranta ibas totonta man Dibata. 

•        Membangun rencana guna kiniulin masyarakat, bangsa ras Negara

Nehemia kenca ia megi berita kerna seninana kalak Jahudi ras tembok Yerusalem, ceda kel atena. tapi la ia larut bas sie tapi ertoto ia janah ibas totona e ipesehna sura-surana gelah ekuah ate raja kempak ia. Jadi ia tidak hanya berhenti didalam sedih dan berdoa tapi ia pe muat rencana kai atena ilakokenna. Jadi kit ape la terjeng prihatin nandangi bangsa ras negaranta enda tapi pe ikut aktif muat bagin guna kiniulin masyarakat, bangsa ras negaranta.

                                                                  Pdt. Kristaloni Br Sinulingga

                                                                 GBKP Rg. Yogyakarta

Invocatio      : “Erkitekensi e erjaga-jaga dingen tutuslah kam i bas ertoto.”

(Epesus 6:18c)

Renungen      : Yohanes 17 : 20 – 23

Tema           : Ertoto kerna Gereja

1.   Kata Perlebe

Kita megati ertoto ras mindo man Tuhan, ngarapken pertotonta iperdiateken ras isehken pemindonta. Sekalenda kita ipindo guna emperdiateken pertoton Jesus ras nehken peraten Jesus siisehken-Na iba peroton-Na. Sebab arah pertoton enda danci siangkai tujun ras rencana Tuhan Jesus kulebe ibas majekken perpulungenNa.

Ibabo batu palas pengakun kiniteken nandangi Jesus Kristus me ipajekken Jesus perpulungen-Na. Ibas kita emperaktekken kinitekenta man Jesus me kita ersada. Sedekah Jesus Kristus jadi palasta ersaksi, ersada ras sikelengen maka arusna teridah harmonisi metunggung ibas perpulungenta.

2.   Empebagesi Pengangkan

Pertoton Jesus enda labo saja man ajar-ajar-Na sienggo tek man baNa, tapi pe man kalak-kalak sitek ulih berita simeriah sipeseh ajar-ajar e. Pertoton enda guna kerina kalak sikerajangen Kristus. Man kalak sienggo bengket kubas persadan ras Kristus sikap ngalo-ngalo kalak sinandangi bengket; bage pa kalak sibengket dancika menyesuaiken diri ras kalak sienggo ibas persadan ras Kristus. Sabab Tuhan meteh bahwa perpulungenNa pepagi la saja kalak Jahudi sitek man baNa tapipe kalak-kalak non-Jahudi sipersada-Na jadi rarasen-Na. Emaka ibahan-Na persiapen guna erbahan harmonisasi ibas empersada kerina bangsa jadi sada kula ibas Kristus.

Tujun Jesus segelah kerinana ipersada ibas sada kula eme sada perpulungen arah kerina ingan ras ibas kerina paksa. Maka sinipepulung Jesus enda eme perpulungen situhu-tuhu mbelin. Jesus tuhu-tuhu meteh ise saja sinandangi tek man baNa, itandaiNa me ise saja sikerajangenNa. Maka tujun pertoton enda jelas eme kempak kalak-kalak sitek man Jesus erkiteken ipilih Jesus jadi sikerajangenNa. Ijadiken Jesus maka kerina kalak sitek man baNa jadi sada kula ibas Jesus Kristus

Siniarapken Jesus segelah perpulungen enda igerakken Kesah Sibadia. Sabab Kesah Sibadia me sienjadiken tep-tep kalak sitek jadi anak-anak Dibata. Kesah Sibadia erbahan kiniersadan sibadia guna tujun-tujun sibadia. Perpulungen labo persadan politik siertujun duniawi. Kecenderungen erjengil erkurang erkiteken mengutamaken kemulian Kristus asangken ndarami kemegahen doni.

Segelah perpulungen ersada ibas iketen keleng ate Kristus, segelah sada ukur ras sada penggejapen ibas Kristus. Payo bahwa labo seh kubas perkara sikitik-kitikna pe ersada kerina. Saja ibas pengertin simbelgah-mbelgahna, umpamana ibas penandai nandangi Dibata, sada kata maka Dibata e lebih penting asangken kaipe ibas doni enda. Bahwa dosa manusia eme pelanggaren sisehkal kelekna erkiteken encurnaken kebadian Dibata. Ras Kristus eme teman simehulina erkiteken enggit Ia nebusi kita arah dosa. Dingen radu tek maka lit kegeluhen silebih mehuli asangken kegeluhen sigenduari enda. Kalak-kalak sienggo ngaloken penebusi dosa arah Kristus ngaloken biak-biak Kristus. Emaka ibas kita enggo lit pusuh simbaru simbabai kita ersada guna empermuliaken Kristus. Ersada ibas rencana ras tujun, siakui maka kemulian Dibata eme tujun siterutama.

“O Bapa, ertoto Aku man baNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me sinuruh Aku”. Pusuh Jesus terbeban nandangi kiniersadan kalak si erkiniteken, segelah kerina “sada kata ibas penandai nandangi Kristus”, alu bage mbereken kesaksin sibenar ras utuh. Buah simehuli eme ulih kiniersadan kalak sierkiniteken. Enda me sijadi bukti sejati kerna kebenaren kekristenen. Kiniersadan eme sijadi berita simehuli man doni enda, dingen peturah pengakun simehuli kerna Jesus.

Kiniersadan erbahan gereja megegeh dingen gegeh gereja eme kiniseradan. Maju pe gereja kami nindu tapi erbelat-belat, erpihak-pihak, demper saingen ras lit perjengilen; labo kalak tek. Arus sicidahken bukti nyata bahwa Kristus lit itengah-tengahta ras Kristus simemerintah nandangi kita kerina.

3.   Pengkenaina

Kita kerinaertedeh ate nandangi kiniersadan sienteguh bagi sinituriken Masmur133:1 “Andiko ulina ras senangna, adi kalak siersenina ersada perarih!” Kerina enda arus iupayaken segelah gereja la icedai alu perjengilen tahpe alu tujun kemegahen doni saja.

Kerna kiniersadanta ibas GBKP enda, adi siperdiateken enggo melala erbagenda kita. Bagi tempa-tempa enggo lit GBKP ala Kharismatik, GBKP ala Pentakosta, GBKP ala Betani ras sidebanna; erbage-bage gaya peribadahen dalanken kita. Lit potensi perpecahen kedepan, sebab masing-masing menganggap bahwa carana sipayona. Pantang ipandang, danci kita itengkingna adi sikritisi carana.

Arus lit kesepakaten bersama, kuja ateta sibaba GBKP enda. Ula min sipejangjang pusuhta guna ngataken “kelebihenta asangken kalak sideban”. Padahal kerina e lengabo teruji, masih dalam taraf uji coba denga kerina. Melalange si “demi” memenuhi selera jemaat, mengikuti trend masa kini, jile-jile ras uga maka siakap senang saja. Lanai mbages iukuri,bagenda kin singena ate Jesus guna silakoken? Ijenda me letak penting pertotonta guna ras-ras kita ndarami peraten Jesus nandangi perpulungenNa.

Tentuna siakui denga maka Jesus me simada gereja-Na, Jesus eme Kepala Gereja, kita enda terjeng persuruhenNa, pelayan-pelayan sisetia kempak Jesus. Adi kita meteruk ukur ibas adep-adepen Jesus maka kiniulin gereja teridah ibas kiniersadan.Ula min kita bengketk ubas “kesombongan yang terselubung dalam gaya ibadah yang wah,” atau “melalasa improvisasi”, padahal aturen ras tatanan sibenar ras terarah enggo ibereken man banta ibas Pustaka Sibadia. Ersada kita ibas ndalanken ras enggenepi Kata Dibata, e saja enggo merandal.

Pdt. Sura Purba Saputra, M.Th

GBKP Harapan Indah

Invocatio    : “Tupung  nandangi keri atena kesahku,  i je ertoto aku  man

BaNdu ; emaka IbegikeNdu  aku ibas RumahNdu sibadia nari   (Juna 2:7)”

Renungen    : Perbahanen Rasul 12:6-17

Thema        : Dibata Megiken Pertotonta

1.   Benakata

Senina ras turang, enggo ka seh paksana kita ngelakoken 10 wari ertoto, eme sada kegiaten sini i lakoken gerejanta GBKP setiap tahunna, janah kegiaten enda i lakoken dalam rangka nimai hari raya perayan nusurna Kesah Sibadia (PENTAKOSTA).

Emaka ibas tahun 2018 enda iangkat thema umum eme “Begikenlah pertoton ku erpalasken mazmur 102:2”. Arah thema umum enda ngingetken man kita kalak kristen maka lit nge kepe lalap kiniseran si man alanken ibas kegeluhen enda, bagi nina pemasmur ndai “ ula tundalken aku, tupung aku ibas kesusahen, tapi Pemasmur ngajuk  kita gelah bagi Ia, mindo pergegeh man Dibata, sebap i sadarina bas Dibata ngenca lit jalan keluar, janah sienda kerina banci i lakoken arah pertoton man dibata si mada kuasa. Arah ia ngenca lit jalan keluar, ras gegehNa lalit singasup nandingisa.

2.   Isi teks

Ibas teks Alkitabta berngi si peduaken enda teridah maka kenca enggo nusur kesah si badia melala kal  kiniseran-kiniseran si inanami ajar-ajar Yesus hal enda erkiteken ia harus nerusken misi Yesus ras pe amanat Yesus gelah niari doni enda. Kepeken guna i nehken pebelangken berita si meriah ndai la kepeken entabeh secara doni, tapi ndatken perlawanen ibas penguasa nari. Emaka ajar-ajar yesus kerina njumpai  kini seran e,  termasuk pe Petrus kerna dampakna. Termasuk pe perpulungen-perpulungen/kalak sienggo tek ras ngaloken Yesus pe ikut ngenanami kini seran e (Perbahanen Rasul  12 :1-5)

Hal enda singelakokenca  eme waktu  Herodes jadi Raja. Ia cukup kejam, nangkapi ras niksa kalak sitek  emaka perpulungen e erbuni-buni ia pulung ras ertoto man Dibata, gelah ula tereteh man penguasa paksa sie, Tapi sada hal si luarbiasa  si idah eme  kerina perpulungen  tutus kal ertoto, apaika  kenca enggo Pertus  enggo itangkap ras ipenjaraken ( Perbahann Rasul 14 : 4-5).Lanai lit sideban si iakap Perpulungen e guna mpegegehi  ia kerina  hanya toto ipenangkih man Dibata . Teridah kal hasilna, kuasa Doa sinipenangkih perpulungen  e sendiri bagepe nandangi kalak si i totokenna

Berngi paksa Petrus ibas penjara, ope denga isehken Herodes Sura-surana maka malaikat Tuhan hadir ku penjara ingan  Petrus itahan, Janah  keadaan  Petruspe cukup memperihatinken  ija  ia lanai erjubah,  janah i pe i iket alu rante besi, ikawal prajurit si erjaga-jaga. Secara manusia  lanai lit dalan pulah , nimai ihukum selebih  mberat

Tapi beda rencana/rancangan manusia (Herodes ras prajurit), langasup menghambat renca  Tuhan, emaka malaikat ndai  ndeheri Petrus, janah ise pe lalit simeteh  ras ngejabkenca  kehadirenna, termasuk pe Petrus, tapi malaikat jumpai  emaka,  Terang ersinalsal ibas penjara e, malaikat ngajak Petrus  gelah  keke, emaka rante singiket tanna  mosar.

Arah kehadiren malaikat Tuhan mabai  Petrus gelha nandingken  ingan e (penjara), alu labo  sadari Petrus ngikutken kai si iperintahken  malekat e. Malekat e  terus  manabi ia , emaka kaipe  lalit hambaten nandangi ia, pengawal pe la meteh, pintu  gerbangpe talang, teridah kuasa  Dibata  erdahin nandangi  Petrus, emaka ibaba ia  gelah banci jumpa ras perpulungen si sangana ertoto i rumah.

3.   Pengkanaina.

Kuasa toto sehkel luar biasana, emaka arah pertoton lit  gegeh ras kuasa sirehna  idur Dibata    nari. Hal enda banci si idah  arah Masmur 102 : 2 ndai maka pemasmur  ngataken : “Dengkehken min Pingko-pingkoku, minter min aloi   aku “ teridah kal mis  man perpulungen  sinotoken petrus , minterkal Petrus ndarat ibas penjara nari tanpa ganggun ras rintangen. 

Bagepe sidah Yunus, kenca ia itelan Nurung, ertoto Ia man Dibata”emaka begikendu  aku ibas RumahNdu  si Badia nari “ emaka arah pertotonna i utahken nurung ndai ia (Juna 2 : 7,10).

Bageme pe kita selaku kalak kristen kepeken labanci lang,  ngenanami kiniseran, erkiteken kita nehken  sura-sura Dibata, emaka  ibas  keadaan sibagenda rupana kita iajuk la putus asa, tapi erpengarapen arah pertotonta  man Dibata si meteh kai ateNa ibahanNa man banta, bagi perbahanen man Yunus ras Petrus.

Sebab nai nari seh asa gundari  tetap nge  lit kini seran e,  apaika erkiteken  kita kalak kristen si lit ibas doni enda harus jadi sira ras terang,  la banci lang  harus  sijumpai  sibage rupana.  Tapi la banci kta putus asa,  kita tetap ertoto, pribadi bagepe jemaat, sebab kuasa Dibata e  mujarapkel arah  kita ertoto.  Sebab asa gundari Dibata tetap megiken pertotonta.

“Pindolah tentu ngalo kam. Daramilah  tentu  idatndu, tuktuklah tentu  i talangi pintu  man bandu Matius  6 : 7”

Bapa- bapa  leluhur bas Padan sindekah nehken pertoto, Tuhan Yesus pe ertoto, Murid-murid pe ertoto, emaka kita pe wajip ertoto. “ Berdoa mengubah segalanya”

Selamat erpekan doa

Pdt  Andarias Brahmana