Bahan Pekan Penatalayanan hari ke VI, Matius 10 : 1-15

Ogen            :Josua 1:1-9

Khotbah        :Matius 10:1-15

Tema            :Nikapken peminpin simehuli

 

I.Bena Kata

          Kebebasen si ibereken Dibata man manusia,salah sada banci icidahken arah uga kita banci memilih/nikapken peminpin ibas kegeluhenta.Kebebasen si ibereken Dibata tentu berbeda nge ras kebebasen si lit ibas doni enda. Harus siangkai maka kebebasen si ibereken Dibata eme ibas ketergantungenta nandangi sura-sura Dibata,emaka kebebasen ngelitken peminpin pe bage ka nge.Bebas kita bertindak,bebas ibas memilih/nikapken peminpin,tapi ibas kebebasen enda,silakoken alu singena ateNa ras proses pemilihen enda erbahanca ermulia gelar Dibata.Kebebasen si ilakoken manusia si lalit hubungenna ras Dibata,labo kebebasen kristiani.Emaka labo asal kita nikapken,asal memilih peminpin tapi lit nilai pertanggungjawabpen man Dibata.

II.Isi

          Ibas perikop Matius 10:1-4 icidahken uga Yesus ndilo ajar-ajarNa si sepuluh dua kalak.Kenca Yesus ndilo kerina ajar-ajarNa,isuruhNa ajar-ajar si sepuluh dua enda berkat nehken berita keselamaten si enggo isaksikenna arah Yesus.Sebab tujun akhir ajar-ajar Yesus eme iutus jadi saksi Kristus.Ibas ayat 5-6 ikataken Yesus “ola kam bengket kubas daerah si labo kalak Jahudi ntah kuta-kuta kalak samaria,tapi dahilah kalak Israel biri-biri sienggo papak e”.Pemena Yesus nuruh ajar-ajar ku daerah kalak Israel,daerah sindeherna lebe.Banci si idah maka ibas pendilo ras pengutusen Yesus nandangi ajar-ajar memiliki tujun si khusus eme erkiteken enggo melala kalak Israel enggo papak kegeluhenna.Pengutusen Yesus jelas ras lit sasaren pengutusen emekap uga bangsa pilihen Tuhan/bangsa Israel mulihi ndalani kegeluhen alu payo.

          Ibas ayat 7-8 nuduhken kai kin dahin ajar-ajar ibas meritaken kataNa:pepalem kalak sakit,pegeluh kalak mate,pepalem kalak gadamen ras pelawes setan-setan.Tugas enda jelas ras nuduhken maka lit kuasa si ibereken man ajar-ajar guna ndalanken pendilo nehken berita simeriah.Ibas ayat 9-15 nuduhken maka gegeh ras kuasa Dibata sierbahanca maka ajar-ajar ngasup nehken berita simeriah.Nehken berita keselamaten enda labo erkiteken gegeh ras sura-sura ajar-ajar,emaka labo perlu ernalem man kai si lit ibas ajar-ajar,kai iakapna si meherga si banci menunjang pelayanenna.”ola baba emas,pirak ntah tembaga,ibas perdalanen ola baba bekal,baju ose,sepatu ntah ciken”(ay.9-10).Enda nuduhken maka Yesus ersura-sura maka ajar-ajar tetap fokus ku bas erti ras makna pendilo si isehken man bana,labo erkiteken buena erta ras sikapna persikapen (mbue program) bas ajar-ajar emaka berhasil ibas pelayanenna.Yesus ngigetken kerina mulihken ku bas kiniteken si paguh “sebab kalak si erdahin patut ngaloken kai si iperlukenna.Ertina Dibata si memperlengkapi ras singkuhi simereken kepentaren,uga arus bersikap,muat sada keputusen ras la gampang menyerah.Seh maka ibas pelayanen ajar-ajar lanai kearun ate si mempengaruhi tapi ketetapen ukur si rehna ibas Yesus nari.

III.Pengkenaina

          Tema ibas wari pe VI ken enda eme Nikapken peminpin si mehuli,hal enda berkaiten ras prioritas pelayanen GBKP 2018 eme “menumbuhkan dan meningkatkan kesadaran warga GBKP dalam bidang politik,hubungan dengan masyarakat dan pemerintah”,alu sada tujun jadi aron Dibata simaba kiniulin Dibata.Nikapken peminpin si mehuli jadi salah sada tanggung jawab kerina warga GBKP, lanai zamanna kita tidak peduli,la muat bagin,golput ibas pemilihen.Pentingna nikapken peminpin simehuli sendalanen ras kai si ilakoken Dibata si membebasken bangsa Israel arah perbudaken Mesir.Sipemena ilakoken Dibata eme nikapken sekalak peminpin Israel,emaka ipilihna me Musa,emaka iperintahkeNa Musa menghadap Firaun,mindo gelah bangsa Israel banci mulih ku kutana,bagepe tupung Dibata membebasken bangsa Israel ibas penjajahan bangsa Midian,Tuhan mempersiapkan Gidion jadi peminpin guna nerang kalak midian.

          Kesadaren nikapken peminpin penting man banta sebab lit ungkapen:Bila kita salah makan makanan kita menyesal satu hari karena harus menahan sakit akibat salah makan,bila kita salah membeli baju,kita harus menunggu satu bulan pada waktu gajian untuk membeli baju baru,kalau kita salah potong rambut kita menyesal selama 2 bulan menunggu rambut kita tumbuh kembali,kalau kita salah memilih peminpin kita akan menyesal selama 5 tahun menunggu priodenya habis,apalagi peminpin itu salah mengambil kebijakan mungkin seumur hidup akan menjadi beban bagi rakyat akibat kebijakannya.

          Tupung Dibata memilih peminpin,Dibata lebih mementingkan kualitas,labo jabaten ntahpe kiniliten.Kualitas sekalak peminpin banci si nen arah rekam jejak sope jadi peminpin.Yesus nuruh ajar ku daerah sindeher,ku daerah Israel.Berkualitas/mehuli ibas jabu,lingkungen ras sidebanna.Melala si idah peminpin ibas jabuna pe labo maba dame,bas kuta na pe labo mehuli,uga ngasup meminpin kalak sideban. Dibata ngatakenca “arus ipilihndu piga-piga kalak singasup jadi peminpin bangsa enda,kalak enda arus mbiar man Dibata,banci itegi ras la ngit ngaloken sogok”(Kel.18:21).Sada hal si utama ibas nikapken peminpin si mehuli eme sekalak peminpin arus lit ibas ia pusuh sibersih,sekalak peminpin arus mereken dirina nandangi kerina si ipinpinna labo hanya man kelompok tertentu.Secara sederhana peminpin simehuli arus lit ibas ia kemampuan untuk memipin (to lead),menuntun (to guide),mengarahkan (to direct),mengatur (to manage) ras mereken pengaruh (to influence).Dibata erngena ate man peminpin simehuli,nina Tuhan man Josua “Aku tetap ras kam,la ndigan pe kam ku tadingken,sabab kam kap si minpin bangsa enda guna ndatken taneh si enggo ku padanken (Jos.1:9)Peminpin simehuli ras benar iarak-arak Dibata ibas kegeluhenna.Mari radu ras kita nikapken/menentuken peminpin si mehuli guna kiniulin kegeluhenta.

                                                          

Pdt Rena Tetty Ginting

Runggun Bandung Barat