Invotion : “O TUHAN, sangap kal bangsa si nembah man baNdu alu rende, kiniulinNdu nalsali geluhna.” (Masmur 89: 16)

Khotbah :  Keluaren 20: 1-11

Tema   :  Lebekenlah Tuhan i Bas Kegeluhen Jabu!

Pengantar

Semakin sibuk seseorang, semakin sulit menentukan skala prioritas. Lit si ngataken harta yang paling berharga adalah keluarga, emaka gegehina kel encari piahna kurang waktu ras keluarga. Ibas erkiniteken tangkas man banta maka kita enda sikerajangen Tuhan. Kai pe si lit ibas kita eme pemereNa. Tapi la jarang terjadi, labo Tuhan jadi prioritas ibas kegeluhenta. Teridah arah jawaben anggota sektor adi ipersingeti kerna PJJ, nina njawabsa: “ue reh aku adi sempat”. Tidak ada orang yang tidak punya waktu untuk sesuatu yang menjadi keutamaan. Adi Tuhan jadi prioritas, pasti sisikapken waktu guna banci jumpa ras IA. Ibas Pekan Kebaktin Keluarga wari peduaken enda, tema si seh banta ‘Lebekenlah Tuhan i Bas Kegeluhen Jabu!”

Pembahasen Teks

Sepuluh Pedah Dibata si ibereken Tuhan man Musa i Gunung Sinai labo sekedar kumpulan perintah ras larangan si harus ihapalken, tapi gambaren hubungen TUHAN Dibata ras umatNa. Kenca ipilih Tuhan bangsa Israel jadi sikerajangenNa, enggo terbentuk hubungen. Janah pedah si sepuluh enda ibereken guna mpeteguh hubungen si enggo ibangun Tuhan. Ibenaken Tuhan alu mereken kata persinget kerna ise IA.  IA me Tuhan Dibata si enggo mbebasken bangsa Israel, si maba ia ndarat i ingan perbudaken Mesir. Ngkai maka Dibata arus mpetandaken diriNa? Kel 2: 23-25, mencatat kuga bangsa enda enggo kesah-kesah perban perbudaken janah nderkuh mindo penampat, pernderkuhna seh man Dibata, si megi sorana tangis, janah iinget Dibata padanNa emaka ibebaskenNa bangsa e. Gelah inget bangsa Israel min Tuhan si enggo nampati ia si ngerana genduari.

Bagin si pemena ibas 10 pedah enda mengatur kerna hubungen manusia ras Dibata (I-IV), bagin si peduaken mengatur hubungen manusia ras manusia (V-X). Si jadi bagin khotbahta eme bagin si pemena, pedah I-IV:

Pedah sipemena: “Ola isembahndu dibata-dibata si deban, tapi sembahlah Aku.” Erkiteken Tuhan enggo milih bangsa Israel, aruslah bangsa e setia man Tuhan. Nembah Tuhan, erpengarapen man Tuhan ngenca. Sedekah ia tading i Mesir enggo tandai bangsa Israel melala dibata, dewa, dewi, kemungkinan enggo ia lupa sada ngenca Dibata si patut isembah. Emaka itegasken Tuhan, “ula lit dibata sideban”.

Pedah sipeduaken: Ola bahan gana-gana ras ola erjimpuh nembah ku je. Masyarakat ibas jaman e semal erbahan patung dari kayu, batu, logam, jenari isembahna. Ia erbanca, ia ka  nembah ku je. Tuhan mere larangen man Israel. Bangsa pilihenNa la banci nggeluh bagi kalak si lenga nandai Dibata. Ibas pedah si peduaken enda tangkas konsekuensina, baik man si melanggar bagepe man kalak si setia. Si ernembeh ate man Tuhan iukum seh ku kesusurenna. Si ngikutken Tuhan tetap ikelengina seh ku kesusurenna.

Pedah sipeteluken: Ola pake gelar Tuhan Dibata guna tujun si jahat (bdk TB-LAI: jangan menyebut nama Tuhan, Allahmu dengan sembarangan). La banci ersumpah ibas gelar Tuhan tapi nuriken kebohongan. La banci pake gelar Tuhan jadi kutuken man kalak si deban.Gelar Tuhan e badia. La banci isalahgunaken.

Pedah sipeempatken: Inget wari Sabat janah pebadiaken wari e. Sabat (Ibrani: syabbat) ertina “istirahat” ntahpe “berhenti bekerja”. Sabat, wari pengadi-ngadin si man persembahken man Tuhan saja. Kerina arus istirahat, seh budak-budak ras asuh-asuhen pe arus ngadi erdahin. Tapi gelah banci menikmati wari Sabat pe tentu alu tutus ras erbintuas erdahin ibas si enem wari si bereken Tuhan guna ndahiken dahin. Tuhan pe enem wari njadiken doni, erdahin alu tutus Tuhan enem wari e seh maka kerina mehuli, tapi wari pepituken ngadi IA, maka wari Sabat e ipasu-pasu ras ipebadiakenNa. Wari istirahat e isediaken kita guna nghamati Tuhan. Ibereken jadi persembahen man Tuhan. Arus min enda ilakoken alu setia. (catatan: Seh asa gundari kalak Jahudi erwari Sabat ibas wari Sabtu. Tapi kita kalak Kristen, wari Sabat irayaken ibas wari Minggu, erkiteken Yesus Kristus keke ibas wari peteluken eme wari Minggu.)

Aplikasi

Tuhan si setia sering bertolak belakang ras manusia si la setia. Enggo pe si teh Dibatata percimburu, tetap denga lit ‘berhala’ si erbanca nembeh ate Tuhan. Berhala eme kerina hal si menghalangi hubungen manusia ras Dibata. Berhala-berhala ibas zaman Perjanjian Lama, bentukna gana-gana. Berhala modern ibas zaman enda salah sadana pendahin ras usaha. Contoh ibas kita GBKP, la seh 40 persen kalak si ku gereja ibas wari Minggu. Ku ja kerina anggota gereja? Lit denga anggota gereja, wari Minggu pe lit event kantor nari, lit meeting, deba la tertadingkenna usahana. Alu alasen wari Minggu e  mbue uang masuk, baik toko, warung, rumah makan, usaha kai pe, adi Minggu tutup toko enggo piga bene rejeki. Adi ku gereja lebe maka buka usaha, e pe rugi iakapna. Lupa ia maka Tuhan si mereken pasu-pasu. Ipindoken Tuhan sada wari, mereken waktu dua jam pe mberat siakap. Ibas pekan enda si evaluasi banta. Tema Pekan Kebaktin Keluarga sendah “Lebeken Tuhan i Bas Kegeluhen Jabu”. Dibata setia man anak-anakNa. Kita selaku anak-anak si arus lebih memprioritaskan Tuhan ibabo kerinana. Tuhanlah yang utama. Bapa, Nande, anak-anak i tengah jabu arus sada prinsip. Tuhan tetap jadi si utama. Alu bage, kai pe si idahiken kerina anggota jabu, ilakoken guna Tuhan ras alu gegeh si ibereken Tuhan. Benaken kai pe ibas pertoton. Mehuli kal adi tep-tep wari, erpagi-pagi ope berkat erdahin, sekolah, belanja ku pasar, rsd pulung lebe kerina isi jabu guna ertoto. Bagepe pang kita erban kesepakaten ibas jabuta, maka wari Minggu arus kerina ngutamaken waktu ku gereja. Ras-ras min sada jabu berkat ku gereja. Ula beda-beda gereja, melala gundari orangtua ngenca ku GBKP, anakna ku gereja si deban alu erbage alasen: terlalu pagi kebaktin i GBKP, atau sekalian refreshing ku mall. Urusan kiniteken lah jadi si utama. Lebeken Tuhan ibas kai pe. Siakuken nge kai pe si lit ibas kita eme pemere Tuhan. Kerina pendahin, usaha, sekolah, kuliah, banci lit ibas kita erkiteken pasu-pasu Tuhan. Ula min terlupaken Tuhan si mereken pasu-pasu e perban kesibukenta.

Ogen Jakup 1: 25-27 nekanken gelah kita si enggo megiken kata Dibata, la terjeng megi-megi tapi nggit ngelakokenca alu setia. Kalak si bage i pasu-pasu Dibata ibas kerina pendahinna. Kalak si eragama tapi la nggit nehken keleng ate, la njaga diri, sia-sia eragama. Emaka, kita si enggo ngaloken kata, arus ngelakoken kata. Bahan Tuhan Dibata jadi si utama, ula ban berhala-berhala termasuk berhala modern, geluhta mpermuliaken gelar Tuhan, janah hamati Tuhan alu nghamati wari Sabat. Lebih asa si e, ibas kerina dampar kegeluhenta, ersada min arih sada jabu njadiken Tuhan si utama, kai pe si ilakoken kita, kerina e guna Tuhan.

Pdt Yohana s nr Ginting

Rg Samrinda

Invocatio: Masmur 119 : 63

Khotbah: Epesus 2:19-22

Thema: Iranggut Jadi Sada Keluarga

I.                   Bena Kata

Tiap kalak tubuh arah sada keluarga. Tiap kalak tentuna ngarapken keluarga jadi ingan si aman ras nyaman man bana. Sada ingan ija kekelengen iterapken secara nyata. Ije iarapken litna sada penerimaan, dukungen, perlindungen, bahkan sada pengampunen. Tapi sipat alami manusia si erdosa rusur kal erbahan dukungen ibas keluarga jadi lebih kompleks ras bermasalah. Siinget arah turi-turin Kain si munuh agina Abel, turi-turin Jusuf si idayaken senina-seninana, Amnon si memperkosa Tamar, bahkan Tuhan Jesus pe pernah ianggap la waras arah keluargaNa nari (Mrk. 3:21). Seh asa gundari, kasus-kasus disfungsi ibas keluarga mbue sibegi ras sijumpai, bahkan pe ibas gereja. Pengarapen kerna litna penerimaan, dukungen ras perlindungen rusur kal jadi kekecewaan erkiteken litna penghinan, pelecehen, pengabaian, ras bentuk disfungsi sidebanna.

II.                Isi

Wari enda sioge sada turi-turin si luar biasa arah keluarga Jakup. Jusuf, ibas masa remaja idayaken senina-seninana, gundari jumpa ka ia kenca nggo ndekah lanai jumpa. Tapi, perjumpan enda tuhu menggetarken pusuh. Keadan Jusuf lanai bo sebage kalak si ipandang rendah tapi sebage penguasa nomor dua i Mesir, iteruh Firaun. Tentu banci saja Jusuf balas dendam man senina-seninana. Tapi la ilakoken Jusuf. Kai nge si erbanca Jusuf banci ngalemi ras la mbalas kejahaten senina-seninana? Pertama, Jusuf banci ngidah sudut pandang si lebih mbelin eme rencana khusus ras kiniulin Dibata. Kejadian 45:5 ncidahken uga Jusuf ngasup ngidah sada rencana ras kiniulin Dibata ibas mpekena-kena kegeluhen keluarga ras cikal bakal bangsa Israel. Jusuf ngidah maka rancangen Dibata kerina guna kiniulin (bnd. Kej. 50:20). Peduaken, Jusuf banci menempatken posisi si tepat iadepen Dibata. Ibas Kejadian 50, kenca Jakup nggo mate, senina-senina Jusuf reh ka mulihken guna mindo pengampunen erkiteken mbiar ia Jusuf balas dendam.

Bahan khotbah enda ngerana kerna pergumulen kalak Junani si nggo jadi Kristen mesera kal akapna ersada ras kalak Kristen si berlatar belakang Jahudi. Man kalak Jahudi, kalak si la Jahudi eme kalak kafir (la nandai Dibata). Enda erbanca kalak Kristen si la Jahudi jadi minder janah erbahanca kiniersadan pe reh serana terbangun ibas perpulungen. Wari enda mbue kalak mesera jadi Kristen erkiteken batasen-batasen si jadi penghalang, sierbanca mesera akap kalak jadi kalak Kristen. Gelah kiniersadan situhu-tuhu terjadi kita harus majekkenca ibas palas si benar. Ibas sienda Pustaka ngatakenca ibas ayat 19. Enda filosofi utamana. Ibas ayat enda kiniersadan terjadi, erkiteken kita enda eme warga kerajan surga. Adi kita warga kerajan surga berarti Tuhan me Rajanta. Kita sada ibas keluarga Dibata. Ijenda perpulungen Tuhan igambarken sebage sada keluarga. Ibas sada keluarga lebih mementingken sada hubungen si istimewa. Menggambarken sada hubungen si dem alu kekelengen. Ate Paulus ngataken man banta labo terjeng ngerana soal kepatuhenta man Dibata tapi uga kita meteh kekelengen temanta manusia. Sieteh maka temanta manusia eme seninanta (aku kap kam, kam kap aku). Enda merupaken gambaren si seh kal pentingna si menggambarken sada hubungen kekelengen ibas keluarga. Sayangna ibas jaman si gundari enda mesera kal ndatken hubungen si mehuli, erkiteken buena hubungen ibas keluarga si la mehuli. Lanai bo ibahan kekelengen e jadi tali pengiket ibas keluarga.

III.             Pengkenaina

Trauma rusur erbahanca luka-luka batin ibas waktu-waktu si la kentisik, seh maka perjumpan si terjadi banci membuka mulihi luka-luka batin. Pengalamen Jusuf isiksa ras idayaken senina-seninana nggo erbahan luka si mbages ibas pusuhna. Tapi, luka-luka batin e berhasil ipulihken seh maka Jusuf ngasup ngalemi kesalahen senina-seninana. Bahkan Jusuf mengembangken sada refleksi teologis kerna rencana ras pendahin Dibata si mpekena-kena kerina senina-seninana ras keselamaten jelma sinterem ibas bahaya kelihen. Arah tindaken senina-senina Jusuf sindayaken ia, iteki Jusuf maka Dibata e nggo maba Jusuf ku Mesir gelah ia jadi penyelamat man keluarga ras bangsa Mesir. Luka-luka batin Jusuf malem erkiteken la ia berorientasi ibas kejadin si pagit ibas masa laluna. Sebalikna Jusuf berorientasi ibas keselamaten Dibata  alu mengembangken sada teologi si palasna ibas kejadin masa lalu si pagit tapi iputusken alu keselamaten Dibata si terjadi ibas masa gundari enda.

Masalah-masalah komunikasi ras hubungenta ibas masa gundari enda rusur dengan terinfeksi ibas trauma-trauma ibas masa lalu. Luka-luka batin pasti mendorong kita guna mpebelang luka-luka e man jelma sinterem. Reh bagesna luka-luka e, reh mbagesna potensi guna ngelukai lebih mbages ka man kalak sideban. Erkiteken adi lalit pemulihen ras pembaharuan eme pengalemi ibas Tuhan nari, pasti turah me bibit kekerasen ibas kegeluhenta. Jusuf berhasil mematahken belenggu kekerasen, seh maka ngasup ia ngalemi ras memperlakuken senina-seninana si pernah niksa ia alu dem kekelengen. Erkiteken sie kekelengen eme palas kemerdekan si tuhu-tuhu ibas ndalani kegeluhen. Arah spiritualitas kekelengen e turah me keadilen, kesetaraan hak man kerina jelma, kegeluhen si harmonis alu buena kinierbagen ibas nggeluh enda.

Ibas Kristus kita nggo jadi manusia mbaru, erkiteken tiap kalak si erkiniteken ras ngaloken Tuhan Jesus jadi tinepa si mbaru. Keluarga Dibata eme keluarga  si terpimpin alu mehuli, sebab ibas kepemimpinenta ipajekken ibabo palas pengajaren rasul-rasul ras nabi-nabi si lit ibas KataNa. Paulus ngidah ras menggambarken kinierbagen sebage palas guna membentuk sada kiniersadan. Kinierbagen ibas perpulungen labo gelah erbahan anggota perpulungen membandingken sada ras sidebanna, labo ka guna erbahan persaingen ras perpecahen, tapi membentuk kiniersadan si iandingken sebage sada kula Kristus. Dahin gereja, eme bersekutu, ersaksi, ras melayani gelah reh turahna ras semakin berkembang adi kerina perpulungen la mpersoalken perbedan-perbedan si lit tapi memaknai perbedan e sebaga sada kiniersadan si seh kal ergunana man kalak sideban. Janah kedungenna, gereja si tuhut-tuhu eme gereja si nempatken Kristus sebage batu penjuru, penopang si erbanca “bangunen” e banci paguh pertedisna.

Ibas tahun 1945 kenca dung Perang Dunia II, kota Berlin ibagi empat: iteruh kekuasan Rusia, Amerika, Inggris ras Perancis. Ibas bulan Agustus 1961 ibangun me sada tembok si mekapal si gedangna lebih kurang 46 kM, si nirangken antara Berlin Barat si ikuasai Amerika, Inggris, Perancis ras Berlin Timur si ikuasai Rusia (Uni Sovyet). Kenca tahun 1961 antara kalak Berlin Barat ras Berlin Timur la banci jumpa. Tembok Berlin ieteh kalak kerina si lit doni, paling tidak pernah megi ceritana janah tembok enda jadi lambang persirang-sirangen. Pemisahen antara anak ras orangtua, pemisahen keluarga ras keluarga, pemisahen senina ras turangna. Tapi ibas bulan Nopember 1989 kekuasan komunis i Berlin Timur iruntuhkenna tembok e seh maka runtuh total. Janah ibas bulan Oktober 1990 Jerman Timur ras Jerman Barat jadi sada negara. Enda sejarah si luar biasa erkiteken tembok si jadi lambang pemisahen e runtuh. Iblis pe mbangun tembok tapi labo tembok si teridah tapi tembok si la teridah. Tembok e eme perubaten, pemisahen, permusuhen antara kalak Jahudi ras kalak si labo Jahudi, antara kalak si ncikep nteguh Undang-Undang Musa ras kalak si ikataken kafir. Seh maka lalit dame antara dua kelompok enda tapi justru lit permusuhen.

Gereja enda eme rumahta. Perpulungen enda merupaken keluarganta. Kita lanai bo kalak pertandang. Kita eme aron Dibata. Kita enda keluarga Dibata. Gereja mungkin mengecewaken. Gereja mungkin membosanken. Gereja mungkin ngelakoken kesalahen. Tapi bicara mekisat gia kita janah ndauh gia kita lawes, pasti mulihken ka kita ku gereja. Sebab gereja eme rumah Kristus si tersedia sebage inganta tading. Ije kita tading. Ije kita sada rumah ras Kristus. Memang gereja banci mengecewaken, sebab gereja eme komunitas si lemah, tapi ije kita justru nggejapken kekelengen Kristus si megegeh. Uga kin pe burukna gerejanta, enda me rumah kinitekenta/rumah rohaninta ras inganta tadingg. Erkiteken sie, perlu kita betah ibas inganta tading e. Janah gereja si maju ras dewasa itentuken arah keluarga si perukurenna maju ras dewasa. Adi keluarga e kin pe la dewasa kinitekennta tentu terbaba nge kubas gereja pengaruh si la mehuli e. Keluarga merupaken ingan pendidiken si mendasar man anak jabu. Keluarga perpulungen Tuhan iarapken banci membangun kerja sama si mehuli antara orangtua ras anak. Tujun utama pendidiken kiniteken ibas keluarga Kristen eme guna ngajarken anak-anak erkemalangen man Dibata, nggeluh ngikutken perentahNa, ngkelengi Dibata, ras ngelai Ia asa ukur ras gegehta lit. Pengarapenta gelah arah keluarga Kristen banci jadi usihen man kalak sideban. Barangkali la terlalu berlebihen adi ikataken maka jabu pe eme gereja. Adi jabu pe eme gereja, sie berarti jabu ntah pe keluarga eme “kula ni Kristus” ntah pe “Rumah Pertoton”. Kristus jadi pemimpinna janah orangtua jadi imamna, seisi jabu e jadi anggota kula ni Kristus si nggit jadi saksiNa. Erkiteken sie me arah pendahin Kristus “Iranggut Jadi Sada Keluarga”.

Pdt. Andreas Pranata S. Meliala, S.Th

GBKP Rg. Cibinong

Invocatio        : Erkiteken sie ertotolah  min perpulungen situtus, tupung ia ibas kiniseran. Gelah adi reh galumbang kesusahen,la seh man bana.Masmur 32;6

Renungen      : I Tesalonika  5 : 17-18

Tema            : Tetaplah ertoto

“Ertotolah katawari pe, janah katakenlah bujur man Dibata ibas sikugapana pe. Enda me singena ate Dibata ibahanndu ibas geluhndu selaku kam kalak si enggo ersada ras Kristus Yesus”.

1.     Ertotolah katawari pe=”Tetaplah berdoa”=”Berdolah sennatiasa”(BIS). Kata “kawaripe” ijenda labo berarti,  melasken pertoton lalap segedang-gedang wari tapi gelah perpulungen lalap ertedeh ate reh ndahi Tuhan, labo hanya ibas paksa-paksa tertentu. Adi meriah ukur dahi Tuhan, adi seh sura-sura dahi Tuhan. Bagepe banci saja ibas susah kal ije teridah tutus kal ate ndahi Tuhan. (Biasana ibas Ruang ICU ijem situtusna kal ertoto).

Ertotolah katawaripe ertina ula sempat bosan ertoto.

Ertoto  = kebutuhen labo kewajiban. Tuhu kita kalak sierkiniteken harus ertoto tapi labo e kewajiban

2.    Piga-piga pengajaren Rasul Paulus kerna ertoto:

Fil 4:6 “Ola aru atendu kerna kai pe, tapi ibas kerina pertotonndu, pindolah......rstna”

Kolose 4 : 2 “Tutuslah ibas ertoto, janah sanga kam ertoto ersikaplah dingen katakenlah bujur man Dibata

Efesus 6 : 18 “Bahanlah sie kerina alu ertoto, mindo penampat man Dibata....”

Kerina enda encidahken sikap geluh erpengarapen ras erpengendes man Dibata singaturken kerina ibas kegeluhenta.

3.  “Katakenlah bujur man Dibata ibas sikugapana pe”, ngataken bujur labo tergantung kubas situasi tapi ngataken bujur man Dibata aminna kai gia jadi ibas kegeluhen.

Dua kata “ertoto” ras “ngataken bujur”  Enda me siarus ilakoken adi ninta kita ersada ras Yesus.Alu kata sideban adi ninta kita kalak sierkiniteken labo kita tutus ertoto janah teridah kita jungut-jungut, kelsehen, merawa katawari pe, labo tuhu kita kalak sierkiniteken.

4.  Banci siperdiateken, cara guna ermalem ate eme alu tetap ertoto. Kita pasti lebih ermalem ate adi kita lebih mbue ertoto. Kita harus tetap ertoto ibas waktu-waktu si itentuken, janah e harus silakoken terus-menerus. Kita harus lalap ertoto, alu la ermedu-medu. Ertoto la erngadi-ngadi, seh maka pertotonta e jadi sada bentuk pujin man Dibata. Labo berarti maka kalak la banci erban kai pe erkiteken ertoto ia lalap, tapi si enda mpersingeti kita gelah ula e siban jadi alasen si erbanca lanai ateta ertoto man Dibata. Ertoto nampati kita guna lebih mpeturah kinitekenta, labo jadi penghambat kegeluhenta ibas erkiniteken, kerina pendahin si ibereken Dibata tuhu mehuli.

5.  Adi kita ertoto la erngadi-ngadi, maka labo kita kekurangen alasen guna ngataken bujur man Dibata ibas kerinana (bnd. Plp. 4: 6). Kita harus ngataken bujur ibas kerina keadaan, bahkan ibas kesusahen ntah pe ibas kemakmuren. Keadan geluhta mungkin labo bage kal burukna bagi si ukurken kita, tapi banci ka nge jadi lebih buruk. Kita ibereken mbue kesempaten guna nehken perbebenta alu meteruk ukur man Dibata, emaka labo lit alasenta mengeluh man Dibata, janah lalap lit alasenta guna ngataken bujur man Dibata.

6.  Seh ija ngen pentingna pertoton ibas kegeluhenta? Si sehken pertotonta ibas gelar Jesus Kristus, janah sieteh maka lit kuasa si seh kal belinna ibalik sada pertoton si seh kal sederhanana, adi pertoton e isehken tuhu-tuhu arah pusuh si mbages nari ras kiniteken sipaguh. Sieteh e payo, tapi seh ija nge aplikasina ibas kegeluhenta? Mbue kalak labo penting akapna ertoto. Ertoto ia adi la akapna sibuksa dahinna. Erdahin e penting, ngurus keluarga penting, bersosialisasi ras sidebanna penting. Tapi ertoto merupaken sada hal si pentingna kal ibas geluh enda janah la banci inomorduaken apai ka itadingken. Pertoton merupaken salah sada sarana komunikasinta ras Tuhan si seharusna menempati posisi ibas uruten si paling meganjang. Adi sangana kita sibuk harus kita berhati-hati gelah ula tergoda guna berkompromi secara pribadi ras Tuhan. Banci kita terjebak guna lebih mementingken ndungi pendahinta lebe asangken mereken waktunta guna megiken sora Tuhan. Kesibukenta banci ipakeken iblis guna melemahken ras membujuk kita gelah reh dauhna kita ras Tuhan e. Erbage-bage kearun ate nandangi kebutuhen-kebutuhen geluh i doni enda banci jadi celah si ipake iblis guna nehken sura-surana mpesirang kita ras Dibata. Kerina kearun ate ras kebiarenta merupaken pintu masuk si banci ipakeken iblis adi la kita terbiasa ngendesken kerinana man Tuhan arah pertotonta. Tuhan Jesus jine mengalami hal enda sanga Ia erpusa 40 wari 40 berngi i padang gurun. Sanga igejapNa melihe ije me iblis e melanacarken serangenna guna ncubai alu menawarken kerina hal si mungkin banci memuasken kebutuhen-kebutuhen arah sisi manusiawi (bnd. Mat. 4: 8-9). Tapi Jesus la tergoda janah tegas itulakNa pengajuk iblis (ay. 10). Arah peristiwa enda banci kita erlajar guna ngidah gelah ula kita terpengaruh ibas kemewahen ras kai si itawarken doni enda si erbanca buta/pentang kita secara rohani janah ngadi kita ngukurken perkara-perkara si rasa lalap (bnd. Mat. 6: 19).

7.  Andar Ismail ibas bukuna si erjudul “Selamat Berteduh: 33 Kumpulan Doa” ije ikatakenna ertoto e merupaken percakapen ras Tuhan. Pemahamen sibagenda pernah lit ibas ibadah gereja mula-mula (abad ke 2 s/d abad ke 5) fungsina sebage salah sada bentuk pendidiken agama kristen kalak dewasa (PAK Dewasa). Pertoton enda labo terjeng ibelasken  tapi terutama guna irenungken, ertina merenung janah ertoto bagepe ertoto janah merenung. Dua tindaken enda ipaduken ibas pusuhta si mbages nari janah seh ibas intina eme sada kebutuhen dasar tiap jelma, eme merasa tenang, merasa dame, rsd. Sebab nggeluh eme ingan ndarami ketenangen, kedamen, keteduhen, rsd. Eme sebabna kita berteduh/cio kempak Tuhan (bnd. Msm. 90: 1). Ertoto labo gelah kita “bermanis mulut” man Tuhan, tapi berterus terang ngataken perbeben kegeluhen si dalani kita. Ertoto iandingken bagi kalak si ndatken ingan cio ibas lasna matawari, angin meter ras galumbang si merawa si nderpa kegeluhenta. Kristus kap si mereken kita ketenangen, emaka ku Ia kita ngadu arah pertotonta (bnd. Msm. 71: 3). Emaka tetaplah kita ertoto.

                                                                                                                                Pdt. Iswan Ginting Manik

                                                                                                                                  GBKP Runggun Pondok Gede