Suplemen Pekan Doa ; Masmur 102 :1-22 , Hari ke Tiga 2018

 

Invocatio    : “Ampekenlah kerina kearun atendu man Dibata, sabap Ia kap si

mperdiateken kam” (1 Petrus 5:7)

Khotbah      : Masmur 102:1-12

Tema         : “Sehkenlah Pingko-Pingkondu!”

I. PENDAHULUAN

Kinata kegeluhen manusia si enggo ndabuh ku bas dosa eme kerina ngenanami perbeben, masalah ibas kegeluhenna, labo lit manusia nggeluh si la lit perbeben ntah masalahna. Subuk masalah sosial, ekonomi, pinakit, jabu (anak si gutul, bapa pe gutul, nande si la bagi nande) kerina pasti engkenai manusia. Seh maka lit sada kuan-kuan nina “manusia yang hidup tanpa masalah, itulah masalah utamanya”, sebab nina kuan-kuan enda ndai dua ngenca macamna manusia si la lit masalahna em kap ‘kalak adon/gila ras kalak si enggo tambat kambal-kambalna alias kalak mate’, lebih asa si e kerina pasti erbebe ibas masalah geluh. Emaka adi latih entah kelsehen gia kita erkiteken lit masalahta, katakenlah bujur man Tuhan sebab “sehat” denga kap kita, janah tatap ku teruh nin kambal-kambalta langa kepe “i tambat”.

Saja si jadi persoalen megati labo erkiteken mbelin kitikna perbeben sinihadapi kita, tapi uga sikapta ibas merespon perbeben e. Lit deba kalak meresponsa alu sikap negatif, putus asa ras bene kiniteken (la nai erkiniteken). Tapi si harus ilakoken anak-anak Tuhan ibas kerina perbebenna eme kap mengandalken Tuhan. Jenari mindo gegeh man Tuhan arah pertotonta alu pengarapen maka ibegikenNa pingko-pingkota.

II. PENDALAMAN NAS

Masmur 102 eme kap pertoton sekalak si sangana lit ibas kiniseran, tupung ia lemah entah kote subuk perukuren bagepe daging kulana ituriken kerina man Tuhan arah pingko-pingkona. Ibas masmur enda ituriken pe maka ibas kerina kecibal geluhta terkhusus ibas kerina perbebenta la banci kita ‘numpah padan’ ntah putus asa tapi tetap kita ernalem dingen ngarap man baNa.

Ibas pertoton enda, pemasmur mindo gelah ibegiken dingen ialoi Tuhan min kerina pingko-pingkona (ayat 2,3) janah masu-masu ia (bnd. Bilangen 6:26). Kelsehen e ituriken pemasmur erkiteken igejapkenna (identifikasi) lit si salah ibas geluhna paksa e, enda banci si idah arah kata-kata si ibelaskenna: ia sangana lemah, suin, janah terbuang (terkucil) bagi cimber, seh makana igejapkenna lit pinakit si mekelek ibas kulana emkap “dagingku melas bali ras api” (ayat 4), geluhna desken nggala bagepe dukut (ayat 5, 12), dagingna reh kertangna erdekahna desken kuling maluti tulan (ayat 6), kelungunen desken perik simeliar i gurun pasir, bagi kalingkupa i bas rumah si enggo runtuh bagepe bagi perik i babo tarum rumah (ayat 7, 8), igejapkenna tempa-tempa melala kalak si megombang nandangi ia (ayat 9) seh maka i akapna Tuhan merawa dingen nembeh nandangi ia seh maka i ukum Tuhan ia (ayat 11).

Megati manusia ibas ngalaken perbebenna entah masalah-masalah geluhna alu kelsehen, putus asa seh maka lit pe si enggo bene pengarapenna. Kelsehenna teridah ibas ia erlebuh dingen serko man Tuhan nina, “engkai maka aku singenanamisa Tuhan?”. Adi terjeng je denga nge si jadi kelsehenna langa bo jadi masalah simbelin kal, tapi dikune enggo seh ku bas meraguken keleng ate Tuhan dingen nalahken Tuhan ibas perbebenta jenari nadingken Tuhan (la nai tek nandangi Tuhan) enda merupaken puncak kelsehen manusia ibas perbebenna. Tapi pemasmur ibas kelsehenna pe tetap ia tek janah erpengarapen man Tuhan, maka ibegikenNa kap kerina pingko-pingkona.

 Ibas 1 Petrus 5:7 si jadi invocatio, ituriken alu gendek, padat ras jelas uga seharusna kita selaku anak-anak Tuhan ibas ngalaken perbebenta. Petrus nulisken surat enda nandangi kerina kalak kristen si sangana ngenanami kiniseran ibas kondisi ingan tading marpar merap (diaspora). Adi si perdiateken surat Patrus enda, ikatakenna “Ampekenlah kerina kearun atendu man Dibata, sabap Ia kap si mperdiateken kam” (bhs. Indonesia, “Serahkanlah segala kekuatiranmu kepadaNya, sebab Ia yang memelihara kamu”). Lit ije kata ‘kerina/semua’ la setengah-setengah, labo seperteluna, labo ka 90 % tapi kerinana/semuanya, enda nuriken maka Tuhan tuhu-tuhu mperdiateken kita janah ngasuhi kita ibas kerina dampar geluhta. Ibas bahasa Inggris kata kekhawatiren iperinci alu ndauh nina: “all your anxieties, all yuor worries, all your concerns, once and for all” (semua ketakutan, kecemasan, kegelisahan, ketidaktenangan, segala yang membebani pikiran, sekali untuk selamanya). Ola nari ibaken entah tadingken kerina perbebenta tapi endesken/serahkan man Tuhan kerinana/semuanya, seh makana enggo menahang si akap ndalani geluh enda.

III. APLIKASI

Jadi kalak kristen labo jaminen maka la nai kita ngenanami perbeben ntah masalah nggeluh, tapi jadi kalak kristen lit sada jaminen maka kita ipegegehi ngalaken kerina perbebenta arah kita erpengendes man Tuhan janah tek kita Tuhan nampati kita guna ndungi kerina masalahta. La nai kita erbebe sekalak kerna perbebenta alu ngandalken gegeh ras kemampunta tapi siendesken kerinana man Bapa si ni Surga. Siharus ilakoken kalak kristen ibas perbebenna em kap “reh ku adepen Tuhan”, amin gia melala denga kita adi lit perbebenta leben si dahi temanta, si teleponi janah curhat kita man bana sebab siakap banci kari iberena solusi tapi megati sebalikna banci ka nambahi si man tangkelen. Emaka si dahilah Tuhan bagi si ituriken bas Pustaka si Badia, “E maka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita” (Heber 4:16). Sabab tek kita i bas tan Tuhan kerina perbebenta la bo lit si mberatsa ntah menahangsa, bagepe tetap si gelem pengarapenta maka “mata Tuhan tetap nare kempak kita dingen mperdiateken kerina perbebenta janah Tuhan-ta ndauh kal belinen asangken perbebenta”.

                                                                                                                               Pdt. Irwanta Brahmana

                                                                                                                               GBKP Rg. Surabaya