Ogen      : 

1 Samuel 16:6-13

Tema      :

Jati diri Mamre ibas Pemilu (menghadapi tahun pelayanen 2018)

Tujuan    : Mamre jadi teladan bas Pemilu. Mamre ngasup milih pemimpin erpalasken kiniteken Kristen

Metode  : Diskuas (Ceramah)

I.           Kata Penaruh

Tangkas dingen jelas denga man banta Pemilihan umum kepala daerah (Pemilukada) i DKI Jakarta si lewat. Ras-ras kita metehsa maka talu gubernur si dekah eme pak Ahok ras wakilna pak Jarot. Sada pelajaren si seh kal mehergana man kerina rakyat Indonesia, terkhusus warga Jakarta. Gia tingkat kepuasan nangdangi pendahinna ibabo 70% tapi banci Ahok ras Jarot talu talu erkiteken terjadi politik si meleket dingen macik. Politik si macik enda enda teidah arah politik identitas si menekanken ras mpersoalken isu SARA (Suku, Agama, Ras dingen Antar Golongan). Arusna dingen idealna milih pemimpin berdasarkan program, ide, gagasen, visi ras missi tapi justru hal-hal sentimental ras emosional si ipeleken. Tahun 2018 enda pe lebih 100 ingan ngelakoken Pemilukada serentah janah tahun 2019 Pemilu (Presiden ras legislator) ilakoken secara serentak. Gelah lebih si lebih teridah tanggungjawabta nangdangi Pemilu si reh enda mari dage erlajar kita arah Kata Dibata.   

II.         Isi/ Tafsiren

TUHAN nuruh nabi Samuel lawes ku Betlehem lako milih ras nangkuhken sekalak anak Isai jadi raja nggantiken raja Saul si enggo itulak TUHAN. Emaka isuruh Samuel si Isai ras anak-anakna sidilaki gelah reh ku perjumpan si enggo irancangna (ayat 1-5). Kenca engggo reh ras pulung kerina, seh waktuna Samuel milih anak-anak Isai e. Iidah Samuel me anak Isai sintua gelarna Eliap. Ibas pengidah ras penilaian Samuel maka Eliap me jelmana. La lit pandangenna. Iakap Samuel maka Eliap e nge kari jadi raja. Tapi kai nina TUHAN man bana, “Ola nehen kuga gedangna ras kuga jilena rupana. La ia Kupilih, sabab pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna” (ayat 6-7).

Mulai si ndai nabi Samuel lanai ngehen man si teridah arah darat eme rupa, tempas, tampilen si banci erbahanca terkecoh dingen salah. Ia lebih erpenggurun man TUHAN ras ngenehen si la teridah eme pusuh. 6 kalak nari anak Isai reh ngadap man Samuel tapi sada pe lenga terpilih nina. Nungkun Samuel man Isai apakah enggo ije kerina anakna. Reh nina Isai maka lit anakna si nguda e me Daud sangana ermakan i mbalmbal. Emaka idilo me Daud. Reh nina TUHAN man Samuel, “Enda me kalakna, tangkuhkenlah ia” (ayat 8-12). Emaka itangkuhken Samuel me Daud jadi raja alu namaken minak ku takalna. Rempet Daud ikuasai Kesah Dibata janah mulai jenari Kesah Dibata e tetap ras ia (ayat 13).

III.          Aplikasi/ Pengkenaina

1.   Sebage warga Negara yang baik emaka kita nehken hak ras kewajipenta nangdangi bangsa ras negarata. Salah sada segi kegeluhenta ibas berbangsa ras bernegara eme kerna politik. Ibas politik enda si sehken ras si nyataken hakta eme nehken sorata bas Pemilu. Kita berhak memilih ras ipilih sue ras syarat-syarat si lit. Dage, nehken sorata lako milih pemimpin labo kewajipen tapi hakta. Selain ertoto eme notoken pemimpinta, bangsata, negarata kita pe idilo ibas pemilu si igelari pe pesta demokrasi. “Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabab adi sikap ia kam pe ikut sikap” (Jeremia 29:7). Tole ikataken Paulus nina, “Perlebe kukataken gelah isehkenndu sapaat, pemindon, pertoton ras pengataken bujur man Dibata guna kerina manusia; guna raja-raja ras kerina si erkuasa, gelah banci kita nggeluh senang dingen dame …” (1 Timotius 2:1).

2.   Khususna ibas kita milih tentu labo gelah enggo milih saja. Ibas kita milih tentu perlebe erpersukuten kita man Tuhan arah toto. Jenari arah Kata Dibata si jadi oratenta, kita iajari gelah milih alu kiniteken ras erpalasken kinitekenta man Dibata ibas Tuhan Jesus Kristus. Ola kal kita milih erkiteken penampilan luarna si man pilihen e. Ola terkecoh arah pencitran si ibahanna. Nina Tuhan arah KataNa maka si nehenlah pusuhna. Apakah pusuhna e idemi sura-sura Tuhan guna ngelai, mbangun ras mpekenaken si enterem ntah terjeng ngelai, mbangun, mpekenaken dingen mensejahteraken dirina, keluargana ras kelompokna saja. Si man pilihen eme pemimpin si memang terpanggil guna mewakili kita memperjuangken kesejahteranta ras keadilen man kerinana. Eme si igelari ‘pemimpin yang telah selesai dengan dirinya’. Labo justru ibas jabatenna e kari ia kesempaten meraup korupsi, rate-ate guns dirina ras konco-koncona saja.

3.   Pilihlah pemimpin si nasionalismena tinggi ras teruji, berkarakter baik, meteruk ukurna, professional, adil ras bersih. Emaka pernehenlah rekam jejakna (track record). Ola bagi milih kucing dalam karung. Ola erkiteken enggo lit pemerena ras oleh-olehna misalna ngalo ‘amplop’ ras sembako maka si pilih.

4.   Salah  milih baju banci mis iganti ras itukur si deban. tapi adi salah milih pemimpin si mehuli ras payo 5 tahun dekahna ngenanami kiniseran. Ula apatis ntah pe acuh tak acuh kerna Pemilu. Apai ka kita la milih alias GOLPUT. Lanai zamanna kita sinik. Adi sinik saja upapa pe si jahat menang ras merajalela.

5.    Tahun 2018 salah sada daerahta inganta tading ras nggeluh eme Jawa Barat (JABAR) ikut Pemilukada eme pemilihen Gubernur ras wakilna. Janah tahun 2019 kita secara serentak milih Presiden ras wakilna bagepe milih legislatif ras DPD. Tentu la si timai ntah pe jumpa ‘Hari H’ na saja. Mulai gundari nari pendidiken politik enggo arusna si benaken. Si mulai bas jabuta nangdangi nderahara ras anak-anakta, ibas sektorta, i gereja ras i lingkungengta. Si cidahken dage jati dirita selaku anak Tuhan si dewasa ibas erpolitik. Pakelah medsos  arah teknologi si lit guna nehken pendapatta guna milih si mehuli.

Pdt. Juris Tarigan, MTH (GBKP Depok – LA; 081316879945)

Ogen :

Kuan-Kuanen 2:1-8; 16:16

Tema :

Kepentaren Ergan Asangken Emas

Tujuan : Mamre erdiate ras erpemere nangdangi peningkaten pendidiken anak

Metode : Diskuas ras Aksi spontan

I. Kata Penaruh

Kebodohen ras kemusilen e me masalah si umumna iadapi negara-negara berkembang termasuk negarata Indonesia. Banci kataken maka buen denga kalak la sekolah ras bodoh asangken kalak si erpemeteh ras pentar. Kebodohen erbahanca murah kal itokohi ras ibodoh-bodohi kalak. Erkiteken kurang pemeteh me maka mesunah ipecah-belah kalak. Kebodohen erbahanca sulit terarapken kemajun. Sebalikna, adi erpemeteh ras pentar tentu megegeh ras beluh, pembangungen pe erdalan alu lancar. Kentaren ras pemeteh erbanca kita terhormat ras isegani kalak. Kita sebage anak-anak Tuhan la banci kem. Kai banci si ban guna nampati anak-anakta, sekeleweta gelah erpemeteh ras pentar. Mari erlajar kita arah kata Dibata.

II. Isi/ Tafsiren

Kitab Kuan-Kuanen termasuk kubas kitab hikmat/ kepentaren ibas kalak si pentar nari. Ibas kitab Kuan-Kuanen sijumpai pernyataan si gendek, padat ras jelas kerna erbage situasi ibas kegeluhen. Kitab Kuan-Kuanen irancang lako ndatken perhatin ras mabai kita gelah rukur. Kuan-Kuanen mereken pengertin, perspektif ras pentunjuk, labo peraturen-peraturen si keras dingen kaku. Kuan-Kuanen mpebetehken bahwa sada prilaku/ perbahanen tertentu biasana mereken asil si mehuli; ras perbahanen si debanna mereken asil si la mehuli. Tentu kalak si pentar pasti milih perbahanen si perlebe ndai. Kalak bodoh/ lenge ngenca si milih perbahanen si peduaken.

Kuan-Kuanen 2:1-8 si jadi ogenta lit ibas judul perikop ‘Guna Kepentaren’. Arah Kata Dibata si jadi ogenta enda si datken dua pelajaren. Sipemena: Pendilo guna ndatken kepentaren (ayat 1-4). Penulis Kuan-Kuanen enda ndilo manusia/ kalak si megisa lako mpelajari si ikatakenna, janah la ngelupaken kerina si enggo iturikenna. Guna ndatken kepentaren maka arus kepe megermet nangdangi kepentaren e jine jenari encubaken ngantusisa (ayat 1-2). Manusia arus aktif guna ndatken pemeteh ras pengertin si icidahken arah kata-kata ‘pindolah, seksekilah, daramilah, ayakilah’. Manusia arus ndarami ras ngayaki pemeteh ras kepentaren desken emas ras erta si terbuni (harta karun). Pemeteh ras kepentaren e desken emas ras erta-erta si meherga si terbuni (ayat 3-4). Terlebih ibas 16:16 ikataken maka kepentaren ras pemeteh e ndauh ergan asangken pirak ras emas. Adi erga pirak ras ermas tergantung berat ras karatna. Tapi pemeteh ras kepentaren la bage. Emas ras pirak la ngasup nukur pemeteh ras kepentaren, tapi pemeteh ras kepentaren ngasup nukur melala emas ras pirak. Jelas dage man banta maka ndauh ergan pemeteh ras kepantaren asangken emas. Sipeduaken: Ingan ndatken kepentaren (ayat 5-8). Perlu jelas ieteh manusia bahwa ingan ras ulu eme arah erkemalangen man TUHAN. “Guna ndatken pemeteh, si pemena si la banci la lit ibas kalak eme mehamat dingen erkemalangen man TUHAN. kalak lenge la nggit mperdiateken kepentaren dingen la ia nggit erlajar (1:7). Arah ndatken pemeteh ras kepentaren me maka si eteh si eteh kai ertina erkemalangen man TUHAN, jenari si dat pemeteh kerna Dibata (ayat 5). Tuhan si empuna pemeteh, pengertin ras kepentaren. TUHAN si mereken kepentaren e man manusia (ayat 6). Man kalak si benar ras bujur iberekenNa penampat ras ampang-ampang. Ia si ngkawali kalak si bujur perbahanenna janah iampang-ampangiNa kalak si tutus man baNa (ayat 7-8).

III. Aplikasi/ Pengkenaina

1. Mamre la banci lang terus ertoto ras erusaha gelah tetap megermet, erlajar lako ndatken pemeteh, pengertin ras kepentaren guna keriahen ras kemalemen nggeluh. Ula meter merasa puas nangdangi pemeteh ras kepentaren si enggo lit. Tambah-tambahilah pemeteh ras kepentarenta alu mehamat ras erkemalangen man Tuhan. Pemeteh ras kepentaren e jadi pengawal ras ampang-ampang si ibereken Dibata man banta.

2. La terjeng kita ngenca erpemeteh, erpengertin dingen pentar singkawali ras si ngampang-ngampangi geluhta tapi pe anak-anakta. Adi kita ngenca jenari anak-anakta la erpemeteh ras pentar banci kataken kita bapa si gagal, la sangap. Emaka mari radu ras (ras-ras) anakta kita erlajar nambahi pemeteh ras kepentarenta (bnd. Josua 24:15b).

3. Janah la terjeng anak-anak bas jabuta (anak-anak biologista) ngenca erpemeteh dingen pentar tapi pe anak-anakta si lit ibas gerejata (anak-anak kiniteken). La seri kerina gegeh ras kengasupen orangtua/ Mamre bas gerejata. Lit si megegeh, lit si kurang gegehna. Lit si mbue buatenna lit si sitik ngenca buatenna. Rutang si megegeh nampati si kurang megegeh. “Tapi gelah ola si tualen kelebihen si lit ibas kam gundari ras kekurangen si lit ibas kalak e gundari. Kune denggo kelebihen ka kalak e, i aka denggo encukupi kekurangenndu. Alu bage lanai situalen…” (2 Korinti 8:13-15).

4. Ibas gerejata terkhusus bas kategorial Mamre lit program beasiswa lako nampati biaya pendidiken man anak-anakta si tutus erlajar, berprestasi tapi orangtuana kurang gegeh secara materi. Ula kal ia putus/ ngadi sekolah ras la seh cita-citana erkiteken la cukup biaya bas orangtuana nari. Arah seh sekolahna ras tercapai cita-citatna erguna ia man masyarakat, bangsa ras negarata terlebih nangdangi Kinirajan Surga.

5. Pendidiken anak-anakta e me investasi si mbelina kal ibas geluh enda. Silahkan ras iajuk kita lako berinvestasi bas barang subuk barang la bergerak bagepe si bergerak (misalna: emas, taneh, rumah, juma, kebun, rsd. Tapi si terpenting kal e me pendidiken anak-anakta seh maka ia erpemeteh, erpengertin dingen pentar. Ia berilmu ras beriman. Enda me sierbahanca kita ras anak-anakta jadi pasu-pasu man doni enda (bnd. 1 Korinti 3:9).

Pdt. Juris Tarigan, MTH (GBKP Depok – LA; 081316879945)

Nast :

Perbahanen Rasul-Rasul 11 : 19 -30

Thema:

“Gereja sikutandai”

1. Sejarah perdalinen berita simeriah, sada hal simeresa ngantusisa sabab pada umumna Gereja bertumbuh labo arah keadan simenyenangkan, labo tupung kita nggeluh ibas zona nyaman, kerina bagi ukur, lalit tantangen subuk ibas nari bagepe idarat nari. Tapi Gereja bertumbuh ibas “tantangen”, ibas “penganiayaan”, ibas penderitaan.

Terjadina peniksaan man jemaat mula-mula i Jerusalem erbahanca kalak sitek lawes Penike, Kiperus ras Antiokia. Payo bagi “nebeng lau maler” adi lau itebeng maka lau e bakal ndarami ingan maler ku kawes tah ku kemuhen.

2. Ibas teks-ta enda ituriken arah dahin berita simeriah e ”enterem kalak sitek”(ay.21 ras ay.24. Perlu sigargari kuga perdalinen perpulungen enda, kai sinilakokenna?

- Tetap meritaken berita simeriah e (ay.20)

- Kiniersadan arih ibas nehken berita simeriah e (ay.22)

- Nggeluh ibas pengajaren (ay.26)

- Nanpati rikutken kengasupen(ay29)

3. Ichwei G.Indra ibas buku Pola Gereja PB, nuriken 5 Bentuk Pelayanen, guna mabai kalak tek man Yesus eme:

- Pelayanan MATA

Ngidah /meteh kecibal teman /Saling memperhatika (Ibrani 10 : 24 . Dan marilah kita saling memperhatikan supaya kita saling mendorong dalam kasih dan dalam pekerjaan baik.)

- Pelayanan KATA

“Mereken dorongan, mereken semangat/Kata-kata yang membangun.(Kolose 4:6. Hendaklah kata-katamu senantiasa penuh kasih, jangan hambar, sehingga kamu tahu, bagaimana kamu harus memberi jawab kepada setiap orang.)

- Pelayanan TELINGA

Ngasup megiken teman, la minter reaktif (Jakobus 1:19. Hai saudara-saudara yang kukasihi, ingatlah hal ini: setiap orang hendaklah cepat untuk mendengar, tetapi lambat untuk berkata-kata, dan juga) lambat untuk marah

- Pelayanan TANGAN

Nampati teman, Sisampat-sampaten (Galatia 6:2. bertolong-tolonganlah menanggung bebanmu! Demikianlah kamu memenuhi hukum Kristus.)

- Pelayanan KAKI

Ndahi/Berkunjung/PRT-Perkunjungen Rumah Tangga (Roma 1:10. Aku berdoa, semoga dengan kehendak Allah aku akhirnya beroleh kesempatan untuk mengunjungi kamu)

Pdt.Iswan Ginting Manik

HP.0812.7020.9020