Nats :

Perbahanen Rasul-Rasul 27 : 21 -26

Thema :

“TETAPKENLAH UKUR AMIN LIT PERBEBEN”

1. Sedekah kita nggeluh i doni enda, perbeben ras persoalen pasti megati si jumpai ras si hadapi, banci berupa sakit-pinakit, kegagalan ntahpe perbahanen si la mehuli si ilakoken kalak man banta.

Uga pe megegehna daging kulanta, uga pe penjaganta nandangi kesehatenta, i bas sada paksa banci jadi bangger ka kita. Bagepe i bas perdalanen kegeluhenta, uga pa pe raturna si ban, lit kemungkinen i bas sada paksa kita menghadapi perbeben ntah pe persoalen.

 2. Sanga perbeben nderpa kita, megati labuh kita, putus asa, hilang harapan. Banci jadi turah i bas ukurta, maka kita me si liahna i babo doni enda, seolah-olah kita ngenca si ngenanmi persoalen. Kita menganggap kalak si deban lebih beruntung, lebih bahagia ibandingken kita sisangana ngenanami persoalen. Lupa kita, maka si penting eme labo lit entah lang persoalen i bas geluh ta; kitik ntah galang perbeben si nderpa kita. Si terutama eme uga kita bersikap ras merespon adi kita ngenanami persoalen; adi sangana perbeben nderpa kita. Apakah si sikapi ras si hadapi alu dewasa, alu dem kiniteken ras berusaha ndarami pengertin ntah pe hikmat i bas persoalen si i hadapi? Ataukah si sikapi  secara kekanak-kanakan, dalam arti jungut-jungut, merawa, ndarami ise si salah (mencari kambing hitam) ?

 3. Bas Perbahanen Rasul-Rasul 27:21-26, icidahken uga Rasul Paulus menyikapi perbeben siihadapina. Aminna pe, usulen si iberekenna ndube (ayat 9b-11) la ialoken seh maka ia ras kerina kalak si ras ia i bas kapal e i dempar angin si merawa, la mabai Rasul Paulus jungut-jungut ras nalahken kalak e, terlebih  perwira Romawi si tergelar Julius, si teken man kapten kapal asangken cakap Rasul Paulus. Malahan, Rasul Paulus mpetetap ukur kalak si bas kapal e (ayat 22 – 25). Rasul Paulus ngatakenca, maka aminna gia ia kerina si i bas kapal e lit i bas kiniseran, tapi tetapkenlah ukur, labo sekalak pe si bas kapal e bene, kapal e ngenca pagi bene. Pang rasul Paulus bage ngerana erkiteken idahi malekat Dibata ia ras malekat e ngerana man Rasul Paulus. Nina malekat e, maka Rasul Paulus la banci la seh ku lebe-lebe Kaisar,  janah erkiteken perkuah ate Dibata arah Rasul Paulus, kerina kalak si lit i bas kapal e pe selamat. Tek Rasul Paulus maka kai siikataken malekat e pasti jadi. E mabai Rasul Paulus ertetap ukur ngadapi perbeben si nderpa ia ras ngajuk teman-temanna pe gelah mpetetap ukur.

 4. Adi iandingken ku anak sekolah, maka anak sekolah e naik kelas labo erkiteken soal-soal si ihadapina, tapi erpalasken jawapan si iberekenna nandangi soal-soal si ihadapina e.

Bage pe kita i bas menghadapi persoalen ras perbeben geluh, uga kita menyikapi ras meresponsa. Arah pengalamen si ialami Rasul Paulus i bas bahan Alkitab si i orati kita, maka Dibata la nadingken Rasul Paulus i bas menghadapi perbeben si nderpa ia ras Rasul Paulus erlajar setia ras tek nandangi kai si ikataken Dibata arah malekat-Na. Sikap Rasul paulus enda la terlepas ku pola pikir Rasul Paulus, eme la ndarami ise si salah;  la ngidoi padahal kai si usulkenna ndube tuhu-tuhu terjadi; tapi uga menyikapi persoalen si sangana i hadapi.

Bagi Dibata si tetap ngkawali Rasul Paulus, kita pe si tek ras erpengendes man ba-Na pasti ikawali ras ipengasup-Na i bas ngalaken perbeben kegeluhen enda. Bagi Kata Dibata i bas 1 Korinti 10 : 13, “Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padan-Na. Labo ipelepas-Na kam icubai lebih asa gegehndu. Asum kam ngenanami percuban, ibereken-Na nge gegeh man bandu gelah ngasup kam nggengkenca, janah radu ras si e ibereken-Na pe dalan pulah.”

Memang perlu si siksiki, kai si erbahanca perbeben e nderpa kita. Adi kin erkiteken perbahanenta, maka alu meteruk ukur mindo ampun kita man Dibata ras mindo maaf man sekelewetta si mungkin enggo si sakiti erkiteken perbahanenta.

Marilah, si petetap ukurta i bas ngalaken perbeben geluh sebab tek kita Dibatanta tetap ngkawali ras mpengasup kita i bas ngalaken perbeben e,  seh maka perbeben e mabai kita reh rembakna ras Dibata ras reh paguhna kita ndalani kegeluhenta alu dem pengataken bujur ras pengendesen ku Dibata.

Pdt.Asnila br Tarigan

GBKP Rg.Cijantung

PENGELAYASI SEPULUH WARI ERTOTO TAHUN 2017

GBKP KLASIS JAKARTA KALIMANTAN

Man sinihamati kami:

Kerina ngawan ni perpulungen GBKP Klasis Jakarta-Kalimantan

Mejuah-juah ibas gelar Tuhan.

1.       Menaken Tahun 2017 silakoken SEPULUH WARI ERTOTO sindube igelari PEKAN DOA. Sepuluh wari ertoto ilakoken kenca Yesus nangkih ku Surga seh nusur Kesah si Badia.

Kenca Yesus nangkih ku surga ajar-ajar Yesus ertoto alu tutus(Kis.1:12-13). Ajar-ajar tutus ertoto guna nimai padan Dibata kerna kerehen kesah siBadia.”Janah aku jine nuruhsa man bandu kai sienggo ipadanken bapangKu. Tapi arus itimaindu ibas kuta enda seh nusur kuasa idatas nari man bandu”(Luk.24:49).

Bageme pe kita selaku “ajar-ajar Jesus” ibas tahun 2017 iajuk SEPULUH WARI ERTOTO, Rikutken Tahun Gerejawi ibenaken Tgl. 25 Mei – 03 Juni 2017.

2.       Tema Umum SEPULUH WARI ERTOTO Tahun enda eme : ERTOTO ULU GEGEH NDALANKEN PEDAHNA (Matius 14 : 23). Thema Umum enda ngajuk kita guna terus ertoto ras ndalanken pedahNa. Bagi lit ungkapen singatakenca nina : “Doakanlah apa yang akan kamu Kerjakan dan Kerjakanlah apa yang sudah kamu Doakan”.

3.       Tata Cara (ibadah) SEPULUH WARI ERTOTO enggo isikapken Moderamen GBKP.

Pelaksananna 10 wari, eme.

3 wari (Kamis seh Sabtu 25 – 27 Mei)i rumah masing-masing eme wari

7 wari (Senin seh Sabtu  28 Mei – 03 Juni )  i Gereja tah i Sektor.

 4.       Mari sipesikap dirinta guna bengket kubas SEPULUH WARI ERTOTO tahun 2017 enda, Ola kita mekarus gelah tuhu-tuhu alu pelaksanan SEPULUH WARI ERTOTO sidatke gegeh guna ndalanken pedah Dibata.

Jati Waringin, 03 Mei 2017

BPMK.Jakarta Kalimantan

Ogen : 

Matius 14:13

Tema:

Mamre Center GBKP

Tujuan    : Gelah Mamre :

- Nggejap uga perluna ngelakoken perenungen/ meditasi secara pribadi ntah pe kelompok guna peningkaten spiritualitas ras 

  pemberdayaan Mamre.

- Gelah kerina Mamre erbahan komitmen janah ikut muat bagin mbangun  Mamre center GBKP

Metode  : Presentasi ras sharing

I.           Kata Penaruh

Si kataken bujur man Tuhanta Jesus Kristus sabab ibas rangka Jubileum GBKP pe 100 tahun eme tepatna 27 tahun si lewat enggo ilitken Taman Jubileum GBKP i Sukamakmur Sibolangit, Sumatera Utara. Salah sada unit pelayanen si lit ibas taman enda eme Retreat Center (RC) GBKP. Unit RC enda sebage sarana pembinaan kiniteken (spritualitas) man warga gerejata bagepe gereja si deban. Khusus bas  3 klasis si lit i pulau Jawa maka sangana ibangun Retreat Center Balai Cariu, Jonggol. Tentu si enda kerina jadi erkiteken enggo seh pemikirenta kerna pentingna ras perluna sarana ras prasarana pembinaan sprititualitas man perpulungenta. Si idah maka ibas perkembangenna, tep-tep tahun program retret reh dekahna reh iperluken perpulungenta la ketadingen Mamre. Reh tangkasna man perpulungen kai ertina ras gunana retreat man bana. Arah ogenta tole erlajar kita kerna meningkatken spiritualitasta.

II.         Isi/ Tafsiren

Ibas Pustaka Si Badia khususna bas Padan Sibaru icidahken man banta piga-iga tokoh Pustaka lawes ku ingan si melungen guna banci lebih ngerembakken diri man Dibata. Ibas ingan si melungen e ia ertoto, megiken sora Dibata, kai sura-suraNa si ateNa ipesehNa man serayanNa. Contohna eme Johanes Peridiken. Ia igelari pe ‘Suara dari padang gurun’ nari. ‘Ia (Johanes) ringan i taneh si mesawang seh paksa maka terang-terangen icidahkenna bana man kalak Israel’ (Lukas 1:80b). Paulus sope lawes erberita si meriah alu semangat perlebe ‘retret’ ia ku Arab (Galati 1:17,18). Telu tahun dekahna Paulus ‘retret’ lako ersikap ras memantapken diri guna erberita simeriah. Bas pelayanenna pe ia la lupa ‘erretret (Perbahanen Rasul-Rasul 9:19b).

Tuhan Jesus piga-piga kali lawes ku taneh mesawang/ ingan si melungen (14:13; Markus 6:30-34; 45-46; 9:2) gelah banci Ia ertoto, rembak ras ersada ras BapaNa sini surga.  Gelah reh telapna man baNa kerna dahin ras misiNa si isuruh BapaNa guna manusia. “Paksa sie lawes Jesus ku datas sada uruk-uruk; ije Ia ertoto man Dibata seh terang wari” (Lukas 6:12). Arah ‘retret’ Ia reh gegehNa, reh mantapna ndalanken dahin persuruhen Dibata. Nabi-nabi ibas Padan Si ndekah pe piga-piga si idah ngelakoken retret. Misalna Elia (1 Raja-Raja 17:2-5; 19:15), Esekiel (Esekiel 1:3). Adi si siksiki tole bas Padan Sindekah tentu mbue denga banci si idah ras si jumpai kerna retret enda. Si e kerina tentu mereken pelajaren ras makma man banta ibas zamanta enda.

III.          Aplikasi/ Pengkenaina

1.                  Bas zamanta si gundari erkiteken tuntuten keperlun geluh si ertambah-tambah ras meningkat emaka la banci lang geluhta manusia reh dekahna reh sibukna ras reh kompleksna. Manusia arus begerak terus, erdahin terus. Melala erdahin ras sitik ngenca waktu rukur. Erkiteken si e manusia banci ndabuh ku bas rutinitas jenari mengalami stress, depresi ras lupa tujun nggeluh, arah dingen fokus. La erndobahen Mamre pe banci nge ikenai ntah pe ngenanami si enda. Akibatna tentu lanai meriah nggeluh, la ternanami ras ternikmati nari geluh si ibereken Tuhan. Buen gulutna nggeluh asangken riahna ras malemna. E tentu saja lampu merah alias berbahaya man banta. Uga carana gelah si enda ula jadi bas kita? kai si ban solusina?

2.                  Lawes ku ingan si melungen enda me salah sada serpang pulah/ solusi si mehuli man banta Mamre. Lawes ku ingan melungen, ingan si teneng ertina erretret. Retret ertina mundur ku pudi ibas kerina kesibuken ras mbercitna kegeluhenta. Retret ertina si sediaken waktuta bersama Tuhan. Sempatken ntah pe bahanlah waktuta ras Tuhan. Uga pe sibukna kita ras uga pe kompleksna geluhta bahanlah alu teratur retretta ras Tuhan.

3.                  Ibas ras arah retret kita mpeteneng pusuhta i lebe-lebe Dibata. Ibas retret kita nikapken pusuhta iisi peraten Dibata. Arah retret buen kita megiken kai Kata Tuhan, kai sura-suraNa man banta guna si dalanken. Ula sebalikna, buen kita ngerana man Tuhan. Buen kita nuriken sura-surata, keperlunta bahken keinginenta. Apai ka adi ibas retret buen ije ngelakoken hal-hal si biakna doni misalna: manggang-manggang, nutung-nutung, rende-rende sekuler, games, koyok rsd. Arus lit keseimbangen kegiaten rohani ras jasmanina bas retret. Lit ka nge kuidah bas retret perbapan bas berngina lit ka agenda terbuni eme erjudi janah miras (minemen keras). Si enda arus si pantangken bas retret.

4.                  Retret banci ilakoken secara sekalak-sekalak, secara keluarga, secara sektor bage pe secara runggun. Retret labo arus erberngi ntah pe sada wari sada berngi. Bicara ilakoken setengah wari ntah pe piga-piga jam la seh sada wari pe labo salah. Tetap nge e retret. Kerna dekahna tentu isesuaiken ras kebutehen si erbahan retret e. Sabab lit ka pemahamen maka adi retret musti erberngi nina. Adi la erberngi ertina e me kebaktin padang nina.

5.                   Kerna erbahan Mamre Center GBKP adi akap kami penulis perlu icakapken lebih mbages. Enggo lit Retreat Center (RC) GBKP. Lit Crisis Center Moria. Lit ka pe PARPEM (Partisipasi Pembangunen) GBKP si ije salah sada programna eme pemberdayan warga ras masyarakat. Mungkin perlu kolaborasi ras si enggo lit ras semakin itingkatken kualitasna seh maka tersehi sura-sura Mamre GBKP janah ermulia Tuhanta.

Pdt. Juris Tarigan, MTH (GBKP Depok – LA; 081316879945)