1.      Tanggal 20 – 26 Mei 2018

       Kuan-kuanen 23:13-21

Jadi Dewasa arah melala dampar

Kata ‘dewasa’ megati isehken man anak-anakta sienggo seh umurna bagi sekalak anak perana singuda-nguda.Tupung ibas kecibal sibagenda rupana teremen orang tua tuhu-tuhu aru atena nandangi anak-anakna. La sitik pedah ras persinget kata waripe isehken orang tua man anakna. Sierbanca gatin enggo bosan anak megikenca dungna mesunahturah la siangkan anak ras orangtua bagepe sebalikna. Si tuhuna sekalak anak jadi dewasa labo perban kata ajar sirehna ibas orangtuana nari ngenca. Sabab kedewasan sekalak anak ibentuk alu lingkungen ras kebiasan ija anak e. E maka ulin orang tua mereken informasi man anakna ingan-ingan sinieteh orang tua ija anak perana singuda-nguda meriah iakapna ku je (meriah dalam arti positif). Biasana ingan simeriah (sicocok) man anak perana singuda-nguda ieteh anak-anakta ibas teman-temanna nari, entahpe arah pergaulenna. Bancika sada dampar sipindo alu mehuli informasi ibas anakta nari ija saja ingan-ingan siiakapna meriah ia ku je ras temann-temanna. Adi siakap perlu gelah siteh uga kecibal ingan-ingan simeriah maka anakta usur kuje,sada-sada paksa kujeka lah kita orang tua ikut mpepayosa. Si sitik mesera gundari, anakta ikuti bentuk kedewasanna arah kepribadian sitertutup ibas komunikasi multimedia sicanggih. Ibas si e reh terbeluhnalah kita orangtua. Sabab alat komunikasi sigenduari me enggo jadi salah sada gegeh sipenting man kegeluhen anak-anakta si la erndobahen kitik denga bagepe sienggo parang belin.

1.      Tanggal 06 – 12 Mei 2018

     Ogen  :  Matius 5:33-37

Pentar Mbelasken Ranan

Kerina jelma ibereken Dibata kepentaren sipelain-lain gelah ngasup ngelakoken sada-sada hal. Termasuk ibas ngerana mbelasken cakap. Labo berarti kalak sipersinik la ia pentar ibas erbelas entah ngerana. Sabab Dibata mereken ulih ibas kengasupen arah dampar sideban si la arah kepentaren ngerana. Man kalak sibiakna pengerana-ngerana la akapna jore adi labo ia sierbelas ibas paksa lit sada-sada perjumpan. E maka semal sienggo biasa erbelas ibas perjumpan jelmana e, e saja singerana. Terlepas ibas porsi ia ngerana erkiteken posisi si kin arus nehken kata. Man kalak sibiakna menukah erbelas sieteh maka asum kita erbelas tuhu-tuhu mereken pengaruh man simegikenca. Adi simehuli ibelasken ulihna banci mereken keriahen. Tapi adi si la mehuli ibelasken ulihna ugapape maba kecedan ras ipandangi kalak. Adi bage, pentarlah ateta ibas nehken ranan. ‘dikune ateta mbelasken ranan sierguna lako mpekena-kena, petala-tala lah ras siateta si man pekena-kenan ula sehken ibas sienterem entahpe siteremi. Ertina ranan guna mpekena-kena arus ibahan ibas ruang sitertutup. Tapi man jelma sienterem erbelaslah guna keriahen ras kemalemen ate maka tuhu lit gunana erti pulung ndatken kata simperiahken sada ras sidebanna simpegedangken ertina nggeluh.

Pdt  Merry Tatuwo br Sembiring 

Per. Makasar 

Suplemen PA MORIA GBKP

1.      Tanggal 29 April – 05 Mei 2018 : Kuan-kuanen 12:9-11; II Tesalonika 3:6-10

Erdahin Mereken Usihen.

Tiap-tiap kalak erdahin tujunna la saja guna ndatken ulih gelah tercukupken kerina siiperlukenna. Sabab arah pendahin banci saja ipepayo jadi usihen man kalak sideban. Erkiteken si e paksa erdahin labo banci idahiken alu ukur siertupang entah pe erdua-dua ukur. Sada dampar ateta gelah ndatken ulih simbue, tapi dampar sideban la sidahiken dahin e alu ketutusen ras ukur bujur dingen payo. Megati kita erdahin gelah ndatken ulihna saja. Tapi cara ibas ndahiken dahin e la ilakoken bagi arusna. Si dat nge ulih ibas kita encari, tapi la sisedari sitadingken bekasta encari e la payo. Cara erdahin sibage rupana la banci siterusken. Bekasta ndahiken dahin ibas sipayo bujur ras mehuli arusna min jadi perayakenta. Sabab lit nge singusih cara erdahin arah bekasta ndahiken dahin-dahin e. Si eteh maka lit paksana pagi kita ngadi erdahin erkiteken gegehta urak, janah enggo kin seh waktuna guna ngadi erdahin. Emaka simehulina tupung paksa kita mejingkat denga erdahin, ingetlah maka sada paksa lit nge sinerusken bekasta ndahiken dahiken e. Adi mehuli bekasta ibas ndahiken dahin eerbuena ulih simehuli dingen terus erbuah. Janah buahna la erngadi-ngadi ras erlipat ganda pe. Patutlah sibereken usihen simehuli sanga kita erdahin.Gelahna pagi sinerusken pendahin e mesunah iakapna ngusihisa. Erbahanca pendahin e erjilena dingen ersikapna bekasna, bagepe la erngadi-ngadi reh Buena ulih simehuli ibas dahin-dahin e nari.