Invocatio  “ Jenari nina Jesus, “Dage ersikap-sikaplah sabab la ietehndu warina ntah pe

jamna   Tuhan reh”. (Matius 25 : 13)

KHOTBAH :  Ketangkasen 3 : 7 – 13

TEMA :  Ersikaplah! Dibata reh me

1.      Penaruh

            Tangtangna turah pengangkan kerna kerehen Jesus peduakaliken erpalas ibas  perkatan ntah pe persinget ibas Jesus nari asum lawes ateNa sirang nadingken ajar-ajar-Na sope ndalani kiniseran si mberat seh Ia mate i datas kayu pesilang. Nina, “Kenca Aku lawes nikapken ingan man bandu, rehdengapagi Aku ngalo-ngalo kam …” (Joh 14:3). Jenari kenca Jesus iangkat ku surga, nina malekat-malekat ngerana man ajar-ajar Yesus, “O, kalak Galilea, engkai maka kam tedis natap ku langit? Bagi nggo idahndu Jesus iangkat ku Surga, bage ka Ia paginrehmulihken”. (Perb. Ras 1:11).

Sope paksa Jesus nggeluh enggo lit pengangkan kerna kerehen ‘Anak Manusia’. Pengangkan e tersurat ibas kitab Daniel, si jadi pengenehenen masa apokaliptik Jahudi si nuriken kejadin paksa si reh. (Dan 7:13). Kerehen Anak Manusia igelari alu istilah cakap JunaniParousiaertina, ‘kehadiran’kernakerehenKristus. Istilah sidebaneskhatologi (cakap Junani ibas kata eskhatos) ertina akhir zaman.Kerehen Kristus ipepayo ibas paksa si reh (akhir zaman) simpekeke kalak si enggo mate (bd I Kor 15:52).Paksa Jesus nggeluh denga, pengangkan kerna eskatologi enggo teridah subuk arah kata bagepe arah perbahanen Jesus. Injil Johanes nuriken erti eskatologi ibas dua dampar: paksa si genduari (‘sekarang’) ras paksa si reh. Erti eskatologi la banci ibatasi ibas pengukumen man doni enda saja (Yoh 12:31).  Ibas bagin si debanInjil Johanes nuriken paksa si reh labo pengertin eskatologi si jadi pengukumen (bd Yoh 5:28,29; 6:39,40,44,54; 12:48).[1]

Pengangkan kerehen Kristus labanci lang erpalasku bas perbahanen-perbahanen Dibata (karya Allah) si isaksiken ibas Padan si Ndekah rasibas Padan si Mbaru.Perbahanen Dibata e enggo erdahin arah kematen ras kekeken Kristus Jesus si nelamatlen kalak si tek.[2] E maka tep-tep kalak si nggeluh ibas paksa genduari enda pe, nggeluh ka pe ibas masa eskatologi, eme masa kerehen Kristus entah pe kerehen si tetap erdahin ibas geluh kalak si tek.

2.      Sikap/ Tindakan ibas Jabu :(Erpalasken Ogen)

Kerehen Kristus ibas kegeluhen sigenduari labo ipepayo ibas penungkunen ndigan reh Dibata.Waktu entah pe jam(Invocatio) labo nentuken paksa si tepat ras payo kerna kerehen Kristus si banci tereteh. Bagi erkira kerna jam ras waktu guna sada rencana entah pe pendahin si ilakoken tep-tep wari. Enggo tersinget maka waktu ras jam kerehen Tuhan labo si eteh janah ise pe labo lit si metehsa (Mat 24:42). Aminna gia ise pe labo meteh ndigan kerehen Tuhan, tapi kalak si tek man Dibata situhuna enggo meteh katawari reh Tuhanta e. Labo perban ia erpenalem ku bas waktu, jam entah warina ndigan kerehen Tuhan. Sabab waktu la banci mbatasi kerehen Kristus janah Kristus la banci ibatasi alu waktu. Tapierkitekenpusuh ras ukur kalak si tek siterjemba ngalo-ngalo kerehen Kristus arahsikap pengkebet geluh siidahersikap katawari paksa pe ibas geluhna tep-tep wari.Sikap ngalo-ngalo kerehen Kristus tangkas teridah carana bagi siibahan sekalak diberu Sunem si bayak nandangi nabi Elisa (Ogen).

Labo perban kebayakenna maka teridah diberu  Sunem nikapken kerina keperlun si cukup man nabi Elisa. Kenca ipepayo diberu Sunem ise kin si tuhuna Elisa, erkata ia man perbulangenna gelah isikapken sada kamar man Elisa ibas rumahna e. Gelah reh kenca Elisa enggo lit inganna kesilang. Keperlun si isikapken man Elisa e me perabot si biasa lit ibas tiap rumah si enterem. Meja kursi ingan medem labo perabot mewahibas rumah kalak bayak ngenca. Tiap jabu lit nge perabot e tergantung kualitasna saja. Ertina kai siisikapken diberu Sunem man Elisa sekalak nabi labo khusus. Si khusus isikapken diberu e, e me pusuhna si tersuruh guna nikapken keperlun man kalak sideban ibas rumahna. Perbahanen diberu e ncidahken sikap perbahanen si ersikap ngalo-ngalo kerehen Kristus.

Ersikap guna kerehen Tuhan ertina ersikap guna si mehuli. Si mehuli si isikapken e sampur dingen serta kap. Teridah bagi litna ingan medem, kursi ras meja. Kai siisikapken kalak si tek ngalo-ngalo kerehen Tuhan Dibata sue ras kebutuhen guna kegeluhen si tep-tep wari ibas jabu.Dibata labo nuntut secara berlebihenguna ngalo-ngalo kerehenNa bagi mindo kebayaken ibas kita nari. Ersikap ngaloken kerehen Kristus ertina ersikap guna ringan ras tading ras Tuhan ibas geluh si tep-tep wari i tengah  jabunta.  Nikapken erbage-bage keperlun ibas jabu bancijadi sarana si ncidahken pusuh si terjemba ngalo-ngalo kerehen Tuhan. Sikap pengalo-ngalo ibas jabuipeturah ibas kinieersadan arih bapa-nande/perbulangen ras ndehara, orangtua ras anak ras kerina isi jabu. Sikap si meriah ngalo-ngalo kerehen Kristus teridah arah perbahanen si erkeleng ate si mereken pelayanen  si mehuli si nggit erkorban guna keperlun entah pe kepentingen kalak si deban.

3.      Pertenget ras Perenungen man Perpulungen: (teks Khotbah)

Perpulungen Piladelpiaperpulungen kalak Kristen si tangtangna si ertutus ate megiken ras ndalanken Kata Dibata, aminna gia kitik kurang megegeh (musil). Dibata labo mandangi perpulungen enda bagi perpulungen sideban. Tapi Dibata mereken pergegeh ras penjemba ibas ketutusen perpulungen selaku kalak Kristen. Terlebih asum perpulungen e ngalaken kiniseran erkiteken la banci atan masuk ku bas sinagoge guna ersembah man Dibata.Pintun ingan ersembah ieruk (terkunci) man perpulungen Piladelpia. Tapi nina Dibata kunci Rumah Pertoton italangi man perpulungen e. Kesaksin Johanes ngataken laboRumah Pertoton Israel i Jerusalem tapi Rumah Pertoton si tempasna nusur i Surga nari.Surga ijenda labo ningetken kerna kegeluhen paksa si reh (bagi pengangkan eskaatologi), tapi kegeluhen sorgawi ibas keersadan ras Dibata si nggeluh ibas kegeluhen perpulungen e.Kristus genduari sinjemak ‘kunci Daud’ si enggo nalangi pintun man perpulungen e. Kunci si ijemak Kristus enggo nalangiaksesperpulungen ku Dibata si lebih penting asangken ku sinagoge.[3] Keersadan perpulungen ras Dibata tuhu-tuhumpegegehi perpulungen ibas ngalaken percuban-percuban si jadi. Penganiayan man perpulungen si genduari enda pe banci saja tetap reh man perpulungen e. Tapi erkiteken keersadan ras Dibata perpulungen e tetap ndatken kemenangen ibas penganiayan e nari.

            Kegeluhen kalak si tek la banci lang tetap lit ibas ngalaken ras ndatken percuban seh kupercuban simberat. Ngalo-ngalo kerehen Dibata ertina ersikap kawari paksa pe ngikutken si ni pedahken Dibata ibas kataNa dingen nggeluh ibas kata e nari. Enda me sikap geluh si meherga si ipersingeti Dibata man banta. Ersikap ngalo-ngalo kerehen Dibata mbuktiken kesetianta nggeluh ngikutken Tuhanta. E maka amin gia perbeben percuban si mesangat jadi man banta, bagi rehna bencana si mesangat; tapikeersadanta ras Dibata tetap maba kita kubas kemenangen si enggo isikapken Dibata man banta.

Pdt Merry Tatuwo br Kembaren

Invocatio  “ Gelah ietehndu uga  erlagu langkah sipayo, dingen ranan si ncidahken kepentaren “ (Kuan-Kuanen  5:2)     

Khotbah :  Perbahanen Rasul-rasul 18 : 1-4

Tema  :  “Rasken Bas Dahi” (Enterpreneurship)

 Kata Perlebe

       Senina turang kekelengen Tuhanta Jesus Kristus, Tema umum KPK ta (Kebaktin Pekan Keluarga) 2018 enda nina, “Jadi Jabu Si Ersembah man Dibata”. Ersembah man Dibata luas cakupenna. Ersembah labo terbatas ibas kebaktin Minggu i gereja saja, i PJJ, PA kategorial saja. Ersembah man Dibata labo terjeng wari Minggu saja. Ersembah man Dibata pe wari Senen seh wari Sabtu. Ersembah man Dibata e tep-tep wari kap. Janah erdahin termasuk ersembah kap. Erdahin (kerja) e ibadah. Emaka ibas berngi si pelimaken KPK ta tema si seh man banta eme “Rasken Bas Dahin” (Enterpreneurship).   

       Isi

Erdahin e orat geluhta kap

       Lako mendukung dahinna erberita si meriah, rasul Paulus pe erdahin. Erdahin ia erbahan tenda/ kemah. Si enda ilakoken Paulus gelah ia la jadi beban man perpulungen. si enda idahikenna gelah ia jadi usihen man kalak si tek. Akwila ras ndeharana pe erdahin. Kebetuleh seri pendahin ras kinibelunenna ras rasul Paulus eme beluh erbahan tenda. Paulus erdahin, Akwila ras ndeharana pe erdahin. Erdahin e wajib man manusia. Erdahin e hakekat manusia kin (bnd Kejadin 1:28; 2:15). Erdahin labo sada kutuken. Erdahin pe labo sada hukumen erkiteken manusia sipemena eme Adam enggo ndabuh ku bas dosa. Si eteh Dibata pe erdahin kap. Tapi nina Jesus man kalak Jahudi e, “BapangKu erdahin kap lalap; emaka Aku pe arus erdahin” (Joh. 5:17). Tuhanta Jesus Kristus jine pe erdahin. emaka kita selaku anak-anakNa pe arus dage erdahin. Tole banci si idah ibas invocatiota Kuan-Kuanen 14:23 nina, “Erdahinlah maka kam nggeluh, adi ngeranai janah kundul-kundul saja ngenca, musil me kam”.

       La banci lang kita erdahin. Erdahin e kearusen nggeluh kin. Erdahin e sura-sura ras si ngena ate Dibata kin ibas geluhta. Arah erdahin kita nggeluh. Arah erdahin ibereken Dibata rejeki ras keperlun geluhta. “Rulih adi mejingkat, liah adi mekisat”, nina nininta si nuria. Ula la erdahin tapi erdahinlah. Ula ngerana apai ka ngeranai saja dingen kundul-kundul saja. Si enda mpereh kemusilen ngenca man banta. Dahikenlah dahinta lau tutus. Kai si banci si dahiken, dahikenlah. Ula tertima-tima, ula tertaren-taren. Si erdahin nggeluh me.

      Tema: “Rasken Bas Dahin”

      Erkiteken seri pendahin Paulus ras Akwila emeka Paulus kesilang i rumah Akwila ras Priskila. Banci jadi kerjasama ras si sampat-sampaten ia bas ndahiken dahinna. Saling melengkapi ras menyempurnaken ia bas erbahan tenda. Bas ogenta pe enggo tangkas uga Jakup erdahin alu tutus ras erbintuas man mamana Laban (Kejadin 30:25-30).

      Lanai zamanna erdahin sisada-sisada, apai ka kisat erdahin. Erdahin si sada ugape ketadingen. Erdahin si sada labo banci maju. Kisat erdahin ras mpediat kalak saja erdahin uga pe labo ngena ate kalak. Kisat ras mpediat kalak erdahin e la kap mehuli (bnd Kuan-Kuanen 6:6). Bagi nina temata, marilah si rasken bas dahin. Erdahinlah kita bagi perkis. Erdahin lau tutus erdahin alu ras-ras. Siraskenlah dahinta, siraskenlah erdahin. Ula kita pertewas. Jadilah mejingkat. Kerjasama ras sama-sama kerja. “Gotong royong”, nina bung Karno. Jejaring/ networking nina zaman now. Uga pe belinna dahin e adi iras-rasken tembe nge. Adi si raskelah bas dahin maka kai pe labo lit metahat.

      Kata Perpudi

      Jabu si ersembah man Dibata eme jabu si erdahin dingen nge Rasken Bas Dahin. Ras-ras erdahin dingen erdahin ras jadi kesemalem bas jabu. La lit si la erdahin, tapi kerina erdahin ras erdahin ras-ras sue ras gegeh ras pemeteh si lit ibas jabu. Jabu si nge Rasken Bas Dahin uga pe dat pujin dingen nggeluh bas kiniulin.

GBKP RG Depok – Lt Agung

Pdt. Juris Tarigan, MTh

081316879945

Invocatio : “Ola kal kam papak! Pergaulen silamehuli, ncedaken biak simehuli”I Kor 15 : 33

Khotbah  :  Roma 6 : 12 - 14

Tema   : Pakelah ringringndu Nehken singena ateNa

1.      Renungen enda ibenaken kami alu penungkunen sisederhana; “Apai nge ndia mesunahen erbahan simehuli tah erbahan silamehuli”?

Pengakun Rasul Paulus ibas Roma 6 : 19 ; “La kudalanken simehuli siateku kubahan, tapi kudalanken kai silamehuli” . Ay.21;”...kubahan kenca ateku simehuli, sijahat ngenca terban aku” .

Perlu ka pe siinget mehuli pe siban lenga tentu mehuli iakap kalak, apai ka adi siban silamehuli.

Tapi cuba ka siukurken apai nge riahen/senangen/damen siakap kenca erbahan simehuli tah kenca ernbahan silamehuli???

2.      Bagin kata Dibata sendah Roma 5:12-14, pengajuk man banta gelah tetap nggeluh iteruh lias ate Dibata.

Kalak singgeluh iteruh lias ate Dibata;

-       La pelepasna dosa ngkuasai kulana(12)

-       La ipepepasna ringringna ipeke dosa guna ndalanken sijahat(13)

-       Dosa e lanai erkuasa ibas dirina(14)

3.      Tema-nta Pakekenlah, ringringndu[1]  nehken singena ateNa

Makakeken ringring nehken singena ate Tuhan e sebagai responta sienggo ngenanami kelang ate Tuhan ibas diri Yesus simate guna penebusen dosa-dosanta. Bagepe encidahken kerelaan engkorbanken dirinta guna ibentuk Tuhan ras tek man Tuhan selaku pengendali kegeluhenta. 

Makeken ringring pe ertina tunduk man sura-sura Dibata  ras nalibken kerincuhen daging.

Labo mesunah makeken ringringta guna Kristus, sabab kecendrungenta megati nehi sura-suranta, ibas Ogen ituriken kuga perbahanen anak-anak Eli merangap,sitik pe la mehamat nandangi persemahen man Tuhan. Sada bagin perbahanen-perbahanen sierpalasken sura-sura manusia isingetken ibas Galatia 5:19-21.  Cataten penting man banta ibas ayat 21 bagin siperpudina; “kalak sindalanken perbahanen sibagi enda la banci dat bagin ibas kinirajan Dibata sireh pagin”.

4.      Ichwei G.Indra ibas bukuna Pola gereja mula-mula, nuriken 5 Bentuk Pelayanen(Pelayanen ring-ring)

ü  Pelayanan Mata.

“Saling memperhatikan” Ibrani 10:24a.

ü  Pelayanan Kata

“Hendaklah kata-katamu penuh dengan kasih”(Kol.4:6)

ü  Pelayanan Telinga

“Cepat untuk mendengar, tetapi lambat untuk berkata-kata” Yak.1:19.

ü  Pelayanan Tangan

“Bertolong-tolonglah ,menanggung bebanmu” Gal.6:2

ü  Pelayanan Kaki

“...beroleh kesempatan untuk mengunjungi kami” Roma 1:10.

Sebagai Penutup : Marilah tetap sisuan ukur ras perbahanen simehuli gelah turah ate jadi, eme kegeluhen silaerkeri-kerin sienggo isikapken Tuhan man banta.

Pdt.Iswan Ginting Manik

GBKP Pondok Gede,