Jadwal Kegiatan

Ibadah Umum - (08PM - 09PM)
Ibaadah Remaja - (09PM - 10PM)

Suplemen PJJ : 1 Petrus 2:9-10 ; Tgl 04 - 11 Juli 2021

Nats            : 1 Petrus 2:9-10

Tema          : Bangsa Pilihen Dibata

  (Konfesi GBKP Bab IX : Gereja)   

     Kata Penaruh

Kalak si nggo I pilih, mon-mon kurang menyadari maka ia nggo I pilih ibas kegeluhen na menjadi sekalak Kristen si tek man Dibata. Janah perlu sisadari maka seharusna kegeluhen kalak terpilih berbeda nandangi kalak sideban si la ipilih, sebab kita eme Bangsa Pilihen Dibata. Sienda terbukti arah kai si ikataken ibas kitab Yeremia 1:5: “Kupilih kam ope denga kubereken man bandu kegeluhen. Ope denga kam tubuh nggo Kuserapken kam jadi nabi nandangi bangsa-bangsa.” Janah ibas bahan PJJnta sendah pe jelas I tegasken maka kita bangsa pilihen Dibata si enggo ipilih Dibata guna jadi bangsa sekerajangen Dibata, bangsa sibadia. Janah si pasti Dibata la pernah salah pilih, bagepe la pernah Ia menyesal kerna kai si nggo ipilihNa. Emaka sebagai pilihen Dibata, harus sisadari maka kita ipilih segelahna kita ngeluh badia janah ngeluh bagi singena AteNa.

I.     Mpebagesi Pengangkan Kerna Ogen

1 Petrus 2:9-10 si jadi bahan pjjnta sendah eme surat Petrus sipemena si ialamatken man Kalak Kristen simerap i belang-belang bagin Utara Asia Kitik. Janah tujun surat enda ibas rangka mpegegehi kiniteken perpulungen, sebab paksa sie kalak kristen sangana ndatken percuban sicukup mberat ibas ia mempertahanken kinitekenna man Yesus.  Ibas bahan oraten pjj-nta sendah, Petrus mereken sada pengangkan kerna hubungen kalak si tek man Yesus, ija kenca perpulungen nggo tek man Yesus berarti perpulungen e lanai seri ras kalak Yahudi sinai sinulak Yesus. Tapi perpulungen si nggo nggeluh ibas keselamaten, bagepe erkiteken man Yesus, maka kalak si tek e enggo jadi bangsa pilihen Dibata

Makna bangsa pilihen,  imam-imam raja ras bangsa sikerajangen Dibata eme bukti eksistensi simbaru nandangi kalak sitek man Yesus Kristus, ija kalak si tek man Yesus nggo iserapken ibas doni enda nari, emaka kalak sitek nggo nggeluh badia.  Kalak si tek nggo jadi sikerajangen Dibata, emaka salah sada fungsi kalak si tek eme harus jadi imam-imam nandangi Yesus selaku Raja. Memang nai ibas bangsa Israel, dahin imam harus ibas kesusuren suku Lewi nari, janah tugas imam eme selaku perantara antara umat ras Dibata. Imam me sinehken kurban persembahen man Dibata. Tapi ibas status kalak sitek selaku bangsa pilihen ras imam-imam raja si imkasud ijenda, lanai bagi status si nai siharus mpersembahken asuh-asuhen selaku persembahen, tapi kalak sitek harus nehken persembahen puji-pujin man Dibata ras ndalanken kekelengen nandangi sapih-sapihna manusia.

Yesus Kristus nggo mpersembahken diriNa selaku persembahen simehuli guna keselamaten kerina manusia. Alu kata sideban, perpulungen njadiken Yesus Kristus selaku palas kiniteken emaka perpulungen jadi imam-imam si khusus si erdahin guna Tuhan. Maksudna ijenda teridah min lagu langkah simehuli siipimpin Kesah Si Badia lit ibas bangsa pilihen Dibata e, janah perpulungen si tek man Yesus e ngasup ngelakoken simehuli singena ate Tuhan, sebagaimana ikataken ibas ay. 9b maka Dibata nggo ndilo kita ndarat arah sigelap nari menuju ku terang Kristus. Bagi nina ibas ay. 10nai kam labo anak-anak Dibata… enda merujuk nandangi bangsa Israel si lanai jadi bangsa pilihen Dibata  erkiteken bangsa Israel lanai ngeluh bagi singena ate Tuhan. Tapi genduari nggo jadi anak-anak Dibata, enda menegasken maka amin gia bangsa Israel nggo erdosa janah nggo ndauh arah Dibata nari, tapi Dibata mereken pemulihen nandangi bangsa si nggit reh ku Ia, sierkadiola kerna dosa si ibahanna, sebab Dibata e perkuah maka sialoken perkuah ate Dibata e si erbahan kita jadi bangsa pilihen-Na.

II.   Pengkenaina

Ibas Buku Saku: Poko-pokok Pengakuan  Iman GBKP (Konfesi) GBKP Bab IX tentang Gereja, ngataken maka gereja eme persekutuan orang percaya yang di panggil jadi milik Allah dan Jesus Kristus menjadi kepala-Nya (1 Petrus 2:9; Epesus.1:22), terus menerus diperbaharui oleh Roh Kudus menjadi garam dan terang dunia. Enda me si i maksud temanta Bangsa Pilihen Dibata janah bangsa pilihen siimaksudken Petrus ijenda pe jelas ituriken maka berbeda ras bangsa pilihen si isandang bangsa Israel ndube. Ija nai bangsa Israel ipilih Dibata janah ipeserap  gelah bangsa Israel berbeda ras bangsa-bangsa sideban, janah tetap ngelakoken kai singena ate Dibata. Tapi sienda la teridah bas bangsa Israel ibas zaman Yesus, khususna imam-imam simbelin ras tua-tua agama Yahudi si lanai ngaloken Yesus Kristus jadi Raja ibas kinirajaan Surga. Erkiteken sie me ibuat Yesus KinirajaanNa ibas bangsa Israel nari janah iberekenNa man ise saja si tek man baNa (bd. Matius 21:43). Arah si e perpulungen Tuhan si tek mana Ba-Na enggo ijadiken Dibata jadi bangsa pilihenNa, emaka tanggung jawab kalak si nggo ipilih Dibata jadi Bangsa Pilihen-Na eme naksiken kerna perkuah ate Dibata si mbelin e man kerina jelma arah kerina dampar kegeluhennta.

Pdt NeniTriana br Sitepu

GBKP Runggun  Cisalak

Suplemen PA Mamre : 2 timotius 1 : 1-7 ; Tgl 27 Juni - 03 Juli 2021

Harganas (Hari Keluarga Nasional)

PA Bersama Kategorial Mamre, Moria, PERMATA, KAKR

Ogen : 2 Timotius 1 : 1-7

Tema : Cara nehken pengajaren si payo nandangi anak-anak

Pengogenta enda (2 Timotius 1 : 1-7) merupaken sada bagin i bas surat si isehken Rasul Paulus man anak rohanina emekap Timotius. Surat enda ibahan Rasul Paulus tupung ia i bas penjara janah lanai ndekahsa iukum mate me ia. Tapi semangatna guna meritaken kata Dibata la surut aminna gia ruang gerakna ibatasi jeruji besi. Salah sadasierbahanca ia semangat emekap pengarapenna nandangi Timotius guna nerusken pelayanenna. Rasul Paulus yakin maka Timotius ngasup nerusken pekabaren injil sienggo ibenakenna e.

·                Ayat 1

Banci si idah maka Paulus tuhu-tuhu nandai ise kin ia, i etehna maka ia kap juak-juak Tuhan. Paulus sadar maka kerasulan si lit i bas ia eme kap erkiteken sentudu bagi peraten Dibata. Erkiteken kesadaren Paulus e maka enda ka mabai ia nggeluh patuh man Tuhan, neteruk rukur i bas nehken berita si mehuli, termasuk mabai perpulungen nggeluh i bas kiniersadan ras Dibata bage pe kiniersadan sapih-sapih manusia.

·                Ayat 2

Kebiasan Paulus si tuhu-tuhu mehuli i bas ia nehken pengajaren e me kap ibahanna perpulungen jadi kandu-kanduna (membangun kedekatan), mehamat, mepehaga teman ras nehken pasu-pasu man kalak si deban. I bas ayat 2 enda pe Paulus mereken semangat kempak anak si ikelengi Paulus eme kap Timotius ras kempak anak si sah menurut imanta kalak Kristen (Tit 1:4).

·                Ayat 3

Paulus nandai dua angkaten sebelum ia sih seh kal setiana nandangi iman, seri ras penyebuten dua angkaten i bas keluarga Timotius (ay. 5). I bas ayat end ape banci teridah maka keriahen Paulus e me nginget-nginget kiniulin Timotius dingen natang-natang Timotius arah pertoton “Bujur kukataken man Dibata asum ku inget kam rusur i bas pertotonku subuk suari bage pe berngi.”

·                Ayat 4

Paulus tuhu-tuhu kal nandai ras meteh perbeben Timotius selaku anak rohanina. Ijenda pe tiridah maka Paulus gejapken kai si irasaken Timotius selaku anak rohanina. Paulus pe i bas ayat ke-4 enda ncidahken atena tedeh kempak Timotius janah nehken kekelengenna.

·                Ayat 5

Kebiasan Paulus si istimewa teridah ka i bas ayat enda, e me ngenen potensi ra ngergaken ketutusen Timotius. I bas ayat end ape banci teridah maka Paulus nandai ras meteh Timotius la terjeng Timotius saja, tapi terus ku nini tudung Timotius pe i tandaina. Enda tentu ncidahken maka Paulus pe mujiken keluarga Timotius, ras secara otomatis mereken semangat ka kempak Timotius

·                Ayat 6

I bas ayat enda Paulus persingeti Timotius guna ngelakoken kewajipenna. Paulus situhuna meteh pergumulen si lit i bas Timotius sibanci erbahan ia lemah i bas pelayanenna. Emaka ipersingeti Paulus segelahna Timotius la lupa nandangi kewajipenna.

·                Ayat 7

Paulus persingeti Timotius kerna Kesah si ibereken Dibata labo erbanca gelah percik-cik. Rasul Paulus sadar maka rintangen si galang guna jadi kalak si erguna eme kap kebiaren si lit i bas kita.

Banci si idah maka kuga cara Rasu Paulus meyakinken Timotius kerna sienda e me alu mereken dorongen semangat, mujiken bagepe ras ngajuk Timotiu guna mpegara semangatna ras kinitekenna si enggo lit tupung ia kitik denga pe. Si end ape banci jadi erkiteken tupung ia kitik denga pe enggo iajari ninina Lois ras nandena Eunike kerna perbahanen si mehuli ras pustaka sibadia. Cara Lois ras Eunike ngajarken Timotius sedalanen ras pengajuk si isehken man bangsa Israel guna ngajarken anak-anakna, emekap alu nurikenca suari ras berngi, ncidahken perbahanen orangtua si mehuli bagepe alu mabai ia ku rumah Pertoton Tuhan (Ul 6 : 1-9).

Aplikasi

Labo lit manusia si tubuh ku doni enda langsung jadi kalak si beluh, pentar, sopan, ramah, ras sebagaina. Kerina memerluken proses, pendampingen bagepe waktu si cukup gedang. Adi sibehen kegeluhen manusia jaman genduari enda, khususna kalak Kristen, maka enggo mbue kal kesempaten siterbuang guna banci ndeher ras anak-anak. Erkiteken kesibuken orangtua zaman genduari enda erbahanca anak-anak sung enggo lebih ndeher ras pengasuhna. Adi arah pengalamen nggeluh Timotius, maka ia kitik-kitik nari enggo iajari ninina ras nandena kuga cara ersembah man Dibata, ise kin Dibata e janah uga ncidahken kehamaten ras kepatuhen man Tuhan.

Nai i bas kita kalak Karo ope denga mbue pemaken TV, mbue denga kal orangtua si erban turi-turin kempak anak, janah isi turi-turin enda mbue kal tersirat makna-makna kegeluhen. Tapi i bas zaman genduari enda, erkiteken orangtua enggo sibuk janah mbue kel tuntuten nggeluh, lanai lit waktu orangtua guna ras anak si ngakibatken sung anak-anak enggo lebih ndeher ras pengasuh asangken ras orangtuana. Enda tentu jadi hal si gawat situhuna, sabab anak pe dungna ibentuk lanai bagi iarapken orangtua. Janah bicara lit perbahanen anak si la pas akap orangtua pudin wari, anak me si kena jungut ntah pe kena raw i bas orangtuana nari, alu la isadari maka waktu ras anak selama enda enggo mbue kal terbuang bage-bage saja. Payo tuhu i bas zaman genduari enda mesera guna nyeimbangken antara kebutuhen geluh ras kebutuhen psikologi anak. Rusur kal erkiteken tuntuten geluh s imbue, orangtua lupa bahwa lit ka tuntuten psikologi nandangi anak. Anak tentu perlu ndatken kekelengen langsung i bas orangtuana nari segelahna anak pe la lit iakapna kekosongen i bas geluhna. Selaku orangtua arus nge sisadari maka anak e emekap pasu-pasu Tuhan si luar biasa ku tengah-tengah jabu, maka alu bage anak e arus ididik ras ibentuk salu mehuli, sabab kunekenca lang maka enggo gagal kita i bas njagai pasu-pasu Dibata.

Adi nulih kita ku pengalamen ngaloken turi-turin si adi,mbue kal makna nggeluh guna si mehuli si banci ibereken ku anak-anak. Contohna emekap bagi turi-turin kak tangko bunga si isina salah sada eme kap berani berbuat, berani bertanggungjawab. I bas turi-turin enda iajarken gelah la melemparken kesalahen kempak jelma sideban. Bage pe turi-turin kancil ras buaya si mengandung erti gelah la jadi kalak si sombong, meganjang rukur, siakap banta si hebatna, sabab i bas sada masa lit kang si la kita beluh tapi kalak si deban beluh. Arah turi-turin si ituriken enda pe maka anak-anak pe banci muat nilai kegeluhen si lit i bas cerita e, maka salu bage anak pe ngaplikasiken i bas kegeluhenna. Situhuna secara perinsip cara nehken pengajaren si payo man anak-anak labo berubah nai ras genduari. Tentu i bas mereken pengajaren nandangi anak-anak la banci salu merawa ntah pe mekpek, sabab kunekenca bage banci timbul rasa dendam ras sifat si keras i bas anak-anak. Metode si ipake mungkin berbeda tapi perinsipna tetap nge seri e me salu dem kekelengen, kesabaren, ndauh i bas jungut-jungut ntah pe merawa, janah idukung i bas si mehuli. Maka alu bage pasu-pasu si enggo i bereken Dibata ku tengah-tengah jabu banci guna pehaga gelar Dibata.

Robby Andarta Sinuhaji (081367130211)

Mahasiswa Praktek Rg. Bekasi

Suplemen PA Mamre : Jakup 1:19-21 ; Tgl 20-26 Juni 2021

(Pentingna komunikasi antara bapa ras anak i bas keluarga)

Ogen : Jakup 1 : 19-21

Tema : Metinggel, La Minter Ngerana

Surat Jakup enda i alamatken kempak dua belas suku si lit i perantauan (Jak 1:1), surat enda i tulis ku kalak Kristen Jahudi si tading i darat Palestina. Tujun Jakup nulis surat enda eme kap:

1.    Guna mbangun semangat kalak Jahudi si tek nandangi Dibata, si sanga e paksana ngenanami penderitaan ras ncubai iman kalak e

2.    Guna mpehuli pengertin-pengertin si salah kerna sifat iman si nyelamatken

3.    Guna mereken kata nasehat ras mbina pembacana kerna hasil-hasil praktis iman ibas kegeluhen si benar ras p erbahanen si mehuli

I bas ogenta wari enda jelas maka i bas ayatna si-19,iajuk kita gelah metinggel, la minter ngerana, janah la minter merawa. Ayat 19 enda banci i pandang merujuk ku perselisihen ras perbedan si terjadi bas kalak Kristen masa si e. Setiap reh permasalahen  ntah pe perbedaan bas kalak Kristen, harus nge lit si mbegikenca. Rusur kal manusia njemak pendapatna sekalak nca ras la git megiken uga kerna pendapat kalak. Arusna min kita nggit megiken pendapat kalak ras kebenaren arah kerina sisi. Janah amin pe kita harus kin ngerana, la banci lit rawa i bas kata-kata si pedarat kita, sabab jawapen si lemah lembut banci erban pusuh rate malem. Bagi si lit bas ayat 20, maka rawa manusia labo ngasup erbahan si mehuli bagi si ngena ate Dibata. Amin pe i bas merawa makai alasen guna keadilen ras kebenaren, la banci i teki. Sebab merawa ate eme kap sifat manusia, janah merawa manusia bertentangen ras kebenaren Dibata. Kalak si ngaku-ngaku guna kepentingen Dibata salu cara merawa situhuna nuduhken maka labo itandena ise kin Dibata e, janah labo i etehna kai kepentingenNa. Emaka ikataken ka pe bas ayat 21 segelah pedauh kebiasan-kebiasan si melket ras lagu langkah si jahat. Kebiasan-kebiasan si melket ijenda berarti sifat-sifat duniawi si la terpuji. Janah lagu langkah si jahat banci i ertiken ate nembeh ras kefasiken rohani si seh kal Buena. Alu bage maka, selaku kalak Kristen i ajarken segelah tetap waspada ras pedauh ate keduniawianta janah kekacauen i bas pusuh si melket, sabab e si erbanca kita si erbahan ngelawan perintah Dibata.

Aplikasi

Erbage-bage rupa pengajaren simpengaruhi perukuren seh ku lagu langkah bagi galumbang awit nderpa kegeluhen seisi jabuta arah media IT. Terlebih man anak-anakta adi la lit pengawasen rikut pengarahen bas kita Mamre maka banci ia ndempar seh bene erkiteken pengaruh IT enda. Terlebih i bas masa Covid-19 enda, ija kita erdahin rumah nari, erlajar rumah nari, ibadah rumah nari si dominan ngisi kegeluhenta e me makeken media Informasi Teknologi (IT). Kerina aktifitasta teptep wari nggo dominan pake IT. Bage pe anak-anak bas persekolahenna. Mulai ia medak seh kenca ka kari ia tunduh, la pernah pulah arah smartphone si lit i bas ia. Bahkan rusur kita lanai terlepas arah smartphonta aminna pe lanai bo lit dahin si penting ije. Emaka penting kal kita ngendaliken dirinta terlebih Mamre arus beluh ngawasi anak i tengah-tengah jabu, segelah anak i tengah jabu la lalar perdalanna erikiteken pengaruh IT enda. Emaka penting kal komunikasi si mehuli terjadi antara orangtua ras anak, segelah kai si terjadi i bas anak banci i ceritakenna man banta. Tapi adi bas jabu kita nuduhken rawata saja rusur maka secara otomatis hubungen komunikasi ras anak lanai mejile, si erbahanca anak banci erbuni-buni ras lanai terawasi kita selaku orangtua terlebih kita sekalak Mamre. Amin pe sung perbahanen anak i tengah jabu la bagi ukurta ntah kin pe kurang si akap payona, labo banci kita minter merawa, tapi arus nge si ajarken dem salu keleng ate, maka salu bage pe anak-anak i tengah jabu banci ngangkai janah la lit dendam si torah i bas ia. Sabab nina pe i bas ogenta wari enda maka rawa manusia labo ngasup erbahan si mehuli si bagi peraten Dibata. Aminna la gia si akap pas janah si rawai erkiteken ncidahken kekelengen alasenna, enda pe labo pas, sabab Jesus pe labo pernah ia merawa nandangi jelma si la i akapna pas, tapi i ajarken salu manjar-anjar janah lit kekelengen i bas ngajarkenca. Mekatep rusur kita selaku orangtua minter merawa, jarang si sungkun kai kin alsenna maka banci bage. Bicara nggit min kita terbuka ras cerita maka komunikasi si mehuli pe banci terjadi janah anak pe banci ceritakenna kerina sebab la lit i gejapkenna tekanen si mengancam ije.

Orat nggeluh si mbaru membutuhken komitmen bersama. Bagi protokol kesehaten wajib ipatuhi gelah kerina selamat, bage pe protokol komunikasi ras pengertin perlu nge ibangun Mamre i tengah keluarga gelah kerina tantangen, perbeben sosial, ekonomi, budaya seh pertendin banci radu ras ndatken solusi, rikut muat bagin gelah teraloken kesangapen i bas jabu. Selaku pemimpin i bas keluarga, kesepakaten ras kesepahamen jam kebersamaan keluarga, subuk cakap-cakap, saat teduh, janah kehangaten keluarga perlu rusur silitken.

Robby Andarta Sinuhaji (081367130211)

Mahasiswa Praktek Rg. Bekasi

Info Kontak

GBKP Klasis Jakarta - Kalimantan
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate