Jadwal Kegiatan

Ibadah Umum - (08PM - 09PM)
Ibaadah Remaja - (09PM - 10PM)

Suplemen PA Mamre : Juna 3 :4-10 ; Tgl 11-17 Juli 2021

Ogen : Juna 3:4-10

Thema : “Ndalani Perubahen Simbaru”

Juna ndalanken dahinna, bengket ia kubas kota Niniwe. Ikataken Juna maka 40 wari nari, kota Niniwe bakal ikernepken. Kepeken Nabi Juna berpendapat maka nubuat ukumen enda eme pesan siperpudi si ate Tuhan isehken man kalak Niniwe: erkiteken kalak Niniwe nggo ngelakoken mbue kejahaten, maka Tuhan ngukum ia kerina. Adi bage, maka nubuat sibelasken Juna jadi nubuat la ersyarat: uga kin pe perbahanen kalak Niniwe, kota Niniwe pasti ikernepken. Tapi la bage maksud nubuat enda. Nubuat enda la imaksudken sebage pesan siperpudi, tapi sebage tuntuten siperpudi. Nubuat Juna eme nubuat ersyarat: adi kalak Niniwe la jera, adi ia la mulihken kempak Tuhan maka kota Niniwe bakal ikernepken. 40 wari nari. Tuhan tetap denga mbuka dalan man kalak Niniwe guna jera, tetap mbuka dalan guna nalihken cara kegeluhenna. Kalimat 40 wari nari rusur siidah ibas Padan Sindekah. Waktu 40 wari eme waktu pembersihen, waktu puasa ras ukumen. Dekahna banjir simbelin eme 40 wari. Musa ringan idatas deleng Sinai kidekah 40 wari. Bangsa Israel harus erdalan ibas padang gurun kidekah 40 tahun. Juna erban nubuat maka kenca 40 wari nari, Niniwe bakal ikernepken.

Kalak Niniwe tek man Dibata. Nubuat sibelasken Juna maba ulih simeter. Kata tek ijenda ibas bahasa aslina eme nteguh, setia, akar katana eme aman. Kata aman e seri ras kata amin. Kalak Niniwe tek man Dibata, eme ia ngendesken diri man sada hal sinteguh ras setia. Kalak Niniwe la tek ibas babah saja, tapi alu perbahanen nyata. Iungkapkenna pertobatenna ibas perbahanen. Kidekah 40 wari sitetap denga ibereken Tuhan man bana kerina, atena erpuasa saja. Erpuasa eme tanda pertobaten. Sebaga tanda pertobaten kalak Niniwe nangtangi bajuna emaka ipakena uis guni. Kerina kalak Niniwe muat bagin ibas puasa ras perkabungen e. Perintah sipedarat raja man kalak Niniwe sipatna tuhu-tuhu keras bagepe berlaku man manusia bagepe rubia-rubia. Labo saja manusia harus erpuasa, tapi pe asuh-asuhen, eme lembu ras biri-biri. Kata Ibrani taam la berarti man saja, tapi lebih asa sie ngenanami sitik saja pe la banci. Jadi kalak Niniwe la banci man kai pe. Bahkan asuh-asuhen la banci man dukut bagepe la banci minem. Manusia ras asuh-asuhen harus make uis guni sebage tanda perkabungen. Kalak Niniwe haruslah masing-masing mpelimbarui perbahanenna sijahat. Kalak Niniwe labo terjeng muat perbahanen sisipatna lahiriah saja bagi erpuasa ras make uis guni. Tapi lit ka nge perubahen pertendin ije. Sie berarti kalak Niniwe tuhu-tuhu cara geluhna harus mulihken kempak Tuhan. Kalak Niniwe nggo ndalani dalan sisalah janah gundari harus milih dalan sideban. Dalan sipilihna seh asa gundari itandai alu kejahaten.

Pengarapen kalak Niniwe arah ia erpuasa ras make uis guni mbera-mbera Dibata salih ukurna janah la ngkernepken kota Niniwe. Kepeken pengarapen kalak Niniwe tuhu-tuhu jadi bagi siarapkenna. Sanga Dibata ngidah perbahanen kalak Niniwe maka kalak Niniwe e nggo robah arah perbahanenna sijahat, erkadiola me Dibata arah marakelesa siatena isehkenNa man kota Niniwe. Dibata labo saja ngukum, tapi pe erkadiola, adi manusia jera.

Masa pandemi eme masa gelap bagepe masa susah. Tahun 2020 virus corona mewabah i Indonesia bagepe kerina doni. Melala korban sakit bagepe idilo Dibata. Kita terkurung ibas kebiaren. Ekonomi menam mate. Enda krisis ekonomi paling parah ibas 100 tahun. Erkiteken wabah enda kita kerina la terkecuali irugiken ibas bentuk siberbeda-beda. Lenga ka kerugin ibas bidang emosi. Sisehken kehamaten man tenaga medis bagepe petugas-petugas sideban sierdahin alu la erlatih-latih nampati korban, tapi justru tenaga medis e ka nge sijadi korban. Nggo iberekenna kesahna guna nampati kalak.

Situhuna epidemi ras pandemi nggo piga-piga kali terjadi. Pernah kidekah 5 tahun (1347-1351) benua Eropa terkena wabah Pes. Akibatna sepertelu penduduk Eropa mate. Bayangken, sada arah telu kalak mate. Pernah lit ka wabah Kolera kidekah 8 tahun (1852-1860) terkena i Asia, Eropa, Amerika Utara, ras Afrika. Rulih-ulih virus flu mewabah, pernah Flu Unggas ras Flu Babi ngkenai Kanada, Amerika Serikat, ras Meksiko tahun 2009-2010. Emaka MERS i Timur Tengah tahun 2012. Bagepe Virus Ebola tahun 2014-2016 i Afrika. Tapi, Virus corona enda me sipaling erbanca kita mesera. Virus enda lebih mesunah menular bagepe banci erbanca kalak mate. Alu lalit nuduhken gejala, tiap kalak banci jadi penular. Tuhu-tuhu wajar kita kerina mbiar.

Arah bahan PA Mamre enda kita ibabai guna ngelitken sikap mental ngadapi masa gelap bagepe masa susah. Manusia iandingken bagi koin lit ia dua sisi. Sada sisi kita rapuh seh maka sembarang waktu banci ndatken pinakit ras marakelesa, tapi ibas sisi sideban kita megegeh ras ngasup nampati kalak sideban. Nggit isampati bagepe nggit nampati, nggit ibere ras nggit mere merupaken inti kiniulin manusia. Kita eme manusia hina simesunah kal italuken virus sikitik. Tapi, ibas sisi sideban kita eme manusia simulia singasup radu ras berjuang mengatasi bencana nasional enda janah keke mulihken arah perbebenta enda.

Masa gelap ras masa susah akibat virus enda memang eme pengujin man banta. Iuji ise kin situhuna. Uga kerna pertemanenta isukati arah pengorbanenta. Tapi, pengorbanen banci teridah ibas masa susah. Segedang geluh rulih-ulih kita bakal ndatken masa gelap bagepe masa susah. Ije kualitasta sebage manusia teruji. Apakah kita banci jadi teman situhu-tuhu man temanta siperlu penampatta?

Jelas me virus enda nggo maba dampak si la mehuli nandangi erbage-bage kegeluhen, la terkecuali bidang keagamaan. Caranta erkebaktin, misalna, lanai banci ilakoken bagi biasa. Lit ibadah virtual. Mbue anggota jemaat canggung denga ngelakoken enda. Tapi, lanai tersilahken. Virus enda nggo erban doni enda dem alu kebiaren. Ilumpuhkenna mbue bidang: ekonomi, politik, hubungen-hubungen sosial, bagepe kebiasan sideban sibiasa silakoken. Dunia pendidiken pe terpaksa mengubah cara ndalanken pendidiken. Kidekah enda konvensional ilakoken ibas ruang kelas, gundari ilakoken i rumah secara daring, sedangken orangtua rempet jadi guru man anak-anak sierlajar i rumah.

Perubahen sada hal sipasti ibas kegeluhenta. Ibas kerina dampar kegeluhen tetap lit ibas perubahen. Emaka siperluken kita labo gegeh guna ngelawan ibas litna perubahen enda tapi kengasupen penyesuaian diri nandangi perubahen e. Perubahen ibas ndalani kegeluhen pe harus silakoken. Harus rajin kita cuci tangan pake sabun bagepe make cairen pembersih tan berbahan alcohol, jaga jarak siaman ras kalak simbatuk bagepe bersin/kebacihen, tetap make masker, adi labo terlalu penting ula pedah lebe ndarat. Memang enda cukup mamang ateta ibas ndalankenca erkiteken la kita biasa. Tapi sienda nggo jadi keharusen man banta guna njagai kegeluhenta kerina. Arah kita njaga dirinta, sijaga kegeluhen temanta silit i doni enda. Kesadaren kolektif tuhu-tuhu kal ipentingken guna ngelawan pinakit enda.

Pdt. Andreas Pranata Meliala, S.Th

GBKP Rg. Cibinong

Suplemen PJJ : Matius 5 :13-16 ; Tgl 11-17 Juli 2021

Ogen  :  Matius 5:13-16

Thema  : “SIRA RAS TERANG DONI”

Ersaksi arah kegeluhen seh kelpentingna ras labanci iabaikan entah pe terlupaken. Bagi kai si iarapken Yesus, gelah kita ersaksi (perb.1:8,Mat 28:18-20) arah kegeluhen si ernanam ras erguna man kalak si enterem, bagepe man doni enda.

Bahan PJJ nta sekalenda eme bagin pengajaren Yesus idatas uruk uruk,guna

peangkaken man kalak sienggo tek dat predikat” Sira ras terang”. Kalak sierkiniteken e igelari Gereja.

Sira ras terang,eme  siibutuhken setiap jelma. Kita laterpesirang  ras sira/terang. Setiap wari kita berhubungen ras sira bage pe terang.  Sira fungsina mempengaruhi bagepe terang  berfungsi guna mempengaruhi. Sada sendok sira itamaken ku gulen sada belanga minter ipengaruhina/iubahna gulen lanai hambar. Terang si kitik adi tamaken ibas gelap, minter ipengaruhina gelap e jadi terang. Tapi gelap la  terpengaruhisa terang e. Bagem kalak Kristen arus mempengaruhi ola ia ipengaruhi.

Kuga maka sira berpengaruh man gulen sada belanga? Nggit sira ndarat ibas bungkusna nari,dingen nggit melengas,emaka minter lit pengaruhna  man gulen sada belanga. Bagepe Terang labo itutupi alu tumba, tapi nggit keri melengas guna nerangi sekelewetna. Bali ras  sebatang lilin siterang, itamaken ibas si gelap, ipengaruhina gelap jadi terang. Bagem igambarken kegeluhen kalak Kristen itengah tengah doni enda.

Kehadiren gereja i doni enda guna mempengaruhi dunia  kegelapen gelah nggeluh ibas terang Tuhan. Bagepe  mempengaruhi biak doni,ku biak singena ate Dibata. Guna sie kalak Kristen arus nggit ndarat ibas zona aman nari guna mempengaruhi kalak sienterem ku simehuli.

Kalak sierkinteken,tah pe gereja itamaken Tuhan i doni enda,jadi pasu pasu ku sekelewetna,tah pe jadi saksi Tuhan i bas inganna tading. Gereja silanai erguna man kalak sideban,situhuna lanai  igelari gereja( sira silanai masin,iambekken,sabab jadi sinanggel man kalak sideban).Ciri gereja yang benar eme jadi pasu pasu man jelma sienterem.

Sira ras terang, berarti ibutuhken kehadirenna ijapa pe. Adi la ia ije idarami kalak.

Tereteh ia la ije. Misalna gulen latama sira minter teridah. Ija sirana? Tapi adi ije pe ia,labo Ncidahken bana, tapi tergejapken.

Bagepe Terang suari labo ia inget, tupung berngi rempet mate lampu,kerina kalak nggejapken gulut, gara lampu minter salih jadi meriah akap(kehadiren terang mengubah suasana gulut jadi tenang. Bagem arusna kehadiren  gereja i doni enda,  tergejap man kerina jelma reh tenangna,reh malemna atena.

Gia sekali sira ras terang ibutuhken oleh semua orang, tapi sira ras terang e igunaken alu tepat sasaran ras tepat takaran. Adi la tepat banci jadi batu sandungan, tercurna gelar Dibata simereken gelar man kalak Kristen. Bali ras gulen mbuesa sira, kerina kalak banci jungut jungut. Tah pe  terang si melebihi bagi sewajarna banci mesilau akap kalak kerina. Contohna kalak Kristen ia ngenca akapna benar , Badia kal akapna bana, mandangi, sombong rohani rsdna. Enda kerina sira ras terang si over dosis,jadi sinanggel man klk sienterem.

Arah uraian idatas,berarti kalak Kristen tah pe gereja sebagai sira ras terang,berarti Gereja siernanam man kalak sienterem, gereja si mpeturah ate malem man kalak sienterem. Gereja simpeturah ate kalak megedang ija  ia tading. Ersinalsallah terangndu ilebe lebe kalak sienterem,gelah ipujina Dibata Bapandu si isurga(ay.16).

                                                                                     Pdt  Neni Triana br Sitepu

Runggun GBKP  Cisalak

Suplemen PA Mamre Kejadian 10 :1-5 : Tgl 04-10 Juli 2021

“Megah Make Bahasa”

Kejadin 10:1-5

Ibas bahan PA Mamre enda ituriken kerna daftar kesusuren janah daftar kesusuren enda seri ras kai silit ibas daftar sebelumna ibas Kejadin 5. Amin bage, lit piga-piga cataten sebage gelemen kata pembuka guna memahami daftar sicukup gedang ibas Kejadian 10 enda. Daftar bangsa enda harus ioge ibas sudut pandang bangsa simbaru eme kenca pembuangen i Babel. Ibas daftar bangsa enda tuhu-tuhu la ikataken kerna bangsa Israel. Bahkan nini-nini bangsa Israel bagi Abram pe la ikataken ijenda. Kari ibas Kejadin 11, gelar Abram teridah. Daftar bangsa sibage kal buena ncidahken maka keselamaten sijaminken Dibata man manusia la terbatas man bangsa Israel ntah pe Juda saja, tapi man kerina bangsa. Perukuren enda sendalanen ras perintah guna ertuah bayak bagepe ndemi doni. Kesusuren anak Nuah itandai sebage kelompok-kelompok bangsa-bangsa menurut bangsa, bahasa, taneh, ras bangsa-bangsa masing-masing. Susunen daftar kesusuren enda la ibenai arah anak sintua, tapi arah anak singuda, eme Japet. Enda me salah sada ibas daftar bangsa simbaru, si la terkena ukumen banjir simbelin, tapi nggeluh ibas kebebasen. Arah ncidahken daftar kesusuren anak-anak Nuah enda, ijenda icidahken petunjuk kerna daerah persebaren bangsa-bangsa: Madai ngiani daerah dataran tinggi Iran sebelah timur. Bangsa Elisa ngiani daerah Sepanyol, bagian barat. Gomer ngiani daerah Laut Hitam, bagian utara. Kus ngiani daerah Arab bagian selatan ras Seba i daerah pantai Somalia i Afrika. Dua gelar enda lit ibas bagian selatan. Alu ngataken daerah-daerah ibas 4 penjuru mata angin enda, penulis atena ngataken maka generasi manusia simbaru si idaftarken ijenda meliputi kerina penjuru doni. Ia si iselamatken Dibata la terjeng terkurung taneh perpadanen, tapi jadi simaba berita keselamaten man kerina bangsa.

Adi siukal bahan PA Mamre enda ibas ayat 1a mereken pengantar cukup penting man banta erkiteken keterangen singkat ibas ayat enda singataken daftar kesusuren arah anak-anak Nuah si tubuh kenca banjir simbelin. Ia me bangsa simbaru, si la terkena ukumen, tapi iselamatken Dibata. Emaka ayat 2-5 erban daftar kesusuren Japet. Gelar arah bangsa-bangsa siikataken ibas daftar kesusuren enda eme bangsa-bangsa singiani wilayah Israel bagian utara. Dua gelar sicukup penting arah ayat 2 eme Madai ras Jawan. Bangsa Madai ntah pe Medi muncul ibas pertengahen abad 9 sM. Bangsa enda me radu ras Babel naluken Assur ras ngkernepken Niniwe ibas tahun 612 sM. Madai enda me sikedungenna bakal lebih itandai alu gelar Persia ntah pe Parsi alu rajana eme Kores. Raja enda me sibakal mpedarat keputusen guna ngulihken kerina bangsa tabanen, termasuk kalak Jahudi, ku taneh kemulihenna masing-masing, sanga ia naluken kerajan Babel. Enda me erti penting siate ikemukaken arah gelar Medi ibas daftar enda. Jawan eme penggelaren nandangi sada suku arah rumpun bangsa Junani. Ibas daftar enda ia anak Japet peempatken. Lit piga-piga kemungkinen ibas ngertiken gelar enda, tapi mungkin saja gelar enda mencakup Dodanim, Gog, ras Magog simungkin berarti Lydia. Informasi kerna perkembangen gelar enda ibas Padan Sindekah memang la jelas, tapi mungkin sinimaksudken eme teluk sinirangken dua kebudayan, eme kebudayan Semit i wilayah selatan ras Indo Eropa i wilayah utara. Pentingna gelar Jawan ibas daftar enda berhubungen ras keterangen kerna tiap bangsa ras tanehna, sukuna, ras bahasana. Alu sienda ate itekanken maka kerehen bangsa simbaru siibebasken Dibata arah bencana pembuangen i Babel nari eme kerehen bangsa ras identitas simbaru si la banci terbaba nari ibas pengaruh bangsa ras kebudayan sideban. Kesusuren enda hadir ibas semangat simbaru, bebas arah konflik. Emaka dahinna eme nggeluh ibas kedamen bagepe membangun diri ibas suasana kegeluhen si terjamin kesejahteranna, janah mpekena-kena tradisi-tradisi kiniteken. Emaka ibas pendungi ayat 5 ikemukaken keterangen kerna kondisi bangsa-bangsa kesusuren Japet si nggo marpar merap e. Keterangen ibas ayat enda perlu iperdiateken lebih lanjut. Nggeluh ibas suku ras negeri si pelain-lain. Keterangen enda erban penekanen kerehen tiap bangsa siikataken ibas ayat-ayat enda secara nyata alu potensi-potensi silit ibas ia. Tiap bangsa e nggeluh ras iungkapkenna identitasna i doni ija ia itamaken. Ijenda me tiap bangsa ngembangken diri ras kebudayanna sue ras kondisi wilayahna. Tep-tep terpuk pelain-lain cakapna. Bahasa sinimaksudken ijenda banci ncidahken identitas arah sada suku ntah pe bangsa, tapi si terutama ijenda eme bahasa sebage alat komunikasi sapih-sapih manusia bagepe ras Dibata. Ibas sudut pandang enda, bangsa simbaru silit kenca banjir simbelin eme bangsa alu sada bahasa simbaru ntah pe banci ka nge ikataken cakap simbaru guna mperehken kedamen. Bangsa e harus mberitaken kedamen man bangsa sideban ras erban ungkapen pujin guna kemulian Dibata. Kinata kegeluhen ibas kelompok merga, suku ras bangsa labo terjeng sada kinata etnik si kosong. Ibassa lit tradisi-tradisi kegeluhen ras nilai-nilai kegeluhenna si positif. Aturen-aturen kerna perjabun, pembagin taneh ras warisen, orat nggeluh ibas pergaulen, berlaku man temue ras sidebanna eme hal-hal simeherga ibas Tuhan. Kerinana e erguna guna mpekena-kena kegeluhen manusia gelah nggeluh sebage mahkluk simulia. Amin bage, nilai-nilai e harus lalap ikembangken ras ipelimbarui gelah jadi pasu-pasu man teman manusia ras mpermuliaken Dibata.

Pdt. Andreas Pranata Meliala, S.Th

GBKP Rg. Cibinong

Info Kontak

GBKP Klasis Jakarta - Kalimantan
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate