Suplemen PJJ : Matius 27 :3-4 ; Jeremia 29 : 11 : Tgl 05-11 September 2021

TUHAN ERBAHANCA KITA SENANG

Matius  27 : 3 – 4; Jeremia  29 : 11 

(Hari Pencegahan Bunuh Diri)

I.      Kata Perlebe

Kesah ras geluhta manusia Tuhan empuna. Dibata si merekenca alu ngembusken kesahNa maka manusia nggeluh (Kej. 2:7). Erkiteken kesah ras nggeluh e sekerajangen Dibata, emaka labo banci ate-ate manusia kerna kesah ras geluhna. Apai ka adi manusia nia-niaken kesah ras geluhna alu munuh bana (MB). Kinatana nai nari seh asa gundari lit terjadi kalak/ jelma si ngujungi geluhna. Lit kalak MB tupung nguda denga ras lenga erjabu, kenca enggo erjabu ras kenca enggo metua. Sada si jelas mbedakenca paksa si nai ras paksa si nduari eme kerna buena kalak si munuh bana. Adi nai mekatep sitik si begi ras si idah. Nduari nggo erurakna beligan kalak si bage. Amin bage gia lit denga 800.000 seh ku 1 juta kalak si mate MB pertahun.                                                                                                                                                                 

II.   Penjelasen Kata Dibata

 Judas Iskariot eme salah sada murid/ ajar-ajar Tuhan Jesus si 12 kalak. Judas salah sada contoh si la mehuli bas Pustaka kerna njaga, ngergai ras mpekena-kena kesah ras geluh si ibereken Dibata man bana. Kenca idayakenNa Jesus Kristus alu 30 keping duit pirak, erkadiola ia. Erkadiola kal ia ngidah uga pengelako imam-imam, kalak Parisi nangdangi Jesus. Terlebih kenca ietehna maka ibunuh kalak e atena Jesus. Ibenterkenna me duit si ialokenna ndai ku Rumah Pertoton jenari lawes ia ibunuhna bana. La Judas ngenca ibas Pustaka si MB tapi lit piga-piga subuk ibas Padan Sindekah bagepe Padan Simbaru. Lanai ndauh ukurina ibas ia kecewa ras erkadiola. Oratna min kalak si erkadiola e jera dingen robah ibas dosa ras kesalahenna nari. Tapi Judas la bage. Justru lakokenna si la ngena ate Dibata, si ilarangNa.

 Kata Dibata ogenta peduaken, ngerana kerna kalak Juda lit i pembuangen i Babel tupung nabi Jeremia nehken nubuatna. Kalak si itaban enda umumna kalak si terhormat: kesusuren raja, pejabat, si erkuasa ras beluh. La kentisik ngenca ia tading i taneh pembuangen. Rumah Pertoton ras tembok Jerusalem kebanggan kalak Juda enggo itutung ras iradasken kalak Babel. Rumah Pertoton e lambang kehadiren Dibata, kuasaNa dingen keleng ateNa man bangsaNa. Tuhu-tuhu medanggel kal iakap kalak Juda si itaban sabab ipedauh ia ibas Rumah Pertoton lambang Tuhan lit i tengah-tengah kalak Juda. Menam bene pengarapenna nggeluh. Tapi Tuhan erkelangken nabi Jeremia ngerana ban bana kerina. Dibata mpeturah pengarapen e mulihi ibas ia. Ibas Tuhan lalap lit pengarapen nggeluh. Tuhan mpetangkas kerna sura-suraNa si terligen man bangsaNa. Tuhan ngenca meteh sura-suraNa nangdangi kalak Juda. Sura-suraNa jine e me gelah bangsaNa nggeluh senang, labo gelah cilaka. Rencana Dibata e me mereken wari si pepagi bagi si iarapken bangsaNa (Jeremia 29:11). Tuhan ngukum bangsaNa alu ngizinken bangsa Babel naban ia labo gelah bangsaNa cilaka. Tapi gelah erkadiola, robah dingen jera. Gelah bangsaNa mulihken ernalem dingen ersembah man Dibata. Jenari Tuhan pasti mereken kemalemen ate bagi si iarapkenna.  

III.                 Pengkenaina

1.        Tema: “TUHAN ERBAHANCA KITA SENANG.” Kerina kita nura ras ngarap gelah nggeluh senang. Melala cara ras perbahanen si ban bas geluhta gelah kita banci nggeluh senang. Tapi banci jadi ras rusur kal terjadi labo kesenangen si datken tapi persoalen, kiniseran seh ku tingkat perbeben. Ibas kita jumpa ras ikenai kesuliten, tekanen ras kinisuin tetaplah erpengarapen man Tuhan. Ula bene pengarapenta. Tek ras yakinlah ibas paksana Tuhan mereken kesenangen man banta. Sura-sura ras rancangen Tuhan lalap si mehuli man banta kerina. La pernah si la mehuli apai ka cilaka si iberekenNa man banta. Kai pe si terjadi man banta, Tuhan e lalap mehuli man banta (bdk. Masmur 106:1). IberekenNa me wari si pepagi bagi si arapken kita.

2.        Kesah, nggeluh ras geluhta arus si jaga ras si pekena-kena seh ibuatNa, ilegiNa ntah ipindoNa ibas kita nari eme arah kematenta. Tuhan si mereken kesah ras geluhta man banta. Jenari Tuhan ka si berhak muatsa, nariksa ibas kita nari ibas waktu Tuhan ras alu caraNa (Jop 1:21). Kita manusia la berhak ras la rate-ate lako mpengadi kesah ras geluhta. Kita la banci alu sengaja mpemate banta. Payo maka kesah ras geluhta e lit ibas kita, sekerajangenta. Kesah ras nggeluhta e hakta. Tapi kita labo berhak mpeltepken ras mbeneken kesah ras geluhta. Hak nggeluhta lit tapi hak mate ntah pe munuh bana la lit.   

3.        Alu tek man Dibata Si Telu Sada, nggejapken kehadirenNa, campur tanNa bas kegeluhenta erbahanca pengarapenta nteguh. Uga gia beratna persoalen ras perbebenta, tapi adi tek kita Tuhan nemani ras nampati labo ndigan pe kita nggit MB. Adi jelas ras tangkaslah man banta maka Tuhanta Jesus  rembak ras kita, rancangenNa lalap rancangen si mehuli ras mereken wari si pepagi bagi si arapken kita, la ndigan pe kita pang MB. Ingetlah, ibas kai pe Dibata erdahin guna kiniulinta kerina anak-anakNa si erkeleng ate man baNa (Roma 8:28).

4.        Erbage-bage sabab kalak MB: bene pengarapenna kerna wari si pepagi; kecewa berat/ depresi; kematen kalak si seh kal atena kelengna, penalemen ras penundalenna; tekanen ekonomi si mberat misalna erkiteken Covid 19; perasan itulak ntah pe la meherga; la ianggap ras la ikelengi; duit/ erta jadi dibatana. Bage duit/ erta e mayap minter bene akapna geluhna. Cara-cara MB si lit eme: ipeltepkenna urat nadina, ndelis, minem racun, ndabuhken bana ibas gedung meganjang nari, ngombakken bana, lompat ku dalan mbelin (jalan raya) si ibentasi mobil si meter, ngalaken kereta api si erdalan, rst.   

5.        Bas liturgi penguburen gerejata jelas ije ikataken maka kalak si sengaja ras sadar ngelakoken MB, man bana la ilakoken liturgi penguburen selaku kalak Kristen. Enda ertina Tuhan la ngaloken kalak si MB. La lit inganna ibas Tuhan man kalak si MB. Sabab ilebeina kuasa Dibata kerna kesah si iberekenNa. La iakuina rasa iergaina Kesah si ibereken Dibata. Alu sengaja ras sadar ia mutusken kesahna alu MB. Pelayanen liturgi penguburen ilakoken ntah pe ibereken man kalak si idilo Dibata erkiteken mutus ntah pe keri kesahna.   

Pdt. Juris Tarigan, M.Th,  GBKP RG Bogor

Suplemen PJJ : Kejadin 22 : 1-4 ; Tgl 01 -07 Agustus 2021

Nats   : Kejadin 22 : 1 – 4

Tema  : Dibata Nikapkenca (Teologi Perjabun)

Abraham eme sekalak sienggo tuhu-tuhu teruji ibas kinitekenna nandangi Dibata. Ia igelari bapa kalak si tek man Dibata erkiteken ia labo saja sekalak si tek nandangi Tuhan tapi pe kalak si ngendesken kerina kegeluhenna man Tuhan. Kiniteken Abraham iuji Dibata alu mesangat, ija Dibata merentahken ia guna ngelakoken sada hal si bertentangen ras akal sehat bagepe kekelengenna selaku sekalak bapa eme mereken (mpersembahken) anakna Ishak. Anak sienggo ndekah kel itimaina, anak siipadanken Dibata man bana. Sibayangken kuga kira-kira pusuh ras penggejapen Abraham selaku sekalak bapa. Tuhu secara manusie enda sada perentah ras pemindon Dibata simberat nandangi Abraham, tapi ibas si e la lit sitik pe ukur Abraham lako nimbak sura-sura Dibata. Ibas perdalanen kegeluhen Abraham, lit telu (3) pengujin kiniteken si idalani Abraham eme :

Pendilo guna nadingken kutana, kade-kadena, rumah bapana jenari lawes ku negeri siituduhken Dibata “pepagi” man bana (Kej. 12 : 1). Kerina kenyamanenna, simeherga ibas kegeluhenna arus itadingkenna dingen lawes ku kuta si lenga eteh kuja tujunna.

Guna tek nandangi padan Dibata mereken kesusuren sienterem (Kej. 12 : 2). Abraham ituntut guna ngelawan logika ras pemikirenna secara manusia sebab paksa Dibata nehken padanNa umur Abraham enggo metua (75 tahun). Padan Dibata epe arus itimaina 25 tahun dekahna.

Perentah guna mpersembahken anakna Ishak jadi persembahen tutungen man Dibata.

Kerina idalani ras ilakoken Abraham sue ras kai siiperentahken Dibata man bana, la lit sitik pe siikurangina ras itambahina. Terlebih ibas natsta ituriken maka erpagi-pagi si lampas Abraham berkat ku taneh Moria guna nehi perentah Dibata. Dibata mereken perentah enda alu tujun :

Kuga nge keleng ate Abraham man Dibata; belinen nge man Dibata ntah man Ishak?

Kuga nge kiniteken ras pengarapen Abraham nandangi Dibata; lalah arah kehadiren Ishak ibas kegeluhenna enggo menggeser “keutamaan” Dibata.

Ibas kinatana tuhu-tuhu Abraham erkeleng ate man Dibata, keleng atena icidahkenna arah kepatuhenna nandangi perentah Dibata. Hal enda banci ilakoken Abraham erkiteken tek dingen igejapkenna maka anak e pemere Dibata. Tupung isungkun Ishak ia: “bapa, ija kin biri-biri si man persembahenken e”? “Nina Abraham : Dibata kari nikapkenca”! (Kej. 22 : 7 – 8). Payo me maka Dibata sinikapkenca.

Yehova Jireh (Dibata Nikapkenca) enda negasken man banta maka sinasa lit e Dibata empuna dingen Dibata nge simerekenca man banta. Dibata meteh kai siniperluken kita dingen si pas ibas kegeluhenta. Si jadi tanggungjawabta eme kuga kite tetap nggeluh erkiniteken man Dibata, nggeluh patuh ras setia nandangi kerina perentah Dibata.

Arah bahan PJJnta wari enda lit piga-piga hal si seh man banta eme :

Kiniteken ras kesetian man Dibata mbelin kel hubungenna ras penandainta Dibata e alu payor as benar. Reh bagesna penandainta man Dibata, kesetian ras kepatuhenta ngikutken kataNa pe reh teridahna.

Jabunta ras kerina isina eme pemere Dibata. Emaka kuga kita ngasup mabai isi jabunta erkemalangen ras erkiniteken man Dibata. Selaku orang tua erlajar kita man Abraham, sibabai ras sibereken usihen man anak jabunta kerna nggeluh ibas kiniteken man Dibata. Kalak sierkiniteken teridah arah kesetian ras ketutusenna er-Dibata, bagepe arah kiniulinna ibas kegeluhen.

Adi Ishak ipindo Dibata guna ipersembahenken jadi korban tutungen, kita ras isi jabunta ipindo Dibata guna jadi persembahen si nggeluh man Tuhan arah kerina dampar kegeluhenta (Roma 12 : 1). Arah dirinta, jabunta, jabaten, pendahin ras kerina kinilitenta kita mpermuliaken Tuhan.

Berkat jangan menggeser “Sang Sumber Berkat” yaitu Allah. Seh ras la seh sura-suranta keutamaan Dibata selaku ulu kegeluhenta ula min bergeser. Abraham la menggeser pengarapenna man Dibata aminpe sampur keriahen ras kemalemen ate sinisehken Dibata man bana arah anakna Ishak. La sitik kita silebih focus ku bas pemere asangken sumber/ ulu pemere e, emaka megati kita kecewa ibas kegeluhen enda.

Ibas kinata kegeluhenta genduari enda, khusuna ibas masa pandemic Covid 19 simereken dampak nandangi kerina kegeluhenta, terlebih secara ekonomi/ pendahin tetaplah kita erkiniteken ras erpengarapen maka Dibata nikapken kerina siniperluken kita. Siperlu silakoken eme tetap setia man baNa, nggeluh ibas kata Dibata.

Pdt. Elba Pranata Barus, S.Th

Runggun Bandung Timur

Suplemen PJJ : Masmur 112 : 1-10 ; Tgl 25-31 Juli 2021

Nats            : Mazmur 112:1-10

Tema           : Si Erkemalangen Man Tuhan

  (Erti Erkemalangen)        

I.     Kata Penaruh

Adi si oge mazmur enda, ngerana soal pasu-pasu Tuhan nandangi bangsaNa. Lit pasu-pasu Tuhan secara universal, komunal, bahkan secara personal.

Kemajun zaman megati mahanca manusia hanya ngukurken dirina jine. Manusia Tambah ka pe pandemi covid-19 si lenga eteh ujungna mahanca manusia erlomba-lomba ngaturken kegeluhenna segalahna ngasup tetap ertahan ngalaken situasi kegeluhen paksa enda. Maun-maun, ndarami kalak sierkemalangen man Tuhan pe enggo mulai mesera. Arah bahan PJJta enda kita iajuk guna ngantusi uga kin kegeluhen kalak sierkemalangen man Tuhan rikutken Mazmur 112:1-10.

II.          Mpebagesi Pengangkan Kerna Ogen

Masmur 112 enda nuriken kerna pasu-pasu Dibata nandangi anak-anakNa si erkemalangen man Tuhan dingen si ermeriah ukur ndalanken perentahNa. Masmur 112 enda eme kelanjuten Masmur 111, kerna upah si ialoken kalak si erkemalangen man Tuhan. Kegeluhen kalak si erkemalangen man Tuhan dem alu keriahen ras kejuah-juahen. Sebab arah keriahan ukur kalak si erkemalangen man Tuhan jadi pujin man Dibata. Kalak si nggeluh erkemalangen man Tuhan ngaloken hak-hak istimewa si la ialoken kalak si la erkemalangen man Tuhan. Kalak sierkemalangen man Tuhan labo kalak si lalap ngataken, “Tuhan, Tuhan, Tuhna”. Tapi kalak si erkemalangen man Tuhan eme kalak si “tunduk, hormat, mehamat” man Dibata (ay.1). Dingen nggeluh rikutken perentah-perentah Dibata. Perentah-perentah Dibata jadi kesenangenna dingen perentah Dibata enggo ituliskenna ibas pusuhna.  Kalak si erkemalangen man Tuhan, aminna pe geluhna melala alang abat, tapi la e mahanca aru ateNa. Sebab Tuhan lalap engkawali kegeluhenna. Kalak si erkemalangen man Tuhan anakanakna ipasu-pasu Dibata, ia jadi kalak sierkuasa (ay.2) ertina maka kalak si erkemalangen man Tuhan, labo terjeng ndatken pasu-pasu idur Dibata nari, tapi ia pe jadi pasu-pasu. Janah jabuna bayak namura (ay.3).

Kebayaken si imaksudken pemasmur ijenda labo kebayaken erta doni, tapi kebayaken siluar biasa si la ternilai ergana. Tapi kepentarenna jadi kesenangen man dirina. Ialokenna me erta ras kinibayeken, tapi si e kerina labo mahanca ia lupa kerna sumber erta ras kebayaken e.    Kalak sierkemalangen man Tuhan nggeluh alu bujur, adil, perkuah dingen perkeleng. Alu bage ersinalsal terang ia ibas kegelapen. Dibata la njanjiken makana kegeluhen kalak si erkemalangen man Tuhan terbebas ibas kiniseran nari. Tapi kiniseran la mahanca ia bene. Sebab Tuhan tetap engkawali ia. Janah rikutken kegeluhenna ngasup ia jadi saksi Dibata si nggeluh erkiteken paguh kinitekenna dingen ia nggit nampati kalak sideban. Arah perkuah atena ras kebujurenna iinget kalak ia (ay.4,6, 9).  Ipasu-pasu Dibata geluhna, erkiteken ibas kinilitenna labo ipakekena guna dirina saja, tapi ia pe nggit alu bujur pepinjamken (ay.5). La ia ertaktak rikutken kai si ibahanna. Tetap paguh kinitekenna. Dingen labo ia guling erkiteken tantangan doni si lit, tapi pegegehi Tuhan ia guna ngalaken kerina perbeben geluhna. Dingen ngasup ia tetap ngidah rencana Tuhan si mbelin bas geluhna. La ia mbiar nandangi imbang-imbangna. Tek ia makana Tuhan kap ras ia. Maka pasti ibela Tuhan ia iadepen imbang-imbangna (ay. 7-8).  Tapina kalak jahat gara atena ngidah kai si jadi nandangi kegeluhen kalak si erkemalangen man Tuhan (ay.10). Sebab kalak jahat ngidah kerna kejahatenna labo mereken keriahen ukur manbana. I je Dibata encidahken keadilenNa. Sebab kerina manusia ngaloken balasen sisetimpal rikutken kai siibahanna. Alu bage, kalak si jahat pe erkesempaten guna ngaloken lias dingen keleng ate Dibata si mereken kemalemen ate nandangi kegeluhenNa. 

III.       Pengkenaina

Erkemalangen man Tuhan eme gaya hidup. Labo banci kita pekulah-kulah nggeluh erkemalangen man Dibata, padahal situhuna pusuh ras peratenta labo man Dibata. Selaku anak-anak Tuhan mari si jadiken erkemalangen man Tuhan jadi gaya hidup. Siencidahken jati dirinta selaku kalak si erkiniteken. Tentuna kalak si nggeluh erkemalangen man Tuhan ndatken pasu-pasu idur Dibata nari. Tapi labo pasu-pasu e sijadi perayakenta. Sebab kemalangen man Tuhan nge keriahen si tuhu-tuhu. Keriahen si la ternilai ergana. Alu bage, mari radu ras kita nggeluh erkemalangen man Tuhan, rikut pe ras kerina isi jabunta. Sijadiken maka jabunta jadi sumbul keriahen si tuhu-tuhu labo terjeng guna dirinta ras jabunta tapi pe guna kalak sideban. Jadikenlah jabuta jadi saksi Tuhan si nggeluh dingen mabai jabu sideban erkemalangen man Tuhan.

Pdt  Nenny Triana Br Sitepu 

Runggun GBKP Cisalak 

Info Kontak

GBKP Klasis Jakarta - Kalimantan
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate