Suplemen PJJ : 1 Petrus 5 : 2 - 4 ; Tgt : 20-26 Oktober 2019

Ogen  : 1 Petrus  5 : 2 - 4   

Tema  :  “Mpermakani Rarasen Biri-Biri Dibata”

(Ngataken Bujur Ibas Enggo Dungna Perdalinen Pemilihen Pertua-Diaken)

I.      Kata Perlebe

Patut kal kita ngataken bujur man Tuhan. Enggo itaruhkenNa gerejaNa GBKP si malem enda ndahiken dahin sekali ibas 5 tahun eme pesta iman “Pemilihen Pertua-Diaken” periode 2019-2024. Secara umum kerina tahapen-tahapen si lit ibas dahin enda enggo erdalan alu mehuli. Mulai kin tahap sosialisasi, pembinan man ngawan, terus ku pemilihen bakal calon ras penetapen calon. Ilanjutken ku pemilihen secara runggun. Kenca si e erbahan kursus man calon Pertua-Diaken. Jenari pengukuhen ras penangkuhen. Lit denga runggun lenga seh ku pelantiken BPMR si mbaru ras penetapen seksi/ komisi. Tapi secara umum buen runggun-runggun enggo ngelakokenca. Bageme Dibata ibas Tuhanta Jesus Kristus Simada Gereja nggo ngendesken dahin pelayanen e man banta Pandita, Pertua-Diaken. Kita me si igelari serayan Dibata, aron Tuhan. IendeskenNa biri-biriNa eme perpulungen man banta serayanNa guna si permakani ras si kepkep alu mehuli bagi si ngena ateNa.   

II.    Isi

  Surat 1 Petrus enda ialamatken man kalak Kristen i bagin utara Asia Kitik (Turki). Kalak Kristen si merap marpar enda sangana ngenanami melala kiniseran erkiteken kinitekenna. Petrus ngerana man pertua-pertua perpulungen i Asia Kitik enda (ayat 1). Ipindona gelah pertua-pertua e mpermakani rarasen biri-biri si sangana ngenanami kiniseran. Pendilo Petrus enda ngingetken man banta uga ndube Tuhan Jesus jine nuruh Petrus mpermakani biri-biriNa. Sabab Petrus pernah mersoken Tuhan seh 3 kali. Mbuktiken kerna keleng atena man Jesus, ipindoNa gelah Petrus mpermakani perpulungenNa (Johanes 21:15-19). Si eteh ras-ras uga tutusna Petrus ndahiken persuruhen Tuhan Jesus e. Lanai sitik pe ia mbiar mpeseh kebenaren Kata Dibata aminna i lebe-lebe pejabat ras penguasa. La ia surut aminna ia iancam ras ipenjaraken. Uga ia tutus mpermakani rarasen e bageme ipindona man pertua-pertua bas mpermakani. Rarasen biri-biri (gereja/ perpulungen) e Dibata kap punana. Janah Dibata si merekenca man pertua-pertua e. Erkiteken si e Petrus mindo  gelah pertua-pertua e ngepkepsa alu ukur meriah bagi si ngena ate Dibata, ola alu ukur mberat (ayat 2a).   

  Petrus ngingetken man pertua-pertua e kerna motivasi si payo dingen mehuli ibas mpermakani dingen ngepkep perpulungen. Sipemena: ola ngelai erkiteken mata duiten tapi erkiteken ukur ersuruhlah guna ngelayani (ayat 2b). Sipeduaken: ola erkiteken atendu merentahi perpulungen, tapi bahan diri jadi usihen man perpulungen e (ayat 3). La banci perayakenna kerna kekuasan doni tapi pelayanen.

 Petrus ngingetken maka lit ulih, upah ibas mpermakani ras ngepkep rarasen biri-biri Dibata. Upah enda denggo ialoken. Upah enda ialoken asum reh pagi Kepala Permakan, Permakan Situhu-tuhu eme Tuhan Jesus peduakaliken. Man kalak si tutus mpermakani ras ngepkep perpulungen ialokenna me rudang-rudang tanda kehagan si la ermelus-melus (ayat 4). Rudang-rudang si merim si la ermelus-melus enda me tanda kehagan ras kemenangen. 

III.   Pengkenaina

1.      Mpermakani eme sada dahin ibas bidang peternakan. Mpermakani membutuhken kemeteruken ukur, ketetapen ukur ras kinigenggengen. Mpermakani la terjeng mere pangan/ gagaten ngenca. Tapi pe mere minemsa, nambarisa kune sakit, mbalutisa kune luka, njagasa gelah ula lalar, ndarami seh dat si enggo ndempar, ras njagasa kune lit rubia-rubia si meliar atena njerngem biri-biri e.  Bageme filosofi, jiwa ras semangat dahin enda ibaba ku bas dahin serayan Tuhan. Tuhan Jesus jine ngajarken kerna si enda. Jabaten Pandita, Pertua ras Diaken eme jabaten si enggo itetapken Dibata lako mpermakani ras ngepkep perpulungenNa.  

2.      Tema: “Mpermakani Rarasen Biri-Biri Dibata” (1 Petrus 5:2-4). Mpermakani rarasen biri-biri Dibata dahin si mehuli kap (1 Timotius 3:1). Emaka permanilah rarasenNa rikutken si ngena ate Dibata. Ingetlah janjita sope kita ikukuhken ras itangkuhken. Ninta ndube, “Tuhu bage ateku”. “Tuhu bage ateku” ertina kita erjanji ras komitmen lako tutus ndahiken persuruhen Tuhan. Si dahiken bagi si ngena ate Dibata. Labo ninta ‘tuhu bagi ateku’. Beda kal “Tuhu bage ateku” ras “Tuhu bagi ateku”. Aminna 1 huruf ngenca bedana tapi ertina seh kal petembilna. Sipemena, kita mpermakani bagi si ngena ate Dibata. Sipeduaken, kita mpermakani bagi ngena ateta saja, ate-ateta saja si ban. Adi bagi ateta (ukurta) nggit kita. Adi lang la kita nggit. Si darami lalap alasenta ngelak ras nulak dahin ras tanggung-jababta.    

3.      Mari si pepayo motivasi/ perayakenta bas mpermakani. Gelah kune nggeduk si pepinter, ras adi melket si murniken. Adi perayakenta terjeng gelar si merim ngenca marilah si pekena. Perayaken terjeng gelar ngenca teridah kap arah kisat ngelai, kisat ndahi perpulungen. Ola kal perayakenta terjeng gelar ngenca. Ola ngelai erkiteken lit canna, ndatken keuntungen materi, doni. Ingetlah maka kerangapen nangdangi duit eme sumbul kerina kejahaten (1 Timotius 6:10). Ngelailah erkiteken ukurta ersuruh ras  meriah. Melayanilah apa adanya, bukan karena ada apa-apanya. Bagepe ola perayakenta guna ndatken kekuasan. Gelah banci kita merentahi kalak. I gereja la inganna merentahi tapi ersaksi ras ngelai.

4.      Jadilah Pt-Dk usihen si mehuli man perpulungen. Jadi teladan ibas perukuren, pengerana, kejingkaten, kemeteruken ukur, erkeleng ate (bdk. 1 Timotius 4:12). Uga si tuhuna, kinatana: mpermakani ntah justru nuntut gelah ipermakani, ngelai ntah ielai, jadi usihen ntah jadi pandangen? Mari si renungken alu mbages. La kinlah kita jadi batu antuken erkiteken malas, sombong, meganjang ukur ras sok kuasa? Ula kal sempat jadi si enda bas kita serayan Tuhan.

5.      Kita mpermakani alu tutus, patuh ras setia gelah meriah ukur Kepala Permakan eme Tuhanta Jesus Kristus. Enggo isikapkenNa upah man banta eme rudang-rudang si la ermelus-melus si jadi keriahen, kehagan, kemalemen ate ras kemenangen (bdk. Ketangkasen 2:10c). Si aloken me upah e tupung kerehenNa peduakaliken. Situhuna gundari nari pe pasu-pasuNa si aloken ras si nanami ibas kita mpermakani rarasenNa.             

   

III.   Diskusi

1.        Biak-biak perman si kuga nge si perlu iusih i bas kegeluhenta?

2.        Dukungen kai nge si banci si bahan man Pertua-Diakenta i bas periode enda?

 Pdt  Juris  Tarigan

GBKP Rg Depok – Lenteng Agung 

Suplemen PJJ : Sakaria 10 : 1-3 ; Tgl 22-28 September 2019

Ogen           : Sakaria 10: 1-3

Tema : Pindolah Man Tuhan

 (Entrepreneurship: Okultisme)

Piga-piga waktu silewat, Indonesia sempat ngenanami kemarau/kekeringan si luar biasa. Biasana kenca seh bulan alu akhiren “-ber”, Indonesia memasuki musim perudan. Tapi ibas paksa si udan pe tempa-tempa segan nusur i Indonesia enda. Sempat sekali jadi piga-piga daerah khususna s iingani kalak karo erbahan ritual ndilo wari udan. Turah penungkunen ije, adi silakoken ritual sibage, situhuna kita sangana mindo udan man ise?

Peristiwa si ehampir mirip ras kai sijadi bahan oratenta sekalenda. Ibas negaranta Indonesia, dua ngenca lit musim. Musim perudan ras musim kemarau. Tapi i Israel bagepe daerah-daerah si beriklim Sub-Tropis, lit 4 musim eme: musim semi, musim panas, musim gugur ras musim dingin. Ibas musim semi, tentuna sinuan-sinuan mulai bersemi, bunga-bunga terlak ras biasana melala udan paksa musim semi, sementara kenca mulai masuk kubas paksa musim panas, udan biasana mulai berkurang, janah pe suhu udara lebih lasna asa si biasa. Logikana, enterem jelma ngarapken udan ibas pendungi musim semi guna jadi persiapen ibas memasuki musim panas.

Masalahna man ise kita mindo— udan e? kata Dibata jelas ngataken maka kita arus mindo udan man Tuhan Dibata, arusna kin pe man Dibata ngenca (ay. 1a). engkai maka bage? Tentuna erkiteken Dibata nge sinjadiken doni ras kerina isina (kej. 1:1-31). Adi Dibata sinjadikensa, emaka ia nge sierkuasa penuh nandangi iklim ras musim. Dibata ngasup penusur kemarau si la erngadi-ngadi seh telu tahun la nusur udan (Jak. 5:17, 1 Raj. 18:1), tapi Dibata pe ngasup penusur udan simeder guna ndungi kemarau e (1 Raj. 18:45). Lebih asa si e, Dibata pe ngasup penusur udan 40 wari 40 berngi seh maka lau ndemi doni ras engkernepken tinepa si lit ibassa seakatan tinepa si ringan ibas Bahtera Nuh (Kej. 7:12).

ÚÚÛDibata erpadan penusur udan meder man kerina kalak si mindo man bana (ay. 1b). lit tersurat ibas pustaka si Badia “Pindolah tentu idatndu” (Mat. 7:7). Pindolah man Dibatakai saja pe keinginenta banci sip indo man baNa. Amin pe banci saja labo kerina pemindonta e ijababNa alu kata “Yes” tapi silang-langna kita enggo mindo man baNa ras e encidahken maka siakui Dibata e selaku Dibata sierkuasa nandnagi kegeluhenta. Bali bagi sekalak anak si mindo man bapana, tentuna bapa e labo mungkin mereken batu adi anakna mindo Roti (Mat. 7:9-11).

D

Ibata ngelarang kita mindo man sideban seakatan man baNa saja. Ibas konteks penulisen kitab sakaria enda, senangen iakap bangsa Israel mindo petunjuk ras mindo pasu-pasu nandangi gana-gana si ipajuh, guru sibeluh ngoge nasip, ras guru sibaso. La ia nungkun man Dibata, situhu-tuhu jadi Dibata sierkuasa nandangi kegeluhen bangsa Israel. Tek kal bangsa e nandangi kai siibelasken guru sibeluh ngoge nasip ras gru sibaso e. Padahal kai si ikataken guru-guru e labo tuhu. Lalit kepeken gunana mindo petunjuk ntah pe nasehat man guru sibeluh ngoge nasip ras guru sibaso e. alu ngelakoken hal sib age akhirna bangsa Israel pe ndauh ibas Dibata nari, merap marpar bagi biri-bir si lalit permakanna. Uga ningen Dibata mpermakani bangsa Israel adi bangsa Israel sendiri pe la nggit ipermakani Dibata? Senangen iakapna ndarami sierbahanca senang pusuhna arah belas-belas guru sibeluh ngoge nasip e.

Bahan renungen enda, ngajuk kita guna niksiki dirinta, ntah pernah sekali jadi sipindo petunjuk man dukun, peramal ntah “orang pintar” sideban. Tapi arusna, paksa kita netapken pusuh ras kinitekenta guna tek man Dibata, ertina kit ape arus tek sepenuhna man Dibata. Ibas situasi sikugapana pe, arus me kita erpengendes man Dibata. Teklah kita tuhu-tuhu man Dibata sebab Ia me Dibata sierkusa ras simere kegeluhen man banta kerina manusia tinepaNa.

Pdt.Abdi E.Sebayang,M.Th.

GBKP  RG  Graha Harapan

Suplemen PJJ : Mazmur 121 : 4-8 ; Johanes 5 : 17 Tgl : 15-21 September 2019

Ogen  : Mazmur 121:4-8; Johanes 5:17

Tema : Aku Arus Erdahin

(Enterpreneurship :Erbintuas)

Mazmur 121enda menggambarkan Dibata penampat, sekawal Israel, ras njagai Israel. Pemazmur meteh tuhu-tuhu keuntungena adi Dibata ras kita, Ia sinjamini kerina perdalinen kegeluhenta. Sanga pemazmur natap ku deleng-deleng si jadi ingan si Badia eme Deleng Dibata, tersungkun-sungkun ia ija nari nge rehna penampat? Ay. 2 eme jawaben si penuh kepastin kerna Dibata. Ate pemazmur nuriken maka Dibatana la bali ras dibata sideban, siisembah nabi-nabi Baal. Terbagesen ibas ay. 4 ikataken maka Dibata siisembahna e eme Dibata si sepanjang sejarah lalap ngkawali bangsaNa. “…..la pernahmadatmataNa, la tertunduhpeIa”. Dibata si jadi sekawal man manusia e konsisten ras berkomitmen, ngelebihi asa sekalak nande sinjagai anakna. Sanga kitik denga anak-anak rusur tangis tengah berngi, biasana sekalak nande minter medak ia guna mpesikap anakna tapi rusur kange erkiteken latihna pernanden e tetap terpedem she maka meda ka erpagi-pagi je maka gantina ampan anakna.

Dibata eme Dibata si la pernah tunduh. Alu bage tentuna Ia me si memelihara kita sepanjang sejarah geluhta. Lit hal si harus silakoken perban Ia eme Dibatasi la pernah medem. IetehNa kerina si ilakoken kita. Sadar ngendia kita maka kai pe siilakoken kita iteruh pengawasen Dibata?

Adi I kantor biasana bos namaken kamera tersembunyi guna ngenehen kinerja pegawaina, tep-tep pegawai la pang berkutik. Pegawaina la pang ngeranai sanga erdahin, la pang chatingen, apai ka cipangan sanga erdahin. Adi nandangi bos ibas inganta erdahin pe kita mbiar, tentuna lebih sieteh njagai perbahanenta sebab bos besarta eme Dibata tetap ngawasi kerina gerak-gerik manusia.

Kitab Johanes si jadi pengogensi peduaken, konteksna eme kritik kalak Jahudi man Jesus kerna undang-undang wari Sabat. Erkiteken ibas wari sabat Jesus mpepalem kalak si pinakiten ideher kolam Betesda, kenca malem kalak ndai isuruh Jesus ia ngangkat amakna. Lit ngendia Jesus ngelanggar undang-undang taurat kerna wari sabat? Situhuna Jesus la ngelanggar undang-undang kerna wari sabat erkiteken siimaksudken ibas Jeremia 17:21-22  eme maba barang-barang si berhubungen ras pendahin bagi si tersurat ibas Nehemia 13:15. Sanggahen Jesus man kalak Jahudi si mengkritik Ia tepat kal, “…Bapang Ku erdahin kap lalap…”. Kata-kata Jesus e ncidahken makai bas Kej 2:2-3 ija Dibata ngadi ibas pendahinna eme nepa, tapi Ia la pernah ngadi erdahin guna njagai tinepaNa.

Temata sekalenda ngajuk kita guna erdahin, Aku arus Erdahin. Erdahin labo mpekeri gegeh erkiteken kekhawatiren kerna kebutuhen nggeluh, tap I kita arus erdahin sebab arah pendahinta pe kita arus teridah selaku kalak si erkiniteken man Dibata. Kalak si erkiniteken man Dibata si tetap erdahin maka ia pe arus teta perdahin (erbintuas). Adi kita kalak karo umumna la palah nari si ajari kerna erbintuas, tapi ula ka ndabuh kubas pemahamen terus-menerus bekerja keras guna ndarami kebutuhen geluh piah dungna la nari sempat menikmati geluh enda: la lit waktu istirahat, pulung ras keluarga, la nari sempat pulung ibadah minggu ras kegiaten si deban si enggo iaturken gerejanta. Ula sempat tarum ngayak-ngayaksi man tadingen, tading si man baban, eme kinitekenta.

Pdt. Abdi Edinta Sebayang, M.Th

Rg  GBKP Graha Harapan

Info Kontak

GBKP Klasis Jakarta - Kalimantan
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate