Suplemen PJJ : Ketangkasen 4 : 11 : Tgl 24-31 Januari 2021

 

OGEN            : KETANGKASEN 4:11,

 

Tema         : DIBATA SI ERMULIA

 

EVALUASI TAHUN 2020 (TEKHNOLOGI INFORMASI)

 

I.                   KATA PENARUH

 

·           Perpulungen sikelengi Tuhan, tentu labo kebetulan ibas Tahun 2020, tahun pelayanen GBKP eme “MENINGKATKAN KEMAMPUAN WARGA BKP DALAM PENGELOLAAN INFORMASI DAN KETERAMPILAN DALAM PENGGUNAAN TEKHNOLOGI INFORMASI”. Emaka mulai Bulan Januari tahun 2020 kegiaten GBKP mulai tingkat Moderamen, Klasis, Runggun, kerina erlumba erbahan seminar tentang Tekhnologi Informasi.

 

·           Emaka Dungkenca  kerina tingkat Moderamen, Klasis, Runggun erbahan seminar-seminar tentang tekhnologi Informasi dan penggunaannya ibas Bulan Februari, emaka Bulan Maret Minggu ke-3 tahun 2020 lanai kita banci beribadah ibas Gedung Gereja erkiteken pandemic Covid-19 nderpa Indonesia.

 

·           Tapi erkiteken arah seminar-seminar ras persiapen-persiapen si enggo ilakoken erbahansa kerina kegiaten gerejanta ibas Tahun 2020 ibas masa pandemic, lalit sada pe la terlaksana aminna gia dalam bentuk si berbeda. Bahken Tahun 2020 banci itutup alu perayaan Natal si penuh dengan hikmat ras nyata ibas nehken kekelengen alu aksi natal ku bidang pelayanan GBKP eme, Rumah singgah Narkoba ras HIV AIDS, YAYASAN PENYANDANG CACAT ALFA OMEGA, PANTI ASUHEN GELORA KASIH, PUSAT PELAYANAN ORANG TUA SEJAHTERA YAPOS, termasuk nampati kas Moderamen GBKP. Alu kata sideban, si  amini maka, Tuhan enggo ngaturken ras mpersipaken kita kerina ngadapi situasi Pandemi enda.

 

·           Emaka alu la siarap pe maka tahun pelayanen GBKP ibas tahun 2021 enda eme, GENERASI MUDA MENJADI BERKAT, ternyata enggo me mulai terlaksana arah masa pandemi enda, erkiteken secara umum belang-belang GBKP enda ibas ibadah Live Streaming enggo me idominasi oleh anak-anak PERMATAnta.

 

·           Tapi erkiteken bahan PJJ ta enda isinggung kerna evaluasi, tentu siakui maka melala denga nge siman pekenan ibas kita kerina subuk alat-alat bagepe Sumber Daya Manusia ibas komitmen ras ketekunen ibas ngelai Tuhan. Emaka arah bahan PJJ ta enda mari dage kita erlajar uga arusna ibas pelayanenta banci erbansa Dibata si ermulia arah kerina kecibal kegeluhenta janah labo dirinta.

 

II.                PEBAGESI PENANGKAAN KERNA TEKS

 

·         Kitab Ketangkasen 4 enda nuriken kerna pengenehen Yohanes uga Dibata mbuka pintu Surga janah minter ia idemi Kesah si Badia si erbahansa Yohanes ndatken kesempaten  naksiken kai si la pernah isaksiken manusia. Iidahna sada kursi kinirajaan i Surga janah sekalak kundul ije janah ayoNa ersinalsal bagi permata Jaspis ras permata Sardis janah kursi e ikeleweti benteha (Pelangi) si erbae rupana.

 

·         Yohanes ndatken kesempaten guna ngidah “pintu “surga” janah la hanya ngidah pintu surga tapi pe ia ibereken kesempaten guna bengket ku bas. Lalit ise pe iijinken Dbata ku Surga guna nuriken kai si iidahna  tapi Yohanes ndatken kesematen e. Bahken Yohanes isuruh Dibata bengket kubas janah gelah icidahkenNa man Yohanes kai si bakal terjadi i doni kenca sie.

 

·         Pintu enda ngertiken man banta maka ertina Yohanes ngidah pintu masuk labo pintu ke luar, janah pintu masuk e eme pintu kempak kursi kinirajaan Surga. Adi secara umum manusia ndarami jalan ke luar secara kedagingan entah pe dalan ke luar kempak dosa adi lit perbeben, kiniseran, kepahitan si ialamina, tapi Yohanes ndatken kesempaten bengket kubas pintu kinirajaan Surga e gelah ietehna kai si nandangi terjadi ibas doni.

 

·         Pintu ibukaken man Yohanes ertina Tuhan nikapken pintu si terbuka man banta kerina, emaka kita harus bengket ku bas pintu e janah labo ndarami jalan ke luar secara kedagingen guna ndungi perbeben siihadapi kita. Mungkin banci jadi lit kalak ndarami dalan kelur erkiteken la ia ngasup ngalaken erbage-bage perbeben si reh nderpa ia.

 

·         Bagepe Yohanes ngidah maka isekelewet kursi e lit 24 kursi kinirajaan, janah ibas kursi e kundul 24 pertua-pertua, uisna mbentar janah ipakena mahkota emas. Ikelewet kursi kinirajaan e lit empat mahluk si nggeluh, sada teptep dampar janah si dem mata arah lebe rasa rah pudi.

 

·         Kai si idah Yohanes e situhuna mereken pengertin si luar biasa man kalak si erkiniteken. Empat mahluk e eme symbol sejumlah malaikat Tuhan, dua puluh empat tua-tua e sebagai symbol kalak si erkiniteken. Kai siidah Yohanes e encidahken maka Dibata hadir ras ibas ingan Dibata hadir e lalit ingan nandangi kesombongen, la kita siakap sihebatna, la kita meganjangen rukur (bnd. Yakobus 4:16), erkitekenDibata nandai manusia ras kelemahen-kelemahenna. Janah benteha (Pelangi) siidahna e melambangken perpadanen Dibata bagi perpadanenNa ras Nuh, janah Dibata la pernah la nepati janjiNa.

 

·         Kai siidah Yohanes ibas Surga e ngertiken man banta:

 

1.      Kursi Kinirajan ngataken man banta maka Dibata kundul ikursi kinirajan Dibata si ikeleweti empat mahkluk ras ipuji sebagai pencipta alam semesta.

 

2.      Kursi kinirajan Dibata i Surga ngataken man banta maka Kursi kinirajan Surga e labo kosong janah labo bual tapi memang lit kin kursi kinirajaan Dibata e si i Surga. Dibata mpeseh man kalak si Badia i doni ras menjamin maka Dibata paksana ndahiken rencana-rencana-Na. Dibata erpadan maka Ia merintah kerina tinepaNa arah Yesus Kristus.

 

3.      Yohanes ngidah sinalsal bagi si ipantulken permata Jaspis ras Permata Sardis ngertiken maka Dibata lit ibas terang si la ngasup ise pe ndeherisa.Janah Dibata eme terang janah lalit kegelapen bas Dibata (bnd. 1 Yohanes 1:5).

 

4.      Dibata setia kap janah Dibata mbuka pintu Surga ngataken maka Dibata tetap mbuka dalan man banta ibas kita ngalaken perbebenta.

 

5.      Dua puluh empatna pertua-pertua e menterken mahkotana i lebe-lebe Kursi Kinirajaan Dibata, ngertiken kiniteruken ukur erkiteken mahkota emas e pe labo lit ergana erkiteken Dibata e ngenca patut isembah, janah erkiteken Dibata me si njadiken kerina si nasa lit, janah erkiteken peraten Dibata nge maka kerina e lit dingen nggeluh. (ay.11)

 

III.             PENGKENAINA

 

·         Temata eme DIBATA SI ERMULIA. Ibas Kamus Alkitab 'Kemuliaan' pada umumnya menerjemahkan kata Ibrani kavod yang mengacu kepada kekayaan, kemegahan, atau reputasi (meskipun dlm pengertian terakhir kavod sering diterjemahkan 'kehormatan'). Kemuliaan Israel bukanlah bala tentaranya tapi Yahweh (Yer 2:11). Alu kata sideban Dibata ngenca patut ndatken kerinana termasuk kebayaken, kemegahen, kehormaten.

 

·         Tentu arah bahan PJJ ta enda lanai lit alasenta maka kita la mereken kemuliaan man Tuhan sebab Dibata kap sinjadiken kerina sinasa lit janah erkiteken peraten Dibata nge maka kerina sinasa lit enda lit dingen nggeluh. Bagi tahun 2020 si lewat aminna gia kita lanai banci muji ras permuliaken Tuhan arah kinipulungenta ku gereja bagepe PJJ ibas rumah turang seninanta kerina bage pe aminna gia la kita banci sidahi-dahin sada ras sidebanna, tapi tangkas uga Tuhan nikapken Tekhnologi Informasi bagi sigenduari endagelah banci denga kita muji ras permuliaken Tuhan ibas masa pandemic enda pe.

 

·         Emaka tetaplah sidukung terus anak-anakta Permata ras KA-KR ibas muji ras mpermuliaken Tuhan ibas masa pandemi enda alu makeken Tekhnologi Informasi si enggo lit. Janah selaku anak-anak Permata si selama enda enggo ikut mendukung perdalinen kegiaten gerejanta alu makeken Tekhnologi Informsi si enggo lit, tetaplah semangat ras setia ibas mpermuliaken Tuhan alu talenta si lit ibas kita.

 

·         Tentu pasti nge lit kekurangen-kekurangen ras tantangen bagepe kinilapuasenta ibas mpermuliaken Tuhan ibas masa pandemic enda, tapi ula e erbahansa urak semangatta guna mpermuliaken gelar Tuhan. Bagi kai siituriken man banta arah bahan PJJ ta enda, bahwa ibas kita ngalaken kerina perbeben sinihadapi kita bas doni enda, Dibata enggo mbukaken pintu man banta janah enggo mbuka ken dalan man banta gelah kita banci ndatken serpang pulah ibas kerina perbebenta.

 

·         Emaka ibas masa pandemi enda pe marilah tetap kita kerina setia ersembah man Tuhan, tetaplah kita kerina setia ertoto man Dibata, ras marilah kita kerina tetap erpengarapen man Dibata sebab tek kita maka Tuhan mbuka ndalan man banta ibas ngalaken kerina perbebenta. Tetaplah bereken kemulian man Tuhan ibas siugapana pe arah keterlibatenta muji ras permuliaken Dibata, sebab Dibata kap sinjadiken kerina si nasa lit, janah erdandanken PeratenNa nge maka kerina e lit dingen nggeluh. Amin

 

 

 

Pdt. Jaya Abadi Tarigan, M. Th

 

GBKP Runggun Bandung Pusat

 

Suplemen PJJ : Johanes 4 : 39-42 ; Tgl 18-24 Oktober 2020

Ogen  : Johanes 4:39-42

Thema : “Tek Ras Erberita”

Bahan PJJ enda nuriken kerna perjumpan Jesus ras diberu kalak Samaria. Kai maksudna maka Johanes ngangkatken cerita enda ibas kitabna enda? Sebab ibas Johanes 3:36 Johanes ngataken ije kerna tek ras la tek sebab ije idatken sada perubahen siwajar guna cerita selanjutna, si merupaken sada cerita kerna kiniteken, pemena arah diberu kalak Samaria, janah kedungenna kerina penduduk kuta Samaria. Jesus kedungenna erban keputusen guna nadingken daerah e bagi si ituriken ibas Johanes 3 janah mulihken ku Galilea. Sanga ateNa mulihken ku Galilea Jesus ngelewati daerah Samaria sanga Ia ngerana-ngerana ras sekalak diberu Samaria i deher sumur. Ibas percakapen e lit ije terjadi kesalahpahamen diberu e memahami kai si ikataken Jesus. Sebab ibas kitab enda Johanes jelas kal tek ia maka manusia cenderung salah memahami pasu-pasu keselamaten Dibata amin pe pasu-pasu e lit jelas ilebe-lebe matana. Bagi diberu Samaria e, manusia cenderung erban kacau dua kinata kerna kebutuhen kula ras kebutuhen kinitekenta. Jesus mindo lau (lau e jadi sada benda situhu-tuhu nyata). Diberu e mamang atena, ngkai sekalak dilaki kalak Jahudi nggit ngerana ras ia, sekalak diberu Samaria. Jesus kedungenna ngerana kerna inemen kiniteken, lau kegeluhen (sada benda si la nyata). Diberu e menduga Jesus sangana ngerana kerna lau ibas sumur e janah meteh atena uga cara Jesus ndatken lau ibas sumur e nari adi la make timba (enda me sada perhatian kempak persoalen si nyata). Jesus ngerana ka kerna lau kegeluhen si erbanca kalak lanai muas. Emaka Jesus mengubah percakapen e seh maka alu pemetehNa kerna situasi kegeluhen diberu e, ibahanNa diberu e kagum man baNa. Emaka ituriken kerna inti penembahen man Tuhan situhu-tuhu, nembah ibas Kesah ras kebenaren, siibereken Dibata man manusia eme Kristus. Janah pemere e berlaku gundari. Diberu e kedungenna ngataken kerna kinitekenna sisangana turah alu ngataken kerna Mesias, janah langsung ia ijabap Jesus. Ikataken Jesus maka Ia me Lau Kegeluhen. Kai si ikataken Jesus enda eme salah sad acara siipake Johanes guna ncidahken kinidolaten ras kebenaren silit ibas diri Jesus. Kenca ajar-ajarNa reh njumpai Jesus janah ajar-ajarNa e sengget ngidah Jesus ngerana ras diberu kalak Samaria, sie erbanca diberu e mulihken ku rumahna janah mberitaken man kerina anak kutana. Ibas ia erberita kerna Mesias e, ia idemi kemalemen ate. Emaka kedungenna, anak kuta e pe lawes njumpai Jesus janah mulai me ia tek maka Jesus me Juruselamat doni. Kinitekenna lanai nari idatken arah kalak sideban, lanai ia bergantung kempak kesaksin diberu e, tapi idatkenna secara langsung. Lebih lanjut, kinitekenna ngelebihi kalak sipemenana kal ncidahken Kristus man bana. Johanes make cerita enda guna nehken sejumlah inti penting, si kedungenna bakal muncul. Jesus ncidahken man ajar-ajar kemungkinen kiniteken ibas kalak Samaria. Sekali nari Johanes mindo perhatianta ibas teks PJJ enda kerna pentingna kesaksin. Kesaksin Johanes Peridiken nggo ikataken, tapi gundari sekalak diberu si kinitekenna banci kataken “lenga dewasa” kepeken ibabaina kalak sideban kempak Kristus janah kalak e ndatken kiniteken silebih mbages ras megegeh asangken kiniteken saksi sipemena eme diberu ndai. Singkatna, Johanes nggo ncidahken cara Dibata nehken kekelengenNa man kalak silabo iperhitungken paksa sie.

Erberita la seri ras ngerana. Erberita terjadi arah perbahanen kegeluhen tep-tep wari. Perbahanen situhuna berarti geraken simeter tapi alu perhitungen sitepat. Erberita berarti ngelakoken kegiaten alu meter tapi alu metenget ras tutus, sebab kita isuruh bagi biri-biri itengah-tengah serigala. Adi sada mobil tabraken ras sada sepeda motor. Siidah sendiri terjadina tabraken e. Apakah kita nggit jadi saksi? Mungkin lang. Mungkin la nggit kita jadi saksi erkiteken jadi saksi e erbanca repot saja. Jadi saksi ntah pe erberita e la mesunah. Kita harus inget kai siidah, sibegiken ras sigejapken. Sebab kerina nge kari isungkuni man banta. Emaka ersaksi pe harus objektif. Enda mesera kal, sebab nggit ras la nggit tiap kalak la banci bebas arah perukuren subjektif. Adi kesaksin e ngerugiken kita sada pihak, banci pe terjadi maka kedungenna kita merasa bersalah. Pusuhta mulai ngerana. Erkiteken kesaksinta kalak irugiken. Adi jadi saksi tabraken saja pe nggo seh kal rumitna, apai ka jadi saksi guna perkara si lebih mbelin. Jadi saksi guna Kristus erkawiten perkara si seh kal belinna. Kita iangkat jadi saksi kerna kegeluhen ras perbahanen Kristus. Jadi saksi guna Kristus pasti ndauh lebih rumit asangken jadi saksi ibas pengadilen. Ersaksi guna Kristus labo terjeng ngerana, tapi ncidahken sada gaya hidup. Johanes ersaksi alu cara erban buku tujunna eme gelah kita tek maka Jesus e Mesias, Anak Dibata, bagepe arah kinitekenta ndatken kegeluhen ibas gelarNa. Perdiateken dua tujun e, eme gelah kalak jadi tek janah gelah kalak ndatken kegeluhen ibas Kristus ntah pe ndatken kualitas kegeluhen Kristus. Intina jadi saksi guna Kristus e la mesunah janah la ntabeh. Mbue risikona.

Thema PJJnta eme “Tek Ras Erberita”. Inti sipemena jadi kalak Kristen eme jadi ajar-ajar Tuhan ntah pe jadi murid Tuhan. Sebab alu kita jadi murid Tuhan merupaken konsep utama ibas pengajaren Kristen. Jadi ajar-ajar Tuhan e lit ije ikawitken ras ngikutken ntah pe ngelakoken. Jadi ajar-ajar Tuhan eme ngikutken guru ras ngelakoken sura-suraNa. Jadi ajar-ajar berarti nggeluh sue ras ajaren guru bagepe erbuah pengajaren guru e ibas bentuk perbahanen tep-tep wari. Jadi ajar-ajar labo status, tapi sada gaya hidup alu sada misi mpermuliaken Dibata. Ijenda teridah kaitenna antara jadi ajar-ajar ras njadiken ajar-ajar. Gaya hidup sebage ajar-ajar bakal erbahan kalak sideban jadi ajar-ajar Tuhan. Inti peduaken eme kerna identitas, emaka iperidiken me ia ibas gelar Bapa, Anak ras Kesah. Inti peteluken eme kerna erlajar ras ngajar. Guna banci ngajar kalak perlu lebe erlajar. Ibas ngajar kita erlajar. Erlajar guna ngelakoken kerina si iperintahken Dibata man banta. Perdiateken kata “ngelakoken” ijenda. Maksudna eme ngelakoken sura-sura Dibata. Kita erlajar labo terjeng guna meteh, tapi guna ngelakoken. Enda me inti pemberitanta ibas mberitaken Berita Si Meriah. Kita idilo guna erberita sebage ajar-ajar Jesus seh maka kegeluhenta e njadiken kalak sideban pe ajar-ajarNa. Emaka adi isuruh kita terus erberita, enda labo soal jumlah tapi soal kualitas. Labo soal pertambahen tapi pertumbuhen. Kita isuruh erberita eme ngajarken kerna keleng ate Kristus.

Pdt. Andreas Pranata Meliala, S.Th

GBKP Rg. Cibinong

Suplemen PJJ : 1 Johanes 4 : 16b -12 : Tgl 11-17 Oktober 2020

Ogen           : 1 Johanes 4:16b-21

Thema         : “Sehken Kekelengen”

Kekelengen eme salah sada hal si paling mendasar ras terpenting ibas kegeluhen manusia. Guna ndatken kekelengen, kalak nggit ngelakoken kai pe. Guna nehken kekelengen, kalak nggit nggalari erga si mehergana kal. Labo lalit alasenna adi turi-turin kerna kekelengen, sekalak bapa harus ngasamken kesah guna anakna, sekalak dilaki simate guna diberu sikeleng atena. Kekelengen sibagenda eme kekekengen siumum. Dibata mereken kapasitas man kerina jelma guna ngergai, ersura-sura, bagepe ndalanken kekelengen. Kesadaren sebage sesama manusia rusur kal nggo cukup sebage alasen guna sikeleng-kelengen. Hubungen si unik antara dua kalak, ntah hubungen dareh ntah hubungen kekelengen, jadi palas simegegeh guna sikeleng-kelengen.

Perintah utama man manusia eme ngkelengi Dibata ras teman manusia bagi ia ngkelengi dirina jine. Persoalenna, apakah kita nggo ngkelengi alu sempurna? Amin pe sikeleng-kelengen merupaken perbahanen si seharusna lit ibas diri kalak Kristen, kepeken la kerina banci ndalankenca alu sempurna. Mbue kalak ibas ngkelengi enda tanggung-tanggung denga isehkenna kekelengen e. Perbahanen si tanggung-tanggung enda tentu saja ndauh arah cukup. Bahkan lit denga si segat atena temanna manusia.

Kekelengen eme biak Dibata. Jadi adi kita alu intensif ersada ras lit ibas kita hubungen simbages ras Dibata (rembak ras Dibata) arah Kristus maka biak Dibata e pasti maler bagepe jadi warna dominan ibas dirinta. Guna jadi kalak Kristen si produktif ibas mereken buah (kekelengen) guna kemulian Dibata, kita harus leket kempak Kristus, sumber gegeh ibas kegeluhen kinitekenta. Sebab, kekelengen Dibata ibas dirinta pasti menggerakken kita guna ngelitken semangat sikeleng-kelengen. Kalak si ngkelengi tentu upahna mbelin i doni bagepe i surga.

Kai situhuna sierbanca kekelengen e jadi la sempurna? Penulis surat 1 Johanes ngataken maka situhuna kebiaren me si erbanca kekelengen e terambati. Kebiaren eme ancamen simbelin ibas nehken kekelengen. Kekelengen Dibata ibas dirinta tentu banci meneken kebiaren, tentu saja kebiaren si uluna kempak sikap ngeraguken ras la tek nandangi kuasa Dibata. Kekelengen Dibata lalap hadir mereken dame bagepe dame e labo mereken ingan nandangi kebiarenta. Kebiaren eme bagin arah penguasan dosa ibas diri manusia, erkiteken man kalak sitek lanai lit siperlu ibiarken sebab simbelinna kal pe kebiaren enda nggo italuken Kristus eme kematen. Erkiteken sie, man kalak simereken dirina ikuasai Dibata maka ibas dirina nggo lanai lit kebiaren bagepe kearun ate.

Kekelengen Dibata erbanca sudut pandangta nandangi temanta manusia jadi berbeda. Adi lalit kekelengen Dibata, kita terjeng natap temanta manusia sebage musuh (bage me cara iblis mereken pengaruh la mehuli ibas kegeluhenta). Tapi, sanga kita megegeh ras Kristus bagepe lit ibas kita kekelengen Dibata, maka kita bakal natap temanta manusia sebage ayo Dibata si seharusna siergai ras sikelengi alu bulat ukur. Kalak si ngaku ngkelengi Dibata harus teridah arah perbahanen si icidahkenna alu ngkelengi temanna manusia. Perumpaman kalak samaria ncidahken man banta uga kin secara universal si la ibatasi kondisi, situasi, suku ras agama. Ibas kegeluhen siibereken Dibata tiap manusia tinepaNa lit perbedaan. Perbedan si lit e labo guna kita ngadili kalak tapi perbedan silit gelahna min guna saling melengkapi eme alu sikeleng-kelengen.

Salah sada teolog gelarna James Barnett ibahanna sada kajian kerna diakonia alu mbenakenca erban kajian kerna inti gereja sebage persadan pengikut Kristus si la nandai pemisahen antara rohaniawan ras perpulungen; ia kerina idilo ngelai, ngusih Kristus. Pada dasarna diakonia berarti pelayanen ntah pe penampat idorong arah kekelengen; bena-benana bersipat pribadi, kedungenna berkembang jadi komunitas. Ibas pemahamen Padan Sindekah, khususna ibas lingkungen bangsa Israel, ngelai la ipahami sebage sada hal si lalit ertina. Undang-undang keimaman mencakup kininggiten guna saling melayani. Tapi ibas undang-undang Junani-Romawi istilah diakonia lit ije konotasina mpekitik kalak sebab e idahiken sekalak budak. Tapi, ibas Padan Simbaru istilah enda muncul lebih kurang 100 kali, ipakeken terutama guna pelayanen man jelma sinterem, bahkan man si lebih rendah kedudukenna. Pelayanen man kerina manusia ipahami pe sebage pelayanen man Tuhan. Jesus Kristus mereken pengertin ras isi simbaru nandangi istilah enda. Jesus me Diaken simbelin. Alu bage sikap kegeluhen sibenar arah sekalak pengikut Kristus eme sebage sekalak pelayan, diaken, bagi uga icontohken Kristus jine.

Diakonia la terjeng aktivitas ras pelayanen erpalasken hobi, idorong perkuah ate tapi kesadaren maka kita nggo iselamatken Tuhan pelin-pelin erkiteken lias ateNa, emaka kita idorong guna mbagiken ras ndalanken kekelengen man teman manusia. Diakonia merupaken dahin si iendesken Tuhan, man banta; kita idilo guna jadi tanda-tanda penampat ras keselamaten man teman manusia. Jadi, penampat man teman manusia e idorong arah kiniteken ras pengataken bujur man Tuhan. Alu bage kerina sindalanken diakonia sekaligus iingetken gelah menguji motivasina: apakah kerina e tuhu-tuhu merupaken ungkapen kiniteken ras pengataken bujur bagepe guna nampati teman manusia si ilayani, ntah kin terutama guna mpepuasken diri ras ambisi sindalanken diakonia e. Sekalak teolog Van Klinken mencatat piga-piga motivasi, misalna kekelengen man teman manusia, kiniulin, ate mekuah, hubungen emosional, pengataken bujur, rsd. La mesunah menilai apakah kerina enda mehuli ras lang. Tapi menurutna lit dua motivasi si seharusna seh kal megegehna, eme solidaritas ras keadilen. Jurgen Moltmann sendalanen ras Teologi Pengarapen sijadi ciri khas perukuren teologisna nambahken sada motivasi ntah pe gegeh pendorong eme pengarapen. Itegaskenna maka diakonia eme ngikutken Jesus, ibas sudut pandang Kinirajan Dibata si menerobos bengket kubas doni. Diakonia harus jadi dalan kegeluhen si nandakenca kegeluhen perpulungen Kristen, arah sie banci mengatasi perbedan etnis, sosial ras gendes. Perpulungen memang iakui sebage tanda ras antisipasi arah kai si iarapken. Tapi Kinirajan Dibata si menerobos e la banci ibatasi ibas gereja, erkiteken Kesah Dibata bertindak sue ras sura-sura ras padan Dibata simehuli guna kerina tinepa.

Sasaren khusus bahan PJJ enda eme mpeturah gelahna kerina perpulungen mediate nandangi unit-unit pelayanen diakonia ibas gerejanta GBKP. PAK Gelora Kasih, YKPD Alpha Omega, PPOS, Komisi HIV/AIDS & NAPZA, Badan Pusat CUM, YAKES GBKP, Komisi Penanggulangan Bencana, Yayasan Ate Keleng, Pusat Pelatihan Pertanian Organik, Tim Posko Sinabung. Unit-unit pelayanen enda ipake Dibata arah gerejanta lako mpepaler pasu-pasu Dibata man doni enda. Arah enda me banci sigejapken uga kelengna Dibata man banta kerina. Erkiteken sie ergiah-giah ras terbukan min ukur perpulungen muat bagin nampati unit-unit pelayanen diakonia silit ibas gerejanta enda alu ikut notokenca, ndahisa, bagepe nampati ibas dana. Apai kai bas masa pandemi bagenda aksi-aksi sosial banci ka nge ilakoken la gia terban kita reh guna ndahisa sibanlah aksi mpepulung dana ibas runggunta, sektorta, arisenta, rsd guna nehken kekelengen ku unit-unit pelayanen diakonia gerejanta enda.

Guna lebih mbages kita ngerungken kerna thema PJJ enda bagepe pendalankenna ibas kegeluhenta, banci sioge arah kesaksin sekalak teolog eme Henri Jozef Machiel Nouwen. Ikatakenna ibas salah sada tulisenna, “kita tahu bahwa tanpa keheningan, kata-kata kehilangan maknanya. Tanpa mendengarkan, berbicara tak memulihkan. Tanpa jarak, kedekatan tak dapat menyembuhkan”. Selama lebih 20 tahun, Nouwen ngajar ibas piga-piga institusi pendidiken si terkenal, Universitas Notre Dame, Universitas Yale, Universitas Harvard. Sada paksa, sekalak penulis spiritualitas sideban gelarna Jean Vanier nuruh sekalak pernanden guna ndahi Henri Nouwen janah nampati kegeluhen tep-tep wari Henri Nouwen. Sebelumna, Henri Nouwen sempat menulis gelar Jean Vanier si ikagumina ibas sada bukuna, amin pe ia lenga pernah jumpa ras Jean Vanier. Pernanden e tading ibas rumah Henri Nouwen selama piga-piga minggu, ngurusi keperlun Henri Nouwen tep-tep wari. Janah Henri Nouwen lalap nimai kai nge siipesanken Jean Vanier arah kerehen pernanden enda. Tapi, kepeken seh asa minggu terakhir pernanden enda erdahin ras Henri Nouwen lalit kai pe dat Henri Nouwen pesanna ntah pe lalit pernanden e ngata kai pe. Kepeken, kerehen pernanden e jine sijadi pesan siatena ipesehna arah Jean Vanier. Pengalamen enda erbekas kal man Henri Nouwen. Singkat cerita, Nouwen kedungenna erban keputusen guna nadingken karier akademisna situhu-tuhu nggo mantap janah bergabung ia ras komunitas L’Arche Daybreak i Ontario, Kanada. Enda komunitas si khusus ngelai dilaki ras diberu alu disabilitas intelektual, janah tertarik kal akap Henri Nouwen. Ibas ingan enda me ia jumpa ras teman-temanna, eme ia sikin ibas lebe-lebe masyarakat lalap ianggap sebage manusia “la normal” bagepe lalit gunana. Tapi, ibas pertemanenna e, Nouwen ndatken kekelengen Dibata situhu-tuhu. Salah sadana eme pertemanen Nouwen ras sekalak anak perana singgeluh alu disabilitas intelektual si paling parah. Adam Arnett gelarna. Pertemanenna ras Adam kedungenna ibahanna kubas sada buku si erjudul Adam: God’s Beloved. 11 tahun kenca sie kegeluhen Nouwen i L’Arche ngerana kerna makna kegeluhen tep-tep wari raduken ras teman-temanna, khususna Adam, si rusur kal iasingken masyarakat erkiteken ianggap “la normal”. Sada kegeluhen situhu-tuhu mejile. Sada kegeluhen si la efisien, tapi seh kal badiana.

Berkaiten kerna kesaksin Henri Nouwen enda lit sada judul artikel si itulis Philip Yance, “The Hole Ineffiency of Henri Nouwen” ibas majalah Christianity Today tahun 1996. Artikel singkat e merupaken kesaksin Philip Yance kerna kegeluhen ras karya spiritrual Henri Nouwen. Yance tuhu-tuhu terkesan ibas keputusen Nouwen secara radikal guna mereken dirina ras kegeluhenna i komunitas L’Arche bagepe mereken waktuna erjam-jam guna merawat Adam Arnett. Ituliskenna Yance kai sinilakoken Nouwen tiap wari eme mperidi ras mencukur kumis, gosokna ipenna, isurina bukna, negu-negusa sanga ia berusaha man. Perbahanen sederhana si iulih-ulihi e man bana nggo jadi sada peribadahen man Tuhan. Tuhu-tuhu la menarik menurut penatap doni, tapi tuhu-tuhu enda perbahanen badia. Nina Henri Nouwen, “bukan Adam, tapi aku, sindatken manfaat utama arah pertemanen kami”. Singkatna, ibas kondisi fisikna sibage, Adam nggo jadi guru man Nouwen.

Pdt. Andreas Pranata Meliala, S.Th

GBKP Rg. Cibinong

Info Kontak

GBKP Klasis Jakarta - Kalimantan
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate