Invocatio      : “Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.” (1 Korinti 13:13)

Ogen            : Rut 2:8-9

Kotbah         : Lukas 14:12-14

Tema            : Jabu si Ermalem Ate

PERLEBE

Kemalemen ate (bahagia/sembuh/selamat/damai sejahtera) jadi daramen tiap jelma. La saja gelahna jadi keriahen man dirinta jine, tapi banci ka min igejapken kalak si deban khususna itengah jabu. Sabab jabu jadi ingan erlajar sipemenana ibas kegeluhen manusia. Ibas jabu sipelajari orat nggeluh, meteh mehuli, ngangkai cara nggeluh ras kalak si deban, sihamaten, sikelengen-kelengen ras nandai Dibata alu tuhu-tuhu. Emaka pengajaren ibas jabu arus erpalasken pengangkanna kerna ulu kemalemen ate si reh ibas Dibata nari, gelahna kerina isi jabu banci ndatken ertina ras ndalankenca alu payo.

Tantangenna, melala jabu si enggo kebenen erti ermalem ate. Salah sadana adi si nin ibas kegeluhen jaman gundari, melala jabu si enggo ndauh ibas biak ras palas kekelengen. Tep kalak enggo nggeluh ibas kepentingenna sekalak-sekalak. Anak la mehamat man orang tua, bagepe orang tua kurang mereken perhatin ras keleng ate man anak, bagepe sapih-sapih ersenina turang si melala lanai jadi teman arih, tapi imbang rubat. Ibas sie me pekan keluarga GBKP mabai penggertin man banta erti kemalemen ate ibas jabu eme nggeluh sikeleng-kelengen, ibenaken ibas jabu bagepe man kalak si deban.

ISI

          Rut 2:8-9, biak keleng ate ipake Rut ibas kegeluhenna si teridah arah kehamaten ras kesetiaanna nandangi bibi/simetuana Naomi. Kenca itadingken perbulangenna, Rut enda permen Naomi si ngikut bibina seh ku kuta kemulihenna bagepe erpadan nembah Dibata siisembah Naomi (Rut 1:16). Rut mindo man bibina gelah banci lawes ku juma mumahi ruhi gandum gelah cukup pangan man bana duana. Lawes ia ku juma Boas, sekalak bayak si lit denga perkade-kadenna ras Naomi. Ije me perjumpan Boas ras Rut. Boas nampati Rut arah mereken ijin man bana mpepulung gandum, radu ras erdahin ras si ngemo. La saja sie, Boas pe njamini Rut gelah ola ise pe ngasgasi ia. Dikune muas pe banci Rut minem ibas bagin sierdahin.

          Adi silanjutken ayat 11-12, eme jadi alasen engkai maka turah ukur Boas nehken keleng ate man Rut selaku ia diberu pertandang. Eme kerna enggo ibegi Boas kiniulin ras kesetianna si ibahan Rut nandangi bibina. Emaka tek Boas, Tuhan pe ersimulih ibas perbahanenna si mehuli e. Upah ras pengkawali Dibata jadi bagin kalak si erbahan bujur. Bageme si ilakoken Boas pe, maka kekelengen ras kemalemen ate sampur ku tengah kegeluhenna. Tek Boas, kiniulin si banci isehkenna jadi bagin Rut ras Naomi, siicukupken Dibata kerna nggeluh ia erpalasken keleng ate. Boas jadi perpanjangen tan Tuhan nehken kekelengen mperdiateken kegeluhen sapih-sapih ia.

          Lukas 14:12-14, Ibas bagin enda Yesus mereken pengertin cara/sikap kegeluhen gelah kemalemen ate jadi baginta. Alu perumpamaan biak temue si reh ku kerja erdemu bayu, Yesus mereken kritik man kalak Parisi si rusur ibas kiniganjangen ukurna ngayaki kehormatan arah manusia tapi la ndalanken si ngena ate Tuhan. Kerja erdemu bayu ibas tradisi Jahudi cukup penting. Ibas sie pe labo erbahanca lit biak meganjang ukur, tapi mpeteruklah banta sada ras si debanna gelah Dibata si mpehagasa.

Bicara ibahanndu kerja suari ras berngi ula undang kalak si bayak gelah ula ia ersimulih man bandu. Tapi undanglah kalak musil, cempang, pangpangen ras pentang. Maka malem tuhu-tuhu atendu sabab la ia ngasup ersimulih man bandu. Dibata nge pagi ersimulih man bandu ibas wari kekeken si benar. Ije me Yesus mereken pengertin gelah sikap meteruk ukurta iadepen Tuhan banci teraplikasi ibas erdiate ras keleng nandangi kalak si deban khusuna man si kekurangen. Alu sie idatken kemalemen ate, sabab labo siarapken ulih arah manusia, tapi Dibata kap. Kegeluhen seh rasa lalap isikapken Dibata man kalak si nehken keleng ate sapih-sapih ia. Sabab bage me perentah Dibata man banta.

PENGKENAINA

          Arah bahan ibas pekan wari si peduaken enda, salah sada bentuk ‘jabu si erbuah’ (tema umum pekan keluarga 2019) eme jabu si ngejapken kemalemen ate. Sie banci idatken adi kerina isi jabu nggit sinergi/sendalanen guna menciptakan situasi ibas malem ate. Palasna eme sapih-sapih isi jabu erkeleng ate. Sebage bapa, nande, anak-anak la lit si ndauh ibas pendalanken Kata Dibata. “Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.” (1 Korinti 13:13).

          Sisehkenlah tanda ate kelengta, bagi kegeluhen Naomi, Rut ras Boas. Masing-masing ia mereken peran si nggit engkelengi kalak si deban. Naomi keleng atena Rut ibas mereken petunjuk ibas kai si ate Rut idalanken. Rut pe nampati ncukupken keperlun geluh alu nggit erdahin mumahi ruhi gandum. Boas pe icidahkenna keleng ate mereken Rut kesempaten erdahin ibas jumana janah mereken perlindungan man Rut. Sie kerina reh ibas palas kekelengen. Janah ibas pendalankenna, tentu igejapken kemalemen ate si ibereken Tuhan jadi ulih siilakoken man kalak si deban.

          Adi isi jabu enggo banci erkeleng ate maka kemalemen pe jadi baginna sekalak-sekalak. Dibata si ersimulih nandangi kekelengen si erbuah arah pengerana, perukuren ras perbahanen. Sebage bapa ras nande banci engkelengi temanna nggeluh ras anak-anak alu tanggungjabab sebage usihen. Anak-anak pe keleng atena pedah kata ras keberadaan orangtuana uga litna. Ngasup ngaloken kondisi jabu alu mpekena perbahanen si lepak, mpersingeti ras ngalemi salah, mperjuangken si benar, erdiate janah mesayang.

Jabu si ermalem ate pe banci naksiken geluh si sempabu, janah kemalemen e la saja igejapken man isi jabu. Kemalemen ate teridah ras tergejap ka man sekelewetna. Turah kininggiten nampati kalak si deban, erdiate, erpemere alu keriahen ukur/tulus. Subuk man kade-kade seh man kalak si la itandai pe. Banci naksikenca itengah masyarakat gereja bagepe ku si lenga nandai Tuhan. Kerna arah keleng ate siisehken e, kemalemen ate maler ku sekelewetna. Eme si jadi kesaksin pe nandangi keleng ate Tuhan. Sabab Dibata nge mereken ulih perbahanen arah kemalemen ate man si nggit ndalankenca. Kemalemen ate ibas kegeluhen seh ku paksana pagi wari kekeken kalak si benar. Amin.

Pdt Deci Kinata br Sembiring

Rg GBKP Balik Papan

Khotbah   : Mazmur 1:1-3

Thema      : Jabu si erbuah

1.   Kata Perlebe

Tanggal 17 seh  tanggal 23 november kita ngelakoken pekan kebaktian keluarga GBKP. Emaka ibas program pekan keluarga enda si terahir kegiatan sinilakoken ibas sector ras gereja enggo si akhiri, eme kegiaten 2019. Kenca dung pekan keluarga enda kita memasuki persiapen Natal ras pe kegiaten Natal. Emaka jumpa ka pagi kita ibas tahun 2020 si benaken ka pagi kebaktiaa Pekan Penatalayanen. Tahun enda Gerejanta GBKP ngakat Thema Umum Pekan Kebaktian Keluarganta eme : JABU SI ERBUAH.

Nina Tuhan Yesus : Adi melala buah ndu, kam me ajar-ajarku. Johanes 15:8a, arah temanta Pekan Keluaraga enda ngajak gelah kerina jabu-jabu kalak Kristen (warga GBKP) erbuah min ia, tentuna hal banci teridah kuga keluarga-keluarga ndalanken tanggung jawabna itengah-tengah jabu bagepe masyarakat. Enda banci teridah arah perbahanenta, bagi nina Yakobus : Adi kiniteken labo sue rikut ras perbahanen, kiniteken sibage mate kap (Yakobus 2:17b)

Emaka arah pekan keluarganta tahun enda kerina warga GBKP banci ncidahken ras ndatken kai si mehuli, erguna ras ngena ate Dibata ibas kegeluhenna wari lepas wari.

2.   Uraian nats

Mazmur pasal 1 enda eme Mazmur, sila itulisken na ise si nuliskenca, bagi Mazmur-mazmur si debanna. Tapi amina gia lalit gelar penulisna, tapi tek kita maka si nulisken Mazmur enda eme kalak si nggo tek man Dibata, janah enggo i dahna ras gejapkenna kuga perbahanen dibata e man ia, janah enggo inanamina kuga Dibata erbahan ras nehken si mehuli nandangi anak-anakna si enggo i tebusina guna ndalanken ras nehken si mehuli. Mazmur enda ibere judul kemalemen ate si tuhu-tuhu, adi ioratikal kerina manusia, baik si enggo eragama bagepe si la eragama, baik kita Kristen, kai nge si man ayakenndu bas geluh enda..?

Pasti jawabna guna ndatken kemalemen ate. Sebab kemalemen ate enda la kal tertukur seh ijange batas-batasna. Lit deba i ukurna arah kesehaten jasmani, lit deba i ukurna arah sukses pendidiken, sukses pendahin, lit deba i ukurna arah melala harta. Erbage-bagelah ukuren kemalemen ate. Bas Bahasa Indonesia i pakena kata berbahagia, seri ras si pake Yesus ibas awal khotbah i datas uruk, ipakena kata berbahagia, janah lit 8 kali ikatakenNa ukuren berbahagia enda. Tapi Bahasa karo i pakena alu kata ketuahen. Tapi akap kami kata bahagia e seringe ras kemalemen ate tah pe ketuahen, tujuanna eme ija kita jumpa kesangapen bagi nina kalak Karo : merih manuk ni asuh, mbuah page ni suan, jumpa matawari ras bulan, sehat jasmani ras sehat rohani, sempurna.

Tapi adi siperdiateken Mazmur 1:1-3 enda ndai lalit singgungna kerna : harta, tahta, dan kuasa, bagepe la singgungna bayak namura sehat jasmani. Emaka nina : malem me / berbahagialah kalak :

a.    Si la megiken pedah kalak jahat

b.    Si la ngusih perbahanen kalak perdosa

c.    Si la erteman ras kalak si menggobang man Dibata. (ayat 1).

Nina per Masmur lit 3 kata  kerja eme : sila megiken, si languish, ras si la erteman. Jabu si erbuah e , eme sitetap megiken, kata  Yesus , ngusih perbahanan Yesus, ras tetap  erteman/ bergaul ras Tuhan Yesus, anak-anak Yesus. Sepanjang kegeluhenna maka ia tetap erbahan simehuli, sebab keluarga Kristen  eme sira ras terang (Matius 5:13-16) Ia tetap  jadi  saksi ras ersaksi, Doni enda gundari melala kal banci mabai kita papak, erkiteken ngikutken kai sini itawarken iblis (orang pasik – Ind)

Adam ras Hawa, ndabuh erkiteken megiken kata /tawaren iblis, erdosa ia (Kej 3) . Tapi Yusuf, Yesus la megiken kata iblis emaka ia jadi pemenang (Kej 39:8-10: mat 4 :1-11). Yusuf menang, Yesus menang, emaka kit ape jadi pemenang. Bagepe kita lanai ngusih-ngusih perbahanaen kalak perdosa , misalna : nangko, judi, selingkuh, pergaulan bebas, malas, ermusuhen ras sidebanna. Ras kitape harus menghindari dirinta/ anak jabunta ras kalak si megombang man Dibata, nina Paulus, dahinna perbau bau Dibata saja, emaka kalak enda enggo iindesken  man iblis (1 Tim 1 ). 

Biasana batang kayu e adi i tepi lau ia turah lalap meratah bulungna, erkiteken ia la kekurangen lau. Bagepe kita adi kita tetap nggeluh ras Yesus (lau kegeluhen) e maka kit ape tetap segar Rohani ras segar jasmani. Janah la ngenca turah, ras meratah bulungna , tapi pe erbuah kai a ibas musimna, katawari kita perlu je reh penampat, bagi Yesus ras ajar-ajarNa i Danau Galilea paksa angina ribut i pengadi Yesus. (Markus 4:35-41). Ajar-ajar si reh ras Yesus mpemedak Yesus, emaka i sergangi yesus lau ndai mis tenang.

Kalak si rembak ras Yesus la ia pernah aru ate (khawatir), sebap enggo ikataken lau kegeluhen e (Yesus), ula aru atendu, aku ras kam seh kedungen zaman enda (Mat 6:25;28:20). Janah sangap ibas kerina pendahinna, hal  enda jelas maka kita hanya berusaha. Erdahin ras erbintuas, janah si erbahanca erbuah eme Dibata. Inget : totoken dahindu, dingen dahinken totondu, adi bagenda perlakuan bas geluhta tep-tep wari, kita i pasu-pasuNa bagi setiap kita dung ibadah, ngaloken pasu-pasu idur Dibata nari (Bilangen 6:24-26)

3.   Renungen

a.    Jabu si erbuah eme jabu si tetap nggeluh ngikutken kerina kai si iajarken Yesus man banta.

b.    Jabu sienggo erbuah eme harus buahna entebu, dingen bancika inanami kalak si deban ibas kegeluhen enda

c.    Buah si entebu ge , maka banci mabai anak jabu bagpe  kalak sideban gelah banci erbuah.

d.    Bergaulah ras Tuhan bagepe ras anak-anak Tuhan

e.    Lawanlah kuasa jahat, alu makeken kuasa Tuhan Yesus Kristus

Selamat  Pekan Keluarga

Pdt Andarias Brahmana

Ketua Klasis Jakarta Kalimantan

Ogen   : Perbahanen Rasul 5:33-39

Tema   : “Percaya Diri”

·      Kenca nusurna Kesah si Badia, ajar-ajar Tuhan Jesus lanai mbiar guna meritaken berita si meriah. Enggo pang ia ersaksi kerna Tuhan Jesus alu terang-terangen. Seh maka Petrus pe enggo pang ngerana man jelma si enterem (bnd. Perb 2:14). Padahal sope lenga nusur Kesah si Badia, ajar-ajar Tuhan Jesus mbiar ia man kalak Jahudi si erkuasa, emaka pulung ia ibas sada ingan ras ierukna pintun ras labo ia pang encidah-c idahken bana apa lagi guna ersaksi kerna Jesus man jelma si enterem (bnd. Joh 20:19). Tapi kenca nusur Kesah si Badia man ajar-ajar e, lanai ia mbiar guna ersaksi, ajar-ajar e enggo percaya diri. Ngajar ia ibas rumah pertoton bage pe i rumah-rumah, ilakokenna melala tanda-tanda sengget (mujizat). Emaka reh teremna kalak si megiken pengajaren ajar-ajar e ras tek man Tuhan Jesus.

·      Kai si ilakoken ajar-ajar jadi tantangan entah pe mpeturah cian ate man imam si mbelin ras teman-temanna kalak Saduki, emaka itangkapna rasul-rasul e ras ipenjarakenna (5:17). Tapi pendahin Kesah si Badia la terambati. Ibas penjara, rasul-rasul e ibebasken malekat Tuhan, janah sada pe pengawal penjara e la meteh maka ajar-ajar e engngo ndarat sebab kerina penjaga tetap tedis ibas inganna. Sementara ajar-ajar e enggo ngajar i bas rumah pertoton. Emaka ibaba ka mulihi ajar-ajar e ku bas sada persidangen.

·      Ibas persidangen e ngilas kel ate imam si mbelin kerna jawaben Petrus ras teman-temanna, bahken peserta sidang e ersura-sura guna munuh rasul-rasul e. Tapi sekalak peserta sidang e gelarna Gamaliel (ia sekalak  Farisi guru undang-undang) ngerana ibas sidang e alu percaya diri ras mereken bukti-bukti si pernah terjadi. Emaka nina: “ukurkenlah manjar-anjar kai atendu si ibahanndu nandangi rasul-rasul e, adi kin pengajaren e reh ibas manusia nari masap me pagin, tapi adi rehna ibas Dibata nari labo ise pe ngasup ngolangisa”. Engaki maka pang Gamaliel ngerana bage janah alu percaya diri ngerena i lebe-lebe sidang e? Sebab ia la asal ngerana tapi lit bukti si jelas si pernah terjadi i tengah-tengah kalak Jahudi, eme Tudas ras Judas i Galilea nari, kekuasanna masap ras pengikut-pengikutnna pe merap kerina, sebab kekuasanna/ pengajarenna reh ibas manusia nari.  Emaka kai si ikataken Gamaliel e ibegiken peserta sidang ndai janah rasul-rasul ndai kedungenna ibebasken.

·      Tema PA nta ibas minggu enda eme “Percaya Diri”. Nggeluh percaya diri bagi ajar-ajar Tuhan Jesus bage pe Gamaliel ndai perlu iusih Moria. Ajar-ajar percaya diri erkiteken ia enggo ikuasa Kesah si Badia. Kenca ia ikuasai Kesah si Badia lanai ia biar-biaren guna ersaksi sebab ajar-ajar e jine saksi kai si ajarken ras si ilakoken Jesus i tengah-tengah kegeluhen doni enda. Adi Gamaliel tidak hanya bicara, tapi alu lit bukti si idahna jine panga ia alu percaya diri guna ngerana ras mereken pendapat. Ibas kegeluhen Moria pe bage, Kesah si Badia e enggo si aloken ibas kegeluhenta, janah Kesah e si erbahanca kita pang alu percaya diri guna ndalanken singena ate Tuhan, naksiken kerna kelenga ate Dibata ibas kegeluhenta. Sebab Kesah si ibereken Dibata man banta labo erbanca kita percikcik, tapi KesahNa e ndemi kita alu kuasa kekelengen, bage pe gelah ngasup kita engkuasai dirinta (2 Tim 1:7). Bage pe ibas kita ngerana, mereken pendapat ras muat sada keputusen pang kita bagi Gamaliel ndai, sebab kita pe memiliki sumber ras bukti-bukti terpercaya. La asal ngerana tanpa ada sumber ras bukti-bukti nyata. Melala kel kita pang ngerana janah si anggap maka kita ka sibenarna, tapi kenca iselidiki labo lit kebenarenna. Emaka kita pe iajuk gelah ola kita ngerena apalagi ngeranaken kalak (encakapken kalak) tanpa ada bukti-bukti si jelas gelah ola kita terjebak ku bas ACC (anceng, cian ras cikurak). Tapi alu penaemani ras pengajari Kesah si Badia pang kita ersaksi alu la biar-biaren, ngasup kita ndalani kegeluhenta bagi si ngena ate Tuhan. 

Pdt Evlida br Ginting

Rg GBKP Klender