Ogen  : 1 Petrus  5 : 2 - 4   

Tema  :  “Mpermakani Rarasen Biri-Biri Dibata”

(Ngataken Bujur Ibas Enggo Dungna Perdalinen Pemilihen Pertua-Diaken)

I.      Kata Perlebe

Patut kal kita ngataken bujur man Tuhan. Enggo itaruhkenNa gerejaNa GBKP si malem enda ndahiken dahin sekali ibas 5 tahun eme pesta iman “Pemilihen Pertua-Diaken” periode 2019-2024. Secara umum kerina tahapen-tahapen si lit ibas dahin enda enggo erdalan alu mehuli. Mulai kin tahap sosialisasi, pembinan man ngawan, terus ku pemilihen bakal calon ras penetapen calon. Ilanjutken ku pemilihen secara runggun. Kenca si e erbahan kursus man calon Pertua-Diaken. Jenari pengukuhen ras penangkuhen. Lit denga runggun lenga seh ku pelantiken BPMR si mbaru ras penetapen seksi/ komisi. Tapi secara umum buen runggun-runggun enggo ngelakokenca. Bageme Dibata ibas Tuhanta Jesus Kristus Simada Gereja nggo ngendesken dahin pelayanen e man banta Pandita, Pertua-Diaken. Kita me si igelari serayan Dibata, aron Tuhan. IendeskenNa biri-biriNa eme perpulungen man banta serayanNa guna si permakani ras si kepkep alu mehuli bagi si ngena ateNa.   

II.    Isi

  Surat 1 Petrus enda ialamatken man kalak Kristen i bagin utara Asia Kitik (Turki). Kalak Kristen si merap marpar enda sangana ngenanami melala kiniseran erkiteken kinitekenna. Petrus ngerana man pertua-pertua perpulungen i Asia Kitik enda (ayat 1). Ipindona gelah pertua-pertua e mpermakani rarasen biri-biri si sangana ngenanami kiniseran. Pendilo Petrus enda ngingetken man banta uga ndube Tuhan Jesus jine nuruh Petrus mpermakani biri-biriNa. Sabab Petrus pernah mersoken Tuhan seh 3 kali. Mbuktiken kerna keleng atena man Jesus, ipindoNa gelah Petrus mpermakani perpulungenNa (Johanes 21:15-19). Si eteh ras-ras uga tutusna Petrus ndahiken persuruhen Tuhan Jesus e. Lanai sitik pe ia mbiar mpeseh kebenaren Kata Dibata aminna i lebe-lebe pejabat ras penguasa. La ia surut aminna ia iancam ras ipenjaraken. Uga ia tutus mpermakani rarasen e bageme ipindona man pertua-pertua bas mpermakani. Rarasen biri-biri (gereja/ perpulungen) e Dibata kap punana. Janah Dibata si merekenca man pertua-pertua e. Erkiteken si e Petrus mindo  gelah pertua-pertua e ngepkepsa alu ukur meriah bagi si ngena ate Dibata, ola alu ukur mberat (ayat 2a).   

  Petrus ngingetken man pertua-pertua e kerna motivasi si payo dingen mehuli ibas mpermakani dingen ngepkep perpulungen. Sipemena: ola ngelai erkiteken mata duiten tapi erkiteken ukur ersuruhlah guna ngelayani (ayat 2b). Sipeduaken: ola erkiteken atendu merentahi perpulungen, tapi bahan diri jadi usihen man perpulungen e (ayat 3). La banci perayakenna kerna kekuasan doni tapi pelayanen.

 Petrus ngingetken maka lit ulih, upah ibas mpermakani ras ngepkep rarasen biri-biri Dibata. Upah enda denggo ialoken. Upah enda ialoken asum reh pagi Kepala Permakan, Permakan Situhu-tuhu eme Tuhan Jesus peduakaliken. Man kalak si tutus mpermakani ras ngepkep perpulungen ialokenna me rudang-rudang tanda kehagan si la ermelus-melus (ayat 4). Rudang-rudang si merim si la ermelus-melus enda me tanda kehagan ras kemenangen. 

III.   Pengkenaina

1.      Mpermakani eme sada dahin ibas bidang peternakan. Mpermakani membutuhken kemeteruken ukur, ketetapen ukur ras kinigenggengen. Mpermakani la terjeng mere pangan/ gagaten ngenca. Tapi pe mere minemsa, nambarisa kune sakit, mbalutisa kune luka, njagasa gelah ula lalar, ndarami seh dat si enggo ndempar, ras njagasa kune lit rubia-rubia si meliar atena njerngem biri-biri e.  Bageme filosofi, jiwa ras semangat dahin enda ibaba ku bas dahin serayan Tuhan. Tuhan Jesus jine ngajarken kerna si enda. Jabaten Pandita, Pertua ras Diaken eme jabaten si enggo itetapken Dibata lako mpermakani ras ngepkep perpulungenNa.  

2.      Tema: “Mpermakani Rarasen Biri-Biri Dibata” (1 Petrus 5:2-4). Mpermakani rarasen biri-biri Dibata dahin si mehuli kap (1 Timotius 3:1). Emaka permanilah rarasenNa rikutken si ngena ate Dibata. Ingetlah janjita sope kita ikukuhken ras itangkuhken. Ninta ndube, “Tuhu bage ateku”. “Tuhu bage ateku” ertina kita erjanji ras komitmen lako tutus ndahiken persuruhen Tuhan. Si dahiken bagi si ngena ate Dibata. Labo ninta ‘tuhu bagi ateku’. Beda kal “Tuhu bage ateku” ras “Tuhu bagi ateku”. Aminna 1 huruf ngenca bedana tapi ertina seh kal petembilna. Sipemena, kita mpermakani bagi si ngena ate Dibata. Sipeduaken, kita mpermakani bagi ngena ateta saja, ate-ateta saja si ban. Adi bagi ateta (ukurta) nggit kita. Adi lang la kita nggit. Si darami lalap alasenta ngelak ras nulak dahin ras tanggung-jababta.    

3.      Mari si pepayo motivasi/ perayakenta bas mpermakani. Gelah kune nggeduk si pepinter, ras adi melket si murniken. Adi perayakenta terjeng gelar si merim ngenca marilah si pekena. Perayaken terjeng gelar ngenca teridah kap arah kisat ngelai, kisat ndahi perpulungen. Ola kal perayakenta terjeng gelar ngenca. Ola ngelai erkiteken lit canna, ndatken keuntungen materi, doni. Ingetlah maka kerangapen nangdangi duit eme sumbul kerina kejahaten (1 Timotius 6:10). Ngelailah erkiteken ukurta ersuruh ras  meriah. Melayanilah apa adanya, bukan karena ada apa-apanya. Bagepe ola perayakenta guna ndatken kekuasan. Gelah banci kita merentahi kalak. I gereja la inganna merentahi tapi ersaksi ras ngelai.

4.      Jadilah Pt-Dk usihen si mehuli man perpulungen. Jadi teladan ibas perukuren, pengerana, kejingkaten, kemeteruken ukur, erkeleng ate (bdk. 1 Timotius 4:12). Uga si tuhuna, kinatana: mpermakani ntah justru nuntut gelah ipermakani, ngelai ntah ielai, jadi usihen ntah jadi pandangen? Mari si renungken alu mbages. La kinlah kita jadi batu antuken erkiteken malas, sombong, meganjang ukur ras sok kuasa? Ula kal sempat jadi si enda bas kita serayan Tuhan.

5.      Kita mpermakani alu tutus, patuh ras setia gelah meriah ukur Kepala Permakan eme Tuhanta Jesus Kristus. Enggo isikapkenNa upah man banta eme rudang-rudang si la ermelus-melus si jadi keriahen, kehagan, kemalemen ate ras kemenangen (bdk. Ketangkasen 2:10c). Si aloken me upah e tupung kerehenNa peduakaliken. Situhuna gundari nari pe pasu-pasuNa si aloken ras si nanami ibas kita mpermakani rarasenNa.             

III.   Diskusi

1.        Biak-biak perman si kuga nge si perlu iusih i bas kegeluhenta?

2.        Dukungen kai nge si banci si bahan man Pertua-Diakenta i bas periode enda?

 Pdt  Juris  Tarigan

GBKP Rg Depok – Lenteng Agung 

Ogen : Galatia 5 : 16-21

Tema          : Pang ngelawen  Okultisme Pinakit Sosial

Tujuan          :  Meteh Mamre okultisme  ras pinakit sosila

                      Erpartisifasi meneken okultisme ras pinakit sosila.

1.    Penaruh .

Okultisme  eme : kiniteken nandangi supernatural, ilmu sihir ilmu yang mempelajari  pengetahuan  tersembunyi (sila teridah). Si lit i alam semesta enda, bas diri  manusia  ras lingkungen.  Occult   =  bahass  latin occultus = rahasia tersembunyi, pengetahuan yang tersembuyi.

Nini – nininta nai melala denga mpelajarisa ras memiliki pemeteh/ beteh-betehen kerna ilmu enda. Sebab lenga  tandaina Yesus eme  melala banna  beteh-bethenna

/pajuh-pajuhena. Sinikin iakap banci nampati ia. Bas Alkitab pe lit si bagenda eme : Harun erbahan  patung lembu ibas  emas nari (Kel. 32:2-6) Israel nembah patung emas ndai , jadikenna sebagai dibatana. Bagepe Raja Saul nungkun guru sibaso i Endor nari ( I Samuel 28 : 3-25).   

Si dua enda  mewakili piga-piga  peraktek okultisme  sini ilakoken umat Tuhan . Tetuna seh gundari enggo pe kita tek man Yesus tetap denga lit praktek-praktek si bagenda bagi lagu “pulungen tawar” perpulungen enggo ertoto, guru sibaso enggo ercibal belo”menduaken Tuhan ras bagepe pinakit sosial pe berkembang denga idoni enda eme:judi,psk,narkoba,ras pengoplosan miras selingkuh ras sidebana ijah ije tetap denga lit semntara hal hal sibagenda kita pe sebagai keluarga keluarga mamre pelaksanana kai sini ciga ate Dibatanta

2.    Uraian teks

Rasul Paulus nehken surat na man kalak Galatia alu judul  kesah si badia ras manusia

Ijenda ibagina 2 eme :

a.manusia secara doni (Kesah Sibadia)

b.manusia secara kesah Sibadia (Surga)

nina Paulus sura sura ku eme  :                      

-        Kesah Sibadia  min negu-negu  kegeluhendu

-        Adi kesah sibadia negu-negu kam lanai bo kam iteruh undang-undang , tapi iteruh Kristus.

Endame manusia secara Kasih Sibadia (Surga) eme bahagian  (b).

Tapi adi manusia menurut doni kesah  sibegi ia sura sura manusia eme :

-        Erlua-lua – singesuh – la meteh mela – nembah berhala – erbahan ilmu sihir  si musuhan – rubti , mecimberu, perampus, digen kepentingenna saja ngenca  iukurkenna – erahan perpecahen – erpihak-pihak  - si cian-cianen, mabuk, pesta minum-minum. Kalak si b agenda labo ndatken kinirajan surga. Endame siniarapken Rasul Paulus, bagepe Tuhanta Yesus. Ija perbahanen menurut kesah Sibadia, kerina sulitkal ndalakenca tapi kekal ras ndatken kedamen ateta she rasa lalap. Tapi adi kita ngikutken sura-sura manusia, senang sesaat tapi mate rasa lalap. (neraka)

3.     Renungen

Man banta Mamre mari kita jadiken dirinta sira ras terang, ulanai kita bermain-mainocultisme, bagepe ula nai kita bermain-main ras pinakit masyarakat, sebab kerina enda hanya untuk mengorbankan dirinta bagepe generasinta. Dibata la sitek pe tena ngena perbahanen si jahat, tapi ngena atena perbahanen simehuli. Mamre menyuaraken suara kenabian di setiap kesempatan silit i :

·      Rumah tangga

·      Lingkungan masyarakat

·      Keluarga

·      Ibas setiap acara budaya sini ilakoken kalak Karo ras warga gereja

·      Pengerananta pe membangun kiniteken jelma si enterem, ras pe kita terus jadi saksi-saksi Kristus

“Hindari, diri, keluarga arah peraktek dukun, pengaplosan miras, narkoba, pergaulan bebas ras selingku “

Pake kata Tuhan  jadi senjatanta ngelawan  musuh ( Epesus 6 : 10-20).

Pdt Andarias Brahmana 

Ketua Klasis  Jakarta Kalimantan

HUT Moria

Ogen : Efesus 5:25-29

Thema    : Kukelengi Ndeharaku

Tujuan      : 1. Meteh maka ndehara e eme diri  perbulangan.

  2.Ngasup engelengi ndeharana

1.    Benakata

Ibas bulan Oktober enda si peringati 62 tahun enggo umur Moria GBKP. Enggo 62 tahun pernandenta bekerja itangah-tengah Gerejanta GBKP si malem enda, janah enggo melala ilakoken Morianta hal-hal si mehuli, baik man Gereja, masyarakat bagepe man keluarganta. Emaka ibas HUT Morianta si pe 62 ken sada hal si man ukurenta sebagai mamre, perbapan; kai nge banci si apresiasi ibas umur Morianta enggo 62 tahun enda. Mamre harus tetap menteladani kuga Morianta ibas kesibukenna: ngatur jabu, erdahin tah erbinaga, pelayanka. Tapi kegiatan-kegiatan Moria PA, ibadah la tetap ketadingen, janah si buat persentasena si ikut kegiaten gereja antara Mamre ras Moria ndauh denga kita ketadingen. Emaka arah kita mengapresiasi Morianta, kita pe perlu ka me mbenahi dirinta ( persekutuanta) mamre enda gelah banci kita mendekati morianta.

2.    Urian Nats

Rasul Paulus memberikan Nasihat kepada keluarga Kristen (percaya pada Yesus). Banci si idah bas Eps 5:1-33 enda iawalina alu Nggeluh ibas terang; encege maka ilanjutkenna kerna ndehara ras perbulangen. Ise kin singgeluh ibas terang, eme kalak si enggo tek, isekin kalak si enggo tek e, eme pasti perbulangen ras ndehara bagepe anak-anakta. Tapi sendah itujuken man banta perbapan /mamre sinigelari perbulangen. Nina Rasul Paulus kam perbulangen kelengilah ndeharandu bagi kristus engkelengi perbulangen. La kap gampang enda, engkelengi e labo ngenca cukup arah mereken keperlunna jasmani saja, tapi pe mereken kebutuhen rohani, bagi kristus engkelengi e nggit Ia mengorbankan diriNa, I kayu persilang, labo terjeng cakap ras perbahanen saja, tapi ia sendiri ncidahken keteladanen man kerina manusia. Perbulangen e melala berkorban hanya untuk anak jabuna, labo untuk kalak si deban bagepe labo untuk hal-hal si negative, umpamana: poya-poya I café, judi, mabuk-mabukan, selingkuh, (WIL). Tapi arah kai si dat kita ibas usaha tah pe dahin, kita harus mengorbankan untuk segalanya man anak jabunta. Janah kristus pe erkeleng ate erkiteken perrpulungen e, gelah reh majuna perpulungen e, emaka harus ia ngorbanken diriNa. Bagepe kita perbapan/perbulangen/mamre, tetap sada odak,sada ole kita ras moria/ndeharanta guna memajuken jemaat Tuhan ija kita bergereja/bersekutu. Enda harga mati, mamre jadi tulang punggung guna menopang nande-nandenta. Kristus ngelengi perpulungen, iarak-arakna perpulungen, I layani perpulungen, I perhatiken kai si perluken perpulungen e, emaka iberekenna kebutuhen man perpulungen: tupung melehei iberena man, sakit I pemalemNa, ceda ate I apuliNa bahkan I pegeluhNa si mate (Lazarus). Emaka kit ape perbapan/mamre si eteh min susah senang ndeharanta/morianta. Bagi kita ngelengi ndeharanta bagi kita engkelengi dirinta sendiri. Enda pengorbanen mamre nandangi morianta.

3.    Kesimpulen

Ibas HUT moria si cakapken dage kange si ban gelah turah semangat morianta sebagai nande itangah jabu, bagepe kita pe sebagai mamre reh majuna ka min persadanta. Kerina enda si benaken ibas jabunta masing-masing lebei maka kita erbahan ku lebih mbelin. Mamre maju- moria maju, emaka sibahanlah apresiasiibas jabu bage Gerejanta paksa ibadah minggunta

Pdt Andarias Brahmana 

Ketua Klasis  Jakarta Kalimantan