Ogen  : Ester 2:8-12

 Thema  : “Nunut Ras Mediate”

Kitab Ester merupaken kitab kontroversial. Martin Luther pernah nulak namaken kitab enda sebage bagin ibas Pustaka Si Badia. Ngkai? Erkiteken la pernah sekali kata “Dibata” ntah pe “Tuhan” ikataken ibas kitab e. Uga mungkin sada kitab ikataken “Kata Dibata” adi kata “Dibata” saja pe lalit ije? Tapi sipasti nggo ialoken Kitab Ester ibas kanon Pustaka Si Badia, nggo sialoken kitab Ester sebage bagin Pustaka Si Badia. Kerna lalitna kata “Dibata” labo maka Dibata e lalit. Seri nge bagi kalak sirusur mbelasken kata “Dibata” sie pe la menjamin maka kalak e nggo badia. Ibas kitab Ester, lalit kata “Dibata” ikataken ije, sebab Dibata lit ibalik kerina siterjadi. Seri bagi film, sutradara biasana labo tampil arah lebe, arah pudi nge ia. Tapi sutradara e ka nge situhuna ngatur kerina film amin pe ibalik layar ia. Erkiteken sie me, banci sipake kitab Ester sebage palas pemberitan Kata Dibata.

Ibas bahan PA Mamre enda teridah ijenda peran Mordekai seh kal belinna, erkiteken singaturken strategi ibas cerita ibas kitab Ester enda eme Mordekai. Adi Mordekai igambarken sebage tokoh cerita situhu-tuhu aktif mulai bena-benana nari seh pendungina, maka sebalikna Ester igambarken sebage tokoh cerita si pasif. Ibas cerita enda Mordekai lit posisina sebage pejuang silit ibas ia perjuangen, eme guna njadiken Ester sebage ratu, erkiteken paksa sie raja ngelakoken sayembara guna milih ise sibakal jadi ratu nggantiken ratu Wasti. Usaha Mordekai guna njadiken Ester, anakna, sebage ratu ntah pe permaisuri Ahasweros alu makeken momentum sanga raja ingetna lalap ratu Wasti. Perban ibas hal enda raja situhuna metedeh atena kehadiren fungsi sekalak permaisuri ibas kerajanna janah labo terjeng ertedeh atenan nandangi sosok Wasti sebage pribadi. Erkiteken sie me raja ngelakoken sayembara eme guna ndarami permaisuri pengganti Wasti. Kekuasan sierbanca perjuangen e berhasil eme kebeluhen Mordekai ibas ngaturken strategi. Mulai bena-benana nari berhasil perjuangen e guna njadiken Ester sebage ratu, Mordekai me singaturken strategi alu kebeluhenna, disamping tentu lit faktor kinijilen Ester. Tentu saja siipake sebage modal utama Mordekai ibas ngelakoken perjuangenna eme kinijilen Ester, seh maka Ester banci menang ibas sayembara e. Adi perjuangen e berhasil, maka sibakal iuntungken tentuna eme kalak Jahudi si iwakili Mordekai. Cerita ibas pasal 2 enda tentu saja erkawiten ras cerita selanjutna, eme kari kalak Jahudi jadi terselamatken erkiteken perjuangen Ester.

Ibas buku Kamus Karo Indonesia kata nunut ertina eme rulih-ulih alu teratur. Banci ikataken kata nunut enda eme kalak simegenggeng ibas nehken sura-surana amin pe la meter bagi kalak sideban, tapi seh ka nge sura-surana e, istilah jaman gundari enda nina pelan tapi pasti. Sura-sura siatena isehkenna e tuhu-tuhu rulih-ulih idalanina janah lalap ia mediate kai saja siman pesikapen guna nehken sura-surana e. Enda nandakenca arah tema bahan PA Mamre sekali enda Nunut ras mediate profil sekalak bapa silit ibas diri Mordekai e tuhu-tuhu nggo sue bagi tema PA Mamre sekali enda.

Bapa eme kalak persinik bagepe cenderung menarik diri. Tapi, lit mbue kenangen sanga bapa mendidik kami. Rusur ia nuriken turi-turin Kancil ntah pe Abu Nawas. Mawen-mawen ibabaina kami main sepak bola ntah pe iboncengna nangkih sepeda: tuntutenna bapa cukup keras. Musuh simbelin bapa eme sikap perkisat bagepe la meter. Pernah ipekpekna anakna alu sapu sanga kundul-kundul padahal ije lit sampah. Pernah isiramna anakna alu lau sanga anakna terlambat medak. Memang anak bapa tuhu-tuhu lenga banci memahami maksud bapa ibas sie kerina. Anakna sakit hati irawai bagepe ipekpeki. Kenca nggo dewasa mulai idah anakna maksud bapa e tuhu-tuhu mehuli. Kerina e ilakoken justru guna masa depan anakna. Bapa tuhu-tuhu merawa sanga anakna mekisat sebab atena anakna jadi anak simejingkat. Rawana simbelin e eme bentuk kompensasi kebiarenna adi anakna jadi perkisat. Bapa tutus ngoge ras nulis erkiteken atena erban suasana erlajar man anakna. Isuruhna anakna nggit ngoge guna erban minat ngoge bagepe nuruh anakna lawes kujapa pe sisada guna mpeturah rasa percaya diri bagepe melatih gelah anakna mandiri.

Pdt. Andreas Pranata Meliala, S.Th

GBKP Rg. Cibinong

Nats            : 1 Petrus 2:9-10

Tema          : Bangsa Pilihen Dibata

  (Konfesi GBKP Bab IX : Gereja)   

     Kata Penaruh

Kalak si nggo I pilih, mon-mon kurang menyadari maka ia nggo I pilih ibas kegeluhen na menjadi sekalak Kristen si tek man Dibata. Janah perlu sisadari maka seharusna kegeluhen kalak terpilih berbeda nandangi kalak sideban si la ipilih, sebab kita eme Bangsa Pilihen Dibata. Sienda terbukti arah kai si ikataken ibas kitab Yeremia 1:5: “Kupilih kam ope denga kubereken man bandu kegeluhen. Ope denga kam tubuh nggo Kuserapken kam jadi nabi nandangi bangsa-bangsa.” Janah ibas bahan PJJnta sendah pe jelas I tegasken maka kita bangsa pilihen Dibata si enggo ipilih Dibata guna jadi bangsa sekerajangen Dibata, bangsa sibadia. Janah si pasti Dibata la pernah salah pilih, bagepe la pernah Ia menyesal kerna kai si nggo ipilihNa. Emaka sebagai pilihen Dibata, harus sisadari maka kita ipilih segelahna kita ngeluh badia janah ngeluh bagi singena AteNa.

I.     Mpebagesi Pengangkan Kerna Ogen

1 Petrus 2:9-10 si jadi bahan pjjnta sendah eme surat Petrus sipemena si ialamatken man Kalak Kristen simerap i belang-belang bagin Utara Asia Kitik. Janah tujun surat enda ibas rangka mpegegehi kiniteken perpulungen, sebab paksa sie kalak kristen sangana ndatken percuban sicukup mberat ibas ia mempertahanken kinitekenna man Yesus.  Ibas bahan oraten pjj-nta sendah, Petrus mereken sada pengangkan kerna hubungen kalak si tek man Yesus, ija kenca perpulungen nggo tek man Yesus berarti perpulungen e lanai seri ras kalak Yahudi sinai sinulak Yesus. Tapi perpulungen si nggo nggeluh ibas keselamaten, bagepe erkiteken man Yesus, maka kalak si tek e enggo jadi bangsa pilihen Dibata. 

Makna bangsa pilihen,  imam-imam raja ras bangsa sikerajangen Dibata eme bukti eksistensi simbaru nandangi kalak sitek man Yesus Kristus, ija kalak si tek man Yesus nggo iserapken ibas doni enda nari, emaka kalak sitek nggo nggeluh badia.  Kalak si tek nggo jadi sikerajangen Dibata, emaka salah sada fungsi kalak si tek eme harus jadi imam-imam nandangi Yesus selaku Raja. Memang nai ibas bangsa Israel, dahin imam harus ibas kesusuren suku Lewi nari, janah tugas imam eme selaku perantara antara umat ras Dibata. Imam me sinehken kurban persembahen man Dibata. Tapi ibas status kalak sitek selaku bangsa pilihen ras imam-imam raja si imkasud ijenda, lanai bagi status si nai siharus mpersembahken asuh-asuhen selaku persembahen, tapi kalak sitek harus nehken persembahen puji-pujin man Dibata ras ndalanken kekelengen nandangi sapih-sapihna manusia.

Yesus Kristus nggo mpersembahken diriNa selaku persembahen simehuli guna keselamaten kerina manusia. Alu kata sideban, perpulungen njadiken Yesus Kristus selaku palas kiniteken emaka perpulungen jadi imam-imam si khusus si erdahin guna Tuhan. Maksudna ijenda teridah min lagu langkah simehuli siipimpin Kesah Si Badia lit ibas bangsa pilihen Dibata e, janah perpulungen si tek man Yesus e ngasup ngelakoken simehuli singena ate Tuhan, sebagaimana ikataken ibas ay. 9b maka Dibata nggo ndilo kita ndarat arah sigelap nari menuju ku terang Kristus. Bagi nina ibas ay. 10 “nai kam labo anak-anak Dibata…” enda merujuk nandangi bangsa Israel si lanai jadi bangsa pilihen Dibata  erkiteken bangsa Israel lanai ngeluh bagi singena ate Tuhan. Tapi genduari nggo jadi anak-anak Dibata, enda menegasken maka amin gia bangsa Israel nggo erdosa janah nggo ndauh arah Dibata nari, tapi Dibata mereken pemulihen nandangi bangsa si nggit reh ku Ia, sierkadiola kerna dosa si ibahanna, sebab Dibata e perkuah maka sialoken perkuah ate Dibata e si erbahan kita jadi bangsa pilihen-Na.

II.   Pengkenaina

Ibas Buku Saku: Poko-pokok Pengakuan  Iman GBKP (Konfesi) GBKP Bab IX tentang Gereja, ngataken maka gereja eme persekutuan orang percaya yang di panggil jadi milik Allah dan Jesus Kristus menjadi kepala-Nya (1 Petrus 2:9; Epesus.1:22), terus menerus diperbaharui oleh Roh Kudus menjadi garam dan terang dunia. Enda me si i maksud temanta Bangsa Pilihen Dibata janah bangsa pilihen siimaksudken Petrus ijenda pe jelas ituriken maka berbeda ras bangsa pilihen si isandang bangsa Israel ndube. Ija nai bangsa Israel ipilih Dibata janah ipeserap  gelah bangsa Israel berbeda ras bangsa-bangsa sideban, janah tetap ngelakoken kai singena ate Dibata. Tapi sienda la teridah bas bangsa Israel ibas zaman Yesus, khususna imam-imam simbelin ras tua-tua agama Yahudi si lanai ngaloken Yesus Kristus jadi Raja ibas kinirajaan Surga. Erkiteken sie me ibuat Yesus KinirajaanNa ibas bangsa Israel nari janah iberekenNa man ise saja si tek man baNa (bd. Matius 21:43). Arah si e perpulungen Tuhan si tek mana Ba-Na enggo ijadiken Dibata jadi bangsa pilihenNa, emaka tanggung jawab kalak si nggo ipilih Dibata jadi Bangsa Pilihen-Na eme naksiken kerna perkuah ate Dibata si mbelin e man kerina jelma arah kerina dampar kegeluhennta.

Pdt NeniTriana br Sitepu

GBKP Runggun  Cisalak

Ogen           : Efesus 6:4

Tema          : AJARI DINGEN TEGU-TEGULAH ANAKNDU.

PERLEBE.

Anak eme pemere Dibata man keluarga, Keluarga / Orangtua harus ertanggungjawab guna membangun mental spiritual/karakter anak sejak dini. Ibas proses pembangunen karakter anak-anak ilakoken alu disiplin ras ertanggung jawab. Arah pembangunan mental spritual / karakter enda, bertumbuh genarasi Gereja si percaya diri, unggul ras kreatif. Emaka kita selaku Imam itengah-tengah keluarga iajuk guna  ncidahken keteladanan man anak-anak ibas jabu.

BIMBINGEN TEKS

Efesus 6:4, eme bagin pedah Rasul Paulus man perpulungen Efesus segelah Jabu kalak Kristen banci jadi pasu-pasu man kalak sideban arah kegeluh isi jabuna. Sebab cara nggeluh jabu/keluarga si dame ras harmonis banci jadi khotbah si nggeluh man lingkungen keluarga. Ibas kebudayaan tradisional, peranan anak-anak umumna lenga iperhitungken erkiteken : Nggeluh ibas tangggungjawab orangtua/lenga mandiri, nguda denga, lenga mbue pengalamen. Ibas keluarga, anak-anak iwajibken guna patuh ras megiken perentah ras pengajaren orangtua, pantang nimbak orang tua.

Rasul Paulus ningetken cara nggeluh Keluarga Kristen si erpalasken kiniteken man Kristus, labo meneken tradisi si ndekah, tapi mpelimbaruisa erpalasken kiniteken. Nina Rasul Paulus, ay.6, Ula pesega-sega anakndu, si erbahanca ia merawa, tapi ibas mpebelin-belin ia ajari dingen tegu-tegulah ia bagi singena ate Tuhan. Bhs Ind (Dan kamu, Bapa-bapa, janganlah bangkitkan amarah di dalam hati anak-anakmu, tetapi didiklah mereka di dalam ajaran dan nasehat Tuhan, Kolose.3:21, Hai bapa-bapa, janganlah sakiti hati anak-anakmu, supaya jangan tawar hatinya).

Ayat enda mpersingeti Orangtua/Bapa : 1. Ula pesega-sega anakndu ; Jangan bangkitkan amarah di dalam hati anak-anakmu ; jangan sakiti hati anak-anakmu. Persinget enda ngajuk orangtua segelah megermet ibas ngajarken anak-anak, labo berarti anak e la banci irawai/ipersingeti tapi isehken alu mehuli, dem alu kekelengen. Ula merawa man anakta adi la ietehna salahna/tanpa alasen si jelas, Ula kasar ibas ngajarken/mpersingeti anak-anak. 2. Ajarken dingen tegu-tegulah anak-anak bagi singena ate Tuhan ; Didiklah mereka dalam ajaran dan nasehat Tuhan. Palas pengajaren orangtua harus erpalasken Kata Dibata, isehken alu manjar-anjar, sampati / tegu-tegu anak segelah ngangkai makna pengajaren e alu ate saber, orang tua ncidahken usihen ibas pengajaren sinisehken man anak-anak.Adi lit kesalahen/kelepaken anak, ipersingeti alu mehuli, ula sikapiti anakta adi ngelakoken kesalahen. Bereken tanggungjawab man anak-anak sejak dini, bereken penghargaan adi lit prestasi, adi lit kelemahen anak-anak ula minter i pandangi tapi itegu-tegu alu saber.

REFLEKSI.

Anak-anak eme pemere/anugerah Dibata, bdk. Mas.127:3, tugas orangtua ertanggungjawab guna  ngepkep ras mpebelin-belinsa erpalasken kata Dibata, ngajarken Kata Dibata segelah seh ibas paksana nandai ras erkiniteken man Tuhan. Tugas enda labo melukah emaka tetaplah pindo gegeh ras kepentaren Tuhan ibas ndalankeca ibas keluarga.

Melala perbeben sinialaken kita ibas kegeluhenta, melala dahin ras kesibuken orangtua guna ncukupken keperlun keluarga, emaka tempa kurang waktuta mperdiateken anak-anak. Emeka arah bahan PA ta enda kita selaku mamre erpala-pala guna ngaturken waktu guna perkembangen anak-anakta.

Ibas Ngajarken anak-anak, megati kita kurang sabar ras mungkin saja mpeturah emosi/merawa ngidah lagu-langkah perbahanenna, lit ka orang tua si ngelakoken tindaken kekerasan man anak. Lit ka nge orang tua si kurang harmonis hubungenna ras anak-anakna. Tentu saja enda  kebiasaan si harus ipelimbarui ibas jabu kalak Kristen, guna mperobahi karakter anak, terkadang kita sebagai orang tua si harus leben mperobahi dirinta. Kita harus tetap optimis pasti lit nge perubahen ku simehuli ibas ketutusen ras kesabarenta ibas ngajarken anak erpalasken Kata Dibata, Amin.

Pdt  Togu  Persadaan Ginting Munthe

GBKP – Rg  Cililitan