Suplemen PA Moria : Titus 1 : 9-16 ; Tgl 14-20 Maret 2021
OGEN : Titus 1: 9-16
TEMA : Gelem ras Ajarken Pengajaren si Tuhu
TUJUN: -Meteh Pengajaren si payo si peseh Titus
-Ngelakoken ras ngajarken pengajaren si benar i bas kecibal adaptasi kebiasaan baru
Titus labo kalak Jahudi, dia adalah orang Yunani (Gal 2: 3), seorang anak yang sah menurut iman kata Paulus (Titus 1: 4) ntahpe banci ikataken ‘anak rohani’ Sanga surat enda ikirimken, Titus tading i Pulau Kreta guna meritaken Berita Si Meriah man kalak i Kreta, bagepe guna pejore dahin si perlu idungi, ras ngangkat pertua-pertua (ay 5). Rikutken tema PA Moria “Gelem ras Ajarken Pengajaren si Tuhu” lit piga-piga poin penekanen arah surat man Titus enda:
Biak kalak Kreta
Ayat 12: Sekalak nabi i Kreta nari pernah ngataken, “Kalak Kreta perguak, bali ras rubia-rubia si merawa, kalak rangap si perkisat.” Karakter jelma si perguak, rangap, perkisat enda agak mesera man ajaren.
Kalak si ndube itandai arah karakter si la mehuli enda, alu pengajaren kata Dibata arah Titus bagepe pertua-pertua si bakal iangkat, iarapken banci berubah jadi kalak si bersih pusuh peratenna (bdk ayat 15-16). Ikataken Paulus man Titus gelah ajarkenna kalak e alu la tanggung-tanggung (TB LAI: tegorlah mereka dengan tegas). Arah si enda banci sibuat sada pelajaren bahwa tegoran yang keras kadang diperlukan untuk mengajarkan orang-orang dengan karakter tertentu. La banci seri kerina metode pengajaren sebab si man ajaren pe beda-beda ka karakterna. Prinsip enda banci ipake ibas jabuta, selaku nande uga kita menghadapi anak-anak sesuaiken ras karakterna. Lit anak si harus tegas maka ikutkenna kata ajar, lit ka si iajak diskusi dari hati ke hati maka turah ukurna gelah jera ras robah. Sitandai ras sesuaiken karakter ras cara mereken pengajaren.
Ula tanggung-tanggung
Pengajaren si ibereken Titus man kalak si jadi pemimpin perpulungen arus ibereken alu la tanggung-tanggung, gelah rurat ibas ia, gelah tuhu kinitekenna. Tujunna, adi enggo rurat pengajaren e, tentu teguh itagangina Berita kerna Dibata e janah ngasup ia mpegegehi kalak sideban alu pengajaren si tuhu-tuhu e, dingen ngasup ia encidahken salah kalak si ngelawan pengajaren e (ayat 9). Bas paksa e tantangenna eme pengajaren si terikat denga ras turi-turin kalak Jahudi si mengutamaken sunat, ras pengajaren-pengajaren manusia labo pengajaren Dibata. Bagepe lit piga-piga kalak si rusur nipu kalak alu cakap si la erguna seh banci ngguluti jabu kalak. Man kalak si bage ola bere ngerana nina Rasul Paulus man Titus. Seh ibas paksa gundari pe lit kalak penyebar berita bohong (hoax). Gara-gara berita hoax banci sada jabu bahkan sada negara la siangkan. Man kalak si bage ula bere kesempaten ngerana, istilahna gundari ‘jangan dikasih panggung’.
Bage ka me kita ibas ndatken pengajaren kata Dibata, ula min tanggung-tanggung. Gelah kita banci ngajarken si benar man kalak sideban ras membantah adi lit kalak si ngelawan kai sibenar e. Berlaku ka ibas kegeluhenta tep-tep wari. Umpamana ibas adaptasi kebiasaan baru, melala kel banci siakses artikel, berita, informasi si bermanfaat ibas kita ndalani erbage aturen. Tapi adi hanya sekedar ngoge judul, minter sibagiken, atau hanya ngoge sekilas lalu, minter sisebarken tanpa memeriksa kembali sumberna. Seh lit kuan-kuan ibas anakta si nguda nina: Gundari adi kena covid ntah pinakit sideban, lanai perlu ku dokter, bas grup whatsapp melala dokter dadakan. Enda maksudna labo mujiken tapi bentuk sindiran halus, sebab enggo mbuesa tips dan trik kesehaten isebarken tapi la tertanggungjawabi. Kenca ikataken bahwa informasi e hoax, jawabna: “Saya ‘kan hanya membagikan info, tidak tahu menahu bahwa itu hoax.” Minter lepas tangan. Bage me kekurangenna adi tanggung-tanggung kita mpelajari suatu hal. Ajaren si tuhu lah sigelem. Alu bage banci kita ngajarken kalak sideban. Baik si ngajarken ras si erlajar, la banci tanggung-tanggung.
Nandai Dibata teridah ibas perbahanen
Kalak si la bersih pusuh peratenna dingen la erkiniteken, kiniteken si iakukenna la lit teridah buahna ibas perbahanen, perukurenna mbau, la nggit patuh. Kita Moria ula lit si la bersih pusuh peratenna. Bersih (Ind: suci) min pusuhta. Cidahken kiniteken man Dibata arah perbahanen. La banci kita ngaku erkiniteken man Tuhan tapi ibas pandemi enda la teridah uga arusna kalak si erkiniteken. Contohna, enggo si teh ras-ras maka ibas adaptasi new normal enda kita arus memakai masker, mencuci tangan, menjaga jarak, menghindari kerumunan. Tapi tetap kita la patuh nandangi himbauan enda. Seh gundari melala denga kalak si la patuh nandangi protokol kesehaten. Umpamana ibas gereja si enggo erkebaktin secara on-site. Enggo iaturken maka 1)Si hadir harus dalam keadaan sehat, 2)Memakai masker selama kebaktian berlangsung, 3)Duduk di kursi yang sudah diatur jaraknya, 4)Tidak bersalaman 5)Mencuci tangan dan bersedia diukur suhunya. Enggo pe bage iban aturen, lit denga si reh ermasker, tapi sanga ibadah mesera akapna rende emaka talangina maskerna, dung kari kebaktin pakena masker ndai mulihi. Lit ka si ngatakenca “labo dalih lepas masker, kita-kita nge je”. Enda tanggung-tanggung denga kepatuhenta, lenga ndalanken pengajaren si tuhu. Gundari caranta nehken keleng ate man temanta manusia eme alu menjaga jarak saat berinteraksi. Alu make masker ras la ersalamen pe enggo sijaga ras silindungi temanta. Singkatnya: My mask protects you, your mask protects me. Emaka mari silakoken alu benar.
Bagepe nandai Dibata teridah ibas perbahanen, khususna selama pandemi ras new normal eme uga kita tetap setia ngikuti kerina kebaktin, PJJ, PA si ilaksanaken sektor ras runggunta, dingen nehken tanggung jawabta walaupe ibas masa pandemi. Nterem kita si tetap menjaga kebiasaan baik nehken persembahen ngikuti kebaktin online ras persembahen perpuluhen alu tertib, tapi lit ka erkiteken pandemi ipengadina nehken piga-piga persembahen sebab mbiar la bias man keperlun jabu. Arah si e pe banci siidah enggo kin tuhu-tuhu sitandai Dibata. La bias pengakun bas biber nari ngenca, tapi arah perbahanen si mehuli, si mengutamaken Tuhan ibas kerina dampar kegeluhen. Tuhan si masu-masu kita.
Pdt. Yohana Samuelin br Ginting
GBKP Rg.Samarinda
