Suplemen PA Moria Tanggal 31 Januari-06 Februari 2016, Ogen : Pilipi 4:1-9
Tujun : Gelah Moria :
1. Njadiken pengajaren Rasul Paulus jadi penjemba guna kiniersadan arih
2. Njadiken geluh ras perukurenna si maba kemalemen ate ku sekelewetna
1. Rasul Paulus sangana kal ibas penjara, biasana adi bas penjara beda kel ras sibebas. Sebab bas penjara erbagai-bagai kiniseran si man alanken. Baik sesama tahanen, penjaga penjara bagepe kalak sideban sibertentangen ras ajaren Paulus. Emaka kebiasan kalak ibas penjara, erceda ate, ngandung ras kesepian.
Tapi Rasul Paulus beda ras tahanen sideban, sebab Paulus bas penjara, rende, ertoto. Ertina ia i penjara sukacita kal (Perb.Rasul 16:25). Mantapkal, kiniseran ihadapina alu meriah ukur, sebab igejapna maka ia masuk penjara labo erkiteken kriminal, tah pe nangko, tapi erkiteken ia ndalanken tugas panggilen bias Tuhan Yesus nari (bdk.Perb.Rasul 9:15 ; 16:13-23).
Inget maka kiniseran sinihadapi kita lenga bo sebanding ras kai si inanami Paulus ras teman-temanna. Saja megati siakap bahwa kiniseranta e beraten asa kiniseran kalak. Tapi hadapilah kiniseran e alu sukacita ibas keleng ate Tuhan Yesus.
2. Situhuna enggo kal sinanami kemalemen ate e, aminna gia ninta megati lenga bo. Cubaken min si hitung-hitung kai si enggo ibahan Dibata man banta pribadi lepas pribadi, bagepe keluarga lepas keluarga. Luar biasa kal perbahanenNa nandangi kegeluhenta enda. Ija perbulangen, anak, dahin usaha ipasu-pasuNa, emaka tetap labo kita kekurangen. Hal enda eme erkiteken perkuah ate Dibata man banta la erkeri-kerin, nai nari seh gundari.
3. Rasul Paulus mereken nasihat man jemaat Pilipi, iawalina lebe alu “o seninangu si kukelengi”. Janah isingetkenna kerna kuga harus pergeluh selaku kalak Kristen si enggo tek man Kristus Yesus. Paulus seh kal tena kelengna ras tedehna jemaat Pilipi, bagepe tedeh tena nandangi jemaat dingen megah akapna.
Paulus mengharapken dua diberu enda harus ersada arih (Eiodia ras Sintike) duana kalak enda harus sikeleng-kelengen, harus sada gegeh, sebab adi ersada arihna maka malem atena, malem ate jemaat bagepe malem ate Paulus aminna gia ia i penjara. Janah sebagai Serayan (kawan sekerja) Paulus harus nampati jemaat, terutama si isingetken Paulus gelarna duana, sebab duana ia ikut muat bagin guna nampati Paulus ibas meritaken berita si meriah.
Radu ras si e Paulus ngajak gelah tetap ermeriah ukur katawari pe amin gia la bagi ukur siterjadi, janah harus ncidahken si mehuli man ise pe sebab kerehen Tuhan lanai ndekah, kearun ate harus itadingken sebab kearun labo banci membangun masa depan si mehuli. Sepanjang geluh harus ngataken bujur, ertoto bagepe mindo man Dibata. Emaka Dibata mereken kemalemen ate, janah si enda la ngasup kita ngukurisa, tapi enggo irancang Yesus Kristus Kerinana.
4. Ibas PA-nta sendah, bagi enggo si eteh maka Rasul Paulus ngajak kalak Pilipi, bagepe kita gelah tetap ibas kiniteken, persadan ras Yesus Kristus. Sebab si sadari nge kerina si terjadi bas kegeluhenta enda enggo iaturken Dibata, janah kai atena ilakokenNa man banta maka ia tetap nehkenca alu meriah ukur. Memang sepanjang geluh pasti lit rusur siterjadi la bagi ukur, tapi inget lit kuan-kuanen nina : “kai pe labo bagi ukur, ras kai pe labo gel-gel. Emaka bas si la bagi ukur pe ngasup kita ndalani kegeluhen enda, ras si gejajp maka labo tetap kari; pasti lit perobahen, emaka guna si e kita harus ermeriah ukur terus. Meriah ukur ibas jabu, anak ras perbulangen, meriah ukur ndahiken dahin aminna gia sidahiken dahin labo pernah dat pujin, bagepe sebagai Moria lebih banyak kerja daripada kata. Janah tetap ndalanken kai si enggo sipelajari, erpalasken pustaka SiBadia. Janah perubahen, pengerananta kerina eme ncidahken kemulian Dibata ibas kegeluhen.
Moria harus merelaken nadingken jungut-jungut, aru ate, cian, cemburu, emosi, pelit, malas, kurang mediate. Janah si enda kerina harus sigantiken alu sukacita, doa, tanggung jawab, sabar, peduli, berpikir positir, jujur.
Enda me siniarapken Dibata , bagi siniajarken Paulus arah Pilipi 4 ndai.
Pdt. A. Brahmana
081317054961
