Suplemen PA Mamre : Galatia 3 : 6-9 ; Tgl 15-21 Agustus 2021
Ogen : Galatia 3:6-9
Tema : Bapa Si Maba Pasu-Pasu
Kata Pemena
Kalimat sekalak tokoh pahlawan nasional e me, Ahmad Dahlan mereken sada statement simenarik e me,” Warisan terbesar seorang Ayah adalah dapat membuat keluarganya sebagai teladan.” Erpalasken tema si seh man banta ibas wari enda maka Bapa Si Maba Pasu-Pasu, e me warisan si mbelin guna kegeluhen setiap jabu bagepe kegeluhen gereja GBKP. Mamre e me bapa si jadi navigator guna mengarahken kegeluhen keluarga gereja kubas encibalken pasu-pasu ras bagepe tentuna tetap mengusahakan segelah ula terputus ras sumber pasu-pasu enda. Adi bas konsep budaya Israel entah pe Jahudi sekalak bapa berhak mewarisken ertana man anakna, emaka erpengarapen kami kam mamre selaku bapa i tengah-tengah perpulungen banci mewarisken kerina talenta si enggo iendesken Dibata guna generasi gereja terus menerus. Emaka arah tema ta skelenda kita ibabai Kata Dibata guna erlajar ibas Abraham nari e me bapa kalak si erkiniteken.
Pembahasen
Kata Dibata si seh man banta e me Gal. 3:6-9 e me kerna kesaksin iman Abraham si enggo lewat piga ribu tahun sebelum konteks surat enda seh kubas perpulungen Galatia. Teks enda sangat menarik erkiteken Paulus mencoba mereken benang merah antara Perjanjian Lama ras bagepe Perjanjian Baru kerna ugakin situhuna kegeluhen kalak si enggo ngaloken Kristus. Ibas ayat 6 ituriken maka kiniteken Abraham jadi acuan kalak sierkiniteken labo saja man kalak Kristen non-Jahudi tapi pe man kalak Kristen Jahudi si tuhu-tuhu payo ietehna maka kiniteken Abraham encidahken uga penandanna man Dibata si enggo erpadan man bana. Salah sada padan Dibata smbelin man Abraham erkiteken kinitekenna e me kerina kesusurenna i pasu-pasu Dibata, termasuk kita si seh ibas paksa enda selaku kalak si erkiniteken man Dibata. Abraham enggo ngaloken berita si meriah ibas paksa padan sindekah, emaka tentu enda sada benang merah sierbahanca terhubung padan sindekah kubas padan simbaru e me, ngaloken berita si meriah (ayat 8). Ibas padan simbaru Jesus (Luk. 4:18) secara terang-terangen menjelasken kerna berita si meriah si jadi tema besar ibas panda simbaru.
Gebrakan berita si meriah enda bali bagi kai si enggo ilakoken Abraham ibas ia erkiniteken man Dibata. Iperhitungken Dibata kinitekenna sebagai kebenaren erkiteken Abraham erkiniteken labo erpalasken undang-undang tapi erkiteken relasina kempak Dibata. Piga-piga kali banci siidah uga Abraham berkomunikasi alu ercakap-cakap ras Tuhan guna ngaloken kai sura-sura Tuhan ibas kegeluhenna. Jesus pe ibas pelayanenna piga-piga kali encidahken maka tek man Dibata labo erpalasken undang-undang tapi erkiteken keleng ate man Dibata. Arah sikap hidup kegeluhen Jesus pe banci siidah maka IA jadi pasu-pasu man setiap jelma sinterem ija pa pe ia ringan. Janah enda me padan Dibata man Abraham ibas ayat 8-9 maka arah ia me i pasu-pasu kerina kalak seh ku kesusurenna. Warisen sinitadingken Abraham si seh man banta ngasa genduari enda e me, berita si meriah si jadi pasu-pasu guna dirinta bagepe kubas sekelewat ta. Enda me warisan kalak sierkiniteken sierbahanca seh asa genduari enda, termasuk kita GBKP banci denga ersada guna nehken pasu-pasu man doni enda.
Arah teks ta enda mabai kita guna nggeluh erkiniteken ola erpalasken undang-undang entah pe erkiteken tuntuten-tuntuten erkiteken kita kalak Kristen, tapi erkiteken nggo si gejapken uga berita si meriah enda menggugah kegeluhen mamre selaku jadi bapa i tengah jabu. Enggo nge seri pengidah ta nandangi Dibata bagi pengidah Abraham? Aminna pe Ishak i pindo Dibata jadi persembahen, ije pe Abraham tetap setia ibas kinitekenna. Paksa si e tentu labo lit undang-undang entah pe tata gereja ras lain sidebanna. Arah ogenta ibas wari enda, Abraham me jadi sarana Dibata guna nehken pasu-pasuNa erkiteken kesetiaan ras kepatuhenna, alu bage Abraham maba pasu-pasu man kerina kesusurenna. Abraham ndatken erta situhu-tuhu e me nggeluh ibas kata ras sura-sura Dibata. Enda me sejarah simbelin man bangsa Israel erdandanken Abraham maka warisen enda tuhu-tuhu la ermasap-masap bagi erta doni entah pe kebayaken-kebayaken doni. Erta si i warisken Abraham enda e me berita si meriah simaba kemalemen ate ras bagepe kegeluhen simaba dame erkiteken Dibata enggo ngaturken kerina masa depan bangsa Israel arah kiniteken sekalak Abraham.
Penutup
Meriah ukurta erkiteken secara organisasi enggo ka seh mamre kubas pertambahen umur. Ertina mamre e me selaku bapa i tengah-tengah perpulungen enggo ertambah kepentarenna arah pengalamen-pengalamen si enggo ibentasi seh paksa enda. Mari bercermin kita kubas sosok bapa e me Abraham, guna mpekena-kena ras bagepe pebagesi kiniteken mamre ibas pertambahen umur enda. Kami yakin dan percaya bahwa mamre banci mewarisken berita si meriah ku tengah-tengah gereja ta guna jadi pasu-pasu man keluarga bagepe man jelma sinterem termasuk bangsa ras negara ta Indonesia. Kedewasan kiniteken mamre akan segera diuji apakah setia kepada Tuhan berdasarkan rutinitas dan tuntutan-tuntutan agamawi? Atau justru berdasarkan imannya kepada Tuhan oleh karena telah diselamatkan dan diberikan kesempatan untuk menjadi berkat bagi keluarga dan sesama manusia. Peran mamre tuhu-tuhu penting ibas keluarga ras bagepe perpulungen, segelah mamre banci jadi navigasi atau kompas guna mengarahkan jabu bagepe perpulungen kubas Kristus. Mamre me perpanjangen tan Dibata guna menghadirken berita si meriah, e me kinirajan Dibata i tengah-tengah doni enda, alu bage kerina jelma banci ngaloken pasu-pasu si rehna ibas Dibata nari. Selamat HUT Mamre man bandu bapa kami. Tuhan sinampati ras simasu-masu kam selaku bapa kami i tengah-tengah GBKP.
Pdt Abel Sembiring , GBKP Rg Tambun
