Suplemen PA Mamre : Heber 12 : 9 - 11 ; Tgl 21-27 Maret 2021
Ogen : Heber 12:9-11
Tema : NEHKEN PENGAJAREN SI ERBAHANCA MALEM ATE.
PERLEBE
Lit istilah si rusur ibelasken eme : Long Life Education, Belajar sepanjang kehidupan manusia. Ungkapen enda ngataken maka erlajar e labo pernah ngadi, tapi terus menerus segedang kegeluhenta. Tujun erlajar eme guna ndatken pemeteh si ngerehken kemalemen ate ibas kegeluhen manusia. Kalak si kisat erlajar ikataken kalak lenge ulihna banci ketadingen ibas kerina dampar kegeluhenna. Ibas PA Mamre ta enda, kita ipersingeti segelah tetap merincuh erlajar ras ngajari anak-anakta, labo hanya kerna pemeteh-pemeteh intelektual tapi erlajar kerna kepentaren Dibaata. Sebab arah kepentaren Dibata nge banci turah kemalemen ate si tuhu-tuhu ibas kegeluhenta.
BIMBINGEN TEKS.
Kitab Heber, eme kitab si isuratken man kerina kalak kristen si merap marpar ibas belang-belang doni si sangana ngenanami erbage-bage kiniseran erkiteken kiniteken man Kristus. Tujun surat enda segelah perpulungen kalak Kristen tetap memegeh ras ngasup ngalaken perbeben alu tetap ncikep kinitekenna alu paguh. Palas PA ta enda ngingetken perpulungen guna ngertiken/memaknai maka kerina situasi sinialaken anak-anak Tuhan ibas kegeluhenna eme bagin proses pengajaren Dibata man kerina tinepaNa. Pengajaren Dibata e desken pengajaren sekalak bapa si disiplin nehken pengajaren man anak-anakna, ibas proses erlajar e megati anak-anak la ermeriah ukur ngaloken pengajaren e erkiteken kedisiplinen bapana, tapi ulihna ngerehken keriahen ukur ras kemalemen ate.
Enda me jadi palas man banta selaku orang tua ibas ndalanken tugas ras tanggungjawab ibas nehken pengajaren man anak-anakta, megati kita pe harus tegas ibas nehken pengajaren e, bahkan ibas kitab Kuan-kuanen 13:24, make tongkat ras perligas ibas ngajarken anak, tapi ilakoken erpalasken keadilen ras ibas paksa si payo, ola erpalasken emosional/gelap mata, harus tetap erpalasken keleng ate Dibata. Ciken ras perligas ibas kitab Kuan-kuanen enda ula hanya simaknai secara hurufiah, tapi banci si ertiken, melalui sanksi, misalnya la banci ndarat i rumah nari dikune anak e lupa waktu erkiteken gawah-gawah, la ibereken sen mingguan, erkiteken la ertanggungjawab ibas makeken duit, rsd.
REFLEKSI
Melala cara Dibata ibas nehken pengajaren man banta, banci saja sijumpai situasi si la bagi ukurta, turah persoalan mberat sinialaken kita, pinakit, rsd. Dibata labo pernah ersura-sura guna ngerancang/ngerehken si lamehuli man anak-anakNa, Sie kerina banci saja erkiteken dosa ras kesalahenta, ras kerina e banci sialoken erkiteken iijinken Dibata. Labo berarti Dibata la erkeleng ate man banta, ola minter kita nalahken Tuhan, tapi sievaluasilah dirinta, adi sijumpai kekurangen mis kita nggit robah ras ola nari erbahan si la mehuli si la ngena ate Dibata. Situasi Perbeben eme keleng ate Dibata guna mpelimbarui gegeh ras kinitekenta seh maka kita reh dewasana ibas erkiniteken ras erpengarapen man bana.
Kita selaku orangtua pe tetap erlajar ras nehken pengajaren man anak-anakta alu la erngadi-ngadi, pengajaren intelektual ras spiritual harus tetap sisuanken man anak-anakta, segelah anak-anak e meteh mehuli ras pentar ibas kegeluhennta. Megati orangtua berjuang segelah anak-anak ndatken pendidikan ibas sekolah si berkualitas saja, tapi lupa kerna pendidikan spiritualitas, padahal pendidikan spiritualitas nge si erbahanca anak-anak e ndatken kesuksesan ras banci iarapken guna jadi penerus keluarga, gereja ras bangsa.
Pdt Togu Persadaan Ginting Munthe
GBKP – Rg Cililitan
