Suplemen PA Mamre : Mazmur 19 : 1-7 ; Tgl 23-29 Februari 2020
Ogen : Masmur 19:1-7
Tema : Dibata erberita arah erbage-bage cara
I. Perlebe
Sada paksa sekalak ahli fisika, Albert Einstein isungkun ntah tek nge ia man Dibata. Jababna “kita enda bagi sekalak anak kitik, masuk kubas perpustakaan simbelin janah dem alu buku. Anak e meteh maka sekalak jelma pasti enggo nulis buku-buku e. tapi la ietehna uga si e banci jadi. Kita pe bali ras anak kitik e ndai. Kita banci ngidah uga luar biasa doni enda ras kerina isina iatur seh kel ulina janah pe banci erdalin sesuai hukum alam siberlaku, tapi kita terjeng meteh sada bagin sikitik ngenca”. Amin pe Einstein takjub nandangi keindahan doni enda, tapi ia la tek nandangi sinepasa.
II. Pemahamen Teks
Pemasmur pe nggejabken keterpanaan si seri ras Einstein. Ibas Masmur 19:1-7, Daud mereken judul “Dibata Ermulia Ibas TinepaNa”. Daud kemamangen ras takjub ngidah Tinepa Dibata, Langit, Awang-awang, suari, berngi, matawari. Kerina tinepa Dibata e nuriken kemulian Dibata ras kinimbisanNa. Berbanding terbalik ras sikap Einstein, Pemasmur Daud tek man Dibata sinepa Doni enda.
Keajaiban Doni enda siigejabken kita arus jadi sada tanda simabai kita ku kemulian Dibata sinepasa. Joh 1:3 mereken tambahen “arah kata e ijadiken Dibata kerina si nasa lit; lalit sada pe ibas kerina sienggo jadi e ijadiken la arah kata e”.
Kemulian Dibata sidapeti ibas karya tan Dibata nandnagi doni enda (ay. 2-7). Nibari kemulian ras kinimbisan Dibata nehenlah langit ras awang-awang, uga lukisen doni enda jilena. Matawari, bulan ras bintang mereken terang rikut ras waktu sienggo itentuken. Lau ras daraten ipesirang alu pemandangen simejile, reh nggitna kita ngenehen tinepa Dibata ibas doni enda reh ngangkana kita kerna kemulian Dibata e.
John Ernest, sekalak astronom sienggo seh ku bulan, ia pe manusia pemena sinyetir mobil i bulan. Kesaksinna, tantangna ia seh i bulan minter ia ertoto janaj i bulan me ia bertobat, engkai mka bage? Erkiteken i bulan me iidahna maka ratur kel susunen galaksi. Lalit iketen singiketsa antara sada ras sidebanna, tapi kerina erdalin sesuai poros. La terbayangkenna adi galaksi-galaksi e tabraken tentu hancur me alam semesta. Tapi si e la terjadi, janah katakenna tuhu-tuhu erkuasa kel Dibata e.
III. Aplikasi/Refleksi
Tek nge kam nandangi Sinepa doni enda? Ntah lit kin keragun ibas pusuhndu? Nehenlah langit, bintang ras bulan berngi enda. Ntah pe bunga-bunga si terlak mejile. Doni enda ras isina kerina mereken sada tanda si luar biasa, tanda simabai kita ku Dibata Sinepasa. Arah penjelasen Mazmur enda, kita la ipindo guna nggeluh terjeng mengagumi kemulian Dibata, ras kuasaNa. Pemasmur mindo lebih man banta eme, pengetahuan kerna Dibata arus mabai kita reh deherna, erkemalangen ras patuh man Dibata.
Pdt Nenni Traina br Sitepu
Rg GBKP Cisalak
