Suplemen PA Mamre : Jeremia 29 : 12-23 ; Tgl 16 -22 Februari 2020
Ogen : Jeremia 29:12-13
Thema : Ndarami Dibata Alu Bulat Ukur
Kitab Jeremia nuriken kerna bangsa Israel sipaksana ndalani masa pembuangen i babel. Mulihi jadi budak, bangsa jajahen. Ibas situasi sibage, Jeremia mereken surat man kalak Israel si lit ibas pembuangen. Isi surat e nuriken kerna padan Dibata sibakal mulahi Israel ibas pembuangen nari kenca pitu puluh tahun i Babel (ay. 10). Isi surat Jeremia enda mereken angin sejuk man bangsa Israel si lit ibas kondisi nungkun-nungkun kerna penemani Dibata. Bangsa e bangsa pilihen tapi arus ngenanami pembuangen ras la ietehna kerna masa depanna. Jeremia ibas suratna make kata-kata sisenada ras Musa “… reh kam ndahi aku dingen ertoto, janah kualoi kam. Idaramindu Aku janah ijumpaindu Aku, erkiteken alu bulat ukurndu idaramindu aku” (ay. 12-13).
Kerina manusia pasti ngarapken gelah pertotonna ibereken Dibata. Meriah kel nge ukur, adi Dibatanta lalap mereken pemindon dan kai siisuraken kita. Tempa-tempa lalit perbeben, sebab doni enda lit ibas tanta. Tapi kinatana kepeken labo bagi siiarapken kita. Dibata labo makhluk ajaib sirehna ibas lampu ajaib nari : adi sigosok lampu e maka makhluk ajaib ndarat ibassa nari janah mereken telu pemindonta. Dibatanta pe labo ibu peri simereken kerina siipindo kita alu tongkat ajaibna. Tapi situhuna, geluh siiberekenNa man banta ibereken gelah kita banci ngelakoken perbahanen si mehuli ras pe ertanggungjawab nandangi dirinta, teman manusia ras tinepa si deban.
Jeremia si keleng kel atena bangsana, arus mpeseh persinget ras ukumen Dibata si la nggit ibegi bangsa Israel, mulai masa pemerentahen Josia seh Zedekia. Keleng kel atena bangsa Israel janah erkiteken kekelengenna e, ia arus nampati bangsa e ngelakoken sura-sura Dibata. Erkiteken si e me Jeremia mate iukum rajam (cambuk) bangsana sendiri, erkiteken kekelengenna ianggap labo kekelengen. Itepa Dibata memang labo senang ras nukah. Adi la kita megegeh, maka ndabuh me kita kubas pengangkan Dibata e la adil. Ntah pe banci saja kita nadingken Ia alu alasen kecewa. Enterem kalak Kristen ngelakoken hal sibage rupa.
Tek ras lakoken kai siiteki kita eme modal paling utama ibas kita ngenehen padan Dibata terjadi bas geluhta. Penampat Dibata berlaku sebagai cadangen man kerina manusia. Penampat Dibata e arus ka nge ipersada ras usaha , cita-cita ras gegeh manusia. Kita labo banci ipegegehi toto kalak sideban adi kita sendiri pe lupa ertoto; erkiteken cara sibage labo itetapken Dibata man banta.
Uga nge ndarami DIbata alu bulat ukur? Ertina eme ndarami ia alu tulus ras sungguh-sungguh bagepe ngandalken penampat ibas Ia nari seutuhna. Amin pe jawaben siiberekenNa la bagi siiarapken kita ntah pe rikutken jadwalta, kita ula min nundalken Dibata. Dibata erjanji merekn dirina gelah banci ijumpai ras pe memulihkan bangsa Israel- padan e pe seh man banta. Adi sidarami Dibata alu bulat ukur, mungkin perbebenta la minter ngadi, tapi pasti bakal siangkai nge maka Dibata pe ikut erdahin guna mereken kiniulin man banta.
Pdt Nenni Traina br Sitepu
Rg GBKP Cisalak
