Suplemen PA Mamre : Keluaran 35: 30-36 :1
Ogen : Keluaren 35:30-36:1
Tema : Pakekenlah Kepentaren, kengasupen ras pengertin
Dibata ngerana man Musa kerna kai siirencanakenNa, kerna uga cara ngelakokensa, kerna ise singasup ndalanken rencanaNa ras engkai rencanaNa e arus idalanken. Rencana Dibata enggo terperinci ras lengkap kerina janah tujunna guna kiniulin manusia ras kemulian Dibata pe. Dibata enggo milih bagepe ngelengkapi Besalel, Oholiap ras tukang-tukang sideban. La ijelasken Dibata engkai maka ipilihNa Besalel ras Oholiap, tapi kerina pilihen Dibata pasti lit erti ras tujunna. Dibata pe enggo nuriken rencanaNa alu sempurna man Musa.
Dibata rusur ras la pernah ngadi erbahan rancangen simehuli man bangsaNa. Rancangen Dibata kerna bangsaNa ras kerina anak-anakNa sienggo ipilihNa ibas gelar anakNa sitonggal, Jesus Kristus eme rancangen sempurna. Rancangen Dibata berkaiten kubas 2 hal eme:
1. Guna ncidahken kekelengenNa nandangi bangsaNa
2. Gelah bangsa pilihenNa e tetap mpermuliaken ras mpebadiaken gelarNa saja.
Dibata eme ulu kerina ide, gagasen ras pikiren kreatif bagepe inovatif, rasp e ulu kerina keahlin. Keahlin si positif, tujunna positif ras erguna man manusia guna ncidahken keleng ate pasti rehna ibas Dibata nari. Dibata enggo netapken maka kerina pendahin manusia khususna bangsa pilihenNa eme pendahin si berkualitas, nomor satu ras la tertandingi. Dibata ngarapken kesempurnaan kualitas ras kuantitas. Nandangi bangsa Israel, tuntuten Dibata eme Perfect (sempurna) seh ku hal-hal si kitik pe.
Dibatanta eme Dibata si sempurna. Adi Dibata masu-masu kita alu Mobil Toyota Kijang, maka Dibata pe pasti mereken sen guna penukur bensinna.
Keahlin si lit ibas Besalel ras Oholiap labo proses kerja satu malam, tapi Besalel ras Oholiap ndatken keahlin e erkiteken ketekunen ras nggit melatih diri suari ras berngi, bagepe proses jatuh bangun si ndekah. Sebab labo lit keahlin sibanci idatken alu instant. Pakekenlah keahlin si lit ibas kita alu tujun tuhu-tuhu guna kemulian Dibata. Ula hanya terjeng teridah mpermuliaken Tuhan, tapi situhuna guna ndarami untung ras kepuasen diri saja.
Lalit kalak si motu ilebe-lebe Dibata. Si lit eme kalak si rajin ras kalak perkisat. Kerina manusia si lit keahlinna eme kalak si rajin melatih potensi dirina rasp e mengasah keahlinna. Pakekenlah keahlin si lit ibas kita guna ngkelengi manusia ras mpermuliaken gelar Dibata. Dibata enggo ndemi akal pikiren manusia alu pengertin, kebeluhen ras kengasupen. Jadi kita enda eme manusia cerdas, pentar ras dem alu pengertin.
Pdt Nenni Triana br Sitepu
RG GBKP Cisalak
