Supleme Bimbingan Mamre ; Ogen : Josua 24:14-28, Tgl 6-12 Mei 2018

BIMBINGAN PA MAMRE GBKP

Tanggal 6-12 Mei 2018 (Spiritualitas)

Ogen: Josua 24:14-28,  Tema: Mamre si Erprinsip (Mamre si Paguh Punya Jati Diri)

I.                   KATA PENARUH

·         Adi kune kenca lit perbeben siihadapi manusia sipemenana kel si lit bas pikirenna eme, uga gelah perbeben e banci lit jalan keluarna. Adi kune sekalak jelma pinakiten sipemenana lit bas pikirenna eme uga gelah malem pinakit, adi kune sekalak jelma ikut tes untuk masuk sada instansi sipemena lit bas pikirenna eme uga nge carana gelah banci lulus tes, adi jadi anggota dewan atena sada ngenca bas pikirenna eme strategi kai kuban gelah menang, emaka lanai maun-maun ngukurken kalak sideban bahken saling menjatuhken, rsd.

·         Soal sendalanen ras sura-sura Tuhan siilakokenna e lanai bo iakap manusia jadi persoalen sipenting seh kerina sura-surana. Adi sibar uga nge kuban nina denga pas denga, tapi rusuren guna nehken sura-surana e subuk gelah lulus tes, gelah malem pinakit, gelah lit jalan keluarna perbeben siihadapina, lanai sentudu ras sura-sura Tuhan.

·         Hal sienda me siterjadi bas kegeluhen manusia maka megati kel melala hal-hal si la bagi ukurta terjadi bas doni enda dingen lanai bo kita saling memikirken sada ras sidebanna, melainken enggo masing-masing mementingken egona. Umpamana engkai maka melala peredaren narkoba erkiteken kalak si ersura-sura pedas ndatken keuntungen si mbelin janah lanai ngukurken keselamaten manusia, engkai maka melala begal erkiteken keinginan manusia untuk ndatken sen alu cara la latih erdahin tapi merampok, engkai maka terjadi bom bunuh diri, penyerangen-penyerangen rumah ibadah erkiteken sekelompok jelma si berusaha nehken sura-surana dungna lanai ranakenna dampakna pengajarenna si la mehuli e nandangi siiajarina ras nandangi kalak sideban. Emaka ibasPA Mamre ta enda iajari kita uga dage carana gelah banci kita kerina Mamre nggeluh i tengah-tengah doni sidem keguluten enda tetap erprinsip tetap mempunyai jati diri)

II.                MPEBAGESI PENGANGKAAN KERNA TEKS

·         Pengogenta enda nuriken kerna telu bagin emeituriken Josua kerina kerina si enggo ilakoken Tuhan man bangsa Israel (Yos 24:2-13), sipeduaken eme bangsa Israel si pulung milih Tuhan sebage Dibatana ras nolak dewa-dewa bangsa sideban (Yos 24:14-24), sipeteluken eme  perjanjian si enggo itetapken ras syarat-syarat  (hukum) si enggo itulisken (Yos 24:25-28).

·         Ibas perikop enda pe ituriken hasil perjumpaan secara langsung antara Yosua ras pemimpin-pemimpin Israel. Ija ilebuh Yosua kerina bangsa e ku Sikhem negasken ulang sekali nari perpadanen sebage landasen hubungen bangsa e ras Dibata. Enggo sekitar 20 tahun ibentasi masa penduduken ras pemukimen i Kanaan.  Yosua mindo gelah setiap suku mengikrarken mulihi kesetiaan bangsa e man Dibata sue ras siipadanken labo i Silo tapi i Sikhem erkiteken i Sikhem lit ije sada ingan si Badia kuno bangsa Ibrani ( 24:26). Sebab i Sikhem me sipemenna kel Dibata erpadan mereken taneh Kanaan man Abram, janah ije ka me ibahan Abram mezbah sipemena i negeri e (Kej. 12:6, 7).Ijenda ka me Yakub enggo majekken sada mezbah (Kej. 33:20) ras ngajuk keluargana menterken kerina gana-ganana (Kej. 35:1-4).

·         Yousa sadar maka umurna lanai ndekah i doni enda. Hal sipentingna kel man Yosua sope lenga ia mate eme mpeseh man bangsa Israel eme bangsa e harus muat keputusen si tepat guna kinulkin bangsa e ras guna masa depanna kerina (19, 20), eme setia man Dibata si setia, Badia ras si mecimberu (22- 24).

·         Tek man Dibata ras setia ersembah man Dibata eme sada hal sipenting menuurt Yosua. Setia man Dibata eme penentu keberlangsungen nggeluh kalak sierkiniteken. Yosua ngangka ras nggejapken kel kondisi bangsa Israel si lemah ibas hal kesetiaanna man Dibata. Janah kinilapatuhen bangsa e man Dibata eme kehancuren bangsa e sendiri (19-21).

·         Kepekaan ras kekuatiren Yosua kerna bangsa e mabai Yosua muat langkah-langkah kebangunan iman bangsa e . Ksetiaan ras ketetapen ukur bangsa e milih setia ersembah man Dibata (16-18), arus iwujudken aturenna ibas perbahanen ras ketetapen menterken kerina gana-gana si lit bas bangsa e (22-25). Keputusen e arus bersifat pengajaren ras latihan gelah mengikat terus ibas paksa-paksa si reh pe. Yosua muat sada batu galang sebage lambang siitamana iteruh batang kayu galang sebage lambang ingan si Badia Dibata (26-27).

 III.             PENGKENAINA

·         Temata eme MAMRE SI ERPRINSIP (MAMRE SI PAGUH PUNYA JATI DIRI).  Ibas Kamus Besar Bahasa Indonesia Prinsip ertina asas (kebenaran yang menjadi pokok dasar berpikir, bertindak, dan sebagainya); dasar.Berprinsip berarti memiliki dasar kebenaran untuk berfikir dan bertindak. Alu kata sideban Mamre harusna kai pe siilakokenna harus ia nulih kubas kebenaren Dibata. Apakah siilakokenna e enggo sendalanen ras sura-sura Tuhan entah lang.

·         Prinsip siuga siarus lit bas sekalak Mamre? Adi Yosua ndai enggo jelas bas ia maka aminna gia sekelewetna e nggeluh la bagi singena ate Tuhan, tapi selaku bapa ras selaku perbulangen ia tetap mabai isis jabuna nggeluh setia man Dibata (bnd. Yosua 24:15). Tentu adi ikataken Mamre si erpsinsip bagi Yosua enda, tentyuna kita katawari paksa pe berusaha gelah isi jabuta subuk ndehara bagepe anak-anakta ras kerina seisi jabuta sibabai rusur nggeluh setia man Dibata.

·         Tentu gelah ngasup kita mabai isi jabuta nggeluh setia man Dibata, kita lebe selaku bapa eme Imam ibas jabu harus nggeluh bagi singen ate Tuhan. Selaku bapa sierkiniteken tadingkenlah dosa silangena ate Dibata  eme sitersurat ibas Kolose 3:5-8 eme: Erlua-lua, Erlagu la mehuli, Peraten daging, Sura-sura sijahat, Bagepe rangap sebab rangap eme nembah man berhala, Merawa, Ngamuk, Segat ate, Cekurak, Melasken cakap melket. Janah selaku Mamre si paguh erkiniteken man Dibata arus lit bas Kita kai siikataken ibas Kolose 3:12-14, Paken ate perkuah, Mehuli, Rukur meteruk, Lemah lembut, Saber, Ola pergelut, Nggit sialem-alemen salah adi kitik ukurta ibahan kalak, Sikeleng-kelengenlah sada ras sidebanna. Ula kari sempat, ketutusenta ku gereja, ertoto ras ngoge Kata Dibata sia-sia kerina erkiteken kerehenta ku gereja, PA-PA, labo erkiteken kinitekenta man Tuhan tapi hanya terjeng rutinitas saja. Gelah ngasup kita ngelakokenca siteladanilah kai siilakoken Yosua eme, La ia lupa ngoge Kata Dibata suari ras berngi janah erbahansa Yosua nggeluh sue ras Kata Dibata janah sie me erbahansa ia sangap janah seh kerina sura-surana (bnd. Yosua 1:8).

·         Yosua ngasup mpertahanken spiritualitasna er Dibata. Kata Spiritualitas eme terjemahen ibas kata”Spirituality” (Inggris) nari,rehna ibas kata ”Spirit” (Inggris) : ”Roh”, ”Jiwa”, ”Semangat”, ”Penggerak”.Ercakap kita kerna ”Spiritualitas” ertina : Kegeluhen ”Spiritual” (Rohani, batin, keagamaan) kalak Kristen ibas kerina dampar kegeluhen siteptep wari ibas kesadaren maka ia nembah ras Dibata ibas Jesus Kristus, alu tading ibas Kesah Sibadia.

·         Arah bahan PA Mamre ta enda iajuk kita gelah kai pe siterjadi la silakoken perbahanen-perbahanen si langena ate Dibata. Sebabkerina usaha-usaha si bahan manusia guna nehken sura-surana adi la sendalanen ras sura-sura Dibata tentu la banci lang kedungenna maba persoalen bas geluhta enda. Emaka sigejapken ras teklah maka alu cara Dibata ngenca banci maba kemalemen ate bas geluhta enda. Ola andalken gegeh-gegeh doni enda guna nehken sura-surata alu bage malem ateta nggeluh adi lang desken api si gurlah me Dibata janah meseng me kerina kalak si ngandalken gegeh doni enda bagi bangsa Israel si ngelawan Tuhan kematen jadi sikerajangenna. Seh dungna bage teremna bangsa Israel bengket ku taneh Kanaan 2 kalak  ngenca seh eme. Yosua ras Kaleb. Amin

 Pdt Jaya Abadi Tarigan 

Rg Bandung Pusat