Suplemen Mamre Tgl 26 Feb - 04 Maret 2017, Ogen Roma 1 : 16-17
PA MAMRE TGL 26 FEB - 04 MARET 2017
NATS : Roma 1 : 16-17
Tema : Nggeluh ibas kinitiken
Tujun : Gelah Mare megenggeng erkiniteken man Dibata ibas kerina dampar geluhna
1. Kalak si enggo ngaloken Berita simeriah, eme kalak si enggo itandaina Tuhan Yesus, janah enggo ibahanna jadi penalemen geluhna idoni enda sidem keguluten enda. Janah kalak si enggo jadikenna Yesus jaminen geluh maka enggo tetap ukurna nggeluh erpalasken kiniteken man Yesus e. Memang payo, sebab nina ibas Yohanes 3 : 16, Kalak sitek man Yesus maka ngaloken kegeluhen si la erkeri-kerin Emaka tading kuga kita nggeluhen geluhta enda, tergantung kubas kiniteken sitetap (la mobah) aminna gia kai pe sijadi tetap paguh. Nggeluh ibas kiniteken ras nggeluh la bas kiniteken, si dua enda megati silih berganti ibas kegeluhen enda, kita lanai mbiar sebab enggo si eteh arah kita tek nandangi Tuhan Yesus maka kita i pegegehiNa.
Emaka man banta Mamre harus kerina nggeluh tetap ibas kiniteken, sebab doni enda tetap ngerintak kita gelah kita ndabuh kubas dosa .
2. Surat Paulus ku perpulungen Roma ngingetken man banta Mamre alu judul kuasa berita si mehuli : emaka iawalina : la aku mela kerna berita simehuli e, sebab lakap sitik jelma enggo keristen tapi la ia pang terang- terangen ngatakenca maka ia pengikut Kristus, mela tempa ia . Emaka kita mamre lanai perlu mela-mela , sebab berita e kuasa Dibata. Gelah enggo si eteh maka kita banci bagenda eme erkiteken kuasa Dibata, labo lit gegehta sibanci siandalken. Sebab arah keleng atena kita, enggo iselamatken emaka kalak si enggo selamatken maka lanai ia ragu-ragu ndalani kegeluhen enda.
Eme kerehen Yesus ku doni enda, tentuna guna kalak jahudi, emaka man kalak sideban. Enda maka payo maka Yesus reh kudoni enda eme ku tengah-tengah kalak Jahudi , tapi arah kerehen kesah Sibadia maka berita e enggo seh ku belang belang doni enda, emaka aminna gia man kalak Jahudi lebe Yesus reh, tapi berita kerna Yesus enggo mbar , emaka kita pe enggo ngaloken berita si mehuli ndai. Emaka nina Paulus maka arah berita simehuli e me maka enggo tangkas uga Dibata ngerembakken kita manusia kempak diniNa. Alu enda dage maka Dibata nge reh ndahi kita, seh maka kita kerina ermalem ate.
Emaka kegeluhenta kedungenna ibenaken ibas kiniteke janah iakhiri ibas kiniten. Ngingetken kita, sekali ngikut Kristus sampai mati tetap Kristus , aminna kai pe guia jadi ibas kegeluhen enda. Kiniteken labanci kompromi, kiniteken labanci tawar menawar tapi harga mati. Yesus la atenna i guro-guroken .
3. Mamre eme sumber pemberi inspirasi bas jabu, ia me mabai anak jabuna gelah tetap nggeluh ibas Tuhan Yesus, sebab ise nirangken keleng ate Yesus maka bene me ia, tapi ise sitetap nggeluh ibas Yesus maka nggeluh me ia (ayat 17b), ertina kegeluhen doni enda pe jadi milikna kegeluhen surga nari, kita erdahin guna kinirajan surga janah kita pe pagi mulihka ku kinirajan surga. Guna sienda kerina maka man Mare harus menggeng erkiniteken man Dibata ibas kerina dampar geluhna.
Adi siperdiaten para penginjil, baik i Tapanuli, bagepe i Karo, muali zaman sending seh ngayak gundari maka kinigengenna erbahannca keberhasilen si luar biasa, erbahanca pertumbuhen gereja semakin pesat, emaka gundari GBKP enggo seh ku belang-belang Indonesia enda.
Selamat Er PA Mamre
Pdt Andarias Brahmana.
