Suplemen PA Mamre tanggal 21-27 Februari 2016, Ogen Mazmur 139:7-12
1. Nembah entah pe ersembah man Dibata merupakan sada hal si la banci la ilakoken kalak si erkiniteken man Ia. Sebab nembah/ersembah eme ngadap dingen sujud i lebe-lebe Ia simada kuasa surge ras doni. Janah ia me sinepa kerina sinasa lit bas doni enda termasuk dirinta enda. Kerinana bekas tinepana, la lit kai pe si jadi bas kegeluhen enda tanpa campur tangan Dibata si sembah kita e. Emaka kita manusia enda khususna si enggo tek man baNa la banci lang nembah Ia. Tiada hidup tanpa campur tanganNya.
2. Pemazmur ngakui maka kepeken ijapa pe kita iteh Dibata, janah Dibata meteh kai pe sidahiken kita, alu e maka Dibata e ijapape Ia lit, kerina tempat ras ruang kerina ikuasaiNa.
Emaka adi si ukuri mbages-mbages lanai lit dalanta nilah ibas Dibata nari. Sebab ijapa pe Ia lit. Sibuniken pe dirinta lalap ia je. Hal enda mengingatken kita gelah ula kita ndalanken sijahat, tapi ibas kerina ingan, waktu harus tetap ngelakoken si mehuli, ngelakoken bagi si ngena ateNa. Sebab idahNa kita kerina gerak-gerik geluhta enda. Cuba si pergermetken, nangkih ku deleng, medem i doni kematen, kabang kempak matawari pultak, matawari ben, ije pe enggo lit Dibata, tah pe i keleweti gelap, aminna pe terang jadi gelap ije pe Dibata lit.
Alu bage dage maka kita tetap berposisi ibadah; bagi kuan-kuan si lit : semua hidup dan kehidupan, pekerjaan dan perbuatan adalah ibadah.
3. Ibas hukum si pe I, ola sembahndu dibata-dibata si deban selain aku Dibata. Dibatanta eme Dibata si man sembahen, Dibata si man pujin, Dibata si harus ipermuliaken. Kalak si tek man Dibata maka ia me kalak si setia nembah/ersembah man Dibata. Kalak si ersembah man Dibata eme kalak si la nggit ndalanken si jahat/ si la payo akap Dibata, sebab igejapna maka Dibata e ijapa pe Ia lit. emaka setiap kai pe ibahanna igejapna maka si e iidah Dibata kerina.
Dibata sini sembah kita si ijapa pe Ia lit, labo seri ras dibata sinisembah nininta nai. Ija nai nininta nembah dibata ijapape, tapi dibata si isembahna la seri ras Dibatanta si isembah kita si gundari arah Yesus Kristus. Sebab dibata nininta nai la banci nampati kalak sideban, tapi Dibatanta si isembah kita arah Kristus e eme Dibata si banci nampati kegeluhen kerina manusia.
Emaka marilah kita Mamre nembah Dibata/tadingken kerina si la mehuli, misalna : judi, mabuk, dunia hitam ras narkoba, pergaulan bebas. Sembahlah Dibata arah kerina perbahanenndu maka ipasu-pasuna kita mamre. Ula bunikenndu perbahanenndu si la mehuli, Dibata tetap ngidah ras meteh kai si ibahanndu. Emaka segedang-gedang geluh pujilah si man sembahen e.
Pdt. A. Brahmana
081317054961
