Suplemen PA Mamre tanggal 18-24 Oktober 2015, Ogen Kejadian 12:8 ; Matius 6:1-4
Tema : Ersembah alu payo
1. Ersembah eme reh ndahi siakapna lebih meganjang asangken ia, ras gejapkenna maka sinisembahna banci akapna nampati ia, bagepe banci akapna mereken jalan keluar adi kune lit permasalahenna. Emaka nai pe ope lenga kita ku BSM, maka kalak karo enggo rusur ia ersembah, ras pe melala bentuk-bentuk inganna ersembah. Sebab iakapna banci arah ia ersembah e banci lit jalan keluar. Radu rasi ia ersembah maka ibabana ka nge siakapna mehuli man persembahenken. Tapi sienda kerina labo kepeken ndungi malahen reh rumitna masalahna, sebab kami pe nai sangana kitik denga rusurkel ibaba orang tua ersembah, radu ras maba cabal-cibalen. Ternyata kai si ilakoken kami e aneh kel kuakap aminna gia lenga bo aku ku gereja. Apai ka kenca enggo ku gereja maka kerina si e enggo kuakap si sea-sea.
2. Kita sebagai kalak Kristen pe lit ikataken ersembah, eme ersemah man Dibata simada kuasa, sebab sigejapken maka Ia simada kuasa sinjadiken kerina sinasa lit enda, sembahlah AKU, sebab AKU kap Tuhan Dibatandu (Kel. 20:4-5). Berarti Dibata pe menegasken man Israel gelah nembah Dibata, sebab Dibata nge si mulahi ia ibas taneh perbudaken nari dingen mabai ku taneh perpadanen (kanaan). Janah sienda kerina labo lit bekas beluh ras gegeh umat, tapi kerina eme gegeh Dibata e sendiri si mbebasken bangsaNa.
Ersembah man Dibata enda situhuna enggo imulai jaman Kain ras Abil (Kej.4:3-4). Bagepe jaman Nuh ras keluargana, ia pe nembah man Dibata. Kenca ia selamat ibas banjir simbelin maka ipersembahkenna persembahen dingen ia pe ersembah (Kej.8:20).
Arah enda siidah maka kalak si ersembah man Dibata iakuna maka kai pe labo banci ibahanna adi la kin Dibata simasu-masu ia. Emaka guna balasen man perbahanen Dibata manusa ersembah man Dibata.
3. Ersembah alu payo eme themanta minggu enda. Kuga kin kalak ersembah alu payo??...
Siidah Abram sebagai teladan man banta. Eme : kenca itadingkenna negeri ras keluargana, maka she ia I kelang-kelang Betel ras Ai, emaka ije me ia tading. Kenca enggo ipajekkenna kemahna maka ibahanna batar-batar ingan ersembah/persembahen, janah isembahna Tuhan.
Luar biasa, kuja saja ia miser/tading maka la ia lupa nembah Tuhan Dibata si nuruh ia nadingken kutana. Igejapkenna maka pilihen Dibata nandangi ia labo asal-asalen saja tapi eme pilihen si khusus gelah erguna man jelma sinterem. Sebab igejapken Abram, guna nehken kai si enggo ipadanken Dibata harus iwujudken, tapi kuncina eme arah nembah atau ersembah man Dibata. Kai si enggo ilakoken Abram enda merupaken sada hal si harus ka silakoken ibas segedang-gedang geluhta enda. Sebab sigejapken maka Dibata sebagai pencipta, simasu-masu rasp e sitetap nemani kegeluhenta segedang-gedang wari. Sebab labo kita ngasup erbahan kai pe adi la kin Dibata simasu-masusa. Abram membanggaken katerpanggilenna arah ia mpermuliaken Dibata arah majekken batar-batar dingen ersembah/nembah.
4. Ibas kita ersembah man Dibata labo kepeken dirinta ngenda, tapi pe kai si lit bias kita harus pe ikut sipersembahken man Dibata arah : nehken pengataken bujur, atah kolekte, bagepe adangen-adangen sidebanna ku rumah Tuhan. Janah sigejap kai si lit ibas kita e, eme kerina pemere Dibata arah pasu-pasuNa pendahinta, usahanta. Bagepe mere man kalak sideban/nampati, tapi adi nampati kita labo perlu penampatta e sigejek-gejekken, bagepe si kata-kataken man jelma sinterem bagi kalak Parisi. Adi bage perbahanennta maka kita kalak pekulah-kulah, janah hanya cari nama labo erdasarken ukur erkusur ras meriah. Sebab megati denga bas kita kalak karo, sibelas-belasken penampatta man jelma sideban : adi la kin erkiteken aku bapa si anuah labo kai pe banci banna. Aku nai nekolahken ia/anakna, enggo melala aku keri guna nampati anak ah, tapi labo kuidah mehamat ia man bangku, la kin tandaina bana…. . si enda me megati terbelas bas babahta nari. Labo si eteh maka kai si lit ibas kita rehna ibas Dibata nari. Ma patut nge kita ngataken bujur, sebab sad ape labo lit bekas gegehta guna ndatkenca, tapi arah pemasu-masun Dibata simaler man banta kerina.
Kai siniibahan kita bas kegeluhennta enda maka kerina enggo iteh Dibatanta, emaka Dibata ersemulih man banta kerina si erbahan si mehuli arah nehken penampat man kalak sideban. Emaka mari radu ras kita kerina ersembah man Dibata arah kehadirenta ku kegiaten-kegiaten gerejanta, bagepe rikut ras buaten lit pe harus ka nge sipersembahken man Dibata.
Pdt. A. Brahmaha
081317054961.
