Suplemen Bimbingen PA Mamre Tgl.19-25 April 2015, Ogen Kuan kuan 19:23-24
Ogen : Kuan kuan 19:23-24
Thema : Mejingkat tanda malang man Dibata
Tujuan : Gelah Mamre meteh maka biak mejingkat eme biak si ngena ate Dibata. Gelah jadi Mamre si mejingkat, ula santai
Dibata enggo ngukum manusia alu ngataken: terpaksa latih iakapdu erdahin ngusahaisa kidekah geluhdu, gelah banci iberekendu cukup nakandu. Terpaksa i gegehindu erdahin alu cur-cur panasndu, gelah taneh enda banci mereken ulihna man bandu seh mulih kam kutaneh (Kej 3 : 17 -19). Bagenda me kepeken Dibata nai enggo netapken man manusia maka, man manusia lalit budaya santai tahpe malas, sebab adina santai tahpe malas maka labanci ndatken kebutuhen kegeluhenna. Bagepe Rasul Paulus ngataken man umat adi la erdahin ula bere man. Ia nange man banta kalak karo, budaya kerja keras pe merupaken sila banci lang, emaka lit istilahta maka merih manuk ni asuh mbuah page nisuan. Hal enda banci terpenuhi arah erdahin erbintuas suari ras berngi. Ise sila erdahin pasti ketadingen geluhna. Emka kalak karo eme kalak si gigih kal erdahin nai nari seh asa gundari sebab mbiar kal ia la man. Lit rusur kubegi nina bapa “Pangan labo man kurangen, dahin pe gegehi”. Mela adi la terbuat nakan pangan. Arah budaya kekeristenan pe bagepe arah budayanta ngajarken man banta ayo kerja, ayo kerja keras membangun masa depan si lebih baik. Termasuk pe pemerintahta si gundari mengajak rakyat indonesia ayo kerja, kerja dan kerja lagi.
Kitab kuan-kuanen eme melala i tulisken Raja Salomo, anak Raja Daud. Ia i juluki Raja berhikmat, erkemalangen man Dibata, emaka ope denga ia ndalanken tugasna sebagai Raja I Isarel pindona hikmat man Dibata, gelah ngasup minpin bangsa si mbelin eme umat Israel. Arah teksta enda lit piga-piga hikmat sini ajarkenna eme: a. Patuhlah man Tuhan maka cawir kam metua. b. Puasme iakepdu dingen la kam kena cilaka. c. Kalak malas namaken nakan ku babahna pe la diatena. Undang-undang (hukum kasih) eme ngkelengi Dibata, eme arah ngikutken pedahna dingen ndalankenca ibas kegeluhenna, eme kalak si rajin baca Firman, rajin ertoto, rende ras rajin eribadah bagi siniaturken gereja. Janah adi kalak sibage me kalak si mediate nandangi temanna manusia (melayani sesama) ras Dibata penegasken man Josua, maka patuh man perintah Tuhan, bagepe Mazmur pasal 1 ngataken ngerenungken/ngukuri kata Dibata suari ras berngi bagepe Josua Aku ras anak jabungku Dibata ngenca ku sembah (Yosua ps 1, ps 24 ras Maz ps 1). Janah kalak sipatuh man kata Dibata maka Dibata ngampang-ngampangi kegeluhenna, sebab i gerejana ras i lakokenna kaipe i hadirkenna Dibata. Emaka ibas kaipe jadi puas akapna sebab Dibata hadir akapna ibasi guapana pe. Kepeken Raja Salomo pe lakapna pas rakyatna nggeluh ibas kemalasen, tapi harus nggeluh ibas kerja keras. Anehkal siakap adina lit siidah bagi kuan-kuanen ndai, namaken nakan kubabahna pe la diatenna, apakai adi isuruh erdahin kujuma. Man kalak si bage maka bene me ia ibahan ke malasenna e.
Man banta mamre ija themata ndai ngingetken maka: mejingkat tanda malang man Dibata. Kalak si malang man Dibata labo ngenca rajin ertoto, rajin baca Firman, rajin ibadah, tapi pe harus nge icidahken arah ia rajinka ndahiken dahin si enggo si bereken Dibata man bana, baik si erjuma, erdahin i kantor, erbinaga, sopir, bagepe dahin erkedei kopi tah buka rumah makan maka kerina harus modal mejingkat. Cubaken si perdiateken perik-perik erpagi-pagi si lampas medak ia, lenga medak matawari rende ia , emaka enggo kari teridah matawari kabang ia ndarami nakan, emaka taruh kenna nakan na man anakna si lit iasar, emaka ben mulih ia, tapi rende ka ia lebei emaka medem matawari medem ka ia. Eme gambaren kalak mejingkat. Emaka bas jamanta enda maka lanai lit inganta kalak si malas-malas, sebab adi malas-malas kita pasti i tadingken teman: teman enggo tinggal landas, kita tinggal di landasan e lalap. Emaka ula bagi kuan-kuan kuta kalak “Adi man ningen kurang piring, tapi adi erdahin ningen iba patuk” enda gambaren pemalas, tapi gambaren kalak mejingkat, kurang rusur siman cameten juma e, lengape ben wari dahin enggo kelar. Kuakap si pakat nge kita ngataken kepada dunia, hai dunia lihat saya kerja keras, saya memenuhi perintah Tuhan ku, saya tolak semua kemasalan. Adi bage maka kaipe sidadap i pasu-pasu Dibata, emaka hasil ras berhasil sini dahiken kita e. Situhuna kepuasan hidup eme adi dung dahin menikmati hasil dahin ras berbagi buat sesama hasil dahin. Kalak si bage me kalak si tetap bersyukur dan bersyukur nandangi Tuhan Dibata.
Salam Pdt A. Brahmana S.Th (0813 17054961).
