Suplemen PA Mamre Tanggal 29 Maret - 04 April 2015, Ogen Matius 13:14-16

Ogen      : Matius 13 : 14-16

Thema    : Mata Si Erpengidah, Cuping Si Erpemegi
Tujuan    :

1. Mamre meteh erti mata si erpengidah, cuping si erpemegi
2. Gelah Mamre lanai mesera man katanken ibas kai-kai pe

(1) Bas daging kulanta enda lit 3 mata: mata nahe, mata kepala, mata hati. Hal enda rusur sibegi belasken kalak, memang payo nge, emaka kaikin fungsina sibanci sidata:

1. Mata Kaki: Eme melambangkan gegeh sebab sumber kekuatan eme bas bahe. Ibas kegeluhenna rusur kal ngandalken gegeh si lit bas ia, emaka gagal.
2. Mata kepala: Eme melambangkan kini jilen, keindahan, emaka ayakina rusur si mejile bas doni enda, piah dungana erpalasken kini jilen doni ndai ndabuh ia.
3. Mata Hati: Sienda melambangkan kejujuren, emaka lit kuan-kuan mata melihat hati berbicara. Kata hati lapernah erbahan salah tetap simehuli idahna ras perintahkenna.

Emaka arah teluna mata enda nda, mata siapai nge sirusur kal siandalken: kini jilen gegeh tah kejujuren alu kata hati.

(2) Emaka nina kata Dibata ndai lit matana tapi la erpengidah, lit cuping na la erpemegi. Cuping pungsena erpemegi, tentuna megiken kai si mehuli, ras kai si membangun masa depan kegeluhen erkiniteken. Emaka kai si ibegiken maka enge si turiken man kalak  maka kai sibegi kita simehuli e, kalak pe banci jadi mehuli. Emaka lit kuan-kuan: lain pemegi lain ibelasken piah dungna radu bene baik sinuriken bagepe si megiken. Emaka nina nda: cuping na memang erpemegi tapi lalit sitikpe iangkaina kai sibegina, bagepe i pernehen tapi la idah, engkai...? erkiteken enggo batu-batun ukurna kerina emaka tertutup cuping kini teken ras pe petang mata kini tekenna. Kalak sibagenda me sini rusur ikataken “mesera kal man katanken”, bebal banyak omong tapi nol.  Situhu pengajaren Yesus sehkai mudahna ngantusisa, tapi megati sulit kal iakap kalak, erkiteken kal....? erkiteken perdalanen kegeluhen anak-anak Tuhan e labagi kai sini ajarken Yesus man bana.

(3) Kita sehkal sangapna erkiteken kita enggo megi ras ngidah kuasa ras kemulian Yesus ibas doni enda, bahkan ngaku nge kita kerina sijadi enda bekas pemere Dibata, Ia masu-masu geluh ras dahinta. Erpalasken kaisini ibahan Dibata bas kegeluhenta enda me maka gundari mata kiniteken erpengidah tangkas, bagepe cuping kiniteken ta erpemegi alu tangkas, eme  kerna kuasa ras kemulianNa nandangi kita. Kai sijadi man banta gundari enda, sadar kita maka e erkiteken kini tutusenta ngidah ras megi kuasa ras kata Tuhan setiap saat: baginini Job”Kaikin nai kubaba reh kudoni enda, janah kai ka kin pagi kubaba nadingken doni enda, Ia simerekenca, Ia ka simuatsa, terpujilah Dibata (Job 1:21). Kita gia kaikin mberenda sibaba ku jawa enda, mungkin buen nge kita mamre modal nekat merobah hidup: labo sibabab modal duit melala, lit nge nai kita ku jakarta pe bangku tempel bas bus, tah naik kapal kayu. Tapi erkiteken kita megi kata Tuhan, bagepe rusur siidah simehuli bas anak-anak Tuhan, emaka i pasu-pasu Tuhan dahinta. Emaka gundari setidak-tidak na enggo me buen mamre lit ingannatading, adih mulih ku medan enggo me naik kapal terbang, sebab enggo lit bereken Dibata rejeki. Ndehara si melias, metami, mejile ukur ras perbahanenna,enggo tubuh anak dilaki tah diberu, bagepe lit dahin, lit ka usaha. Adina kuta nai megati deba man pe teragis. Puji Tuhan mata nta enggo sipake ngenin kiniulin Tuhan, cupingta sipake megiken kata Dibata, emaka lanai kita ngandalken gegeh ras kinijilen doni, tapi mata melihat hati berbicara, cuping mendengar hati berbicara, emaka simehuli lalap lit bas kita.

(3) Man banta mamre, lit seloganta “Mamre erdiate, mamre erpemere”, emaka arah mata kita mediate nandangi masa depannta, arah erpemegi erdiate kita nandangi masa depanta. Emaka arah enda kita lanai mesera man katan ken. Setia nandangi Dibata, setia nandangi keluarga (ndehara, anak), setia nandangi dahin/masa depan, setia nandangi temanta. Lanai kita mesera man katanken sebab kita enggo ngasup ngaturken kegeluhenta ku simehuli.  “Ngajari kita man kalak silabeluh e ras ngguru kita man sibeluh” Gelah radu ras beluh kita kerina, adi radu beluh kita ma lanai mesera man kataken.

Salam
Selamat ngikuti ibadah Jumat Agung ras Paskah 2015
Pdt A. Brahmana S.Th (0813 17054961).