SUPLEMEN PA MAMRE: MASMUR 145:1-12; 12-18 JUNI 2022
Tema : ERMOMO KERNA KEMULIAN TUHAN IBAS TINEPANA
Teks : Masmur 145:1-12
Tujun : Gelah Mamre :
1. Meteh maka Tuhan tuhu-tuhu mehuli nandangi kerina tinepaNa.
2. Ndaftarken perbahanen-perbahanen kerna kemulian Dibata ibas kerina tinepaNa ras erbahan kampanye arah spanduk ras media sosial
Metode : Diskusi
KATA PENARUH
Dibata enggo nepa doni enda ras kerina isina alu tuhu-tuhu mehuli (bd.Kejadin 1). Arah kerina tinepa si enggo itepaNa e, teridah kuga mbelinna kuasa Dibata bagepe kemulianNa. Erkiteken si e, mabai kita manusia muji IA ibas kegeluhenta sitep-tep wari. Tapi, kuga nge ndia gundari keadan doni si enggo itepa Dibata alu tuhu-tuhu mehuli e ? Reh ulina nge ndia ? Entah ercedana nge ndia ? Ise nge ndia si erbahanca tinepa Dibata e reh ceda ? Kai nge ndia si arus si lakoken segelahna reh ulina ? Bahan PA Mamre ibas minggu enda, ngajuk kita kerina Ermomo Kerna Kemulian Tuhan Ibas TinepaNa. Mari radu ras kita niksiki Masmur 145:1-12 si njemba kita guna erbahan aksi segelahna tema PA Mamre enda banci tersehi.
PEMBAHASAN NATS
Masmur 145 enda emekap masmur si nuriken kerna kuga Daud nandai IDbata si isembahna, emekap masmur ende-endden pujin man Dibata si perkeleng bagepe perkuah man kerina tinepaNa. Lit 3 hal si isehken Masmur 145:1-12, emekap :
1. Muji Tuhan (ay.1-3)
Pemasmur Daud nehken ende-enden pujin pengataken bujurna man Dibata. Itandai pemasmur kel Dibata e ibas kegeluhenna. Emaka nina O Dibatangku, o Rajangku, kuberitaken ateku kerna kemulianNdu si mbelin. Asa lalap seh rasa lalap ateku ngataken bujur man baNdu. Bagem pemasmur nehken pujinna tep-tep wari man Dibata. Reh bagesna penandaita kerna Dibata mabai kita ersetiana nehken pujin man baNa. La terjeng ibas kita nggejapken kiniulin, tapi ibas kiniseran pe mabai kita muji Tuhan.
2. Ermomo Kerna Perbahanen Tuhan Si Mbelin (ay.4-9)
Perbahanen Tuhan si mbelin enggo igejapken pemasmur ibas kegeluhenna, erkiteken si e, imomokenna man jelma si enterem kerna kuasa dingen kemulian DIbata e. Subuk ibas kesusahen geluh bagepe ibas keriahen, Dibata tetap nehken kiniulin ibas kegeluhenta. Igejapken pemasmur kel maka Tuhan perkeleng kap dingen perkuah kap, la pedas ia merawa, janah dem keleng ate si tetap. Man isepe IA mehuli, janah keleng ateNa man kerina tinepaNa. Enda encidahken man banta kerna penandai pemasmur nandangi Dibata. Perbahanen Tuhan si mbelin enda me si imomoken pemasmur man enterem jelma, iturikenna dingen iendekenna pe kerna kebujuren Tuhan ibas kegeluhenna. Ibas pemasmur ermomo kerna kemulian Tuhan, tentu enda ibegiken jelma si enterem. Mabai kalak si deban pe meteh kerna perbahanen Tuhan si mbelin e, dingen mpermuliaken Tuhan ibas kegeluhenna sitep-tep warina.
3. Kerina Tinepa Muji Tuhan (ay. 10-12)
Penandai si mbages kerna Dibata bagepe nggejapken uga kelengNa ate Tuhan ibas kegeluhen pemasmur, erbahannca ia la ngasup la nuriken kerna kemulian Dibata man jelma si enterem. Labo pemasmur ngenca ersaksi kerna kemulian Tuhan, tapi kerina tinepa Dibata muji Dibata bagepe kerna bangsa-bangsa nehken pujin bagepe mpermuliaken Dibata. Alu bage kerina kalak meteh kerna perbahanen Tuhan si mbelin bagepe kemulian kinirajanNa si erdolat.
PENGKENAINA
Ibas kinata kegeluhenta paksa genduari enda, erbage-bage peristiwa si terjadi isekelewetta erkiteken tinepa Dibata si enggo ceda. Misalna : banjir, longsor, suhu udara yang meningkat, pencemaran udara, pencemaran air, pencemaran tanah, kerusakan hutan, pemanasan global, ras sidebanna. Ise nge ndia si erbahanca si enda kerina terjadi ? Tentu saja si enda kerina erkiteken perbahanennta manusia. Doni si enggo itepa Dibata alu tuhu-tuhu mehuli ndai, enggo reh cedana. Kemulian Dibata si teridah arah kerina si enggo itepana ndube enggo ceda. Perbahanen manusia nge si enggo erbahanca tinepa e ceda. Erkiteken si e, kai nge banci silakoken ? Bagi pemasmur si ngasup ngidah kemulian Dibata ibas kerina tinepaNa e, enda ngajuk kita tuhu-tuhu segelahna ngasup ngidah maka kemulian Dibata e teridah ibas kerina tinepana. Kesadaren sibagenda rupana, mabai kita lanai sembarangen, lanai encedai doni enda.
Ermomo kerna kemulian Tuhan ibas tinepaNa, enda labo terjeng cakap saja. Tapi arus maka lit trasformasi ibas pola pikir, pola sikap bagepe pola tindaken. Tentu enda jadi sada bentuk revolusi cara nggeluh bagepe karakter pribadi si lebih bersahabat nandangi kerina tinepa Dibata enda. Sikap jera encedai doni enda banci silakoken arah erbage-bage hal : kita jadi manusia si ber-spiritualitas ekologis emekap sekalak si tetap komitmen nggeluh erdame ras kerina tinepa Dibata dingen la encedaisa erkiteken keleng ateta nandangi doni si enggo itepa Dibata alu mehuli, janah kita manusia pe sesama tinepa Dibata ras isi doni enda, kita bersaudara dengan alam semesta ciptaan Tuhan. Tentu enda mabai kita kerina guna tetap njagai kerina tinepa alu mehuli. Nggeluh guna kiniulin doni enda. Kai nari si banci si lakoken sebagai gerakan njagai tinepa Dibata gelah ula reh cedana? Hemat energi listrik dengan mematikan listrik jikalau tidak pergunakan lagi, hemat air dengan mematikan keran air jikalau bak air sudah penuh, jangan membuang sampah sembarangan (sikap mela melket), membersihkan got, make tas belanja si ramah lingkungen, rsd. Kita pe jadi sekalak si terus setia mengkampanyeken geraken peduli lingkungen save earth; mari hijaukan bumi kita; mela melket; ras sidebanna melalui media sosialta. Selamat engkelengi doni enda. Tuhan masu masu. Amin.
Pdt. Crismori Veronika Br Ginting Manik
GBKP Sitelusada
