SUPLEMEN PA MAMRE: 1 Korinti 6:19-20; 20-26 Maret 2022

Kesadaran Mamre Terhadap Diri Sendiri

Teks    : 1 Korinti 6:19-20

Tema  : Muliaken Dibata Arah Kulandu

 

PENDAHULUAN

Manusia eme tinepa si istimewa, si ibereken Dibata akal pikiran guna banci ngukurken simehuli, janah ngasup mbedaken si benar ras si salah. Ibas si enda perlu sisadari pentingna “citra diri”. Citra diri eme uga kita memahami dirinta sendiri. Sebab uga kita memahami dirinta, mbelin kel ngaruhna nentuken uga kita rukur ras uga kita bertindak. Oratenta sendah ngerana kerna uga kita nandai dirinta selaku kalak Kristen, uga kita memaknai dirinta selaku sikerajangen Dibata.

ISI

Ibas bagin ayat enda, Paulus make dua metafora: eme “Rumah Pertoton Kesah Sibadia” ras “enggo itukur”, janah isinggung ka pe kerna pengajaren kerna Kesah Si Badia guna menekanken maka kula kalak Kristen eme guna Dibata sebab kula e Dibata si empuna. Kula e me Rumah Pertoton, kalak Jahudi bagepe si non-Jahudi ibas jaman Paulus ngangkai maka ingan ersembah (temple) eme ingan ija Dibata/dewa tading. Tapi pengajaren Paulus enda ianggap radikal erkiteken ia ngataken maka “temple” e labo sebuah bangunan tapi kula kalak Kristen e nge. Ibas ayat 19, Paulus nerapken kebenaren e ibas kula kalak si tek. Lebih lanjut, ibas padan sindekah melala bagin si ngatakenca maka kehadiren Dibata ibas rumah-Na e sekaligus ncidahken kebadianNa. Contohna, imam si mbelin si enggo iurapi rikut ibadiaken ngenca si banci bengket ku ruang maha kudus ibas wari perdamen (Imamat 16). Emaka, sanga Paulus ngajarken man perpulungen Korinti maka kulana e me Rumah Pertoton Kesah, e ngatakenca maka harus tetap ijaga kebadian kula e alu la ngelaloken pendahin-pendahin si ncedai kebadianna. Lebih lanjut, bage si enggo isinggung perlebe, Paulus nekanken maka kehadiren Kesah Si badia ibas kula kalak si tek eme bukti maka kulana e Dibata si empuna. Ibas ayat 20 nina Paulus “kam enggo tukur Dibata”, kara si ipakena ije eme avgora (membeli) si umum ipake ibas pembelian budak oleh sekalak tuan arah tuan sideban. Ertina kaarya penebusan Kristus membebasken kita, tapi labo bebas dalam arti banci bertindak semaunya. Sebalikna, selaku kalak si enggo itebus maka kita harus ncidahken kepatuhen si total man Dibata si siwujudken ibas kegeluhen si badia. Guna banci taat secara total, kalak Kristen harus rela mulahi hakna erkiteken dirina pe lanai bo sikerajangenna sendiri tapi enggo jadi sikerajangen Dibata

APLIKASI

Selaku kalak kristen si enggo iselamatken Dibata, lit kewajiben si la banci lang harus sidalanken eme njaga kebadian dirinta, segelah alu bage banci sidalanken bage nina tema-nta eme “Muliaken Dibata Arah Kulandu”. Penjagaan dirinta jadi si utama ibas kai-kai pe. Si harus ijaga, pertama-tama eme pusuh (hati), engkai? Erkiteken i je me inganna kerina sura-suranta iaturken. Emaka kendalikenlah e, disiplinken. Sebab pada akhirnya i je me sumber masalahna. Ngadi ngisap e mesera ntah gampang? Gampang! Si mesera kadena? Si mesera eme: sura-sura guna ngadi ngisap.

Sipeduaken si perlu ijaga eme, babah. Engkai maka babah? Kenca ukurta ersura-sura, adi babahta lalap ngatakenca “pasti gagal, la mungkin berhasil. Mesera e, iyah gawat naring”, maka anda 99% akan gagal. Kemauan si enggo lit, la ibere dorongan, malah iperlemah ka.

Pusuh enggo ngatakenca “stop, aku lanai nggit” emaka lit si menawarken “cubaken min yah, labo uga pe”. Bas situasi si bage, kai si ikataken babah e sangat menentukan. Penting kal kai si ibelasken babah e, baik man diri sendiri bagepe man kalak si deban

Sipeteluken eme mata, pusuh enggo ngerana “lang, lanai aku nggit”, babah pe enggo bage nina “lanai”. Tapi mata tetap dengan berkelana ku kawes kemuhen. Bahaya.

Mata e penting erkiteken mata banci mabai kita ku erbage-bage percuban. Emaka realistis kel nge toto si siajarken Tuhan Yesus “Ula min baba kami ku bas percuban”. Kendalikanlah mata anda.

Sura-sura enggo mehuli, kai si ibelasken babah enggo pas, kai si idah ras iperdiateken mata pe enggo si sikap, kerina enggo mehuli. Ibarat mobil, mesin enggo nggeluh, bensin bias, lampu terang, kaca spion enggo pas, emaka enggo banci baba erdalan. Beres? Lenga. Ku ja nge iarahkennndu perdalanna mobil e? enda me si dungna nentuken kerinana. Selaku mamre, kepala keluarga harus sieteh nggeluh badia, hidup lurus. Nggit janah harus nggeluh badia. Seh maka alu bage teridah kita selaku mamre si tutus, si ngasup mpermuliaken Dibata arah kulana. Jagalah dirindu.

 

 

                                                                                                                                                                                 Pdt. Dian Br Sitepu