Suplemen PJJ ; Amos 5 : 4-6 ; tgl 18-24 Februari 2018

Kata Perlebe

Amos nabi singelai Tuhan sekitar tahun 760 SM. Ia kalak Yehuda tapi nehken sora kenabin seh man kerajan Israel Utara. Situasi politik ibas masa Amos siterjadi kalak sierkuasa nggeluh ibas kesenangenna saja, kebijakenna bagi ate-atena. Israel nggeluh ibas perbahanen dosa simesangat; kalak bujur itindih, ngalo duit sisip ia, janah kalak musil iolang-olangina gelah ola idatca kebujuren ibas pengadilen. (5:12). Kalak bujur si la ngasup nggalar utangna idayakenna, janah kalak musil iergaina asa erga sepasang selop ngenca, kalak kote iperjakina, kalak musil sierdalan ibas dalan ijemjemkenna. Anak dilaki ras bapana erlua-lua ras sada budak diberu, ibas rumah Tuhan minem-minem anggur ia (2:6-8). Erkiteken kejahatenna ras pemberontakenna nandangi kebenaren Dibata, maka reh me rawa Dibata simesangat man Israel siisehkenNa arah nabi  Amos. Nina Amos, “Tuhan erdengum i deleng Sion nari; soraNa erlenggur i Jerusalem nari. Sora Tuhan simerawa e erbahanca mbal-mbal jadi kerah, dukut deleng karmel melus kerina”. (1:2). Sora Tuhan e igambarkena bagi sora singa sipaksa merawa erdengum (mengaung) nandangi imbang-imbangna. Kenca singa erdengum ijerngemna me imbang-imbangna e alu rawana simesangat. Bageme ate Tuhan ilakokenNa ision nari nehken pengadilenNa man Israel. Lanai lit dalan Israel nilah, lanai lit ingan Israel cebuni, ibunuh Tuhan me ia erkite-kiteken dosa ras kejahatenna.

Pembahasen

Kata persinget sirehna ibas Dibata nari siisehkken Amos tempa-tempa lanai bo lit ammpunen nari, Israel pasti ndatken hukumen Dibata simesangat. Tapi Dibata e perkeleng kap. Ibas kerina kejahaten manusia kekelengen Dibata labo pernah surut. Belina ras tetapna keleng ate Dibata labo itentuken perbahanen sinembah Ia, tapi Ia kap kekelengen e. E maka ibas keadaan sitemap tempa enggo mendesak, tempa tempa lanai lit dalan pulah man Israel “pengumumen-persinget” siisehken Amos e arusna erbahan Israel sengget ras ertobat, menyadarken dirina kerna situasina paksana erdalan ibas dalan keruntuhen ras maut. Erkiteken si e nina Tuhan arah Amos “Marilah dahi Aku, maka kam nggluh..”. Dahilah Aku ibas bahasa Indonesia “carilah Aku” siertina pindo min pengajaren man bangKu=sungkun Aku, maka kam nggeluh. IbasTuhan lit arapen dalan pulah ibas hukumen kematen nari.

Ibas masa si e kalak Israel sibuk ngelakoken upacara penembahen man Dibata ibas ingan-ingan sibadia (tempat-tempat suci) i Betel rasi Gilgal, tapi siilakokenna labo nembah Dibata, labo ndahi Tuhan tapi nggeluh ibas “gaya hidup badia” (kesalehan sipalsu) situjunna pesenang-senangken bana labo erpenembahen mpermuliaken Dibata. Ciga iakap Tuhan perayan-perayan Israel sihanya pesenangken bana e, si la erdampak mperobahi lagu langkahna ku bas tujun ndalanken simehuli. Nina Tuhan “Mutah Aku ngidahsa” enggo itulak Tuhan persembahen tutungen ras persembahen gandum Israel. Persembahen tutungen e me persembahen pengampunen dosa tapi ciga ate Tuhan sebab la isehken alu pertobaten. Persembahen gandum  e me persembahen ucapen syukur, e pe itulak Tuhan sebab rehna ibas kejahaten nari ras tujunna kemulian bana (kesombongenna) siipertontonken. Enden enden pujin siisehken Israel lanai bengket ku bas pusuhTuhan, tapi enggo gejek iakap Tuhan, sebab singena ate Tuhan la idalanken Israel. Si ipindo Tuhan gelah Israel ngelakoken kebujurun alu erburak-burak desken lau sumbul, desken lau belin si la pernah kerah. Si ipindo Dibata gelah Israel nadingken gana-gana si isembahna. (Bd. 5:18-26), ciga min ate Israel si jahat, janah erngena ate ngelakoken sibenar, ndalanken kebujuren ibas pengadilen, gelah mekuah ateTuhan man bana (5:15).

Gilgal ras betel e ingan sibadia (tempatsuci )tapi labo ingan sibadia e Dibata. Si arus ilakoken Israel adi ersembah dahilah Tuhan jumpai Ia. Ingan—ingan sibadia e la tetap, hanya lokasi janah adi i hancurken Dibata ingan e hancur lesap me kerina raduken ras kalak Israel sisangana ersembah i je. Ibas ayat 6, sekali nari iulihi Amos “Dahilah Tuhan maka kam nggeluh”. Lit denga arapen, lit denga ibere Tuhan sitik waktu sebab adi Israel la reh erpenungkunen man Dibata, maka bagi api sigurlah me Tuhan reh ndahi Israel, nutung keri bangsa e ras ku Betel ngeradasken kerinana ras penduduk kuta e.

Aplikasi

Payo nge e maka Dibata sisembah kita e Dibata sikejam, isehkenNa rawaNa alu mesangat, la kecuali man bangsaNa pilihenNa adi bangsaNa e erbahan dosa ras pemberontaken ? Tuhan e eme Dibata siperkeleng, niNa mpetandaken diriNa ras nehken perentahNa “Aku Tuhan sierdolat, la ukurKu meriah ngidah sekalak perdosa mate. Riahen ukurKu ngidahsa ia ngadi erbahan dosa gelah Ia nggeluh”.ToleniNa ”O Israel, ngadikenlah kejahatenNdu. Engkai maka nggiten kam mate?” (bd. Esekiel 33:11). Tujun Dibata ibas nehken ukumen man kalak siperdosa labo guna menikmatisa, tapi gelahna kalak siperdosa e jera ibas dosa ras kejahatenna nari ras ndalanken kebujuren. Erkitekensi e Tuhan nuruhsuruh-suruhenna mperisingeti, menegor kalak singgeluh ibas dosa gelah jera. Artina Tuhan mereken waktu si bias gelah kalak singgeluh ibas dosa ertobat.

Kalak sinadingken Tuhan, sierpenembahen ku dibata-dibatana sideban maka geluhna ras pengertinna kerna kebenaren labo banci reh ulina. Adi kalak reh dauhna ibas Tuhan nari ras reh deherna kutujun pribadi entah kelompokna maka ibas ngelakoken hal-hal simehuli entah ngelakoken upacara keagaman pe dasar ras tujunna ngelakokenca labo payo, simehuli ras sikap ibadah siilakokenna e ngadi guna kemulian dirina saja, siilakokenna e ipertontonkenna (idemonstrasikenna) demi pengakun ras kesombongen diri. Kerembaken ras Tuhan nge siiperluken manusia sindarami kedamen nggeluh. Kalak siertutus ate erpenungkunen ku Tuhan ibas ia la kurang pemetehna guna ndalanken sibenar, janah ibas ia kata Dibata jadi rambu-rambusi njaga perbahanenna gelah tetap erdalan ibas kebenaren Dibata. Adi bage kerehen wari Tuhan labo jadi kebiaren man bana, labo cilaka entah kegelapen tapi jadi keriahen si itimai penggenapenna.

Pdt. Ekwin Ginting

GBKP Rg. Sitelusada