Suplemen PJJ , tgl 2-8 April 2017, Ogen : 1 Yohanes 2 : 21-25
Suplemen PJJ
Minggu : Tgl 2-8 April 2017
Nats : I Yohanes 2 : 21-25
Thema : Silangdu ku muliaken .
1. Minggu enda merupakan minggu Pasion si pepituken, ija maka kita enggo nandangi seh kubas persiapen -persiapen rangakaian kamis Sibadia , Jumat simbelin, Sabtu pengarapen ras paskah kerina enda eme ngigetken kita kubas penderitaan Yesus bagepe kemenangenNa ibas kuasa kemante nari.
Emaka arah themanta enda mulihken me membaharui semangatta lako ikut muat bagin ibas naksiken Kristus sebagai juru selamatta sienggo memenagken kita ibas kuasa dosa nari.
SilangNdu ku muliaken, silang lamabang kiniseran, kini seran si enggo ibenaken Yesus arah ia nai muka hubungen kembali antara manusia ras Dibata sinjadiken kita.
Emaka Yesus tetap menyemangati kita si itadingkenNa idoni enda gelah kita ikut muat bagin ibas dahin-dahin kesaksian, Persekutuan bagepe pelayanen, hal enda banci tersehi adina kita tetap mpermuliaken Yesus arah geluhta, amina pe erbage bage siman alanken (Penderitaan)
2. Rasul Yohanes iba ia nehken suratna man perpulungen eme :
a. Guna ngiketken maka ibas ndalani kiniteken e maka kepeken lit ka ajaren –ajaren sipapak si atena ngerontasken perpulungen e.
b. Ngajar perpulungen e gelah tetap mpertahanken kiniteken bagepe terus menerus erlajar guna mpebagesi kiniteken.
c. Kalak sitetap nggeluh ibas kiniteken maka ngaloken kegeluhen situhu-tuhu, bagi janji Tuhan man manusia ( Band Yoh 3 : 16)
Arah teluna hal enda me kuga maka banci perpulungen e dewasa ibas Tuhan Yesus. Janah perpulungen e tetap nge paguh bagi nina Yomanes : labo erdandanken la tehndu ketuhun-tuhen, janah itehndu maka Dibata e tuhu dingen ketuhu-tuhu (ayat 21).
Jelas penulis e tehna nge maka jemaat e setia, paguh erkiniteken, tapi lit kebiarena maka banci ka kari terpengaruh arah jelma si enterem, sebab erbage- bage pengajaren ras pemahamaen munculen, bahkan munculna pengajaren maka Yesus e labo Raja penampat sijadiken Dibata (ayat 22 a).
Jadi mbiarkel Yohanes e banci goyah ukur jemaat. Emaka alu tegas ia ngataken maka ia me musuh Kristus (22 b).
Emaka kalak sebage me sinulak Kristus (Anak), bagepe nulak Bapa, emaka adi aloken Anak e (Yesus) maka ialokenna me Bapa (ayat 23). Bapa, Anak eme merupakan kesetiaan si iteki kita, sebab ia me maka kita ndatken keselamatan penebusen dosa.
3. Emaka kita si enggo jadi pengikut Kristus, wajib hukumna harus mersan kayu silang, tapi kayu persilang e labo beban, tapi keriahen situhu-tuhu. Emaka adi segejabken maka kini seranNa keselamatan ta maka tetap kita mpermuliaken Tuhan Yessus si enggo nelamatken kita. Emaka berita si meriah e harus tetap ibuniken ibas pusuh alu mehuli ibas ukurta, sebab eme sumber kegeluhen secara rohani, janah eme rupakan jaminen kita tetap ras Dibata Bapa.
Janji Tuhan eme kegeluhen sila erkeri-kerin, eme kegeluhen sirasa lalap (kini rajan Surga). Janah keselamatan enda sini ipadankenNa man banta, emaka kita tetap nggeluh ibas ia (band Evesus 2 : 20). Adi hal enda sidalanken maka aminna pe ipersan kayu silangNa maka tetap nge siakap meriah, erkiteken keselamatan enggo jadi bahagianta.
Selamat ber PJJ
Pdt Andarias Brahmana
