Suplemen PJJ Tanggal 08-14 Mei 2016, Ogen Johanes 16:12-15;Efesus 1:13-14

 

 

Kata Perlebe
Kenca lima puluh wari kekeken Jesus, entah pe kenca sepuluh wari kenangkihen Jesus ku Surga, isuruh Dibata me Kesah Si Badia ku doni enda man murid-murid ras kalak si tek. Kerehen Kesah Si Badia e sue bagi si enggo ipadanken Jesus nina "Ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda." (Perb Rasul 1:8). Penting kal peran Kesah Si Badia ibas penginjilen si la erbatas seh ku kerina bangsa ras belang-belang doni enda. Penginjilen akan menghadapi erbage-bage tantangen ras perbeben arah erbage-bage budaya, tradisi ras erbage agama ibas doni enda. Tapi murid-murid ras kalak si tek la banci ngadi entah cebuni ibas penginjilen e nari. Jesus pe atena gelah murid-murid ras kalak si tek berhasil mbaba enterem jelma nandai Ia ras ngakuken Ia jadi Tuhan ras Juruselamatna. (bdg Joh 3:16).

 

Pembahasen teks
Teks Johanes 16 enda ipeseh Jesus man murid-muridNa sebage persiapen man murid-murid sebab labo pagi Jesus lalap ras Ia janah enggo ndeher paksana Jesus nadingken ia kerina. Kenca Jesus lanai ras murid-murid pendahin pemberitan Kerajan Dibata arus iterusken murid-murid ras kalak si tek. Ibas pemberitan kata Dibata e tetap nge lit perbeben ras ancamen ibas doni enda nari. Perbeben e labo reh nahangna sebab nembeh ate doni enda nandangi kiniteken ras kesetian murid-murid ras kalak si tek man Jesus. (bdg Joh. 15:18,19). Ngidah kesuliten ras tantangen kiniteken si mberat e bagepe pemeteh ras pengalamen murid-murid si terbatas denga (perlu pendewasan kiniteken) e maka Jesus ngutus Kesah si Badia man murid-murid ras man kalak si tek. Murid-murid ras kalak sitek la banci kiam arah kerina kebiaren ras ancamen ibas doni nari, tapi arus iadapi. Kata Dibata ras kekelengen Dibata arus ipeseh man nembeh ate doni e.

 

Kerna ngadapi perlawanen ibas doni enda nari Jesus nehken padanNa niNa: "Kusuruh pagi penampat si reh i bas Bapa nari ndahi kam. Ia kap Kesah si ncidahken kebenaren Dibata. Adi enggo pagi Ia reh, Ia kap si ersaksi kerna Aku". (Joh.15:26). Kesah Si Badia naksiken kerna Dibata Bapa ras Jesus Kristus, guna ngelawan kuasa doni. Man murid-murid Jesus mere perentah: "Kam pe arus ngerana kerna Aku, sabab tangtangna nari kam ras Aku." (Joh. 15:27). Kesah Si Badia e labo erdahin si sada tapi Kesah e erdahin arah/ras murid-murid, mere penampat; dorongen, gegeh ras kinipangen naksiken kerna pengalamen kinitekenna ras ngajarken pengajaren si enggo ipeseh Jesus man baNa. Murid-murid perlu i kawali gelah ula tertuktuk (tersandung) ibas siding si iblis (doni) nari. Ula lit si kiam nadingken Jesus (nadingken pelayanen ras kiniteken). (bdg. Mat. 26:31).

 

Kesah Si Badia e pagi mpetangkas pemeteh doni enda kerna dosa, kerna ise si benar bagepe kerna ukumen si reh ibas Dibata nari. (bdg Joh. 16:8). Adi la arah penampat Kesah Si Badia manusia pentang, la erpengidah kerna kebenaren ras la erpemeteh kerna kebenaren bagepe la ergegeh guna ndalankenca. Adi la arah penemani ras pengajari Kesah Si Badia manusia papak ibahan doni enda.

 

Masa pelayanen Kesah Si Badia labo babak baru pelayanen ibas Dibata nari, tapi kelanjuten pelayanen kenca Jesus mpetangkas kemulian ras kebenaren Dibata man doni enda. Masa pelayanen Jesus ran Kesah si Badia labo terputus tapi erkelanjuten, ersada, sebab kai si iberitaken ras ilakoken Kesah Si Badia rehna ibas Dibata Bapa nari si isehken Jesus. Ibas pelayanen Jesus ras Kesah Si Badia ipelimbaruiNa geluh manusia, ibereNa gegeh guna ngelawan dosa ras naluken kuasa si iblis. Lebih pe asa si e maka ibas pendahin Kesah si Badia ipetangkasNa pe kerna wari wari si reh, gelah kalak si tek tetap nggeluh ibas pengarapen ras kiniteken kerna kepastin keselamaten.

 

Kesah Si Badia ersaksi kerna kai si ibegina ibas Dibata nari, jadi Kesah Si Badia e ersaksi ibas kiniersadan ras Bapa bagepe Jesus Kristus. Labo lit lainna entah pertentangen atara pengajaren Jesus ras Kesah Si Badia. Pendahin Kesah Si Badia e jadi tanda ras jaminen man kalak si tek maka sialoken me kai si enggo ipadanken Dibata, maka arah pendahin Kesah Si Badia ijagaiNa penebusen si enggo ilakoken Jesus i das kayu persilang.

 

Kehadiren Kesah Si Badia e labo erpaksa-paksa, la ibatasi ruang ras waktu. KehadireNa labo itentuken manusia tapi bekas penuruh kekelengen Dibata Bapa. Kehadiren Kesah Si Badia e bebas kap, emaka manusia labo banci membatasi kehadirenNa. Alu kuasaNa ras tujun Dibata Bapa Kesah Si Badia erdahin man kalak si tek. Kesah Si Badia e pengganti kehadiren Jesus secara jasmani, ras Kesah Si Badia e tading ibas kegeluhen kalak si tek. Nina Rasul Paulus: "La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna." (1 Korintus 6:19).

 

Aplikasi ras Renungen
I bas erkiniteken, pemeteh kerna kata Dibata ras pengalamen kiniteken saja la bias, sabab pemeteh kerna kata Dibata ras pengalamen erkiniteken e la banci ngadi ibas sesekalak si tek saja, tapi arus jadi pemberitan. Erkiteken si e kalak si tek perlu penampat Kesah Si Badia, nampati ibas ersaksi ras ndahiken kesaksina.

 

Kesah Si Badia e penampat. Ise kin kalak si nggeluh ibas doni enda la perlu penampat? Mungkin lit kalak genduari la ia perlu penampat sabab kerinana mehuli, tapi sada paksa pagi ia pasti perlu penampat, e maka si ingetlah tetap pengkawali Kesah Si Badia ibas kegeluhenta. Kesah Si Badia e mediate man banta kalak si tek, lalap Ia setia ngarak-ngarak kegeluhen kalak si tek, labo terjeng adi Ia i lebuh. Kesah si Badia e labo seri ras kesah doni si gelap. Kesah doni si gelap e reh nampati kalak si nembah ia ibas paksa ia erlebuh ras iberena persembahen saja. Kesah Si Badia erdahin nampati kalak si tek labo itentuken pengelebuh kalak si tek saja, tapi Kesah Si Badia setia rasa lalap ibas kerina keadan geluh manusia guna mere penampat sabab guna si e me Ia iutus Bapa man kalak si tek. Labo sieteh katawari musuh e ncilakai kita, tapi Kesah Si Badia tetap erjaga ngkawali kita, ngampangi kita ibas kuasa si jahat e nari, iajariNa kalak si tek berhikmat ngalakenca.

 

Doni enda la nandai Jesus, tapi kalak si tek arah penampat Kesah Si Badia tek man Jesus, tek maka Jesus me dalan kebenaren ras kegeluhen maka ibas Jesus kap ngenca keselamaten. (bdg. Joh. 14:6).

pdt.ewgm.gbkp-sitelusada-bekasi