Suplemen PJJ Tanggal 01-07 Mei 2016, Ogen Lukas 24:50-53

 

 

Kata Perlebe
Labo melukah ngaloken ras ngertiken kerna kematen Yesus i das kayu persilang, bali sulitna ras ngaloken bagepe ngertiken kekeken ras Yesus nangkih ku Surga. Labo lit kalak benar mate i datas kayu persilang, tapi kalak perdosa nge si i hukum mate i datas kayu persilang. Bagepe labo umum kalak si mate keke ibas kematen nari ras ibas jaman padan si mbaru labo lit iberitaken kalak si nangkih ku surga. Gelah lit gunana man kinitekenta, iperluken pemeteh si meganjangna ras kiniteken si mbagesna guna ngertiken ras ngaloken telu peristiwa si mbelin si ialami Yesus e. Janah ibas bahan perpulungen jabu-jabunta minggu enda secara khusus kita ngerana kerna kenangkihen Yesus ku Surga, ngkai maka jadi keriahen ukur man murid-murid ras kalak si tek?

 

Pembahasen teks
Arah peristiwa kenangkihen Yesus ku surga, Dibata ncidahken kemulian si iberekenNa man Yesus kenca penderitan si inanamiNa i datas kayu persilang, kematenNa ras ke kekenNa. Kerna kenangkihen Yesus ku Surga ibas Perb. rasul 1:9-11, Lukas nuriken Yesus iangkat ku Surga i lebe-lebe rasul e nari, jenari embun ngeligeni Ia. Embun e ncidahken kemulian Tuhan si reh ngalo-ngalo Yesus. Bandingken pe bagi peristiwa embun si nusur ku kemah perjumpan ibas jaman Musa, ibas embun e kemulian Dibata reh njumpai Musa (Kel. 33:7-11, 40:34), bagepe embun si reh ku Yesus si ngelinggemi Ia, janah ibas embun e nari ngerana Dibata nina "Enda me AnakKu si Kukelengi,..." (Mark. 9:7).

 

Kenca kekeken Yesus guna mpetetap ukur murid-muridNa gelah tetap erkiniteken man baNa bagepe guna mpetetap ukur mu rid-murid gelah nerusken pelayanen e, Yesus ncidahken diriNa sedekah empat puluh wari. Kenca kerina enggo bias iakap Yesus e maka seh me paksana Ia nadingken murid-muridNa, Ia nangkih ku Surga. Nina William Barclay "Yesus yang duniawi itu pada akhirnya menjadi Kristus Surgawi."

 

Kidekah Yesus secara jasmani lit i tengah-tengah murid-muridNa erbahanca kinipangenna ngalaken perbeben penginjilen ras ketetapen ukurna erkiniteken man Yesus ras Dibata Bapa tuhu-tuhu mehuli. Murid-murid nandai Yesus sebage Yesus si mulia, emaka kesirangen ras Yesus e la ngkurangi kemalemen atena sebab opedenga nangkih ku Surga Yesus nehken pedahna: "Arus itimaindu....nusur kuasa (Kesah si Badia) i datas nari man bandu." (Luk.24:49). Bagepe Yesus ngangkat tanNa masu-masu murid-murid e. Yesus lanai ras murid-muridNa, tapi ukur murid-murid enggo ipetetap Yesus alu Kata Dibata si enggo ipesehNa ras pengalamen erkiniteken si enggo ialamina kidekah ras Yesus.

 

Alu kenangkihen Yesus ku Surga jadi momo man murid-murid ras doni enda kerna Yesus ipermuliaken Dibata Bapa. E me si erbahanca murid-murid nembah ejimpuh man Yesus, meriah pe ukurna janah ilakokenna bagi si ikataken Yesus mulih ia ku Yerusalem, i je janahna nimai kerehen Kesah si Badia bagi si ipadanken Yesus, gedang-gedang wari ipujina Dibata Bapa. Kenangkihen Yesus ku Surga erbahanca meriah ukur murid-murid, peristiwa e tuhu-tuhu erlawanen kal ras sikapna asum Yesus i tangkap, iadili ras mate, pusuhna dem alu kebiaren, cebuni ia sabab la idahna kemulian Yesus tapi iakapna Yesus gagal. Alu pengidah jasmani kesirangen arusna erbahan aru ate, tapi erkite-kiteken murid-murid Yesus ngenehen kesirangen ibas kenangkihen Yesus ku Surga alu "mata kiniteken" (mata rohani) e maka erbahanca kesirangen e jadi keriahen, sabab ibas kenangkihen Yesus ku surga si i idahna e me kepastin kegeluhen kalak si erkiniteken man Tuhan, kenca kematen jadi me kekeken, ras kenca kekeken ibaba Yesus me kalak si tek ku surga rumah Bapa ibas paksaNa.

 

Jelas kal perbedanna perbahanen kalak si dem keriahen ukur ras kalak si dem alu kebiaren. Kalak si dem alu kebiaren si arusna ilakokenna la idahikenna, sinik saja ia, entah cebuni, bagi si ilakoken Adam ras Hawa erkite-kiteken pelanggarenna, mbiar ia, emaka cebuni ia asum Tuhan reh man bana. Kalak si pusuhna dem alu kebiaren labo turah ukurna mperjuangken kemajun. Tapi kalak si pusuhna dem alu keriahen, terlebih lebih keriahen erkite kiteken ngidah kemulian Tuhan, erbahanca ia semangat ndahiken Kata Dibata, pang ngadapi kerina tantangen kiniteken ras nggit ia erkorban ibas pelayanen.

 

Kenangkihen Yesus ku Surga jadi pengarapen si nggeluh si mpetetap ukur murid-murid ras kalak si tek maka Surga ingan Dibata Bapa e tuhu-tuhu lit, janah Yesus lawes ku bas ingan e. Kerna Surga e Yeusu pernah ngerana man murid-murid niNa: "Ibas rumah BapangKu mbas ingan; janah lawes me Aku nikapken ingan man banndu. ...reh denga pagi Aku ngalo-ngalo kam, gelah ija Aku i je kam pe. (bdg. Joh. 14:1-4).

 

Jadi perenungen pe man banta bagi kai si ikataken Rasul Paulus: "Sabab aku enggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bagepe kai si jadi pagin. Subuk kai pe i babo doni tah iteruh doni, la lit kai pe i bas kerina si enggo ijadiken Dibata si ngasup nirangken kita ras keleng ate Dibata, e me keleng ate si cidahkenNa i bas Kristus Jesus Tuhanta." (Roma 8:38-39). Ras Yesus secara jasmani memang terjadi kesirangen tapi ras keleng ate Dibata ibas Yesus Kristus labo lit kesirangen. Keleng ate Yesus e me si erbahanca geluhta terkawali, e maka ermeriah ukurlah tetap ibas Tuhan, sidalankenlah kinitekenta alu tutus ate, seh paksana pagi Yesus reh mulihken ndahi kita gelah sialoken kemulian si rasa lalap.

 

pdt.ewgm.gbkp-sitelusada-bekasi