Suplemen PJJ Tanggal 24-30 April 2016, Ogen Matius 5:38-47

 

 

Lit pendapat si nagatken :
1. Membalas kebaikan dengan kejahatan adalah sifat setan
2. Membalas kejahatan dengan kejahatan adalah sifat hewan
3. Membalas kebaikan dengan kebaikan adalah manusiawi
4. Membalas kejahatan dengan kebaikan adalah sifat ilahi

 

Ibas kalak Yunani kekelengen e ibagi 4, eme :
Storge → kekelngen erkiteken hubungen dareh
Philia → kekelengen erkiteken pertemanen (sependahin,sepermainen, teman kompak)
Eros → Kekelengen erkiteken ketertariken nangdangi sekalak jelma (lawan jenis) aminna pe gundari             ketertariken e enggo ka lebih berkembang (LGBT)
Agape → Kekelengen si turah ibas ukur si mbages nari, la erpalasken objek si man kelengen, ras                       kekelengen si la ngarapken balasen

Kerina kekelengen si datas enda mehuli kerina, misalna :

• Storge adi lit hubungen darehta uga pe lebih keleng ka nge ateta asangken kalak si lalit hubungen darehta. Emaka adi ngerana kerna KKN em salah sada si erbahan mesera janah hampir la banci ibeneken. Masalahna hubungen dareh la cukup mpertahanken hubungen si mehuli ibas jabu, sebab mbue ka nge siidah kalak si ersenina si rubat. Gelah kekelengen erkitek hubungen dareh enda lebih enteguh harus iwarnai alu kekelengen agape, si mpengasup kita ngaloken senina entah turangta uga ia litna.
• Philia, kekelengen erkiteken pertemanen, teman sada dahin teman sada perpulungen si erbahanca kita kompak, ijenda megati kel iwarnai soal “suka atau tidak suka, menguntungken atau tidak menguntungken. Persoalenna ibas geluh enda megati ka nge ras temanta kompak e ka nge kita maka rubat, kuan-kuan kalak karo tinaruh sada sagak nge maka si antuken. Adi ras kalak “keling ah labi banci kita rubat”, emaka kekelengen Philia enda pe harus iwaenai alu kekelengen Agape, si mpengasup kita ngaloken temanta uga ia litna.
• Eros, enda kekelnegn si erbahnca lit perjabun, sebab adi lalit ketertariken nangdangi kalak si deban maka lalit kalak jatuh cinta, adi lalit si jatuh cinta lalit kalak si erjabu. Tapi cinta eros la nagsup mpertahanken keutuhen hubungen dua insan si imabuk cinta. Aminna pe ibas paksa kalak mabuk cinta, dunia milik berdua, kalak si deban ngontrak bas doni enda. Sanga mabuk cinta, megati ka pe ndarat belas-belas “lembing ras kelewang pe kua alakan, lautan badai akan ku hadapi, tidur beralaskan koran dan beratapkan langit tidak akan melunturkan cintaku. Cinta itu buta tapi kasih sabar dan mau mengampuni, ertina cinta eros tanpa i warnai alu cinta agape, terjebak kubas kejenuhen ras kebosanen. Keleng ate erkiteken “ngena ate” memang kai pe pang kita ngelakokenca, tapi persoalenna uga adi “ngena ate e enggo berubah, erkiteken perubahen “fisik ras sikap” si ikelengi kita e, sanga si enpoi “langsing gundari enggo langsung” sanag lamarna kita tuhu-tuhu menawan erkiteke bukna si lebat, tapi gundari enggo mulai “botak/gundul”, cinta agape si erbahan kita ngasup lalap engkelengi ‘ndehara/perbulangenta” aminna pe mbue perubahen ibas geluhna
• Cinta Agape eme eme gambaren keleng ate Tuhan man doni enda, bandingken Yoh. 15 :13, labo lit kekelengen si lebih mbelin asa kekelengen teman si nggit mereken kesahna man temanna. Roma 5:6-8 “mate guna kalak bujur/idolana/siatena ngena/si erjasa man bana/orang tuana/anakna, entah lit nge jelma si nggit. Mate guna kalak jahat/ anak durhaka/ pemberontak labo lit kalak si nggit, tapi em si lakoken Tuhan. Enda me si ikataken alu keleng ate agape, entape ikataken alu “kekelengen si serta”, engkelengi erkiteken kekelengen e seindiri, bersih ibas motivasi pribadi tapi termotivasi guna kiniulin kalak si ikelengi e.

 

Yesus ngajarken kebudayaan si mbaru, alu ngeruntuhken (mendobrak) kebiasaan ibas paksa sie kerna “erbalas” sebab adi kejahaten ibalas alu kejahaten maka si turah eme “pelipatgandaan kejahaten” tapi adi kejahaten ibalas alu kiniulin e sikap men”ziro” kan kejahaten. Rumus matematika, adi kejahaten +kejahaten = bertambah kejahaten, kejahaten + kebaikan = pengurangan kejahaten dan pertambahan kebaikan. Cuba sibayangken adi ibas geluh enda berlaku “gigi ganti gigi, janah mata-ganti mata” banci done enda lani lit kalak eripen, entah ermata. Contoh, seandina rubat kita jenari ndabuh sada ipen imbang entah ipenta, je nari ilegalken (sahken) ndabuhken sada ipen imbangta entah ipenta, jenari si tunju entah tinjuna kita target sada, tapi bicara dua entah telu si ndabuh....maka kita entah ia pe harus ka ndabuhken ipenta sada entah dua nari, di kune ka 4 si ndabuh ....maka dungna sada pe lanai eripen. Emaka ibas pepatah Indonesia man kalak rubat “menang jadi abu, kalah jadi arang” aminna pe si kelekken tapi radu meseng.

Gelah ngasup kita ndalanken kekelnegn si serta, terpaksa lit ibas kita “gegeh si lebih rela berkorban dari yang di tuntut” ertina adi dua kali pe kita ngasup iparapna sementara kita sekali ngenca iparap, ma langa jadi persoalen man banta, adi pindo kalak baju ras jubahta pe langa bo kita merasa rugi apai ka adi baju ngenca pindona, ma la siakap lit si urak bas kita. Bagi syair lagu pindondu sada ku bere dua, adi sada ngenca ngenca si bereken ma la jadi persoalen man banta. Adi maba barang si isuruhna e ngasup kita dua kilo meter, adi sada kilometer ngenca suruhna, ma enggo “kecil” kel siakap. Ertina selaku kalak Kristen harus lit bas kita sada “misteri” si la terprediksi kalak. Melala kita enda bas kalak “remod controlna” kalak si mengendalikenca, adi bage kari kubahan pasti ia merawa atena, adi merawa kita berarti ia berhasil mengendaliken kita. Adi bage merawa nge ia kari atena, la kita bergeming (la diateta) pe , 3-4 kali banvci nge iusur-usurna, tapi adi la pernah ia berhasil bosan nge ia dungna, piah ngadikenna sebab seri akapna ras menjaring angin.

Adi engkelengi kalak si erkeleng ate man banta, ernembeh ate man kalak si ernembeh ate man banta, kai kin obahna (bedana) kita ras perbegu ras rubia-rubia, kalak si la nandai Dibata (perbegu) bage pe rubia-rubia pe bage nge, pemungut cukai si igambarken ibas Kata Dibata si hanya memikirken “keuntungen man dirina saja” si rusur tampil bagi i “lintah darat” epe keleng atena nangdangi si erkeleng ate man bana .

Cuba si bayangken ibas geluh enda adi kejahaten terus ibalas alu kejahaten, uga doni enda adi ras kalak si cocok ngenca kita meriah, adi kenca lit kalak si la bagi ukurta “si musnahken ateta” tentu ia pe bage ka emaka si terjadi eme “perang la erngadi-ngadi” adi perang la erngadi-ngadi katawari nari nge kita erdahin, adi strategi perang nge rusur si dalanken katawari nari kita rukur kerna pembangunen. Kiniseran ras penderitaaan, kebencian ras dendam, kacau ras kehancuren e negca si terjadi. Yesus reh ku doni enda mnegubah kiniseran jadi keriahen, kekacauan jadi kiniraturen, kebencian iubah jadi kekelengen. Guna nehken “misi perdamen” e maka Yesus nehken pengajaren enda, gelah kalak si ngikutken Yesus kita harus tampil beda, memancarkan sifat ras karakter Kristus, ncidahken kekelengn si serta (kasih yang sempurna =Agape).

Yakinlah (teklah) kekelengen e banci “mengubah” kebencian menjadi kasih, lit sada ilustrasi si mungkin enggo rusur si begi. Sekalak permain si rusur rubat ras bibina, ersura-sura permainna ngeracuni bibina, emaka lawes ia ku dukun si enggo bertobat...... akhir cerita permanin ras bibina enggo bagi “teman kompak”.

Kai perlu si lakoken gelah kita ngasup ndalanken kekelnegn si serta e ?, proses pembathinan Firman Tuhan, mari mbaca sada puisi
Kasih itu sabar
Kasih itu murah hati
Kasih tidak cemburu
Kasih tidak memegahkan diri
Kasih tidak sombong
Kasih tidak melakukan yang tidak sopan tidak mencari keuntungan diri sendiri
Kasih tidak pemarah dan tidak menyimpan kesalahan orang lain
Kasih tidak bersukacita karena ketidakadilan, tetapi karena kebenaran
Kasih menutupi segala sesuatu, percaya segala sesuatu, mengharapkan segala sesuatu, sabar menanggung segala sesuatu.
Ganti kata “kasih” alu gelarta.... belasken berulang-ulang...

Pdt.Saul Ginting,

GBKP Rg. Bekasi