Suplemen PJJ tanggal 17-23 April 2016, Ogen Roma 1:16-17

 

Meritaken Berita Si Meriah (Injil) Tenggung Jawab kerina kalak Si Tek

Ayat enda megati ikataken amanat Agung, ertina pesan man kerina kalak Kristen gelah meritaken kerna Yesus si enggo ndatken kuasa i surga ras i doni. Perintah enda iikuti ras sada jaminen penemani (perlindungen, pemeliharaan, ngajari)

Alamat Berita Simeriah
Kisah Para Rasul 1:8 Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda."

Ayat enda ngerana kerna janji Tuhan si mere gegeh alu Kuasa Kesah Si Badia man perberita Sineriah, titik berangkat meritaken berita si meriah, piga-piga hal si banci iertiken :
1. Yerusalem (pusat peribadahen ras pusat pemerintahen) ertina pusat pengaturen strategi kegeluhen ibas bangsa e, adi ibas “pusat kegeluhen e enggo iwarnai alu berita simeriah/injil tentu mabai bana kerina rakyat e terkena pengaruhna. Lit ka si nafsirkenca maka Yerusalem eme “ring 1 lingkaran paling dalam (keluarga), adi ibas keluarga enggo nggeluh berita simeriah (injil) mabai bana mereken pengaruh si mbelin mankegeluhen masayrakat ras doni.

2. Judea menurut kesaksin Alkitab “kuta si kitik, ertina berita simeriah e la banci la menjangkau ingan-ingan si terpencil, banci ka si erttiken man kalak si kitik medanggel ras kalak si terpinggirken. Judea eme ingan tubuh Tuhan Yesus, ertina berita si meriah entah injil e labanci lang harus ka si beritaken man kalak “kuta kemulihenta”

3. Samaria menurut kesaksian Alkitab eme kalak si la tek man Tuhan, ertina man kalak si langa nandai Tuhan harus ipeseh berita si meriah (injil).

Emaka ibas gerejanta er-PI e lit 2 alamatna, eme : - PI kedalam ras PI keluar ( ibas bahan renungenta ayat 16 ( Yahudi ras la kalak Yahudi)

 

 

Arah teluna Kata Dibata siidas ndai siidah maka lalit dalan keselamaten idarat “Berita Simeriah (injil) . Dibata si njadiken kerina manusia, emaka la ateNa sada pe lit si bena (mate), guna si eme IA reh ku doni enda (bdk. Yoh.3:16). Selaku pengikut Kristus la banci lang kita harus ikut bas ndalanken misi Kristus guna nelamatken doni enda.

Doni enda ibarat juma si perlu “iolah” gelah banci mereken hasil si mehuli, bage pe kerina jelma perlu iajari ndalanken si ngena ate Tuhan (si mehuli) gelah banci mehuli ibas ndalanken kegeluhenna, si banci maba kiniulin (berbuah manis dan lebat)

 

Berita si meriah jadi kata persinget gelah manusia ngadi erbahandosa, sebab dosa e maba kubas kematen (Yehezkiel 3:17 "O kam manusia si ermasap-masap Kubahan kam jadi penjaga i bas bangsa Israel. Kam nehkenca man bana kai persinget si Kubereken man bandu” II Timotius 3:16 Kerina si tersurat i bas Pustaka Si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli)

 

Ertina adi ateta kegeluhen enda erulina “ajari kalak ndalanken si ngena ate Tuhan”. Si inget kentisik motivasi awal pemerintahen Belanda ngerehken perberita si meriah man kalak Karo, eme guna “menjinakken musuh berngi” si rusur nutungi bangsal kalak Belanda, aminna pe situhuna antara “pemberita Injil e labo seri tujunna (visina) ras pemerintahen Belanda. Motivasi pemerintahen Belanda tentu guna “menguasai Indonesai” tapi tujun misionaris eme guna nelamatken ras membangun kegeluhen kalak Karo. Meritaken Berita Si meriah e mabai kalak erkemalangen man Tuhan, e salah sada cara “menghadirken surga i doni sebagai persiapenta bengket kubas surga si tuhu-tuhu.

 

Enda me pengakun Paulus ibas nats renungenta, labo lit dahin si lebih mulia asa dahin si “nelamatken” , perberita Simeriah e seri ras kerehen Tim SAR ibas sada bencana. Adi lit kalak si enggo ndabuh kubas lubang si oksigenna pe kurang, enggo ka 2 wari bas la minem ras la man, tentu meriah kel ukurna ngidah kalak si reh nelamatken dirina. Bageme penggejapen Paulus maka megah kel akapna jadi perberita Simeriah. Aminna pe melala ka jelma la sadar, adi ia ndauh ras Tuhan, nggeluh ibas dosa, situhuna “maut enggo mengancam” (kerohaninna enggo sekarat), lit penolaken man Paulus. Bagi ikisahken lit sada kuta si terpencil, kidekah enda ertambar man dukun, je itempatken me ku je sekalak dokter, labo teraloken kalak kerehen dokter ndai, itolak bahken ibahan usaha-usaha guna mpelawesa, tapi adi enggo isadarina dokter e banci nambari pinakitna, tentu megah kel akapna man dokter e. Bage ka me pe Perberita si meriah e megati itulak ras “sinanggel” akap kalak, tapi adi enggo te tehna maka lebih ka kel atena kelengna, si erbahan turah sada keriahen (kemegahen) man perberita Simeriah e.

 

Berita Simeriah (Injil) eme cara Dibata ngerembakken diriNa ras manusia. Tentu berita si meriah e harus ialoken alu kiniteken (bagi sekalak dokter ku kuta terpencil ndai harus tek ia man dokter e maka banci teralokenna, jenari nggit ia ertambar man dokter e, adi labo ia tek, la ia nggit ertambar man dokter e, maka labo lit gunana man bana kehadiren dokter e. Bage ka me pe Berita Simeriah e harus “ialoken alu kiniteken. Kalak si ngaloken Berita Simeriah erpalasken kiniteken terkelin me ia.

 

Pdt. Saul Ginting

Rg. Bekasi