Suplemen PJJ tanggal 3-9 April 2016, Ogen Markus 16:16

TEK DINGEN IPERIDIKEN
(Markus 16:16)

 

Peridin eme Sakramen si tetapken ibas gerejanta, sakramen ertina “Firman Yang Kelihatan” si langsung iperintahken Yesus guna ilakoken.

Matius 28: 19-20 Laweslah ku kerina bangsa manusia, bahanlah ia jadi ajar-ajarKu: Peridiken ia ibas gelar Bapa, gelar Anak, ras gelar Kesah Si Badia, janah ajari ia ngikutken kerina si enggo Kupedahken man bandu. Janah ingetlah! Aku tetap kap ras kam seh ku kedungen jaman.

 

Markus 16:15-16 jenari nina Jesus man ajar-ajarNa, "Laweslah, siari doni enda jenari beritaken Berita Si Meriah man kerina manusia. Ise si tek dingen iperidiken terkelin kap pagi. Tapi ise si la tek ia pagi iukum.

Adi si gargari secara mbages duana ayat enda , lit ije perbedaan  :  Adi ibas Matius 28:19-20, ijenda tempa lit uruten, peridiken lebe, jenari ajari .   Markus 16:16, pemberitaan i ipeseh man kalak si enggo mbelin (dewasa), adi ia tek emaka ia iperidiken.

Adi ibas tradisi GBKP duana ayat enda sipake, adi man anak-anak si pridiken lebe, jenari ajari ia nandai Yesus Kristus, orang tua/orang tua  sranina  si maba ia iperidiken ertanggung jawab guna ngajari anak e nandai Tuhan, janah adi seh paksana ia enggo mbelin mabasa ku pengajaren agama, adi turah ibas ia kiniteken emaka i ngawanken (jadi kristen dewasa). Adi kalak si enggo mbelin (dewasa)  ia iajari lebe,  maka ngenca turah kinitekenna nggit ia ngakuken Yesus jadi juru selamatna  e maka iperidiken.

Menurut kamus peridin  eme  Upacara agama si make lau.  Istilah enda ibas bahasa Yunani nari  si ertina “nggedapken entah icuci alu lau. Ibas kalak Yahudi ibas abad pemena . Peridin eme upacara tanda masukna  sekalak jelma ku sada kelompok (persadan tertentu), bandingken ras Proselit  (sunat) tanda kalak bengket kubas agama kalak Yahudi. Yohanes peridiken erbahan  peridin sebagai tanda pertobaten ras pengalemi dosa.

Adi ibas Perbahanen Rasul-rasul 2:38,  Ibas gereja mula-mula peridin ipahami  sebagai pengalemi dosa ras ngaloken Kesah Sibadia.  Paulus nerangken maka peridin eme tanda kalak ersada ras Kristus  ibas kegeluhen, kematen ras kinikeken  (Roma 6:3-8),  sekaligus jadi anggota umat (kerajan Tuhan).

Arah pengertin maka Peridin eme tanda kalak bengket kubas persadan  alu bage maka “semakin cepat semakin baik” , terlepas iangkana entah la iangkana, sebab kiniteken anakna e “terhisap”  ras kiniteken nandena ilustrasina  “bali ras anak diberu si langa iangkana kai pe, tapi ban teh orang tuana e perlu ibereken/ipakekekn man anak e, emaka orang tuana makekenca man ank e, misalna : anting-anting, baju ,bedak  minak telon.  Engkai  maka ipakeken man bana aminna pe langa iangkana ? erkiteken orang tuana  si meteh kerina e erguna ras mehuli ibereken man anak e, gelah eteh kalak anak e  diberu, gelah  la masuk angin rsd.

Ibas peridin e  “cara ras  media” labo memegang pranan si penting, sebab kesaksian Alkitab  labo njelasken maka kalak iperidiken  harus “i gedapken, harus pakai lau, sebab peridin e labo mbersihken “kula” si banci banci ibersihken alu ridi, jenari adi enggo melket  iperidi ka mulihken. Peridin e berhubungen ras “roh/tendi” maka Kesah Ras Dareh Tuhan ngenca ngasup mbersihkenca. Si penting ibas peridin eme e substansina   iperidiken ku bas  Gelar Dibata Bapa, ku bas AnakNa e, ras ku Bas Kesah Si Badia, ertina  peridin e  tanda a kita enggo bengket kubas rarasen/persadan  ras Dibata . Benket kubas persadan ras Kristus banci la arah upacara si make “media lau, tapi arah Kata si ndarat arah Kata Tuhan Yesus ( bdk.  Lukas  23:43 Ngaloi Jesus man bana, "Kukataken man bandu maka sendah me kam ras Aku i Pardis.")

 

Kisah Para Rasul  2:41 Nterem kalak si megi kata Petrus e tek dingen mindo gelah iperidiken. I bas wari e lit kira-kira telu ribu kalak tambah ku bas perpulungen e.
Banci si bayangken adi lit 3000 kalak si man gedapenken, tentu la terbayangken uga dekahna peristiwa e, emaka labi jadi persoalen man banta soal cara  mpridiken ras media si ipake, si penting kita enggo ersada ras Kristus.

 Kulit labo banci ngelebihi isina, aminna pe isi si mehuli adi ikemas alu kulit si meherga tentu “nilai” jualna pe lebih tinggi ras lebih menarik.  Tapi adi kulitna ngenca mejile tapi isina la mejile tentu si e erbahan kalak “tertipu”.  Bage ka me pe kerna kegeluhen kinitekenta  Peridin e sada tanda si mejile, tapi harus i isi alu “isi” si mejile,  amina pe kita enggo iperidiken tapi adi perbahanenta la lebih asa “kiniulin ras kebujuren” jelma si enterem  maka labo  sialoken keselamaten.

Jadi  si terpenting eme  kiniteken, janah tanda/bukti  ia tek  eme  iperidiken, kalak si bagenda me iselamatken. Sebab mbue kang kalak  ngaku ia tek tapi la nggit iperidiken, e seri nge ras kalak si meteh man e erbahan  besur tapi adi ia la nggit man maka ia tetap melehe.  Teh kalak pe man e maka besur tapi adi la ia nggit man ma dungna ia “lumben” sakit  dungna mate. Bage pe kalak si ngaku ia tek man Tuhan tapi la ia nggit iperidiken e seri ras kalak si nulak “anugerah” Tuhan, kalak si bage iukum Tuhan.  Sebalikna kalak si iperidiken tapi adi labo ia tek, kalak si bage pe  labo terkelin tapi ndatken hukumen.

Lit istilah peridin meherga ras peridin murahen, dalam erti labo kualitas peridin e si menetuken meherga ras murah, tapi terletak ibas si ngalokenca, adi peridiken pe ia labo lit usahana njaga  statusna selaku kalak si enggo iperidiken, lalit pertobaten ibas ia   (bdk.  Mutiara man babi) maka labo banci maba keterkelinen man bana, peridin si meherga eme peridin si harus igalari alu usaha-usaha pertobaten, penyangkalen diri ras usaha nggeluh badia, tutus  ibas ngikuti kegiaten gereja.

Labo kerina si bengket ku bas perguruan tinggi ndarat maba ijazah kelulusen, tapi guna ndatken izasah ibas perguruan tinggi nari la banci lang ia harus masuk kubas perguruan tinggi. Janah kalak si banci ndatekn ijazah kelulusen harus tutus ibas erlajar janah ngikuti kerina aturen si berlaku.  Bagi kalak si bengket kubas perguruan tinggi maka labo perlu ia “rusur ndaftar”, bage me pe kalak si enggo jadi kalak Kristen labo perlu “rusur iperidiken”, alu pemahamen si bagenda maka gerejanta lanai bo mperidiken kalak si reh ku gerejanta adi ia enggo ngaku enggo peridiken, saja perlu iajari maka itehna aturen   ibas gerejanta.

Jadikenlah peridin si enggo sialoken kita e jadi peridin si meherga, alu encidahken buah kiniteken eme ndalanken telu pendahin gereja : Ngikuti persadan (Koinonia), Ersaksi (Marturia)i ras  ngelai (Diakonia).

 

Pdt. Saul Ginting

Rg. Bekasi