Suplemen PJJ tanggal 22-28 November 2015, Ogen II Petrus 3:10-14

1. Dalam rangka perayan ras ibadah Natalta tahun enda, eme i tahun 2015, kita enggo me mempersiapkan kerina, diantarana Panitia, dana, bagepe pengkhotbah Natal, janah la ketadingen kuga dekorasi ras konsumsi Natal. Bagepe Gereja-Gereja enggo me ngelakoken latihen-latihen koor tah pe drama natal. Hal enda ilakoken mulai danak-danak seh ku lansia. Seh kel riahna adi enggo kenca seh bulan Desember. Gereja tiap wari ipake guna persiapen e, bagepe rapat-rapat panitia terus ilakoken. La ketadingen seragam si pake tiap sektor bagepe kategorial khusuna kategori Moria ras KAKR.
Meriah kel adi ernatal ningen, memang payokel, sebab permakan pe nai i mbal-mbal Efrata meriah kal akapna. Lit koor malaikat, lit kata-kata ula mbiar aku reh  maba berita si meriah, si mereken keriahen si mbelin man kerina manusia (Luk.2:10).
Emaka suasana Natal eme ngalo-ngalo Ia si erbahanca lanai kita mbiar, lanai ateta aru, sebab Ia si reh e maba berita si meriah e.

2. Kristus Yesus sebagai Juruselamat e, enggo reh ku doni enda dua ribuan tahun si lewat. Ia reh sue ras kai si ipadanken Dibata arah Nabi-Nabina :
Nabi Mika 5:2 “ O Betlehem i Efrata, aminna I Juda kam kuta si kitikna, tapi ibas kam nari ku pe keke sekalak si ngajari Israel, si asalna ibas si adi-adi nari”
Yesaya 9:6 “Sekalak anak enggo tubuh man banta, anak dilaki ibereken banta ia me pagi jadi pemimpin. Igelari :
“Penampat si meganjangna”
“Dibata si mada kuasa”
“Bapa rasa lalap; Raja Dame”
Ras melala denga bas Alkitab nuriken ise kin siman alo-alon e. Kepeken si man alo-alon e sungguh luar biasa kal, janah kehadiranNa pe cukup menggembirakan umat manusia, bagi janji Dibata :”perban keleng kal ate Dibata doni enda, emaka iberekenNa anakNa si tonggal, gelah ula bene si tek man baNa tapi ndatken kegeluhen si rasa lalap” Yoh.3:16.

3. Gundari kita mpersiapken dirinta guna ngalo-ngalo kerehenNa si peduakaliken, eme ibas ia pagi jadi Raja si erkuasa ras guna ngalo-ngalo kita, gelah bagi padanNa “gelah ija aku ije pe kam”.
Emaka kerehenNa pagi bagi pinangko, janah Ia pagi reh guna ngelesapken langit, barang-barang si ilangit meseng dingen ikernepken. Doni ras isina lesep. Mengeriken kal kerehen pagi, emaka guna si e maka iarapkenNa kita gelah :
Nggeluh bagi si ngena ate Tuhan, erpengendes man Dibata. Sebab  si man timanta e eme langit si mbar ras doni simbaru, ije me ingan keadilen (Ay.13). Emaka ibas kita nimai e harus si pala-palai gelah bersih la erpandangen i lebe-lebe Dibata, janah nggeluh dame ras Ia (Ay.14).
Emaka dalam rangka Natalta tahun enda perlu si inget maka ula kal kita menghamburken dana ibas acara-acara sinidalanken, tapi kita harus menghemat. Sebab labo soal makanan, pakaian ras dekorasi man unjukken Natalta ialoken Dibata, tapi erkiteken kuga kita nggejapken ras ndalanken kai si niikataken Dibata arah kebaktian Natalta e.

Janah ernatallah kita alu mehuli dingen jadilah pembawa berita sukacita man jelma si enterem kenca kita mulih ernatal. Arah kita maka Natal e jadi pembaharuan man umat Kristen ijape kita ngerayaken Natalta.

Selamat ngalo-ngalo Natalta.