Suplemen PJJ tanggal 25-31 Oktober 2015, Ogen Esra 8:21-23;Matius 9:14-17

Ogen        : Esra 8:21-23 ; Matius 9:14-17
Tema        : Erti Puasa

 

 

Puasa sada istilah simbaru kali bas Gerejanta GBKP. Aminna gia puasa enda enggo me melala si ngelakokenca itengah-tengah Gerejanta GBKP, tapi lenga bo sada kewajiben. Sebab megati erpuasa e pemahaman kalak la man, la minem saja. Tapi adi si gar-gari kal simbages-mbagesna maka puasa enda cukup mendasarkel, sebab Yesus pe erpuasa Ia 40 waru 40 berngi (Mat. 4:1). Emaka erpuasa enda tetap denga jadi percakapan ikalangen Gerejanta GBKP. Janah seh asa gundari maka lenga bo dat kal sada kesepakatan kuga kin ras kai kin si harus ilakoken adi kita erpuasa. Tapi amin bage gia mari sitelusuri kai kin maknana erpuasa e.

 

Esra mabai bangsa Israel gelah erpuasa. Erpuasa enda sekaligus peteruk diri i lebe-lebe Dibata. Tujunna eme gelah ibabai Dibata bangsaNa arah dalan simehuli. Arah enda pe banci si idah maka umat Israel erpuasa ia la ngenca nahan lapar ras haus tapi pe merendahken diri i lebe-lebe Dibata. Ertina sembari kalak enda la man la minem sekaligus jagana dirina gelah tetap mehuli i lebe-lebe Dibata, baik penyembahen, bagepe sikap hidup (pengerana ,perbahanen ras perukuren). Ula kari siakap erpuasa e la man la minem saja, tapi sijaga gelah hubungen ras Dibata bagepe hubungen ras manusia.

 

Emaka arah kai sinilakoken umat Israel, kepeken Dibata ngidah perbahanenna maka Dibata masu-masu perdalanen, kerina musuh-musuh kernina nilah. Emaka arah kai sinibahanna (puasa ras njaga hubungen rasa Dibata), maka Dibata masu-masu umatNa. Sungguh luar biasa ibas pengakun umat/Esra arah Ia ertoto, erpuasa, Dibata ngkawalisa dingen pertoton pe ibegiken Dibata.

 

Emaka adi erpuasa ula pekulah-kulah, peberjut-berjut ayo, hal enda la ngena ate Tuhan. Adi erpuasa kita maka harus njaga dirinta gelah ula sempat terpengaruh hal-hal si la mehuli i lebe-lebe manusia. Janah kalak erpuasa harus segar, tegar jasmaninta. Labo perlu teridah man kalak, sebab adi puasa enda ija kita membuka hubungen ras Dibata si semakin baik, bagepe ras manusia semakin mehuli. Janah labo perlu kita ndatken penghormaten ibas kalak sideban, sebab Dibata nge si ngergai kerina perbahanendu, termasuk ibas kam ertoto ras erpuasa. Siang ban ayonta, ndahiken dahinta, janah labo sikurang tanggung jawabta. Emaka banci si idah maka kegeluhen bangsa Israel pe erpuasa ia guna membuka hubungen reh ulina  ras Dibata bagepe manusia, bagepe Tuhan Yesus ngajak maka kita pe erpuasa tapi ula memaksa diri, tapi alu ukur meriah ras tetap ceria aminna gia menahan haus ras lapar. Tuhan  Yesus mpegegehi kita ibas kita ndalanken kai siniperintahken Yesus.

Salam,
Pdt. A. Brahmana

081317054961