Suplemen Pjj Tanggal 3-9 Mei 2015, Ogen Heber 11:13-16
Ogen : Heber 11:13-16
Tema : “Doni Kalak Mate”
Tujun :
1. Gelah ngawan perpulungen ngangkai doni kalak mate
2. Gelah ngawan perpulungen lanai mbiar ngalaken kematen
Adi si oge Heber 9:27 jelas maka la lit manusia si banci nilahken kematen. Ibas paksana manusia pasti mate kenca si e iadili. Tapi engkai maka ngerana kerna kematen seolah sada hal si man silahenken? Adi mbiar iadili erkiteken iakap kita pasti ikelompokken kalak si ersalah jenari masuk neraka, wajar adi mbiar encakapken kematen. Saja ngenca payo nge bage? La lah erkiteken lenga jelas man banta kerna keadan kalak si enggo mate?
Situhuna ibas Pustaka Sibadia mbue ngerana kerna kematen. Salah sada eme ogen Pjjta sendah. Ikataken Abil, Enoh, Nuah, Abraham, Sarah eme kalak sierkiniteken tapi kerina ia mate kang, saja ngenca mbedakenca ras mbue manusia eme ikataken ibas ayat 13 kalak enda mate ibas kiniteken. Kai kin ertina mate ibas kiniteken? Erpalasken erti kiniteken ibas Heber 11:1 maka banci ikataken amin gia kalak enda lenga bo ngidah kegenapen kerehen Yesus Kristus si padanken[1], tapi pengharapen kalak enda nandangi kegeluhen sirasa lalap ras Dibata I negeri siterulin eme negeri I sorga erbahanca kalak enda ibedaken ras kalak si mate si la erkiniteken. Kata “dauh-dauh nari enggo idahna si e” nuduhken uga pengarapen kalak enda nandangi kegenapen padan Dibata e janah enda ipahami sada kebenaren emaka penulis Heber ngataken maka man kalak enda enggo isikapken Dibata sada kuta (surga).
Ibas ogenta enda pe isingetken penulis Heber membedaken kalak enda ras kalak si la erkiniteken eme
terang-terangen iakuina maka ia kalak perlajang di ngen kesilang I doni enda. Pemahamen enda penting, sabab alu litna pemahamen enda me erbahansa tetap pokus ku kuta kemulihen si tuhu-tuhu eme surga. Tanda pokus eme: (1) idaramina negeri si jadi negerina jine; (2) la nai atena tedeh nandangi negerina si marenda si enggo itadingkenna; (3) tedehen atena negeri si terulin eme surga.
Uga kita, apakah kita pe seri pemahamenta ras tokoh-tokoh kiniteken enda maka kita enda pe kalak kesilang I doni enda? Kesilang ertina kalak petandang, kalak si labo ije inganna tading. Ia reh ku sada kuta berarti ia kesilang ku kuta e, emaka ibas paksana mulihken ka ia ku kutana. Adi seri pemahamenta arusna la nai kita mbiar nandangi kematen, bagi nila Paulus ibas Filipi 1:21 “Sabap kai kin ertina nggeluh! Man bangku, nggeluh e me Kristus, janah mate reh untungna”.
Jenari ngerana kerna tema “Doni Kalak Mate” lit dua eme kuta si enggo isikapken Dibata eme surga ras neraka. Ibas keterangen Pustaka Sibadia mbue imformasi kerna dua kuta enda, saja ngenca si megati turah penungkunen eme ope she masa penghakimen si menentuken ku surga ntah ku neraka kujange manusia e adi ia enggo mate, mis kin ku surga ntah ku neraka. Kerna penungkunen enda lit dua pendapat si mbuena eme: sipemena, bage jelma mate mis ku surga (bd. Lukas 23:43, Lukas 16:19-31, Filipi 23:43, rsd). Sipeduaken, kenca jelma mate bengket ia ku doni kematen. Istilah doni kematen enda ibas Kitab Padan Siendekah igelari Sheol ras ibas Padan Simbaru igelari Hades. Ibas ingan enda me kalak si enggo mate itamaken. Emaka ibas paksa wari pengadilen eme kerehen Anak Manusia sipedua kaliken (Bd. 2 Tesalonika 4:16), ipekeke me kalak si enggo mate guna iadili. Ibas Yohanes 5:24-29 ikataken ibas paksana ibegi simate eme sora Anak Dibata, janah simegisa e nggeluh me. Saja ngenca nggeluh epe si nggeluh-geluhen sabab ibas ayat 29 ikataken “kalak sierbahan simehuli ipekeke guna nggeluh, tapi sijahat perbahanenna ipekeke guna iukum”. Jadi lit waktu antara kalak si enggo mate ras pengadilen simbelin simenentuken kerina jelma singgo mate bengket ku surga ntah neraka. Kerna dua pendapat enda, akap kami la padah iperdebatken sabab sipasti langsung ntah la langsung bengket ku surga ntah neraka sipenting prinsipna adi kalak simate ibas kiniteken la banci lang man bana enggo isikapken ingan irumah Bapa I surga. Ndigan e, la nai jadi penting sabab bagi ikataken waktu ibas Dibata bali nge seribu tahun ras sada wari bagepe sebalikna (Mazmur 90:4, 2 Petrus 3:8).
Alu bage dage sipenting alu ngangkai maka amin gia kita la banci lang mate la nai kita mbiar kerna si e, ntah erceda ate erkiteken kade-kadeta ntah sinikelengi kita leben mate sabab bagi si isingetken ibas 2 Tesalonika 4:13-18, arusna lanai kita mbiar ntah erceda ate bagi kalak si la erpengarapen adi sinikelengi kita leben mate sabab sieteh kuja kin perlawesna kalak si enggo mate. Emaka arusna kita erceda ate adi kin kita ntah kalak sinikelengi kita lenga erkiniteken man Tuhan Yesus sebab siteh ka kuja perlawesna kenca enggo mate eme ingan kiniseran sirasa lalap eme si igelari neraka ntah gehenna.
Pdt. S. Brahmana
Diskusi (Bagi si enggo iban ibas Bimbingen PJJ GBKP)
- Ibas ayat 16 nina “Tapi tedehen atena negeri si terulin, e me negeri si i Surga. E me sabapna maka la mela Dibata jadi Dibata kalak ndai, sabap enggo isikapkenNa sada kuta man kalak enda kerina”. Kai nge ertina ayat enda kubas pengarapen kalak sitek? Turikenlah!
- Turiken pandangenta kerna kematen, apai belinen kebiarenta ntah keriahenta ras kai sababna?
