Suplemen PJJ Tgl. 15-21 Maret 2015, Ogen Epesus 4:11-13

1. Gelah ngawan ni perpulungen meteh maka ia ikut ertanggungjawab nandangi kiniulin dahin pelayanen gereja
2. Gelah ngawan ni perpulungen makeken talenta/potensi guna ndahiken dahin Dibata

Payo, erbage-bage kecibal perpulungen. Lit deba meganjang sekolahna, lit ka lang, lit bayak, musil, bestang, gendek, mbiring, mbentar, rsd. Tapi kerina e enggo irakut ibas persadan kalak sitek man Yesus Kristus emaka kinierbagen e jadi kebayaken guna saling melengkapi, labo sebalikna. Payo kinierbagen e mbelin potensina banci erbahan la ersada ukur adi masing-masing peganjangken bana, egos, rsd. Tapi e banci ihindarken bahken sebalikna jadi potensi si luar biasa adi kinierbagen e saling menopang, saling membangun ibas ndahiken pendilo jadi saksi Tuhan itengah-tengah doni enda.

Uga carana segelah ersada arih ras potensi si lit ibas perpulungen si pelin-lain e banci secara optimal ipakeken ibas ndahiken dahin Tuhan?

Mari kita erlajar arah Ogenta Efesus 4:11-13.
Guna ngangkai bagin enda ijelasken kami mulai ayat 1-13. Pasal 4 enda  ibenaken “Emaka aku, si ibas penjara erkiteken kudahi dahin Tuhan…” (ayat 1a). Kata “emaka aku” nuduhken pedah enda iban erpalasken pengajaren si enggo isehken Paulus ope bagin ogenta enda. Janah mamang surat enda itulis Paulus sekitar tahun 62 Masehi paksa ia ipenjara I Roma. Tapi labo soal ipenjara e si penting, tapi engkai maka ia ipenjara. Enda me nuate itekanken Paulus ijenda, ia ipenjara erkiteken setia ndahiken pendilo Tuhan. Ibas ndahiken pendilo Tuhan e, Paulus la kutera amin gia ia ipenjara. Adi bage tentuna perpulungen Efesus si enggo tek man Kristus berarti pe enggo ngaloken pendilo Kristus guna ndahiken dahin Tuhan emaka ngawan perpulungen arusna nggeluh sue ras pendilo e (ayat 1b) segelah kerina ngawan perpulungen seh kutingkat kedewasan Kristus (ayat 13). Tambah si e nginget litna bayaha simengancam persadan kalak sitek (gereja) eme perselisihen antara kalak si enggo tek (ayat 2-3), masalah pembagin tugas (7-11), pengajaren sesat (14-15), Paulus nehken pemindon ntah pe nasehat segelah:

(1) Nggeluh meteruk ukur, lemah lembut, saber, la pergelut ras sisampat-sampaten/Tunjukkanlah kasihmu dalam saling membantu (ayat 2, bd. Kolose 3:12-13). Jenari ngusahaken alu serius (tuhu-tuhu) njagai (memelihara) persadan e (Kesatuan Roh). Ibandingken terjemahen bahasa Indonesia, terjemahen bahasa Karo lebih jelas maka persadan e (Kesatuan Roh) labo bekas ijadiken manusia tapi ibereken kesah. Alu kata sideban persadan e enggo isediaken man kerina kalak si enggo ngaloken Yesus Kristus bagi isingetken Paulus ibas pasal-pasal si arah lebe. Perpulungen Efesus arus “memelihara” persadan e labo arah usaha ntah pe pengaturen manusia tapi alu nggeluh sue ras kecibal si enggo iaturken Dibata rikutken pendilo ngikutken Kristus (berpadanan dengan panggilan).

(2) Ngangkai maka Kristus nge simereken kengasupen khusus ntah pe pemere sipelain-lain man ngawan perpulungen (ayat 7-11). Pemere e ibereken kenca Yesus nangkih kusurga erpalasken lias atena (ayat 7-10), ertina labo erkiteken pemindonta ntah pe perban metunggung kita ngalokenca, tapi inisiatif Kristus nge mereken pemere-pemere e. Ibas ayat 11 isingetken kerna pemere e eme deba jadi rasul, nabi, perberita simehuli, simpermakani ras guru-guru. Pemahamen enda penting segelah sipemena, potensi si lit e (kai pe, mbelin tah kitik) Kristus kap simerekenca; sipeduaken, pemere e guna majekken kula ni Kristus gelah ersada kinitekenta, penandaita kerna Anak Dibata (Yesus Kristus) seh ku tingkat kedewasan Kristus si serta e (Ayat 12-13). Alu pemahamen si bage, pemere si pelain-lain e labo guna perpecahen ntah pe erbahansa turah persaingen si la sehat, tapi sebalikna saling melengkapi, saling menopang ibas nehi tujun Kristus mereken pemere si pelain-lain e.

Themata “Ersada arih ndahiken dahin Dibata”. Biasana erbahan ersada arih banci nukah ras banci ka seh serana. Sipasti adi seri pemahamenta jenari seri ka tujunta nukah erbahan sada arih. Siban contohna paksa jaman penjajahen. Ersada arih paksa e guna merdeka. Emaka kerina rakyat Indonesia bahu membahu mengunaken senjata kai pe si banci igunaken erjuang melawan penjajah. Paksa e la ipersoalken engkai siah make sentata buluh (bambu runcing) ras engkai maka sienda make senjata rakiten ntah senjata mesin asil rampasen, bagepe la mpersoalken suku ras agama, rsd, ras ulihna tanggal 17 Agustus 1945, Indonesia memproklamasiken kemerdekanna. Jadi kuncina lit pemahamen ras perayaken ntah pe tujun si seri eme guna merdeka. Arah analogi enda mbabai kita pe segelah selaku ngawan perpulungen kai gia potensita ntah pe posisinta ibas gereja, kita tetap ersada arih ibas ndahiken dahin Dibata sabab kerina kita idilo guna ertanggungjawab nandangi kiniulin dahin pelayanen gereja. Alu bage kai pe fungsita ibas perpulungen (Pendeta ntah pertua Diaken, pengurus Pjj, pengurus kategorial ntah ngawan perpulungen), pendilonta eme ndahiken dahin Dibata alu tutus segelah tujun tersehi bagi isingetken ibas ayat 12 ras 13.

Bagem ibas bulan Maret enda ilakoken me Musyawarah Anggota Sidi Jemaat. Rikutken Tata Gereja Bab V Pasal 31 ije isingetken maka Musyawarah Sidi Jemaat eme merupaken keiukutsertan ngawan ni perpulungen guna menggumuli pelayanen simengacu ku bas Tritugas Panggilen Gereja (Koinonia, Marturia ras Diakonia). Amin gia Musyawarah Sidi Jemaat labo muat keputusen tapi kegiaten enda she kal pentingna ija kerina anggota perpulungen banci ikut muat bagin menggumuli, mengevaluasi ras mereken usul ntah saran gelah pelayanen gereja reh sikapna, la saja man anggota perpulungen tapi pe man masyarakat iluar gereja. Bagem pentingna Musyawarah Sidi enda emaka adi kin kegiaten e ilakoken alu sistem perwakilen persiapkenlah wakil-wakil e gelah tuhu-tuhu mereken kontribusi si membangun ibas Musyawarah sidi e, jenari man BP Runggun pe, tetaplah berpikir positif adi kune peserta Musyawarah e lit si megang sorana, mengkritik, rsd. Sipahamilah maka kerina peserta musyawarah e ersura-sura pehuliken labo sebalikna. Saja ngenca usahakenlah bahasa ras sikapta, bahasa ras sikap gerejalah siban ibas ngelakoken Musyawarah Sidi e labo pasaren. Tambah si e, ulih Musyawarah Sidi e mislah ibaba ku Sidang Runggun, mehuli adi keputusen si ibahan erpalasken ulih musyawarah e isehken man sektor-sektor segelah ipebelangkenna ka man kerina anggota perpulungen, alu bage ngawan perpulungen lit akapna ertina erbahan musyawarah sidi e.

Pdt. S. Brahmana

Diskusi (Bagi si enggo iban ibas Bimbingen PJJ GBKP)

1. Ibas ogenta (oge ayat 11), guna kai nge maksudna maka ibereken pemere-pemere e ibas ndalanken tugas-tugas gereja? Turiken!
2. Musyawarah Anggota Sidi Jemaat eme ingan arih-arih muat simehuli guna pelayanen gereja. Uga siakap perdalinen Musyawarah Anggota Sidi Jemaat ibas Runggunta? Enggo nge ndia sue ras siiarapken? Suratken kain kin masalah-masalah entah pe kendala-kendala ras turiken kuga dalan pekenasa.